Poj Deev Hluas - Hlub Yuam Kev Koj Rau Tiam NO
Tus sau: Txeeg Vwj
From : Laos Nplooj-1 Niaj hnub niam no lub ntuj thiab lub teb chaws vam meej zuj zus lawm tiag los tib neeg lub siab yim hloov pauv mus deb zuj zus nrog lub caij lub nyoog zoo li lub ntiaj teb no uas tig mus yam uas tig tsis tau rov qab los thiab nws zoo yam li tus dej ntws mus tsis rov los lawm.....
Kuv lub npe hu ua Txeeg vwj kuv zoo siab heev uas hnub no kuv los paub lub chaw Vas sab www.3haivhmoob.com no. Hnub no kuv yuav los piav kuv lub neej rau ib tsoom phooj ywg hmoob sawv daws paub seb lub siab puas yuav kaj me ntsis. Xyoo 2010 dhau los muaj ib hnub kuv tau pom ib tug me nyuam hluas nkauj ntxim hlub heev tuaj mus kawm ntawv deb ntawm peb zos li ntawm 3 km( Ki lau mev), hnub ntawv yog hnub kuv mus hauj lwm ua cas txawm los ib nyuag kob nag kuv thiaj li nthos nkaus kuv lub kaus dub thiab caij kuv lub tsheb cav(Motorbike) mus hauj lwm.. Thaum kuv mus txog ib tog kev kuv caum tau tus me nyuam hluas nkauj no tiv nag ntub nag tag li nws muab nws cov ntawv ntsaws rau hauv plab tshos ua tau ntxim hlub heev. Kuv thiaj hais nws tias cas koj tsis kwv kaus? Nws tias: xav tias tej zaum tsis los nag no kuv thiaj li tsis nqa kaus tuaj. Kuv saib nws ntub npliag nplaws kuv thiaj kom nws zaum nram kuv pob tw tsheb ces kuv xa nws mus rau tim tsev kawm. Tau 2-3 hmos tom qab kuv thiaj li mus saib nws thiab nrog nws nyob lawv yeej txom nyem kawg nws yeej tsis muaj ntau cev khaub ncaws los sib hloov nws tsuas muaj 2 daim tiab kawm ntawv 1 lub ris jean hos ob lub tsho kawm ntawv thiab muaj 2 lub tsho dog dig hnav sib hloov xwb tsis tag li los tseem yog cov qub qub caws2 ntxim li twb yuav ntev2 lawm tiam sis zoo li nws kuj txuag heev ces kuj zoo li tseem zoo hnav thiab thaum kuv pom zoo li no ua rau kuv haj yam hlub nws heev tshaj qub tuaj. Kuv ntsia nws ntsais muag duj doov maj mam ntsais muag zoo li tus me neeg nkees nkees maj mam ntsais muag zoo li tus plas taub laub ob blub qhov muag dub dub hlaws hlaws kuv muab nws ntsia nruj nruj ua rau nws txaj muaj muag heev rau kuv li 4-5 feeb na thi kuv mam xav txog tias cas kuv yuav muab nws ntsia nruj ua luaj li no kuv saib nws txaj muag heev lub nsej muag hloov tag li kuv thiaj txav zog mus ti nkaus nws thiab cev loo kuv sab tes xis mus muab nws lub taub hau ib nyuag nyo los ntawm kuv lub xub ntiag ua rau kuv lub kua muag teev yees kuv nrog nws nyob ib xuaj moo tawm me ntsis ces kuv hais nws tias: kuv mus tsev lawm thaum twg kuv khoom mam tuaj saib koj dua no ces kuv rov los tsev lawm. Tau 2 hnub tom qab ces kuv yuav tau 1 lub kaus 1 nkawm khaus kawm ntawv thiab 2 ces khaub ncaws mus rau nws. Kev sib raug zoo kuj tsuas muaj zoo zuj zus tsis ntev tau 3 lub hlis xwb ces kuv coj nws los ua kuv tus poj niam. kuv hlub nws heev li os…! Yeej tsis muaj leej twg lawm uas kuv yuav hlub npaum li nws thaum kuv coj nws los nrog kuv nyob nws kawm twb tsis tau tiav ces kuv kom nws rov mus kawm kom tiav kuv mam li txhawb nws kawm thaum nws kawm tiav high school ces kuv thiaj li nrhiav chaw kawm rau nws mus kawm kom tau ib txog hauj lwm zoo los