Yeej Thiab Maiv Xyoo
|
Txwv: Txwv tsis pub leej twg tuaj muab peb cov dab neeg ntawm www.3haivhmoob.com no coj mus tso rau lwm lub vas sab los yog koj tus kheej lub vas sab -website uas tsis tau txais kev tso cai los ntawm peb vam tias ib tsoom phooj ywg yuav muab kev koom tes. Warnig: No no can copy these stories at: www.3haivhmoob.com to post on any other site or your own website without our permission. Thanks.
|
Nplooj1 Lub Kua Muag Poob
(Yeej & Maiv Xyo Txoj Kev Hlub) Txawm yuav ntev npaum twg? Tsawg niaj tsawg xyoo...tag nrho kuv lub neej los kuv yeej tseem nco Maiv Xyo tsis ploj. Maiv Xyo yog kuv thawj tug hluas nkauj thiab kuv kuj yog nws thawj tus hluas nraug, wb yeej nyob koom ib lub zej zog puag thaum yau los txog hnub sib ncaim no. Txhua hnub kuv yeej yuav tsum tau mus pom nws ib zaug kuv lub siab thiaj li nqig , hos nws tsis pom kuv ces nws yeej pw tsis tsaug zog tib yam nkaus li thiab . Lub caij hlais nplej Txog niam thiab txiv lub caij hlais nplej wb tau mus sib pauv zog hlais nplej, de dib noj, kuv chais deb rau wb ob leeg noj, muaj qee chim Maiv Xyo muab noj zom mos mos hauv nws qhov ncauj mam li nti los rau kuv noj, kuv yeej tsis qias nws , nws yeej tsis qias kuv li thiab vim wb sib hlub heev. Tej neeg hauv peb zos yeej paub hais tias wb yog nkawm nkauj nraug zoo thiab sib hlub heev li. Xav hais tias tiam no yuav tsis muaj hnub sib ncaim mus li vim nws tsuas muaj kuv thiab kuv tsuas muaj nws ib leeg xwb. Thaum noj 30 tag lub caij ntuj no kuj dhau mus zuj zus, saib tim tej toj roob pom me nroj ntsuag tuag lawm liab vog, iab oos ntsuab xiab pom tej me npooj npaim ya zom zaws kho siab zim xwb, Maiv Xyo wb kuj tau mus ncig ua si nyob rau ntawm lub tiaj rhawv zeb. Wb tau mus zaum sib puag sib hnia, qee chim nws maj mam muab nws cov kaus hniav tom kuv ob daim di ncauj thaum kuv hnia los yog npuav nws lub qhov ncauj. Qee zaus kuv kuj maj mam tom nws ob daim di ncauj tib yam, nov yog lub caij uas zoo zoo ntawm wb ob leeg. Tsis xav tias yuav muaj hnub los kua muag , mob siab, txoj siab yuav tu li. Txhua zaus wb pom luag lwm tus poob kua muag vim txoj kev hlub xwb, yeej tsis xav tias hnub zoo li no yuav los poob rau wb li.. Hnub wb sib ncaim tau los txog Noj 30 nyob rau lub xyoo 2002 - 2003, nws yog ib xyoo uas zoo heev rau qee leej tib neeg , tab sis yog ib xyoo phem heev rau Maiv Xyo wb. Muaj ib tug Hmoob Meskas tau los rau teb chaws Los Tsuas rau ntawm peb lub nroog Xeev Khuam no. Nws tau mus pom Maiv Xyo thawj hnub nyob pem tshav pob thiab nyiam Maiv Xyo heev li. Tus Hmooob Mes Kas no kuj tau tuaj nqis tsev hais Maiv Xyo, txawm hais tias Maiv Xyoo tsis kam yuav li los nws niam nws txiv lawv tau muab yuam kom yuav xwb, vim tus vauv Hmoob Mes kas no thiaj yuav pab tau lawv tsev neeg lawm tom ntej, hos ntawm kuv ces yog neeg pluag txom nyem txhob hais txog qhov yuav pab tau lawv li..Hmoob Mes Kas coj niam tais ntsuab tuaj khoo Maiv Xyo yeej mus tsis tau qhov twg li lawm, nws thiaj hais rau tus niam hluas kom tuaj qhia kuv tias niam thiab txiv muab nws yuam rau Hmoob Mes Kas yuav lawm. Thaum kuv hnov kiag cov lus no ua rau kuv txoj sia txoj pa yuav tu tiag tiag li, kuv ib ce tuag tag tsis muaj zog li lawm. Nws tus niam hluas qhia kuv ntxiv tias Maiv Xyo quaj li quaj xwb hais tsis tau ib lo lus li, ua rau kuv hlub nws heev haj yam mob kuv lub siab nruj cuag yuav tu tiag tiag li. Kuv xav tias yog Maiv Xyo tuag lawm ntshe kuv yuav mus quaj nyev thiab nqa ib res me paj coj mus tso rau pem nws lub ntxa es kuv mus nrog nws tuag ua ib pawg av rau pev, wb ob tug ntsuj nplig mam li sub pus ya mus thawj thiab ua neej dua tiam tshiab tom ntej es mam rov los yug sib hlub li qub dua. Ua cas nws tsis tuag, Hmoob Mes Kas yuav nws xwb, yog tias chim kuv siab heev kuv tuag lawm no ntshe tiam neej no kuv yuav tsis ntsib nws lawm, es lwm tiam puas yuav muaj ntxiv rau wb lawm thiab? Thaum kuv xav tau li no kuv cov me kua muag mas ntws cuag dej tawm los xwb mob siab siav yuav tu lawm tiag tiag..los kuv yeej ua tsis tau li cas li. Kuv nim xav txog ib qho dhau ib qho yad tag los wb sib sib hlub..ua cas hnub no kuv zoo li ib tug me nyuam ntsuag ntsuag nos uas tsis muaj leej twg hlub li lawm..tu siab tshaj plaws li os ...lawv ..aw..! Tiam neej no Hmoob Mes Kas yug los ua neeg muaj nyiaj nyob teb chaws vam meej , kuv yug los ua nraug Hmoob Nplog txom nyem thiaj li tau plam lis plaws kuv tus neeg kuv hlub tshaj plaws mus lawm.. |
