Txoj Kev Hlub Tuag 6 Zos Dej Dawb
*LUB NEEJ QUB NROG HNUB HMO UAS LWJ SIAB*
Nplooj1 ♥ Kuv tsis paub tias peb ua neeg nyob yus yuav nyob tau ntev npaum twg, yuav tuav txoj pa no nyob mloog lub plawv dhia zaum kawg tag rau hnub twg..? Muaj qee zaum kuv kuj xav paub tias peb ua neeg nyob peb puas yuav muaj ntsuj plig thiab thaum peb tuag mus lawm puas yuav muaj ib qho chaw rau peb mus nyob thiab peb puas yuav sib ntsib sib paub lawm..?
♥ Kuv txoj kev hlub tshwm sim nyob rau ib qho chaw uas txom nyem siab ntsws thiab dai siab tshaj plaws nyob rau Thaib teb lub zos hu ua Dej dawb uas yog peb Hmoob nplog khiav mus nyob, yog qhov chaw uas nyob nrog txoj kev ntshai thiab txoj kev txom nyem. Peb sib dai nyob los txog rau xyoo 2007 lub 7 hli peb lub yeej Dejdawb tau kub nyhiab tag peb lub neej nyob zoo li lub lwg dej tsis paub tias yuav ntws mus rau sab twg li, muaj ib co tawm khiav mus ua Hmoob thaib ib co txiav txim siab rov los Nplog teb raws li nyias lub siab txiav txim. ♥ Ntuj los nag xuj xuav ntsia mus rau qhov twg los tsuas pom tej hluav kub nyhiab dub vog puv txhua txhia qhov chaw, lub neej zoo li tsis muaj kev cia siab dab tsi li lawm. Tej vaj tse ncee ai nyob lom zem ntws thaum ntawv ib tsais muag xwb twb ua hluav ua tshauv tas li lawm zoo li npau suav xwb. Cov uas tsis kam los mus Nplog sawv daws kuj rov qab los pib ua tsev pheej suab nyob sib dai zom zaws dua lawm thiab. ♥ Kuv tau ntsib ‘R’ nyob rau ib hnub uas ntuj los nag xuj xuav neeg cug dej coob coob wb tuaj cug dej sib ntsib thiaj sib tham tos cug dej thiaj ua rau wb sib paub los, wb txoj kev hlub nws kuj loj zuj zus ua rau kuv muaj siab nyob ua neeg Nplog nyob dai teb chaws Thaib ntxiv mus, kuv lub sij hawm tsuas yog nyob nrog ‘R’ tas li tsis hais nruab hnub los hmo ntuj. Thaum ntaw kuv muaj 19 xyoos hos ‘R’ muaj 14 xyoos wb hnub nyug tseem me thiab siab ceev kuj ua rau wb sib nrug ob zaug diam tab sis kuj rov qab los sib zoo tas li qub lawm thiab kuj haj yam ua rau wb sib hlub dua qub ntxiv. ♥Kuv muaj kev sov siab heev thaum uas kuv nrog nws nyob rub nws los puag nhia nws sab plhu es nws ua lub ntsej muag nyaum nyaum rau kuv, thaum kuv tuav nws sab tes mus tej qho uas neeg coob coob zoo li neeg khib kuv heev zoo li kuv zoo nraug tshaj, kuv tig ntsia nws nws luag rov rau kuv thaum ntawv zoo li lub nriaj teb no tshav ntuj nrig zoo nkauj thiab ntxim nyob heev li. ♥ Los txog rau xyoo 2009 lub 6 hli wb kuj tau sib tso dua lawm thiab kuj tsis muaj zaum thib 3 uas wb yuav rov los sib hlub dua li lawm. Vim muaj ntau yam teeb meem los cuam tshuam ua rau wb kuj sib tso tau lawm thiab qhov tseem ceeb yog zaum no nws yuav tau ncaim los mus rau sab teb chaws Nplog. |
Nplooj2 Thaum uas kuv paub tias lawv txiav txim siab los Nplog ua rau mob kuv siab tshaj plaws los ua tsis tau li cas li vim wb twb sib tso tag lawm thiab twb tau cog lus yuav tsis mus ntsib nws li lawm vim nws twb muaj tus tshiab lawm, yam uas kuv ua tau tsuas yog nyiag quaj thiab mob siab ib leeg xwb, kuv lub siab rov mob thaum uas muaj neeg rov noog txog ntawm nws thiab kuv wb, kuv tsuas tau dag lawv thiab dag kuv tus kheej tas li tias tsis muaj dab tsi lawm xwb.
