Tsim Meej thiab Paj Yeeb -2
Tus Sau: Hmoob Khej3 Email: Birdybrid@yahoo.com Hmo ntawv Nyab Laj tua phom loj heev tuaj mus rau Tsim Meej lawv saum khaib. Mloog mas nws tsis yog tib ram 130 mm sab Phus Vias tua tuaj xwb tiam sis nws yog 2 rab phom loj tua tuaj diam. Ib rab mas yog rab 130 mm hos ib rab mas yog rab 122 mm teeb qhov nyuag tim cov npov roob sab qaum teb tua tuaj mus rau lawv xwb. Thaum Nyab Laj tua tuaj mus ces yeej hnov nrov duj dawg mam li hnov lub mos txwv ya tuaj mus poob. Nais Koos Phas rov qab hu dua mus rau Hoob Kas 2 nyob Looj Ceeb thiab thov kev pab tiag tiag yog tias tsis muaj kev pab hmo no lawv nti tsis taus. Tus tub teb xov tooj nyob rau Hoob Kas 2 nws hais tias "Commandant..kuv tau hu xov tooj mus rau Udon lawv teb tias tam sim no peb cov nyoob hoom tua rog uas yog cov F-4, F-105 thiab cov F-5E tau ya mus tua rog nyob rau lwm thaj chaw tag lawm vim tias tam sim no Nyab Laj Qaum Teb thiab cov Paj Thej Laus lawv tib teg ntaus qaum teb ti nkaus qab teb...Nyab Laj ntaus xyhav heev nyob rau lwm thaj chaw...hauv Npab Nas ntawm ko Nyab Laj tseem nyuam qhuav tua phom loj rau nej xwb tseem tsis tau nce tuaj ntau nej...kom nej ua siab ntev tag kis tso kuv mam li rov hua dua rau lawv kom lawv tuaj pab nej tua...saib xyuas nej tus kheej kom zoo nawb" Nws hais li ntawv tag xwb ces nws cia li muab xov tooj khwb lawm. Suab phom loj nrov doog diaj hluav taws mas ntsais pes plaws liab vog thaum mos txwv phom loj tuaj poob. Ib tag hmo dua twb 1 moos tawm yuav luag txog 2 moos cov suab phom loj thiaj li mam ntsiag...Nais Koos Phas los kuj tau hu rov rau Looj Ceeb qhia txog tus xwm txheej tam sim no rau Tus Loj paub tam sim no Nyab Laj cov phom loj twb ntsiag lawm tsis paub tias xyov thaum twg Nyab Laj mam li tuaj mus ntaus lawv. Tub rog txhua tus lawv puav leej nyob zoo tsis muaj leej twg raug mob los sis ploj tuag vim tias lawv cov kwj hoob thiab cov qhov taub khov txaus uas yuav tiv thaiv tau cov mos twv phom loj thaum Nyab Laj tua tuaj mus poob. Nais Koos Phas nws txawm yuav ntaus xov tooj npaum licas los zoo li hu tsis tau mus rau Looj Ceeb vim tias Nyab Laj cov mos txwv phom loj tuaj raug tus ncej xov tooj piam tag lawm. Tam sim no twb yog 2 moos ib tag hmo kiag lawm Nyab Laj Qaum Teb, Paj Thej Laus, thiab cov Koos Paj Cai twb pib nce khaib tuaj mus ntaus Tsim Meej lawv lawm ntag. Lawv tuaj txog rau sab hav sab tim ub xwb lawv twb pib tua RPG (Npes 40 los sis Npe Pob Tsawb) tuaj mus rau saum Tsim Meej lawv khaib lawm. Cov tub rog Hmoob nhyob rau saum khaib lawv tua rab 60 mm Mortar mus rau Nyab Laj. Tiam sis zoo li lawv tua mus tsis raug cuv uas Nyab Laj nyob hlo li. Tib pliag ntsis ntawv xwb Nyab Laj twb nkag tuaj mus pw ntsuab vog raws sab qab khaib puv tag txhia chaw. Tiam sis mas niag tsaus ntuj dub nciab npaum laug cam npog qhov muag xwb tsis paub ua cas Tsim Meej lawv thiaj li tsum 4 lub Luj Coob cig dawb paug cuag nruab hnub ncig khaib pom Nyab Laj twb pw raws qab kahib tag...thaum ntawv ces Tsim Meej lawv cov phom M16 cov 8 teg thiab Carbine mam li nrov. Suab phom me nrov ib zag ib zag...zag pib zag xaus...nrog rau Nyab Laj cov suab phom AK-47 nrov rhev ib zag nkhaus nkoo sab xov pos hlau sab nrauv tuaj rau lawv...dhau li ntawv lawm Nyab Laj tua RPG tuaj tawg pig poog ntawm ntug kwj hoob li ntag. Nais Koos Phas thiaj li hais tias...tsis tau li ntag nawb...tub rog txhua tus nej tsis txhob xuas phom me tua lawm vim nej xuas phom me tua cov nplaim taws cig ntawm nej ntsis phom Nyab Laj pom ntsais pluj plias Nyab Laj paub nej cuv lawm Nyab Laj thiaj li xuas Npes tua tuaj...nej tsis