Yeej Vaj Txoj Kev HLub:
Tus sau : Yeej Vaj
Email: kevhlubnyobdeb2012@yahoo.com
From: Laos
Txwv: Tsis pub leej twg lam tuaj muab peb cov dab neeg hauv no coj mus tso rau lwm lub vas sab los yog website uas tsis tau txais kev tso cai los ntawm peb. Warning: No one can copy these stories at: www.3haivhmoob.com to post on your own website without our permission. Thanks.

Nplooj-1

    Qee leej tau hais tseg hais tias “ kev hlub yog yam uas zoo nkauj tshaj , tsis muaj kev mob, tsis muaj kua muag thiab ib txwm tsis tau rhuav tshem leej twg”. Tab sis thaum uas koj hlub leej twg lawm ces koj yeej yuav tau quaj qw xwb xwb. Koj puas tau nug koj tus keej li… Hais tias koj “ koj puas tau hlub nws tiag, hlub npaum li cas thiab hlub li cas.. ?” . Lo lus teb ntawd tsuas yog koj xwb thiaj li paub. 
       ​Qhov tseeb tiag yog thaum uas koj tab tom nco txog leej twg ib tug twg ntawd heev, tej zaum nws kuj yuav tab tom nco txog lwm tus los kuj yeej muaj thiab ntshe kuj ho muaj leej twg uas kuj nco nco txog koj yam koj twb tsis quav ntsej txog kiag li thiab. Qee zaus qhov uas yus xav ib leeg ntawd haj tseem zoo dua li uas yus tau paub qhov tseeb hais tias txhuas yam uas yus xav cia ntawd nws tsuas yog txoj kev npau suav ntawm yus ib leeg nkaus xwb. Yog li ntawd nws thiaj tsis yog ib qho uas txawv heev rau qhov uas neeg ho xaiv tsau nyob nrog txoj kev npaus suav ntau dua li qhov uas tau paub txog qhov tseeb. Qhov uas tsis tau yog tus neeg 1 nyob rau hauv nws lub siab nws tsis yog ib qho uas yuav tsim nyog ua rau koj nyob ntshaus ntsho los yog tus siab. Tej zaum yus kuj yuav yog tus zeeg 2 los nws kuj haj tseem zoo duas tus neeg 3, zeeg 4 … thiab tab txawm yus yog tus zeeg 10 hauv nws lub siab...los thov kom koj ho xav tias yeej zoo dua li tias yus tsis muaj nqi ib qho dab tsi hauv nws lub siab kiag li. Tej zaum yus kuj yuav los kuas muag rau qhov uas yus kam lees paub tias yus tsis yog tus zeeg 1 hauv nws lub siab….. tab sis thov koj nco nroov cias nawb mog, yog hais tias koj lub siab tseem tsis tau quaj qw nrov nrov nrog rau lo lus thov koj hais tias “ kuv qaug lub zog heev lawm, thov tsum txij li no lawm xwb, thov tsum ua ntej kuv yuav qaug zog ntau tshaj nov”…cev kav tsij hlub thiab nyiam nws mus ntxiv mog. Kev uas koj hlub ib tug neeg ntawd tsis yog kom koj ua lub siab ntev, “ kev txiv txim siab” thiaj li yog yam uas yuav tsum tau ntev tiag tiag. Sim nug thiab ntsuas koj lub siab seb hais tias txoj kev zoo siab uas koj muaj thaum koj tau nrog nws ntsia sab muag thiab txoj niag kev mob siab thaum uas koj pheej yuav khiav nraim nws txoj sab muag ntawd qhov twg ntau dua. Tsis txhob chim rau koj tus kheej hais tias koj los ntsib tau nws lig dhau heev lawm. Txhob chim rau nws qhov uas tsis muaj lub siab hlub koj txhob chim rau txoj hmoo qhov uas coj koj los ntsib nws tab sis ho ua kom neb 2 lub siab xav zoo ib yam. Thov koj luag ntxhi pub rau koj tus kheej uas yam tsawg kawg txawm tau ntsib tus ntawd lig dhau heev lawm los twb ho tau ntsib lawm. Luag ntxhis rau nws uas txawm tias nws tsis kam faib ib nplooj siab rau koj los tab sis nws ho tau tag nrho koj lub siab mus lawm… luag pub rau txoj hmoo uas