Tub Nuj Thiab NKauj Zuag
Tus sau: Tub Hmoob Lis Email: tseemseemraukoj@yahoo.com
Tub Nuj Thiab Nkauj Zuag Txoj Kev Hlub Uas Nco Ib Sim Neej
"Zaj Kev Sib Hlub No tu siab heev nawb tab sis nws ntau zog lawm ces peb tsis muaj caij los kho cov lus tag, muaj tej qho yuav ntaus yuam kev me ntsis los ntawm tus tswv sau tab sis nej ua siab ntev nyeem thiab zam txim rau peb lub vas sab los yog tus tswv sau vam tias yog nej nyeem tag yuav ua tau ib qho kev kawm pub rau suav daws lawm yav tom ntej.............."
"Zaj Kev Sib Hlub No tu siab heev nawb tab sis nws ntau zog lawm ces peb tsis muaj caij los kho cov lus tag, muaj tej qho yuav ntaus yuam kev me ntsis los ntawm tus tswv sau tab sis nej ua siab ntev nyeem thiab zam txim rau peb lub vas sab los yog tus tswv sau vam tias yog nej nyeem tag yuav ua tau ib qho kev kawm pub rau suav daws lawm yav tom ntej.............."
Teb chaws los tsuas toj Roob siab dawm Roob zuag, qhov chaw nyob ib txwm, muaj me hav Zoov nuj txeeg ntsuab li xiab thaum sawv ntxov tseem pom me Huab dawb pe vog tim tej kaum Roob kaum Hav, pom me Dej tsaw tsag dawb pe vog tim tej ntav Roob, muaj me Na, me Noog, Kab kooj quaj xi li nqiab kho siab kawg.Nyob rau sab tiaj nrab teb muaj ib tsoom Niam Txiv zej tsoom Hmoob nyob coob lom zem xauv li npo ua ib zog. Lub zos hais los txawm muaj tau Tub Nuj thiab Nkauj Zuag nkawv tshwm sim los ua neeg nyob rau lub zos ntawv.
Tau tsis ntev xyoo tom qab no xwb, nkawv leej twg lo loj paub tab, ces nkawv Niam thiab Txiv txawm tau tso nkawv mus nrog luag kawm ntawv. Sij hawm ntawv nkawv leej twg lo yeej tsis tau paub dab tsi li, dhau ntawv los mus tsis ntau xyoo tom qab no Tub Nuj yog tus xub tshwm sim los ua ntej Tub Nuj yog tus xub loj thiab paub tab zog, tsis ta li xwb Tub Nuj yog tus uas nyiam ncaim Niam thiab Txiv, Kwv Tij thiab lub zej zos mus kawm deb, hos Nkauj Zuag loj tuaj Nkauj Zuag yog ib tug uas nyiam kawm ze ntawm zos nrog Niam nrog Txiv nyob. Nkawv leej twg loj tuaj lo tsuas yog rau siab ntso rau txoj kev kawm xwb, thiab yeej tsis tau xav txog tias txoj kev hlub yog dab tsi thiab zoo li cas li. Kev kawm xyoo ntawv muab los sib tw tag Tub Nuj rov qab los saib Tub Nuj Niam thiab Txiv lawv. Vim tias yog lub caij so kev kawm ntawv lawm, Tub Nuj rov los txog tsev tsi tau muaj pe tsawg hnub tom qab, muaj ib hnub tag ib tsoom Tub Ntxhais hluas suav daws mus ua si koom siab ua ke rau ib qho uas nyob deb ntawm zos. Hnub ntawv Tub Nuj thiab Nkauj Zuag nkawv tau mus ua si koom siab ua ke, hnub ntawv sij hawm 11 teev 15´ thaum sawv ntxov, nkawv tau los sib tham ua si ua ke raws li nkawv txoj kev sib paub uas nkawv tau nyob ua zej ua zos ua ke xwb. Nkawv sib tso dag ua si hais txog nkawv ob txoj kev kawm thiab txhuas txoj kev lom zem yav tag dhau los, sij hawm ntawv Nkauj Zuag tau nug Tub Nuj tias: Tub Nuj! Nyob rau hauv koj lub neej thiab koj txoj hau kev yam uas koj ntshaw thiab xav tau tshaj plaws yog dab