pab wb lub neej. Kuv thiaj xa nws mus kawm nram nroog raws li kuv xav tseg kuv kom nws kav tsij rau rau siab kawm txhob txhawj kuv mam xa nyiaj rau nws kawm kuv ua txhua yam txhawm rau nws thiab tsis pub nws txom nyem li yav tag los nws nrog nws niam thiab nws txiv lawv tsev neeg nyob lawm tsis hais kam noj kev haus chaw nyob nws yeej tau zoo mus ntau kauj ruam lawm. Thaum kuv tso nws mus kawm raws li hais lawm kuv kuj hais thiab kom nws lav coj kom zoo nws kuj tau lav kuv 100 yam tsav kuv yeej xav tias tej zaum nws yuav ua tau niam tsev siab ncaj siab zoo rau kuv thiab kuv yuav tau ib tug niam tsev kawm siab, ntse txawj ntaub txawj ntawv thiab zoo rau kuv. Thaum ntej nyuam qhuav mus kawm tseem tsis tau muaj phooj ywg ces kuj zoo. Nyuam qhuav mus kawm tiav xyoo 1 los xwb cas nws kuj muaj phoojywg hu rau nws tsis tseg kuv kuj tsis nug nws kuv xav tias yog nws cov phooj ywg kawm ntawv ua ke sib nug hmoo xwb muaj qee zaus kuv nug nws kuj tias yog cov phooj ywg hu nug txog kev kawm xwb thiab kuv kuj ntseeg nws. Xyoo tom qab nws rov mus kawm ces muaj qee zaus kuv yeej hu tsis tau rau nws kuv kuj tsis xav li cas vim nws yog yus tus poj niam yeej yuav tsis ua siab phem rau yus ib zaug. Dhau los mus yuav tag xyoo ntawv ces pom nws coj txawv zuj zus xws li ua ntej ntawv hu xov tooj rau nws tsis tau, taij kom yuav xov tooj zoo zoo rau siv, kov facebook tsis tseg, hais lus tsis sib to taub, tej qhov tsis khua chim los chim lawm dhau li ntawv los ces tsis pub yus nrog nws pws ywj siab li yav tag los lawm. Thaum tshwm sim tej yam txawv txav li no tawm ces kuv thiaj soj ntsuam thaum kawg ces kuj yog muaj hluas nraug li hais tiag thiab kuv thiaj kom tub ceev xwm muab nkawv ntes thaum ntes tau los nug ces nws kuj tau qhias txhua yam raws li nws tau ua muaj. Thaum niag poj dab noj nyoog haus txias no qhias qhov pib txog qhov xaus ib qho rau ib qho mas kuv mloog zoo li txoj pa tuaj ntawm kuv lub caj pas ceev zuj zus ua tsis taus pa npaum li muab ib txoj hlua los zawm ceev zuj zus zuj zus zuj zus rau zoo li thaum yus npau suav ua pa tsis nto thiab zoo li kuv ua yog toog feeb tsis meej. Kuv tig ntsia kiag Tus tub hluas ntawv ces kuv saib nws txaj muag kawg nkaus kuv xav nyem kiag ib lub foob pob rau nkawv kom yaj ntsis hauv lub ntiaj teb no mus hos niag poj dab rov taw tuaj ntuj ces yeej tsis muaj rab peev xwm yuav tig ntsej muag los ntsia kuv ib plia li thaum zoo li no nws niam thiab nws txiv lawv thiaj cem thiab ntaus nws heev thiab muab nkawv ob tug neeg phem no plua los mus kho kuv thiab them kuv tej nqi tshoob nqi kos rov qab rau kuv tag nrho muab nkawv rho tawm ntawv tsis pub kawm ntxiv lawm. Poj dab rov taw tuam kuv thiaj tau los thov kuv lav kuv tias nws yuam kev raug dag ntxias lawm xwb thov kuv rov hlub nws dua txij no lawm tov nws yuav los ua kom zoo rau kuv yuav tsis ntseeg lawv tej lus dag ntxias li yav tag los li lawm |
Nplooj-2nws quaj heev li kuj ua rau kuv hlub nws lub sij hawm ntawv kuv thiaj li hais rau nws tias: Tej zaum koj wb tsis yog niam txiv sib hlub kom txog hnub laus wb tsuas yog niam txiv sib hlub thaum yau xwb ..