txawm tsis tau ua kom neb sib hlub los twb tau ua rau neb sib paub lawm. Koj tsim nyog yuav zoo siab hlo rau qhov uas ib zaug koj tau ntsib tus neeg uas koj xav khaws nws lub ntsej muag luag ntxhi cia rau koj ib leeg, tus neeg uas koj rau siab rau nws ntau tshaj li rau koj tus kheej. Tus neeg uas ua rau koj luag… thiab quaj tau ntau ntau zaus, tus neeg uas nws lub ntsej muag luag ntxhi ntawd xwv los muaj peev xwm hloov tau koj hnub tsaus ntuj nti mus ua hnub tshav ntuj nrig. Li no xwb txaus lawm puas yog ma..? tsuas yog kom tau pom tus neeg uas yus hlub nyob nrog tus neeg uas nws hlub tshaj plaws xwb, qhov no laud,… yog qhov uas zoo siab thiab txaus siab ntawm txoj kev hlub tiag thiab tiag tiag na.TSUAS YOG KUV XWB UA HLUB KOJ
Kuv paub zoo lawm hais tias tam sim no koj yeej tsis hlub kuv kiag li, tsuas yog muaj kuv xwb uas thiaj hlub koj. Yav nram ntej I tej zaum kuv yuav xav thiab ntseeg hais tias koj hlub kuv thiab. Tab sis tam sim no kuv txoj kev xav tau qhia rau kuv hais tias txoj kev hlub thiab txoj kev xav zoo zoo uas koj ib txwm muaj rau kuv ntawd nws twb tau yaj, tsuag thiab tau tag mus lawm. Los txog kiag rau tam sim no lawm los txoj kev xav ntawd yeej tseem qhia tau rau kuv ntxiv quj qees hais tias yam uas koj tab tom ua rau kuv nov nws zoo li tus yam ntxwv ntawm tus neeg uas tsis muaj siab hlub lawm, vim tsis hais kuv yuav ua dab tsi, hais dab tsi los yeej puav leej yog qhov chaw chiv thiab lub hauv paus pib txoj kev nyuaj siab, ntxhov siab,.. rau koj. Tab sis nws kuj txawv heev rau kuv qhov uas yeej paub zoo lawm tias koj tsis muaj kev hlub kuv lawm…,Tiam sis txoj kev hlub , txoj kev xav zoo zoo thiab txoj kev hlub-kev nco ntawm kuv uas muaj rau koj suav txij kiag li hnub uas wb tau sib paub los ntwd yeej ib txwm tsis muaj qhov hais tias yuav ploj los yog tag mus kiag li. Kuj yeej muaj lawm thiab uas qee zaus kuv me siab, tu siab thiab tag txoj kev cia siab rau koj. Tab sis txoj kev xav ntawd yeej ib txwm tsis muaj yeej tus neeg uas muaj lub siab hlub koj li kuv kiag li. Niaj hnub nim no kuv yeej tseem nug kuv tus kheej tas zog li hais tias txoj kev hlub uas kuv muaj rau koj ntawd yog kuv muab qhov twg los…? Es vim li cas nws thiaj li ho tsis muaj hnub txawj ploj thiab tag mus kiag li.. tab txawm yog hais tias yam uas koj ua kuv hnub no nws yuav tsis zoo npaum li cas los kuj xij. Txhua tsav txhua yam uas yog yam ua rau kuv lub siab mob nov koj ua tau yam tsis quav ntsej txog li hais tias kuv yuav xav li cas. Muaj qee zaum kuv yeej xav nug koj thiab hais tias “ txoj kev hlub, txoj kev xav zoo thiab txhua tsav txhua yam uas tus nraug hmoob ruam ruam li kuv no ua pub rau koj ntawd nws yeej ib txwm tsis muaj nqis kiag li lod, nyob hauv koj lub ntsiab muag na..?” thiab kuv xav nug koj ntxiv hais tias “ koj puas tau xav li thiab hais tias yuav hlub kuv meme, thiab yog vim li cas koj thiaj ua tau li no rau tus neeg uas hlub koj tag nrho siab ntsws zoo li kuv?” kuv yeej tsis xav thov dab tsis ntau los ntawm koj os mog, tsuas yog xav thov ua rau kuv lub siab no ho muaj sia muaj zog rov tuaj es thiaj yuav ua rau nws muaj siab ua tej yam zoo zoo pub rau koj mus tau ntev ntev.