tsi xwb os leej nus Tub Nuj? Tub Nuj kuj teb Nkauj Zuag tias: Nkauj Zuag! Yam uas kuv ntshaws thiab xav tau tshaj plaws mas kuv tsuas xav tau ib txoj kev ywj pheej, nyob kaj siab lug, muaj noj muaj hau zoo thiab muaj txoj kev txawj ntse li luag xwb os Nkauj Zuag. Sij hawm ntawv Tub Nuj lo kuj tau nug Nkauj Zuag tias:Es uas li koj ne! Leej muam Nkauj Zuag! Yam tshwj xeeb tshaj uas koj xav tau thiab lub siab ntshaw tshaj plaws hauv koj lub neej ne yog dab tsi thiab os? Nkauj Zuag teb Tub Nuj tias:Tub Nuj! Li ntawm kuv los yeej xav tau ib yam li koj thiab os leej Nus, tab si kuv paub zoo tias kuv Niam, kuv Txiv nkawv tsuas yug tau kuv lub cev, tsuas yug kuv loj xwb tsis yug laus yam uas tshwj xeeb thiab kuv ntshaws tshaj plaws mas yog kuv tsuas xav tau ib txoj kev hlub los ntawm ib tug tib neeg twg uas hais lus sib nkag siab, es txawj sib txhawb lub dej siab rau txoj kev kawm es sib hlub tiag tiag mus kom txog hnub kawg xwb os Tub Nuj. Dhau ntawv los Tub Nuj xav tsis tawm tias yog vim li cas hnub ntawv Nkauj Zuag lam hais tau ob peb lo lus li ntawv.Txij li hnub ntawv los mus txawm tias Tub Nuj thiab Nkauj Zuag nkawv nyob koom ib lub zos ua ke kiang los Tub Nuj yeej xav tsis txog tias yuav mus nrog Nkauj Zuag nyob tham ua si tso dag li thiab.Dhau ntawv los xyoo tshiab rov txog lub caij rov pib kawm ntawv dua Tub Nuj yuav rov qab mus kawm yam xav tsis txog dab tsi li, txog ntua hnub Tub Nuj sawv kev mus kawm kiag tag kis ntawv pom Tub Nuj ib tug Phooj ywg muab tau ib tsab ntawv rau Tub Nuj thiab hais rau Tub Nuj tias: Npawg Nuj! Nag hmo kuv mus saib kuv tus hluas nkauj es kuv ntsib kuv tus hluas nkauj nws ib tug viv ncaus, nws faj me ntsi lus rau kuv tias hnub no kom kuv pab hais rau koj ua ntej thaum koj yuav rov mus kawm tias tag thaj tsam ze ntawm peb lub zos no hav Zoov dav thiab Ntoo ntau kawg nkau tab si yeej muaj ib tsob siab thiab ntsuab tshaj plaw cov, es koj mus lawm lo yeej muaj ib tug neeg nyiag nyiam koj heev thiab xav faj lub siab nrog koj mus thiab no nawb es nws faj tau tsab ntawv no kom kuv pab nqa los rau koj tsis paub tias xyov nws yuav hais dab tsi rau koj os Npawg! Es mus muaj sij hawm no ho rov qab los saib peb thiab os nawb. Dhau ntawv Tub Nuj rov tuaj mus txog ntua chaws kawm li qub mam li muab tsab ntawv los qhib saib kuj yog Nkauj Zuag sau, nyob hauv tsab ntawv Nkauj Zuag sau tias: Thov txim ntau os Tub Nuj! Zaum no yog zaum xub xub thawj ntawm kuv uas tau sau tsab ntawv no tuaj rau koj tus uas yuav ncaim peb suav daws rov qab mus kawm nyob ib qho es koj mus rau rau siab kawm nawb es muaj caij no ho rov qab los saib peb thiab os leej Nus. Qhov uas tshwj xeeb tshaj plaw mas yog cov lus Nkauj Zuag sau tias:Tub Nuj! Los txog hnub no kuv xav tsim ib txoj kev phooj ywg lo yog ib txoj kev sib hlub nrog koj mus lawm yav tom ntej puas tau os? Es yog tsis xav li cas thiab no ho sau ntawv rov qab mus saib Nkauj Zuag tus nyob tom qab thiab os