Nplooj2 Yeej & Maiv Xyo Lub Kua Muag
( Txuas Ntxiv 2) ROV QAB LOS HAIS TXOG MAIV XYO Hnub tom qab Maiv Xyo rov kom tus niam hluas tuaj hais rau kuv tias nws niam nws txiv yeej tsis pub nws hais ib lo lus li, kom nws kav tsij ua zoo zoo rau tus vauv Hmoob Mes Kas xwb vim tus vauv Hmoob Mes Kas no thiaj pab tau nws niam lawv. Maiv Xyo kom nws tus niam hluas tuaj hais rau kuv tias, " nws thov kom kuv zam txim, vim niam txiv yog tus muab txoj sia rau nws ces tiam no cia nws pauj niam txiv tus txiaj ntsim mus yuav Hmoob Mes Kas kom niam txiv zoo siab. Fab lwm tiam thov dua ntawv los , nws yuav los hlub kuv dua thiab yuav tsis muaj hnub ncaim zoo li tiam no lawm. Tsis hais tiam no lwm tiam tsawg tiam los Maiv Xyo yuav cim ntsoov kuv lub npe rau nws nruab siab mus tsis lwj". Maiv Xyo tus niam hluas hais ntxiv tias , thaum Maiv Xyo hais cov lus no mas nws kua muag ntws sis los tsis tu li, tej lus hais yeej yog lub suab quaj tawm los xwb. Lub caij tam sim no kuv lub siab mob cuag li muab ib rab riam ntse ntse lub hau coj los lij kuv lub plawv ib teg ib teg cuag li lub plawv yuav tawg txoj sia yuav tu tiag tiag los yeej ua tsis tau li cas..Saib pem ntuj los yog ntuj xwb..saib pem teb los yog av xwb...kua muag ntws npaum dej.. Nws tus niam hluas tseem hais ntxiv tias," Maiv Xyo kom hais rau kuv sib hlub tiam no tsis sib tau, yog tias kuv xub tuag kom kuv los tos nws, yog nws xub tuag nws yuav rov los tos kuv wb mam mus ua neej rau nruab dab thiaj tsis muaj neeg txiav wb txoj kev hlub lawm. Nws hais ntxiv tias, hnub twg yog nws muaj mob es hais tias yog kuv los tos nws ces nws yuav tsis pub lawv ua neeb mus thaiv es cia nws tuag kom nws tau kuv no." Thaum kuv hnov cov lus no tag ua rau kuv lub siab kaj me me vim xav tias tsis tau saum neej no thov cia seb puas tau rov nruab dab li nws hais. Kuv thov ua nej lub vej xaij no tsaug uas muab qhov chaw no rau tus tib neeg lwj siab li kuv no tau sau piav txog kuv txoj kev hlub tu tu siab rau ib tsoom phooj ywg uas plam tus hlub li kuv tau nyeem. Thov kom nej lub vej xaij no nrog peb nyob mus ntev ntev lawm tom ntej. " Thiab yog tias lwm tiam muaj tseeb tiag kuv yuav tsis thov yug los ua tib neeg kom lwj siab li tiam no lawm. Kuv yuav mus thov ntawv los ua ib tug me lau noog, ya mus thoob lub ntiaj teb no kom pom paj xyoob paj ntoos, tsuas pom txoj kev kaj saib xwb. " Maiv Xyo lwm tias yog tias muaj tseeb rau wb tiag, cia kuv yug los ua tus me noog, koj yug los ua tsob ntoo...lub caij kaj ntug kuv ya mus nrhiav noj lawm...lub caij tsaus ntuj kuv ya rov los tsaws ntawm tsob ntoo los pw ntawm koj txhua hmo cia koj puag kuv mog...es wb thiaj tsis sib ncaim li tiam no lawm..'' Sau npe: Yeej Tus Nyob Lwj siab.. Kuv lub npe lam hu ua Yeej ...tab sis kuv tsis yeej txoj kev hlub...kuv yog tus swb ....Nej xav tias muab kuv lub npe hloov ua Swb no puas zoo os....cov phooj ywg...? |
Lus Ceeb Toom:
Cov dab neeg kev hlub thiab txhua yam hauv3haivhmoob.com no peb tsuas yog tso rau sauv daws tau tuaj nyeem laug caij nyoog xwb txwv tsis pub leej twg muab luam mus muag los yog ua lag luam, yog koj coj mus kho los yog ua lwm yam tsis tau qhia rau peb paub , thaum peb tshawb tau lawm koj yuav raug nplua raws txoj cai ntawm lub teb chaw koj nyob ko.
Ua tsaug ntau:
3HaivHmooB.Com
Cov dab neeg kev hlub thiab txhua yam hauv3haivhmoob.com no peb tsuas yog tso rau sauv daws tau tuaj nyeem laug caij nyoog xwb txwv tsis pub leej twg muab luam mus muag los yog ua lag luam, yog koj coj mus kho los yog ua lwm yam tsis tau qhia rau peb paub , thaum peb tshawb tau lawm koj yuav raug nplua raws txoj cai ntawm lub teb chaw koj nyob ko.
Ua tsaug ntau:
3HaivHmooB.Com