Nplooj-2


Tab sis ntawm kuv, kuv xav qhia kiag rau koj paub tam sim no hais tias “tiam no kuv tsuas yug los hlub koj xwb”, Es txawm hais tias koj yuav ntxub kuv thiab ua rau kuv txom nyem lub siab lub ntsws npaum li cas lawm los xij, tab sis ib lo lus teb uas kuv xav qhia kom koj paub ntawd yeej tseem yog lo lus qub uas kuv yeej ib txwm hais rau ko lawm, ntawd nws yog “ kuv hlub koj tshaj plaws hauv ntiaj teb no” thiab yuav tsis muaj ib yam dab tsis uas yuav cheem tau kuv lub siab qhov uas hlub koj. Kuv yuav ua kom koj pom hais tias hauv lub ntiaj teb no yeej tsis muaj leej twg lawm uas yuav hlub koj npaum li kuv, thiab tsuas yog muaj kuv xwb uas thiaj hlub koj los ntawm lub siab dawb paug thiab hlub koj tshaj plaws hauv lub qab ntuj no.
                               CIA KUV MAM MUS
Thaum uas koj twb xav tau li no lawm ces cia kuv mam li mus, mus nrog rau lub sij hawm uas niam Nkauj Hnub ncaim lub ntiaj teb Hmo No.
Txij no mus kuv yuav tsis txais kev nug moo los yog xa xov los ntawm koj ntxiv lawm. Ntshe wb yuav tsis tau sib ntsib, ntshe kuv yuav tsis tau hnov koj lub me suab qab zib ntxiv li lawm os. Yog hais tias lwm hnub wb ho rov tau sib ntsib los wb yeej tseem yog phooj ywg zoo zoo vim hais tias wb tsis tau muaj kev sib chim, wb tsis tau ua txhaum rau ib tug twg… thiab koj yeej yog tus neeg uas zoo heev li. Qhov uas koj tsis hlub kuv, tsis nyiam kuv ntawd nws yeej tsis yog koj li kev txhaum kiag li. Peb ua neeg nyob ces ib tug yeej yuam tsis tau lwm tus lub siab. Tab txawm yuav yog kuv kiag los ntshe kuv tsuas ua tau zoo ib yam li uas koj ua no lawm xwb. Kuv nkag siab koj zoo os.
Tej zaum koj yuav xav tau lub sij hawm kom ntau tshaj nov uas yuav coj los paub nrog kuv. Los sis tej zaum koj kuj tsis tau ntseeg koj tus kheej qhov uas yuav kam hlub nrog kuv, los tej zaum koj kuj muaj koj li lwm yam yamthawj ( reason ) uas hais txog ntawm “wb”. Tab sis kuv xav lawm hais tias zaj twg los yeej mus xwb ces cia mus kiag tam sim no, tsis tos kom txog tag kis lawm.
