Tsim Meej thiab Paj Yeeb -6
Tus Sau: Hmoob Khej3 Email: Birdybrid@yahoo.com Ho tig rov mus hais txog ntawm Paj Yeeb uas yog Tsim Meej tus hlub. Thaum tsis pom Tsim Meej rov qb los nws tos tos Tsim Meej nws niaj hnub mus saib cov tuag uas nyoob hoom thauj tom tshav rog los nws mus saib tug twg los tsis yog Tsim Meej nws mus nug cov uas khiav dim rov qab los txog tug twg los lawv kuj tsis pom thiab tsis paub tias xyov Tsim Meej mus dua qhov twg. Nws thiaj li mus nug kiag Tsim Meej tus Nais Koos Phas thaum no Nais Koos Phas thiaj li mam hais tias tej zaum ntshe raug Nyab Laj ntes tau lawm. Paj Yeej thaum nws hnov li ntawv lawm ua rau nws niaj hnub quaj tsis kaj siab mus ua dab tsi. Nwsw nco txog 2 xyoos dhau los lub sij hawm thaum nws thiab Tsim Meej nkawv tseem nyob rau pem Zos Hav Zeb Dub Tsim Meej twb tau cog lus rau nws hais tias Tsim Muaj mus ua tub rog 2 xyoos xwb nws yuav rov qab los yuav Paj Yeeb thiab nkawv yuav ua txij ua nkawm muaj tub muaj ki ua lub neej khwv noj khwv haus nruab teb yuav mus ua daim qub teb uas nkawv niaj xyoo mus ua. Twb yog vim lub teb lub chaw tsis tiaj tus ua tsov ua rog loj yog Tsim Meej ho tsis mus ua ib tug tub rog los tiv thaiv Hmoob los ntshe yuav tsis tau vim tias cov Paj Thej Laus thiab cov Nyab Laj Liab lawv yuav tsis tso tseg lawv txoj ke tuaj mus tua sawv daws yog tias thaum twg cov dev tw liab ntawm no tuaj txog thaj chaw twg lawm ces nws luaj zus tua pov tseg tsis hais tub rog, pej xeem, thiab tej poj niaj menyuam yaus tej neeg laus cov nyuag ntawm no luaj zus tua pov tseg huv si tej vaj tej tsev sawv daws khwv khwv ua tau nws luaj zus muab hlawv pov tseg huv si, (Qhov ntawm no nws yog qhov Nab Nyaus Npais 3 yam ntawm Nplog Liab xws li yog...tua kom du lug tsis txhob tseg 1 tug.....hlawv kom du lug....thiab nyiag kom du lug tsis txhob tseg) Paj Yeeb nco tau tias thaum Nyab Laj tuaj tua Paj Yeeb lawv lub zos uas yog Zos Hav Zeb Dub Nyab Laj tua phom loj tuaj mus poob rau hauv plawv zos txhua txhua lub mos txwv phom loj uas Nyab Laj tua tuaj poob rau hauv tej zej zog raug pej xeem sawv daws tuag raug tej vaj tej tsev hluav taws kub cig liab pes vog rau txhia chaw. Tej pej xeem sawv daws tus khiav dim ces dim lawm tus ho khiav tsis dim ces Nyab Laj cov mos txwv phom loj tuaj poob raug tuag tag. Cov trub rog Hmoob uas tiv thaiv lub Zos Hav Zeb Dub ntawm no muaj tsis txog 20 leej thiab riam phom los tsis muaj phom loj tsis muaj Luj Tem ntau tsuas yog rab puav M16 thiab Carbine xwb mos txwv los tsawg heev li thiaj li tiv thaiv tsis tau lawv lub zos. Tsis txog 1 xuab moos Nyab Laj thiab Nplog Liab twb nkag tau tuaj txog hauv Paj Yeeb lawv lub zos tuaj hlawv tej vaj tej tsev cov pej xeem uas khiav tsis thas es tseem npaj yuav khiav xwb ces Nyab Laj luaj phom rau xwb ces ntog pawg lug xwb. Thaum sawv daws khiav mus txog ib sab roob saib