nawb. Dhau ntawv los Tub Nuj kawm ntawv ntau heev ua rau Tub Nuj tsis muaj sij hawm rov qab los mus saib Nkauj Zuag li.Lub hli tom qab Tub Nuj thiaj li sau ib tsab ntawv rov mus saib Nkauj Zuag, Tub Nuj sau teb Nkauj Zuag tias: Leej muam Nkauj Zuag! Zoo siab kawg rau koj tsab ntawv os, koj txhuas los lus kuv to taub zoo lawm; kuv lo ib yam thia tsab ntawv no lo yog thawj thawj tsab ntawv ntawm kuv sau tuaj rau koj thiab, kuv lo txaus siab rau koj ib yam thiab, koj lo yog thawj thawj tus hluas nkauj uas kuv nyiam raug thiab txaus siab txais tos los ua tus hlub hauv kuv lub siab ntsw mus ib sim thiab os Nkauj Zuag, ntshe yuav txog caij noj peb caug thiaj li yuav tau rov los os nawb, es yuav noj peb caug rau thaum twg no thov koj sau ntawv mus qhia kuv thiaj li paub los mog.Dhau ntawv los ob lub hli tom qab uas yog yuav txog peb Hmoob lub sij hawm noj tsiab peb caug rov txais tau Nkauj Zuag ib tsab ntawv sau qhia Tub Nuj tias: Tij laug Nuj! Twb yuav noj peb caug es thov koj rov qab los nrog peb noj peb caug os nawb, kuv zoo siab heev yog tias koj los, es hnub twg koj los txog tsev lawm muaj dab tsis lo wb mam li tham os. Tau tsis muaj pe tsawg hnub tom qab xwb txog caij noj peb caug lawm tiag Tub Nuj npaj hnab nce tsheb rov qab los mus nrog Tub Nuj Niam thiab Txiv lawv noj peb caug yam zoo siab hlo. Thaum los txog tsev Tub Nuj Niam thiab Txiv tag tsoom Kwv Tij tag txhuas leej lawv muaj lus zoo siab hlo. Vim tias ib xyoo tshiab tshiab tig rov los txog dua ib zaug, hos Kwv Tij suav daws lo kuj los txhij los txhuas. Hos Tub Nuj lo kuj muaj lus zoo siab kawg li thiab, vim tias lub xyoo ntawv Tub Nuj lo kuj npaj lub siab yuav nrog luag pib kom muaj ib txoj kev hlub mus lawm yav tom ntej thiab. Lub xyoo ntawv Nkauj Zuag thiab Tub Nuj nkawv thiaj mam li pib muaj txoj kev sib tham rau nkawv txoj kev ua Nkauj ua Nraug lo yog nkawv thiaj mam li pib muaj nkawv txoj kev sib hlub ua ke tiag. Tsiab peb caug xyoo ntawv nkawv lub sij hawm tau los sib ntsib 5 hnub thiab 6 hmo xwb twb txog caij nkawv rov qab mus kawm ntawv lawm thiab. Sij hawm npaum li ntawv hnub lo twb zoo li tsis hnov ntev kiag li zoo li npau suav ib vuag duas xwb nkawv leej twg lo nyias twb yuav rov qab mus kawm nyias, txawm tias nkawv yuav tsis tau xav sib nrug lo vim lub sij hawm tsis zoo li xav pub tau rau nkawv. Dhau ntawv los hnub tom qab uas yog hnub Tub Nuj yuav sawv kev rov qab mus kawm tiag tiag tag kis ntawv pom Nkauj Zuag nqa ib rev paj dawb dawb tuaj cev rau Tub Nuj ntawm chaws tos tsheb thiab ntxuag lo lus tias:Tij laug Nuj! Koj yuav rov qab mus kawm kuv tsis muaj dab tsi, kuv zoo siab muab rev paj no hawm ua kev zoo siab nrog lub xyoo tshiab no rau koj xwb lo koj txhob xav li cas mog. Es mus rau rau siab kawm tsis txhob mus ua tej yam uas Nkauj Zuag siab tsis kheev nawb.Lo lus uas Tub Nuj nco ntsoov rau hauv siab zoo siab hlo mus kawm mas yog lo lus Nkauj Zuag hais tias: Tub Nuj! Tiam no ces