Yog koj hlub kuv npaum li koj hais ko ces txawm wb ib leeg nyob ib sab ntuj ib xyoo mam sib ntsib ib zaug xwb los yeej yuav tsis muaj tej yam zoo li niaj hnub no koj ua rau kuv os koj lub siab tsis tus lawm, koj puas nco thaum wb nyuam qhuav sib ntsib es koj ntub ntub nag tom ib tog kev tsis muaj neeg tos koj li koj muab koj cov ntawv ntsaws rau hauv koj lub plab tsho es kuv xa koj mus kawm ntawv thiab koj tsis muaj khaub ncaws hnav sib hloov li lub sib hawm koj mus kiab khw los koj tsuas yog de tes nruj nrho ntsia luag lwm leej lwm tus xwb twb tsis muaj rab peev xwm yuav mus nug ib lub lab ris tsho twg li es kuv hlub hlub koj kuv thiaj tuaj coj koj los nrog kuv nyob kuv xav tias nyaj koj txom txom nyem es ntshe koj yuav paub txog txoj kev txom nyem cia kuv mam hlub koj tsis pub koj ntshaw luag txawm koj los tau kuv txom nyem los kuv yuav tsis pub koj ntshaw luag, wb txawm tsis muaj li luag los kuv mam li maj mam txhawb koj kom ib hnub twg wb caum tau wb txoj kev npau suav thiab pab kom tau koj mus kawm raws li koj tau hais rau kuv. Tej laus ib txwm piv lus tias: “qub dev qub ntxhiab qub neeg qub siab” koj lub siab ces tiam no yeej yuav zoo li no mus yeej pauv tsis tau. Thiab cov laus keev hais tias ” mob siab npaum twg los yeej mob tsis npaum li luag nyiag yus qoob nruab txhab deev yus poj niam nruab paig” cov lus no yeej muaj tiag. nws yog yus nplooj siab uas yus ntseeg thiab hlub ua txhua yam pub tau rau nws yam qhia siab dawb pawg yeej tsis khuv xim. Kuv hlub koj heev li os los koj twb tsis nco kuv ib qho me me koj twb muab kuv tsuj nthi hauv koj qab xib taws lawm koj puas paub thaum kuv pom koj thawj zaug ntawv kuv yeej muaj hluas nkauj wb sib hlub heev li lawm kuv twb yuav coj nws los nrog kuv nyob tus hluas nkauj no lawv lub neej tsis txom nyem li koj os me ab niag neeg siab phem tab sis vim yog kuv xav tias koj txom txom nyem es koj thiaj li los nrog kuv nyob ua ib yim neej tau mus tag ib sim es kuv thiaj li muab kuv ib nplooj siab hlub uas dai dhuj dhuam hauv kuv lub siab dua rhe puam chawj nws ua ib siab tsis nco nws sau siab hlo los hlub koj los koj twb tsis paub niaj hnub no ces ntshse luag twb nyob tom tej ntsia kuv pos ib sab kaum ncauj luag kuv lawm xwb ntshe luag twb nyho 2222 kuv os zaum no es yog kuv los ua neej yuam kev nrog koj lawm xwb lwm tiam yuav tsis thov los hlub koj lawm yog muaj dua ntawm wb ces cia los xaus rau hnub wb kos npe sib nrauj es koj pom leej twg