tuaj mus rau lawv lub zos nyob ib sab roob tim ub pom tej vaj tse kub nyhiab cig liab vog rau txhia chaw. Tsis ntev xwb sawv daws tej vaj tej tsev kub nyhiab tag tshuav cov pa taws tseem ncho lawm xwb tej pej xeem sawv daws tus khiav dim lawm los dim lawm tej uas khiav tsis dim ces tuag pawg lug puv zej puv zos tag. Txij li Tsim Meej tuaj mus ua tub rog rau Looj Ceeb lawm Paj Yeej nws niaj hnub nrog nws niam nws txiv thiab nws 2 tug nws mus ua teb txawm yuav los nag yuav tshav ntuj los nws yeej nco Tsim Meej tsis ploj hnov nyuag suab kab wb niam, kab nqos vias quaj nram tsob tsab ntoos qhuav nram qab teb tuaj nyuag toj roob hauv pes ntsuab xwb xiab nplej dauv twb qaib zom zaws cua tshuab ib vuag me nplooj nplej co zom zaws nrog cua....cas yuav kho siab yuav nco txog Tsim Meej ua luaj nws tsis quaj los lub kua muag poob twj ywm. Los txog rau hnub no Tsim Meej txawm yuav cia li ploj mus lawm yam tsis hnov ntab ntw qhov twg. Paj Yeeb niam nws kuj hais kom Paj Yeeb tsis txhob quaj quaj thiab nco txog Tsim Meej lawm kom Paj Yeeb ua ib siab nyob txog lwm xyoo tej zaum nws niam yuav muab nws rau lawv dab laug tus tub hlob vim dab laug lawv los kuj nyiam Paj Yeeb mus ua lawv tus nyab. Lub tsiab peb caug xyoo 1969-1970 Nyob rau hauv Nroog Looj Ceeb lom zem xauv npo tej tub tej ntxhais hnav me tsoos tsho tshiab mus dhia qaib yam lom zem kawg tab sis Paj Yeeb nws nyob ib leeg ntshaus ntsho tej phooj ywg sawv daws tuaj yaum nws kom nrog lawv mus nws tsuas yog lam nrog lawv mus ua si xwb txawm muaj tej hluas nraug tug puav zoo nraug ntxhiag nrog nws tham lus nrog nws pov pob ua si tiam sis nws twb tsis muaj lub siab rau lawv me me hlo li. Luag tej li luag muaj khub luag niam ua ke nrwb nraim koj tuav kuv tes kuv tuav koj tes kwv kaus ua ke mus nce roob ua ke pom muaj tej khub hluas nkauj hluas nraug zaum sib tawb ua si ntawm tej cas yuav ua rau nws nco Tsim Meej ua luaj xav tias yog Tsim Meej nrog nws nyob ces tam sim nws nws yeej zoo li txhua khub hluas nkauj hluas nraug uas muaj kev lom zem tiam sis tsis muaj muaj txo hmoo Tsim Meej tsis nrog nws. Lub tsiab peb caug twb dhau mus lawm tiag txoj kev lom zem ntawm tej hluas nkauj hluas nraug twb dhau mus lawm twb pib yuav txog lub caij mus ua teb lawm tiag. Txog rau lub caij Paj Yeeb tus dab laug tuaj mus nqis tsev hais Paj Yeeb lawm tiag thaum no Paj Yeeb nws niam thiab nws txiv thiaj li muab nws mus yuav nws dab laug tus tub lawm. Hauv Paj Yeeb nws nruab siab nws tseem nco Tsim Meej tsis ploj nws txawm yuav quaj thiab thov nws niam nws txiv thiab lawv tus dab laug tias nws tseem tsis tau xav yuav txiv, nws txawm yuav hais npaum li cas los ob tog yeej tsis mloog nws hais li thaum kawg nws thiaj li raug yuam mus yuav nws dab laug tus tub lawm nws quaj thiab tu siab heev li los zoo li tsis muaj leej twg pom nws thiab hlub nws hlo li tab