kuv yuav tsis thov ncaim ntawm koj lub xub ntiag mus qhov twg li lawm os, es txhuas txhuas sij hawm koj nco ntsoov tias kuv nyob nrog nraim koj ib yam li rev paj no os mog kuv me nplooj siab hlub! Es mus tsuag tsuag rov qab los nawb kuv nyob tom qab no kuv nco nco koj heev mog kuv me leej Nus zoo! Dhau ntawv tsis muaj pe tsawg nathi tsheb khiav yeev los nre nkau Tub Nuj nce loo saum tsheb tsa tes baiv bai (bye-bye) rau Nkauj Zuag thiab Tub Nuj Niam lawv txhuas tus ntawm chaws tos tsheb. Dhau ntawv Tub Nuj rov tuaj mus txog ntua chaws kawm li qub, xyoo ntawv Tub Nuj tuaj mus kawm Tub Nuj muaj txoj kev kho siab zog txhuas zau yav dhau los. Vim tias Tub Nuj mus nyob ib leeg rau ib qho tau tso Nkauj Zuag nyob ib leeg tom qab ua lub chaws nco. Suav txij li lub xyoo ntawv los mus Tub Nuj thiab Nkauj Zuag nkawv txoj kev sib nyiam, sib hlub tsua muaj suav hnub suav loj thiab dav zuj zus zoo tam li txoj kev uas suav hnub suav taug mus deb zus dav zus thiab zoo tam li tus dej uas ntw mus deb zus dav zuj zus mus lawm xwb. Txij li thaum ntawv los mus tsis hais Tub Nuj lo ib yam nkau li Nkauj Zuag, txawm tias nkawv yuav tsim tau muaj txoj kev Nkauj kev Nraug tau zoo npaum li ntawv lo nkawv ob txoj kev kawm yeej mus tau zoo npaum li ntawv mus nrog nraim thiab. Vim tias nkawv leej twg lo yog neeg kawm yeej txawj tsim txoj kev hlub mus rau qhov zoo tsis pub kom muaj teeb meem, kev puas tsuaj rau nkawv ob leeg.Lub xyoo ntawv nkawv pib tau txoj kev hlub, kev Nkauj Nraug tshiab tshiab nkawv sib nrug ib leeg mus nyob ib qho deb lawm ua rau nkawv muaj lus sib nco sib tshuas kawg nkau. Tab si txawm tias nkawv ib leeg nyob ib qho deb me ntsi lawm lo nkawv txoj kev sib nco yeej nyob rawv hauv nkawv tsab ntawv mus-los ua rau nkawv yeej hnov moo nraim txhuas txhuas hli, cuag li nkawv twb tau nyob ua si ua ke sib pom lawm. Txawm tias nkawv yuav muaj kev sib nco npaum li ntawv lo, nkawv nyia yeej rau siab ntso rau nyia txoj kev kawm txhuas txhuas sij hawm mus nrog nraim thiab, tshaj plaw mas yog Tub Nuj, vim tias Tub Nuj yog tus uas tau txiav txim siab ncaim Niam thiab Txiv mus kawm deb. Xyoo ntawv Tub Nuj lo muaj txoj kev hlub los txhawb lub dej siab lawm thiab ua rau Tub Nuj muaj siab kawm ntawv heev, ua rau Tub Nuj txoj kev kawm lub xyoo ntawv tau zoo tshaj txhuas txhuas lub xyoo dhau los. Kev kawm xyoo ntawv muab los sib tw tag rau lub qab 6 hli ntuj Tub Nuj kuj tau zoo raws lub siab nyiam tshaj txhuas txhuas leej.Dhau ntawv los tim 13 lub 7 hli ntuj Tub Nuj thiaj mam li tau rov qab los mus saib tsev lo yog mam tau rov qab los mus cuag Nkauj Zuag. Tub Nuj rov qab los txog tsev hmo ntawv Tub Nuj nqa ib qho khoom plig mus ua kev zoo siab rau Nkauj Zuag lo yog mus cuag Nkauj Zuag. Thaum mus sib pom kiag Nkauj Zuag ua lub me ntsej muag luag ntxhi kab lia luag nyav ntxuag lo lus hu mos nyoos tias: Nyob zoo os Tij laug Nuj! Koj twb los txog lawm lov? Cas ntev ua luaj koj mam li los