Muaj kiag 2 yam uas kuv tseem xav thov ua ntej hnub no yuav tag mus. Yam 1 yog xav thov hnub no coj los nco thiab xav txog koj, koj uas yog kuv tus neeg hlub nyob nraim hauv kuv tus npau suav, ua zaum kawg. Qhov 2 yog nyob seb lub ntuj puas lam hloov thiab tig koj lub siab es seb koj ho puas yuav tig los nyiam thiab hlub kuv li qub os. Txij no mus ntshe koj yuav xav hais tias yog muaj dab tsi tshwm sim rau kuv, yog kuv ploj mus dua qhov twg lawm es vim li cas koj thiaj hu tsis tau kuv. Ntshe koj yuav nyob tau tus mi mluag mlob me ntsis os mog… tab sis tus neeg uas kuv hlub, thov koj ho nkag siab txog kuv thiab nawb. Kuv yuav tau mus tiag tiag lawm mog. Kuv ntshai heev li, ntshai tsam ib hnub twg kuv yuav tau ris tus niag kab mob siab lwj siab mu sib ntxhis.
Kuv tus uas koj ntsia tsis khuab qhov muag no xav qhia rau koj paub hais tias “ Yav tag los kuv tau hla dhau ntau txoj kev hlub uas lwj liam tshaj plaws nyob rau hauv qab ntuj no lawm”. Ntau ntau txoj kev hlub tsuas taug ib tug hneev taw xwb uas yog hlub tsis kawg ntsis. Tej no ua rau kuv lub siab mob tag los mob thiab, nws mob tshaj qhov kuv yuav uv thiab nyiaj taus lawm os. Kuv tsis muaj lub zog thiab tsis muaj peev xwm txaus uas yuav kam muab kuv txoj sia coj los pheej hmoo nrog txoj kev hlub ntxiv lawm, tab txawm tias koj yuav yog tib tug neeg uas kuv hlub tshaj plaws nyob rau hauv qab ntuj no lawm los xij.
Kuv thov txim tiag tiag li nawd. Kuv tawv tsi txaus uas yuav pheej hmoo nyob nrog txoj kev hlub zoo yav puag thaum ub nram I lawm. Kuv yeej ua tsis tau tiag tiag li lawm os. Nws yog txoj kev mob puag thaum ub, txoj dab neeg puag thaum I, txoj kev ntshai yav tag los uas kuv tsis muaj peev xwm yuav yeej tau lawv. Kuv tsis xav yuav rov qab mus rau lub neej yav dhau los, mus khaws tus qub mob ntawd lawm. Kuv thov txim tiag tiag nawb, kuv qaug lub zog heev li lawm. Kheev lam hais tias hnub no tseem yog hnub ntawd, hnub uas kuv tseem muaj muaj siab thiab muaj zog hlo ua txhua yam pub thiab ua txhawm rau koj txoj kev hlub thiab tsis ntshai dab tsis kiag li ces… txoj kev MUS hnub no yeej tsis yog txoj kev kuv yuav xaiv kiag li os.
"Kuv thov txim, thiab thov ua tsaug ntau ntau rau txhua yam yav tag los ua wb tau muaj ua ke. Wb txoj kev sib hlub yav tag los nws zoo tshaj plaws li tiag. Tag lub qab ntuj no yeej tsis muaj ib yam dab tsis yuav lo piv tau wb txoj kev hlub kiag li. Txhua txhua yam uas yog koj-kuv yeej nco tau zoo. Kuv yuav thov khaws koj cia rau kuv lub siab thiab yuav thov nco koj mus ib txhis os kuv me nplooj siab aw." Thaum kawg no kuv thov ua tsaug rau Hmongmeka.com uas nej muab qhov chaw no rau kuv tau tuaj sau zaj dab neeg no, nws ua rau kuv lub siab kaj lawm ntau mam ntsib nej dua lwm lub sij hawm.

Ceeb Toom: Cov dab neeg kev hlub thiab txhua yam hauv 3haivhmoob.com no peb tsuas yog tso rau sauv daws tau tuaj nyeem laug caij nyoog xwb txwv tsis pub leej twg muab luam mus muag los yog ua lag luam, yog koj coj mus kho los yog ua lwm yam tsis tau qhia rau peb paub , thaum peb tshawb tau lawm koj yuav raug nplua raws txoj cai ntawm lub teb chaw koj nyob ko. 
                 Ua tsaug ntau:  
                       3HaivHmooB.Com