txawm nws niam yug nws kiag los zoo li tsis hlub nws hlo li thiab. Sawv daws muab noj haus tag txog rau hnub uas nws yuav sawv kev hla nws niam nws txiv lub taw rooj mus ua neej nrog nws dab laug tus tub Paj Yeeb thiaj li sau tau ib tsab ntawv coj mus rau nws ib tug phooj ywg hu ua Maiv ceev tseg nyob mus hos yog tias Tsim Meej tsis rov qab los lawm los tseg...hos yog hnub twg Tsim Meej ho rov qab los txog kom Maiv pab muab tsab ntawv coj mus rau Tsim Meej kom Tsim Meej tu nws moo tsis txhob nco txog nws ntxiv mus lawm. Nws yog ib hnub Saturday sawv ntxov tseem tsis tau kaj ntug zoo pes tsawg 37 leej tub rog Commando tuaj mus sib sau nyob rau tshav dav hlau Looj Ceeb npaj yuav nce lub nyoob hoom tshuab txaij "Jolly Green" mus ua lawv txoj hauj lwm uas yog mus "Npuv Moos Xees". Txhua tus tub rog Commando uas mus ua txoj hauj lwm ntawm no sawv daws txhua tus hnav ris tshob tub rog Nplog Liab uas yog hnav li Nplog Liab cov tub rog hnav thiab nqa tib co phom AK-47 thiab cov SKS uas txeeb tau ntawm Nyab Laj los vim tsis xav pub kom Nyab Laj paub. Lub Jolly Green nqa lawv 37 leej hauv Looj Ceeb mus txog rau sab "Moos Mauj" txog rau ntawm Hmoob ib thaj teb pob kws lub nyoob hoom nws ya qis txij li ru tsev thaum ntawv cov tub rog Commando thiaj li dauv hlua nqis rau hauv av. Thaum sawv daws nqis tag lawm lub Jolly Green thiaj li ya rov qab rau Looj Ceeb lawm. Hauv Moos Mauj no ces yog kiag ntawm ciam teb lawm ntag mus tsis deb xwb ces txog kiag Moos Xees lawm ntag tab sis sawv daws yuav tau nkaum tos kom tsaus ntuj tso mam li mus vim tias tsis xav kom tib neeg pom lawv. Hnub ntawv tub rog Commando txhua tus nkaum ib hnub yuav luag tsaus ntuj sij hawm 4 moos yuav txog 5 moos ntawv ntag sawv daws tseem tab tom npaj muab qhaub heeb los ntse dej noj tso tos kom tsaus ntuj mam li mus. Tam sim thaum ntawv sawv daws nyias ntsaig nyias tais mov tsuag tsuag vim lawv hnov ib co suab sib tham zom zaws pem luag teb tuaj sawv daws cuab pob ntseg mloog zoo zo nws yog ib co suab sib tham suab poj niam siab txiv neej sib xyaws pes daws. Sawv daws nyias nkaum nyias tsuag tsuag ntawm tej hauv pob kws tos seb pab tib neeg ntawv tuaj txog seb yog leej twg thiab yog pej xeem xwb los yog tub rog. Tib pliag ntshis xwb cov suab sib tham ntawv thiaj li tuaj mus tshwm rau ntawm lub tsev teb pab ntawv coob thaj tsam 5-6 leej muaj poj niam thiab txiv neej lawv yog tib co pej xeem xwb ib leeg ris ib lub kawm cab 1 tug nees muaj 2 lub pob tawb nyob rau saum tus nees nruab qaum. lawv pab ntawm no yog tuaj mus muab nra tuaj mus ntais pob kws xwb. Command txhua tus nkaum twj ywm tsis nti hlo li tsis pub ib tug nroj ua zog hlo li pab Hmoob uas tuaj mus ntais pob kws ntawv los yeej tsis paub hais tias muaj tub rog Commando nkaum hauv lawv daim teb pob kws txog 37 leej. Tsis ntev xwb pab Hmoob ntawv lawv muab