txhob tua lawm...txawb Luj Tem (M26 Grenade) mus rau xwb. Nyab Laj mas Nyab Laj tseem xuas AK-47 tua lawv ces pom cig ib ntshuas npplaim taws qhov twg yog pom cig nplaim taws tes lawv txawb luj tem rau qhov ntawv xwb. Nplaim taws mas cig pes plaws txhia chaw xwb Tsim Meej saib mus rau tus ntug xov pos hlau deb kwv yees li 100 tawm yards ntawm nws 4 tus Nyab Laj twb nkag tuaj txog ntawm txoj xov pos lawm tab tom tuaj txiav txoj xov pos hlau ntag. Tsim Meej xav yuav xuas rab Npes Qe (M79) tua ntshai tsam Nyab Laj paub cuv thiab...nws thiaj li ntho nkaus ib lub luj tem dua rhe siav sis mus rau...luj tem tawg nrov poog raug 4 tug ntawv ua nwg ib tug dhia ib sab tag. Thaum ntawv ces Nyab Laj tsis tshua tua Ak-47 lawm Nyab Laj tua RPG tag zog lawm xwb tab sis zoo li Nyab Laj tsis paub lawv cuv zoo lam tua xwb twb tsis raug Tsim Meej lawv. Tsim Meej lawv txawb luj tem thiab tua 60 mm mus rau Nyab Laj tag zog xwb...sib tua yuav luag muaj 30 nas this Nyab Laj ntsiag tag lawm. Nyuam qhuav ntsiag zoj tib pliag xwb tus Nais Nyab Laj nthe tawv tawv kom tub rog Nyab Laj cia li rov nce dua tuaj mus ntaus. Zaum no zoo li Nyab Laj nce coob zog thawj pab lawv cov suab nthe hij hij hui hui mas hais lus Nyab Laj div daim div daim civ cev civ cev txhia chaw tuaj mus zoo li vij khaib tag lawm. Tsis paub lus Nyab Laj xyov nws hais nws tus dab tsi. Nyab Laj nce tuaj zaum no ib txhia yog tuaj muab cov raug mob thiab tuag hos ib txhia yog cov tuaj mus ntau Tsim Meej lawv ntag. Thaum no Nyab Laj nce tuaj mus coob heev twb nce tuaj txog ntua ntawm txoj xov pos lawm txawb luj tem los txawb tsis yeej lawm sawv daws cov uas txawb luj tem los txawb cov uas xuas phom me tua los tua li ntag. Suab phom M16 thiab AK-47 rov qab nrov ib zag zag. Tsim Meej xuas rab M79 tua 2 phom rau mos txwv tawg ua rau tsais pes plias. 2 tug tub rog uas tua 2 rab Las Miv Tais (Machine Gun) xuas 2 rab Las Miv Tais teeb nkaus saum ntug kuj hoob tua nrov dawg dawg dawg dawg......Nyab Laj ntog pawg lug raws ntug xov pos sab nraum ub. 2 yawg nyuam qhua tshai chaw tsuag tsuag tom ntej xwb Npes 40 tawg nrov poog ntawm nkawv qub chaw tsis raug nkawv vim nkawv txav tom ntej lawm. Tam sim no Tsim Meej lawv tog tub rog tuag 10 tawm leej lawm cov raug mob los yeej raug mob coob lawm thiab. Cov tuag lawm ces xuas ntaub dawb muab kauv cia hos cov raug mob ces tus Nais Maum uas nrog tub rog los kho mus xoos phais los phais tus xoos ntxiv los muab qhov nqaij ntxiv. Phom loj phom me nrov doog diaj ib hmos txog rau thaum kaj ntug Nyab Laj mam li thim. Hmo ntawv Nyab Laj ntaus Tsim Meej lawv khaib tsis tawg. Thaum ntawv Tsim Meej lawv thiaj li mam li mus Kuaj Lab raws ntug xov pos Nyab Laj mas tuag coob kawg sis laub sis nias xwb. Cov tuag ces tuag lawm cov tseem ua nruj nriaj yuav tuag tsis tuag los muaj cov no cev Tsim Meej lawv xuas phom loos tsuag tsuag rau xwb. Ho hais txog ntawm tus tub hluas uas zaj 3 kuv sau kuv hais tias nws niam nws txiv nws 2 tug tij laug thiab ib tug muam raug Nyab Laj tua tuag tag tim Zos Paj Doos tus hluas no nws chim siab heev nws thiaj li tawm mus sab xov pos sab nrauv nws mus muab cov niag Nyab laj tuag ntawv cov taub hau txiav. Nws txiav tau 5 lub taub hau Nyab Laj nqa loscoj los txi rau nws niam nws txiv thiab nws tsev neeg uas rau Koos Phoos Nyab Laj Qaum Teb uas Koos Phoos 317 ntawm no tua tuag tag tim Zos Paj Doos. Nkauj Dab Los Tos Xyum Part 2 |
Lwm Yam Uas Koj Xav Mus SaiB
Ci Vaj Lub Neej Tu Siab
|
Koj xav li cas rau txoj kev hlub tu siab saum no sau nram qab no. Nias nov rov mus Nplooj Kev SiB HLUB
Widget is loading comments...