Nrog Hluas Nkauj Noj Mov Tsis Sib Tau
Nplooj1 Zaj Dab Neeg hlub no, yog zaj uas cov laus hais tias tau noj hluas nkauj cov mov no tsis sib tau tseeb li hais tiag.Thaum xyoo 1988 mus txog rau xyoo 1989 ntawd,kuv yog ib tug thaum Teb Chaws tawg Nyab Laj muab 3 xav rov mus rau 3 qub Teb Qub Chaw rau lub Zos hu Tiaj Tshuaj, los yog lub Nplog hu uas Phus Ces uas ze rau ntawm pob tsuas Pham Thib, nyob rau Houa Phan, thaum Hlob Vaj Pov lawv kav mas hu ua Xas Nias (Sam Neua )no,tab sis Nyab Laj tsis pub peb mus nyob,Nyab laj muab peb xa mus nyob rau lub nrog Moos Vias Xais , uas yog ib Nroog tawv ntawm tog Koom Sam.
Tus Ntxhais no npe hu ua Poj Qhua Lis, lawv kuj yog cov uas raug xa nrog 3 mus ua ke hauv Tshav Dav Hlau Vas Vias mus thiab, tab sis lawv mus nyob rau Roob Txiv Nyuj, uas yog cov laus hais tias, Tuam Laj Tsua Nquab, thaum lub sij hawm ntawd tus hluas nkauj no tau tsiv puag tid los nyob ze rau ntawm peb lub zos, ces lub sij hawv lawm los kuv tseem tab tom kawm ntawv nyob Vias Xais, wb kuj tsis tau sib paub thiab, tab sis lub sij hawm ntawd kuv kawm Ub Doos Xyoo 2 (Udom 2), kuv tw mus rau xyoo 3 tsis tau, kuv thiaj los ua kws qhiav ntawv nyob rau ib lub Zos Nplog hu ua Na Heua, uas yog nyob ze rau lawv lub Zos. Nws lub Zos mas hu Phieng Ken, hos 3 lub mas hu Hinh Pieng los yog Zos Txiag Zeb, ces kuv pheej mus tim lawv Zos, kuv nyiam nws, nws nyiam kuv, ces kuv ho los qhia ntawv ze lawv lub Zos, qhia ntawv tag ces kuv pheej nej hmo mus tham nws, wb yeej sib tham zoo zoo, kuv kuj yuav khoom pub nws, hos nws los hlub kuv thiab, nws niaj tag kis sawv ntxov ua tshais ntim rau kuv, ces tham mus tham tuaj, ntshe ua li cov laus hais ntshe tau noj nws tej khoom thiaj tsis sib tau los cas, tham mus tham los twb yuav sib yuav, ua cas muaj ib hnub 3 ib tus kwv tij txheeb txheeb uas yog tus dai tus qhab Tse txawm tuaj yuav nws lawm, tus kwv tij no nws niam ho yog lawv tus phauj thiab, lub caij ntawd, kuv los yuav tuaj mus Sam Neua thiab, nkawv thiab kuv peb yuav luag tau caij ib lub Tsheb ua ke tuaj mus rau Sam Neua. Thaum kuv tuaj mus txog ped, kuv tus tij laug hais tias, kuv tus hluas nkauj yuav txiv lawm no mas, ua yam twg los xav txog nws xwb tsis xav ua dab tsis li, kuv twb yuav luag mus dhia Dej Naj Xaj kom kuv tuag no tab sis kuv xav tias, tej zaum hluas nkauj tsis ua siab zoo tiag rau yus, nws thiaj li khiav mus yuav yus cuab kwv tij lawm, yog li kuv ho muab xav tias, kuv niam kuv txiv tuag tag nrho lawm kuv nrog tus txiv ntxawm nyob es nws tu kuv los ua nws tub, yog kuv tuag no ces yuav nkim nkawv lub zog tu, vim kuv txiv tuag nyob rau lub caij peb tawg Sam Neua los nyob rau Looj Ceeb, kuv niam tuag nyob Phu kham los yog Hoi Kham kev mus lawm Looj ceeb ntawd, kuv thiaj xav xav tsis txhob tuag vim txoj kev hlub no. |
Nplooj2 Tab tom lub sij hawm ntawd, Nyab Laj pheej kee Hmoob mus ua Tub Rog tua peb Hmoob Caub Fab, tsis mus los txhaum, ces thiaj tau mus lawv thiaj xa 3 tuaj mus rau Vees Cas, ces yus ho tsis xav mus tua Caub Fab, kuv thiaj li nrhiav hauv kev tuaj nyob rau Yeej thoj Nam Vib Nai xyoo 1990 thaum lub 12 hlis, tab tom tuaj txog tid, kuj cuag li hmoov muaj thiab, ho tuaj tham tau ib tug hluas nkauj Hmoob Muas, nyob khej 3 khoob 2, ces nws los nyiam kuv thiab, kuv los nyiam nws, ces kuv yeej xav tias, plam tus nkauj Hmoob Lis ces ua kom tau tus no, tus no los hlub hlub, kuv tuaj txog txom txom nyem mas no no tsis muaj tsho loj hnav, nws mus muag paj ntaub nyob Kiab Khw O9 mas nws yeej yuav tshuaj zawv plaub hau,xab npus da dej thiab txiv xyoob txiv ntoo los rau kuv noj thiab siv, nws hlub kuv heev li.