nra tag lawv los mus tsev lawm thaum ntawv twb tsaus ntuj lawm Commando txhua tus thiaj li hla ciam teb Nplog mus rau hauv lub Nroog Moos Xees Teb Chaws Nyab Laj. Moos Xees yog ib lub menyuam nroog mem me nyob rau hauv cov qab taw roob muaj roob siab vij tag nws yog ib lub nroog uas pos huab heev nyob rau yav hmo ntuj thiab yav sawv ntxov huab tsaus nti ntawm qhov muag xwb yeej tsis pom kev hlo li txog ntua rau yav hnub qaij nroos huab mam li tshem tib pliag xwb tom qab ntawv huab rov qab ntom nti li qub lawm nws yog ib qho nyuaj heev li rau cov tub rog commando uas yuav mus ua txoj hauj lwm zaum no. Sawv daws mus txog rau saum npov roob saib Moos Xees nyob qhov nyuag tsis deb nrav lawm xwb sawv daws thiaj li zaum so thaum no Commandant Vaj Xwm thiaj li mam muab daim map los rau sawv daws saib thiaj li mam qhia txog lub tswv yim uas yuav mus npuv li cas yuav npuv sab twg tuaj ntawm lub nkuaj kaw neeg thiab Nyab Laj lub txhab mos txwv riam phom thiab cov Lauv Saj los los Lauv Tham yuav thas lais nes yuav mus thas lais li cas. Hnub ntawv nws yog ib hnub uas Nyab Laj muab cov neeg raug txim nyob hauv nkuaj Nroog Moos Xees tso tawm los mus ua hauj lwm yuam kom cov neeg raug txim tuaj mus khawb txoj kev tsheb tuaj hauv Moos Xees hauv tuaj mus rau sab Moos Mauj. Nyab Laj muab lawv khi duav xauv ko taw huv si ib leeg kwv ib rab hlau tuaj mus lawm pab neeg raug txim ntawm no muaj 14-15 leeg muaj 6 tug tub rog Nyab Laj ib leeg ib rab AK-47 daj nrhuv khoo cov neeg raug txim ntawm no tuaj mus khawb kev. Cov tub rog Nyab Laj ntawv tsuas pom ib sij ib ncaw taw ib sij ib ncaws taw rau cov neeg raug txim uas tuaj khawb kev pob tw xwb ua rau cov neeg raug txim ntawv ntog pes daws taug kev tuaj lawm. Vim tias cov neeg raug txim lawv cov ko taw rau xauv ti ti ua ke kom khiav tsis txhob taus lawv thiaj li mus kev tsis tau ceev li cov tub rog Nyab Laj siab xav Nyab Laj thiaj li ncaws lawv kom mus tsuag tsuag. Cov tub rog Commando txhua tus lawv muab kob xoos coj los xoos pom li ntawv ib txhia yeej xav mus pab kiag tam sim ntawv es mus muab 6 nyuag Nyab Laj ntawv ntsaig tiam sis ib txhia hais tias kom txhob maj tseem tshuav ib txhia nyob rau hauv nkuaj yog tias Nyab Laj paub tias muaj xwm thaum twg lawm Nyab Laj yuav muab cov hauv nkuaj tua huv si thaum ntawv lawv qhov mission yuav failed ib qho ntxiv yog Nyab Laj lub txhab mos txwv riam phom yuav tsum thas lais kom tau tsis pub kom Nyab Laj coj tau tuaj mus tua hauv Teb Chaws Nplog ntxiv lawm. Nyob rau lub nkuaj kaw neeg nyob rau Moos Xees ntawm no muaj neeg rau txim tag nrho 25 leeg 11 leeg yog Hmoob hos dua li 3 tug yog Nplog muaj 3 tug ces yog Meskas cov tub tsav dav hlau raug Nyab Laj ntes tau coj los kaw rau ntawm no. Cov tub tsav dav hlau Meskas ntawm no Nyab Laj tsis muab lawv kaw ua ke hos muab lawv kaw ib leeg ib lub nkuaj muab lawv