♥ Txhua hnub yuav tsum mus ncaws Npas (ball), txhua mho yuav tsum nrhiav kev qaug cawv uas nws yog txoj kev yuav pab hnov qab nws, kuv tsis xav pom tej chaw uas wb nyob ua ke li tab sis kuv kuj tsis xav ncaim ntawm no mus li thiab, kuv yeej tsis tau thov kom nws rov qab los yeej tsis vam kom nws nyob tos kuv li tab sis ua cas kuv ho tseem nco nws ua luaj li no kuv kuj tsis paub tias yog vim li cas tiag. ♥ Tau tsis ntev peb sawv daws kuj raug los Nplog tag nrho kuv tau tseg thaj chaw uas muaj nqis uas tau qhia txhua yam ntawm kev ua neeg rau kuv. “Kuv tau paub tias txoj kev uas rov qab mus hlub tus neeg qub nws zoo li yus rov qab mus nyeem phau ntawv qub txawm yuav nyeem zoo npaum li cas los thaum kawg yeej xaus zoo li qub. Kuv yuav nco koj tab sis yuav tsis tos koj ntxiv lawm os ntawm wb nws zoo li zaj Movie kuv paub kuv tsis yog tus Phab Ej, tau sib hlub li ntawv xwb yeej zoo heev rau wb coj mus xav lawm, kuv paub koj yeej mob siab yeej nco wb tej kev hlub tsis swb kuv thiab.” Thaum kawg kuj hnov tias nws mus yuav txiv lawm kuj rov ua rau kuv lub siab mob ib teg kuv lub kua muag maj mam ntws los qhia tau tias zaum no tag lawm tiag tiag kuv yuav pib dua lub neej tshiab txawm tias tseem nco koj npaum cas. Kuv maj mam hais yau yau rau huab rau cua tias “ mus zoo koj mog.. wb tej kev txhaum tiam tas los kuv them rov rau koj tag lawm os” zaum quaj yau yau ib leeg. Qee zaum qhov uas yus quaj tsis yog quaj rau tus neeg uas ncaim yus mus lawm, nws yog quaj rau txoj kev hlub uas yus tsim los es yuav tau ploj mus lawm xwb. Thaum kawg uas tsis tau kawg no thov ua tsaug rau 3haivhmoob.com uas tseem muaj tej qho chaw uas zoo zoo li no rau peb tuaj seev peb tej kev lwj siab thiab ua tsaug rau tus uas nrog nyeem thiab UA TSAUG..! Tus sau: Yias Muas 04 AUG 2013 Nco Ntsoov: Txhob hu xov tooj rau lawv cov kev lag luam lawv tso hauv no yog tias koj tsis muaj feem txog kev lag luam nawb. Ua tsaug
|
Lus Ceeb Toom:
Cov dab neeg kev hlub thiab txhua yam hauv 3haivhmoob.com no peb tsuas yog tso rau sauv daws tau tuaj nyeem laug caij nyoog xwb txwv tsis pub leej twg muab luam mus muag los yog ua lag luam, yog koj coj mus kho los yog ua lwm yam tsis tau qhia rau peb paub , thaum peb tshawb tau lawm koj yuav raug nplua raws txoj cai ntawm lub teb chaw koj nyob ko. Ua tsaug ntau: 3HaivHmooB.Com |
|