ho hlub koj tshaj kuv no los koj kav tsij mus hlub thiab ua zoo rau nws mog es tsis txhob ua tej yam uas zoo li koj ua rau kuv no lawm ..... Txij hnub no lawm tov ces koj txhob nco kuv lawm mog. Txawm kuv nco koj los mam xav tias yog npau suav xwb no. lub sij hawm kuv hais cov lus no rau nws ces kuv yeej hais tu nrhab tu nrheev ib lo tsis cuag ib lo tej niam tej txiv mas cem kuv ua lwj ua liam los kuv yeej tsis nco yuav xav li cas. Thiab thaum kuv los sau kuv zaj dab neeg no ces kuv yeej cheem tsis tau kuv lub kua muag rov ntws dua ib zaug ntxiv. Niaj nub no kuv tseem ua yawg nrauj nyob khuam ntab khuam ntuv os. Poj niam mas siab phem txia ntshav tob tshaj plaws nawb kom phooj ywg nej sawv daws nco cim tseg li ntawv yus ua zoo rau nws mas lawm hnub nws tig taw rov tuam yus yog nws ruam ces kav tsij cia ruam kom kawg yog koj yuav yuav tus txawj ntaub txawj ntawv kawm siab los ua koj tus poj niam mas kav tsij cia nws kawm kom tiav mam yuav yog yuav lawm ces txawj li cas yuav li ntawv xwb txhob cia nws mus kawm li kuv no es ib leeg nyob ib qho sib cuag tsuas zoo li nkauj nraug xwb yus yuav tsum nyob nrog nraim nws thiab soj ntsuam nws kom zoo tsis pub txawv txav ua npaum nkaus li tub ceev xwm saib cov neeg txim mas thiaj taus. Kuv xav mas tej zaum yog yus txoj hmoo sawm los zoo li no xwb yeej yuav tsis yog txhua2 leej os. Kuv lub neej kub nyhiab ces nws los xaus li no xwb. Mam ntsib nej dua lwm zaus nawb. Es ua tsaug rau 3haivhmoob.com uas yog tus tsim qhov chaw no rau peb tham kev mob siab nawb thov kom nej sawv daws nyob zoo thiab txhob tau tus hlub siab phem li kuv. Sau Npe: Txeeg Vwj Tus uas hlub yuam kev koj rau tiam no... |
Lus Ceeb Toom:
Cov dab neeg kev hlub thiab txhua yam hauv 3haivhmoob.com no peb tsuas yog tso rau sauv daws tau tuaj nyeem laug caij nyoog xwb txwv tsis pub leej twg muab luam mus muag los yog ua lag luam, yog koj coj mus kho los yog ua lwm yam tsis tau qhia rau peb paub , thaum peb tshawb tau lawm koj yuav raug nplua raws txoj cai ntawm lub teb chaw koj nyob ko.
Ua tsaug ntau:
3HaivHmooB.Com
Cov dab neeg kev hlub thiab txhua yam hauv 3haivhmoob.com no peb tsuas yog tso rau sauv daws tau tuaj nyeem laug caij nyoog xwb txwv tsis pub leej twg muab luam mus muag los yog ua lag luam, yog koj coj mus kho los yog ua lwm yam tsis tau qhia rau peb paub , thaum peb tshawb tau lawm koj yuav raug nplua raws txoj cai ntawm lub teb chaw koj nyob ko.
Ua tsaug ntau:
3HaivHmooB.Com