tsim txom thiab rau txim rau lawv sab kawg tsuas yog tshuav txoj sia tsis tus xwb yuav heev li tshuav ib tsuag txha xwb. Hnub ntawv txhua tus pw thiab so ib hnub hmo ntawv sawv daws so kom txaus txaus tag kis kaj ntug txoog xwb sawv daws pib ua hauj lwm lawm ntag. Kaj ntug kiag xwb cov tub rog Commando nkag ntsuab vog mus lawv mus hla Nyab Laj ib lub nyuag zeg liaj mam li mus txog rau ntawm lub nkuaj thaum ntawv lawv faib ua 2 pab lawm pab coob zog ces yog pab uas yuav mus tua lub nkuaj. Hos pab uas tsawg zog ces yog pab uas mus tua Nyab Laj lub txhab mos txwv lawm ntag. Vim Nyab Laj los pab maj thiab Nyab Laj yeej tsis muaj cov zov nyas li vim Nyab Laj tso siab dhau heev lawm hais tias yog hauv Nyab Laj Teb yeej tsis muaj leej twg muaj peev xwm tuaj ua tau li cas Nyab Laj thiaj tsis zov nyas li tsis hais ntawm lub nkuaj kaw neeg ntawm no los sis tom lub txhab mos tswv uas lawv ib pab tsem mus lawm. Thaum nkag mus txog rau ntawm ntug nkuaj lawm lawv pom muaj ib nyuag nyuag shack nyob rau ntawv pom muaj 2 nyuag tub rog Nyab Laj nyob rau hauv zov rooj vag xwb 2 tug tub rog commando thiaj li mam nkag ceev cev mus txog ntua muab ob nyuag Nyab Laj ntawv hlais caj pas kiag xwb thaum ntawv ob tug tub rog Commando thiaj li co tes ua ib qho signal rau cov coob uas nkaum tom ntug fab kom lawv tawm los. Commandant Vaj Xwm nkag tsuag tsuag mus txog ntawm qhov rooj nkuaj pom muaj tib tug nyuag Nyab Laj nyob ntawv xwb nws thiaj li rho hlo nws rab yaj phom looj lub suppressor tua kom tsis txhob nrov twb nkaus rau tus Nyab laj ntawv taub hau tib phom nrov nplhawj no xwb tus Nyab laj ntawv khwb nkaus ntawv. Tub rog Commando txhua tus caws nplaum tsuag tsuag rau lub qhov rooj nkuaj tsis dhau 1 nas this nplaum tawg nrov poog thaum no ces Team 2 nyob ntawm lub nkuaj sab nraum no Team 3 nkag mus tso cov neeg raug txim Team 1 yog cov mus tua Nyab Laj lub txhob mos txwv. Thaum Team 3 mus tso cov neeg raug txim tawm tag los xwb nplaum tawg muaj 4-5 teg sib lawg liag nram Nyab Laj lub txhob mos txwv tuaj txhais tau tias sawv daws nyias puav leej ua nyias txoj hauj lwm tiav mentsis lawm tam sim no ces yog coj cov neeg raug txim ntawv thim rov qab lawm xwb. Thaum no Nyab Laj mam li ras txog Nyab Laj mam li pib tua lawv thaum no sawv daws thiaj li sib pab tua. Suab phom AK-47 thiab SKS ntawm ob tog xws li Nyab Laj tog thiab tog tub rog Commando nrov zag pib zag xaus luj tem tawg pig poog txhia chaw tib pliag xwb Nyab Laj lub nkuaj kaw neeg nyob rau Moos Xees nplaim taws cig txij ib nta ntoo hos pa ncho dub nciab xwb. 3 tug tub tsav dav hlau Meskas uas yuag yuag tsis muaj zog los tsis taus lawv muab kwv kiag saum xwb pwj khiav los mus hla Nyab Laj zeg liaj Nyab Laj tuaj sab tim ub xuas RPG txais lawv mos txwv tawg pig poog ntawm lawv ib sab hluav taws cig liab vog xwb txhua tus kuj tsis ua li cas