kuv nco koj heev li na! Sij hawm ntawvTub Nuj lo kuj teb Nkauj Zuag tias: Nyob zoo os! Kuv twb rov qab los txog lawm os Nkauj Zuag! Thov txim ntau os Nkauj Zuag twb vim yog kuv tseem sib tw ntawv tsis tauxaus es thiaj li tsis tau rov los xwb os Nkauj Zuag, kuv los nco koj ib yam nkau li thiab! Nkawv sib tuav tes kiag nkawv ob leeg mam li nkag mus hauv Nkauj Zuag lawv tsev, sij hawm ntawv Nkauj Zuag Niam thiab Txiv lawv lo kuj hus Tub Nuj zom zaw tias: Yog koj sav Tub Nuj! Koj twb los txog lawm lov! Tub Nuj lo kuj teb Nkauj Zuag Niam lawv tsev neeg yam ntsej muag luag ntxhi tias:Twb yog kuv kawg os kuv twb los txog lawm kawg mav! Es ib ntu no nej noj, nyob li cas thiab ua dab tsi lawm thiab xwb os? Sij hawm ntawv Nkauj Zuag Niam teb Tub Nuj tias: Peb suav daws nyob zoo tsis muaj dab tsi thiab os, tsuas yog niaj hnub mus tej nyuag hauj lwm ib qho ib me ntsi hauv tej nyuag liaj teb xwb thiab os Tub Nuj. Rov los txog lawm muaj dab tsi lo Nkauj Zuag neb mam li tham neb kom txaus siab ib chim koj mam li mus tsev es peb cov laus peb tsaug zog lawm es peb mus pw lawm os nawb. Dhau ntawv los Nkauj Zuag muab ib lub Rooj los rau nkawv zaum, sij hawm ntawv Tub Nuj mam li muab qhov khoom plig cev rau Nkauj Zuag sab tes ntxuag lo lus tias: Nkauj Zuag! Zaum no wb sib ncaim ntev kawg li mam tau rov sib cuag, kuv npaj tsis tau ib yam dab tsi los rau koj kom tsim nyog qhov uas wb sib nco, sib tshuas, kuv npaj tau qhov khoom plig me me no puag pem tsev kawm los ua kev zoo siab, txhawb lub dej siab rau koj xwb lo txhob xav li cas nawb mog.Nkauj Zuag muaj lus zoo siab heev Nkauj Zuag txais nkau mus puag thiab ntxuag los lus hais rau Tub Nuj tias: Tsis ua li cas li os Tij laug Nuj! Tsuav tias koj tseem nco thiab hlub hlub kuv ib yam li qub xwb ces zoo zoo kuv siab heev li lawm os Tij laug Nuj! Es ua koj tsaug ntau ntau nawb. Sij hawm ntawv Nkauj Zuag los kuj hais rau Tub Nuj tias: Tus hlub! Nkauj Zuag twb npaj tsis tau ib yam dab tsi rau nws kom tsim nyog li ne? Tab si txhob xav li cas os nawb, Nkauj Zuag zoo siab yuav muab Nkauj Zuag txoj kev hlub kom tag nrho rau nws ib leeg xwb no mog.Sij hawm ntawv Tub Nuj thiaj teb Nkauj Zuag tias: Tsis ua li cas li os Nkauj Zuag, koj yog ib tug uas kuv hlub tshaj plaws hauv siab txawm tias koj yuav muab tau dab tsis thiab tsis tau ua kev zoo siab rau kuv lo kuv yeej tsis xav li cas, kuv yeej yuav ua kom tau txhuas yam txhawb koj lub siab ua kev zoo siab rau koj mus lawm yav tom ntej os nawb, kuv lo ib yam thiab kuv txoj kev hlub kuv yuav muab kom tag nrho rau koj ib leeg ib yam nkau thiab, txoj kev hlub kuv yuav tsis pub koj mus ntshaw luag lwm tus li os Nkauj Zuag. Sij hawm ntawv Tub Nuj mam li nug Nkauj Zuag tias: Kawm ntawv li cas lawm xwb os, es sib tw tag los no kuj tau zoo li wb ob lub siab xav thiab puas yog nab? Nkauj Zuag teb Tub Nuj tias: Tij laug! Kuj tau nrog luag thiab mad, tab si vim nco nco koj heev li es sib tw zaum no tsis