Tham mus tham los yuav yuav nws, cuag li tiam ntawv los tsis sib tau thiab, ib tug muam nyob rau Fresno Ca hais los tias, kom txhob rawm yuav poj niam es thiaj li tsis nyuab, yog yuav poj niam lawm muaj ntau qhov nyuaj, tsam tuaj mus tsis tau rau txawv Teb Chaws, ces kuv tsis yuav nws, ces nyob Vib Nais tsis muaj tshuaj kuab taw hnyuv, tsuas muaj tshuaj ntxuav nyiaj xwb,ces tus hluas nkauj thiaj noj tshuaj ntxuav nyiaj tuag lawm, kuv ob tug hluas nkauj uas sib hlub tau noj khoom thiab noj mov ua ke cia li tsis sib tau li tej laus ib txwm hais tseg los, ces kuv cia li poob ib teg nqi rau nws tsis tau nws los ua kuv tus hlub koom nrog kuv ua ib yig neej li. Nij hnub nim no tab txawm kuv tsis tau nkawv lawm los ,nkawv ob daim duab, kuv haj tseem khaws cia thiab rhov tsis tau tawm hauv kuv lub siab mus li, tus ob mas yog tus tshwj xeeb, pab qhia kuv, kom kuv txawj paj ntaub es thiaj tsis txom nyem, yog li kuv hmoov tsis muaj kuv tsis tau tuaj mus rau Teb Chaws America thiab kuv ho tau mus rau Teb Chaws Australia lawm. Nyob rau lub neej yav tag los nram ntej li 30 tawm xyoo yog tias koj tau nrog tus hluas nkauj no noj mov ua kev lawm ces yeej plam tsis tau yuav nws li tej laus hais tseg qhov no yeej muaj tseeb tiag, tab sis nim no tej zaum kuj txawv lawm vim nyias muaj nyias fuab tais kav. kawg no ua tsaug rau peb Hmongmeka.com qhov website uas tau pab nthuav tawm peb tej kev hlub kev zoo siab, nyuaj siab thiab kev iab siab ntawm txoj kev hlub kom koj thiab kuv lub siab ho kaj thaum peb tau muab tso tawm tag lawma...es tsis txawj ntawv lam sau seb puas zoo rau sawv daws nyeem kom ho ua kev kawm,ua nkauj nraug zoo tau noj khoom ces yeej tsis sib tau li cov laus hais tiag. Ua Tsaug rau Ib tsoom phooj ywg uas los nyeem kuv zaj dab neeg ntawm ob tug hluas nkauj tau noj mov nrog es tsis sib tau no. Mam ntsib nej suav daws rau lwm lub caij nyoob los yog lwm zaj. Sau npe: Tub Vaj Huab Muas ntawm: Australia. |
Nco Ntsoov: Txhob hu xov tooj rau lawv cov kev lag luam lawv tso hauv no yog tias koj tsis muaj feem txog kev lag luam nawb. Ua tsaug
Lus Ceeb Toom:
Cov dab neeg kev hlub thiab txhua yam hauv 3haivhmoob.com no peb tsuas yog tso rau sauv daws tau tuaj nyeem laug caij nyoog xwb txwv tsis pub leej twg muab luam mus muag los yog ua lag luam, yog koj coj mus kho los yog ua lwm yam tsis tau qhia rau peb paub , thaum peb tshawb tau lawm koj yuav raug nplua raws txoj cai ntawm lub teb chaw koj nyob ko. Ua tsaug ntau: 3HaivHmooB.Com |
|