tsis raug mob lawv kuj khiav dim tag los huv si txhua tus neeg raug txim kuj tsis muaj tus raug mob los yog ploj tuag li cas. Thaum sawv daws thim tau los txog rau sab Teb Chaws Nplog lawv hu nyoob hoom tuaj nqa tiam sis hu npaum li cas los tsis tau thaum hu tsis tau lawm sawv daws thiaj li txiav txiam taug ko taw sab Moos Mauj ntawv los rau Looj Ceeb. Lawv taug ko taw los yuav luag 1 lub hlis thiaj li los txog rau Looj Ceeb. Thaum lawv sawv daws los txog rau Loj Ceeb lawv co ko taw lwj tag tej socks tej khau ntuag tag huv si. Tsim Meej rov los txog tsev nws niam nws txiv zoo siab heev sawv daws thiaj li mam li sib qawg quaj "ntuj aw...kuv tub xav tias sim neej no yuav tsis tau ntsib kuv tub lawm ua cas hnub no kuv tub rov los txog lawm" Tsim Meej niam thiab txiv thiaj li tua nyuj hu nws plig. Tsim Meej los so tau ib ntus nws muaj zog lawm Tsim Meej nws tus kheej nws tsis paub tias Paj Yeeb twb mus yuav txiv twb mus ua neej lawm nws tseem xav ntsoov hauv siab tias tos nws zoo me ntsis tso nws li mus cuag Paj Yeeb. Tag kis ntawv Maiv thiaj li nqa tau Paj Yeeb tsab ntawv tuaj rau Tsim Meej kom Tsim Meej muab nyeem tag Tsim Meej mam li paub. Txawm Tsim Meej yuav nug Maiv txog Paj Yeeb npaum cas los Maiv tsis kam qhia nws. Hnub ntawv sawv ntxov tsees Tsim Meej thiaj li nqa Paj Yeeb tsab ntawv nce mus nyob puag saum roob siab ntsia ntsoov los rau hauv Nroog Looj Ceeb cua tuaj txias zias me nyom vau qaug lais raws cua nqis hav. Tsim Meej thau Paj Yeeb tsab ntawv los nyeem. "Nyob zoo koj mog me leej nus Tsim Meej tus dai siab. Txij li thaum koj ncaim kuv mus lawm txog tav li no kuv yeej ua lub siab zoo siab ncaj nyob tos koj. Ntiaj tog qaum pes txawm yuav muaj tus zoo dua koj los sim neej no kuv lub siab kuv txoj kev hlub tsuas muab rau koj xwb kuv tsuas muaj koj ib leeg hauv kuv siab xwb sim neej no kuv txoj kev hlub muab rau koj kuv xav tias lub ntuj lub teb paub. Kuv xav tias kuv tsis mus ua nyab yuav nyob tos koj txog hnub tau ntsib koj tab sis vim kuv niam kuv txiv lawv yuam kuv. Kuv thiaj li tau mus ua luag nyab lawm es thov koj tsis txhob tu siab rau wb txoj kev hlub. Tsis yog vim kuv tsis yog vim oj tsis vim leej twg vim tej laus yuam kuv thiaj li tau mus lawm es nyob zoo koj mog me leej nus tus dai siab sim neej no xyov yuav nco koj txog hnub twg. Txawm kuv yuav mus ua luag poj luag sev lawm los kuv nplooj siab tseem nyob nrog koj kuv yuav bco koj tsis ploj hauv kuv lub neej mus tag tiam no. Thov koj tsis txhob tu siab rau kuv mog sim neej no vim wb txoj hmoo wb thiaj li tsis sib tau nco ntsoov rau fab lwm tias cia kuv mam li los ua koj thawj tug uas koj hlub mog....Sau Npe Paj Yeeb" |
Lwm Yam Uas Koj Xav Mus SaiB
Ci Vaj Lub Neej Tu Siab
|
Koj xav li cas rau txoj kev hlub tu siab saum no sau nram qab no. Nias nov rov mus Nplooj Kev SiB HLUB
Widget is loading comments...