tshua tau zoo heev os zoo li tau zeeg 3 xwb os. Sij hawm ntawv Tub Nuj luag ntxhi thiab teb Nkauj Zuag tias:Zoo kawg li lawm os Nkauj Zuag! Kev kawm ces yeej nyuaj, yog li ntawv nws kuj muaj zaum tau zoo thiab yeej muaj thaum tsis tau zoo raws li lub siab xav li no la mad! Thaum kuv tseem kawm li tsam no koj no lo yeej ib yam nkau tej zaum kuj tau zoo li lub siab xav thiab tab si yeej muaj tej zaum tau tsis zoo ib yam nkau thiab, tau zoo li no ces nws yeej zoo kawg li lawm os Nkauj Zuag. Qhov tseem ceeb ces yog wb txoj kev sib hlub, wb yuav tsum tsim wb txoj kev sib hlub kom loj thiab zoo tshaj no mus ntxiv es thiaj li yuav txhawb tau wb ob lub siab es wb thiaj li yuav kawm tau zoo tshaj nod mus tom ntej os Nkauj Zuag. Sij hawm ntawv Nkauj Zuag lo kuj nug Tub Nuj ntxiv tias: Es uas li koj ne Tij laug! kuv muaj txoj kev cia siab heev rau koj ib leeg xwb es sib tw tag los no puas tau zoo raws li wb lub siab xav thiab os Tij laug Nuj? Tub Nuj teb Nkauj Zuag tias: Li ntawm kuv tseem paub tsis tau meej os Nkauj Zuag! Vim tias nyuam qhuav sib tw tag xwb es kuv nco nco koj thiab maj los pom koj heev li es kuv cia li los lawm xwb, raws li xav xwb mas tej zaum nyaj yuav tau nrog luag thiab os, cias ob hnub tom ntej no mam li rov mus saib npe seb puas tau lo tsis tau thiab ho tau zoo li cas no mam li qhia tau qhov tseeb rau koj os Nkauj Zuag! Nkauj Zuag lo kuj hais ntxiv tias: Kuv ntseeg tias yeej yuav tsum tau zoo xwb os Tij laug Nuj! Yog koj lawm kuv yeej cia siab heev li, vim tias koj yog ib tug uas ib txwm kawm ntawv tau zoo heev, tej zaum mas ntshe xyoo tshiab yuav los no xwb koj twb yuav tau ncaim kuv mus kawm txawv teb chaws lo tsis paub! Vim tias yog koj tau ua yam twg lawm ces yeej yuav tsum tshwm sim mus rau qhov zoo xwb thiaj tag na! Tub Nuj txawm teb Nkauj Zuag tias: Nkauj Zuag! Qhov koj hais no ntshe nws tsuas yog wb txoj kev npau suav thiab ntshe nws tsuas yog wb txoj kev xav lawm xwb lauv! Thiab Tub Nuj txawm teb Nkauj Zuag ntxiv tias: Leej muam Nkauj Zuag! Ib tsam ces xyoo tshiab los no kuv cia li tau ncaim koj mus kawm txawv teb chaws deb deb kawg nkau nyob hauv peb lub zos no xwb laud! Sij hawm ntawv Nkauj Zuag teb Tub Nuj tias: Tis txhob lam hais dag dag li koj nawb piv txwv li tias yog koj hos yuav tau ncaim kuv mus kawm deb deb tiag ne, kuv ces kawg quaj quaj cia es leej twg yuav los hlub thiab so kuv lub kua muag ma lod? Sij hawm ntawv zoo li Nkauj Zuag lub kua muag twb yuav poob, Tub Nuj thiaj hais rau Nkauj Zuag tias: Nkauj Zuag! Kav liam wb tham lwm yam os nawb, tshuav ntau yam heev uas kuv tseem yuav hais qhia koj vim kuv mus tau ntau lub hli heev tsis tau los pom koj kuv nco koj heev li.Hmo ntawv nkawv sib tham yam lom zem thiab yam zoo siab kawg nkau lus sib nco muab los tham txhua, kev sib tshuas muab los tham ntxaw, ua rau nkawv leej twg lo muaj kev kaj siab lawm ntau kawg nyob rau hmo ntawv. Vim nkawv nyuam qhuav los sib cuag thiab ho yog nkawv lub caij so kev kawm ntawv lawm thiab. Dhau ntawv los tau ob hnub tom qab Tub Nuj rov mus saib npe seb kw ntawv ceeb toom npe tawm li cas, mus saib kuj pom Tub Nuj npe tawm nrog Tub Nuj ob peb tus phooj ywg tawm mus kawm txawv teb chaws raws nraim li Tub Nuj lub siab xav twj ywm tau tseg lawm tiag tiag, Tub Nuj rov qab los mus tsev yam zoo siab hlo. Dhau ntawv los mus muaj ib hmo Tub Nuj mam li tau rov qab mus nrog Nkauj Zuag nyob tham ua si hmo ntawv Tub Nuj mam li hais rau Nkauj Zuag tias: Nkauj Zuag ! Xyov kuv yuav hais lis cas rau koj os Nkauj Zuag, ntshe lub xyoo tshiab no kuv yuav tau ncaim koj mus kawm ib qho deb deb rau ib sab ntuj lo tsis paub os Nkauj zuag! Vim tias kuv twb rov qab mus saib npe los lawm, kuj pom npe tawm mus kawm deb raws nraim li koj lo lus hais hnub i os Nkauj Zuag! Thaum Nkauj Zuag hnov lo lus no kiag Nkauj Zuag muaj lus zoo siab heev hais txog li ntawm nkawv txoj kev kawm. Tab si Nkauj Zuag xav txog li ntawm nkawv txoj kev sib hlub Nkauj Zuag muaj lus tu siab heev thiab xav tias nkawv txoj kev sib hlub tseem tab tom pib lom zem mus zoo yam li tus dej uas tseem tab tom pib huam ntw suav hnub suav dav mus xwb cas tseem siv hos yuav tau sib ncaim ib leeg mus ib qho thiab. Sij hawm ntawv Nkauj Zuag tau hais ib lo lus rau Tub Nuj tias: Pab koj zoo siab kawg os Tij laug Nuj! Tab si mas ntshe ……! Sij hawm ntawv Nkauj Zuag lub kua muag ntw sis pw ib kiag ntawm Tub Nuj xub ntiag thiab hais tias: Tij laug Nuj! Nco koj ua luaj li no yav tag dhau los koj mus kawm nyob pem nroog pev xwb txhuas txhuas zau kuv twb laj laj tos txog hnub koj rov qab los, zaum no es koj tseem yuav ncaim kuv mus kawm deb deb rau ib sab ntuj li no lawm thiab es kuv nyob kuv yuav ua li cas nco koj mus txog hnub twg os Tij laug Nuj! Sij hawm ntawv Tub Nuj cev tes mus so kiag Nkauj Zuag lub kua muag thiab ntxhuag lo lus hais rau Nkauj Zuag tias: Tsis txhob quaj kuv hlub koj os Nkauj Zuag! Koj ua siab loj mog tseem paub tsis tau tseeb xyov puas tseem tau mus thiab os, txawm tias ho tau mus lawm tiag lo tsis yog mus dab tsi mus kawm xwb koj ua siab loj os nawb, thiab lub sij hawm lo tseem tshuav ntev mam li tau mus es muaj dab tsi lo wb hos tham mus ntxiv os. Txij li hnub ntawv los nkawv ob leeg tsis hais Tub Nuj lo ib yam li Nkauj Zuag, nkawv muaj lus sib nco, sib tshuas heev, ib hnub twg nkawv tsis tau sib pom ib zaug yeej tsis zoo nkawv siab.Vim tias ib hnub dhau mus lawm zuj zus tshuav tsis ntev lawm xwb nkawv twb yuav tau sib nrug ib leeg mus ib qho yam tsis sib pom. Dhau ntawv los Tub Nuj lo kuj tsis xyeej lub sij hawm mus nrog Nkauj Zuag nyob tham ua si li thiab vim tias Tub Nuj tuaj mus khiav Tub Nuj tej ntaub ntawv npaj mus kawm deb. Lub sij hawm ntawv nkawv leej twg lo zoo li muaj kev nyuaj siab kawg li yam qhia tsis tau rau leej twg paub.Vim tias muaj ntau txoj kev xav, kev nyuaj siab heev tsis hais Tub Nuj lo ib yam nkau li Nkauj Zuag. Lub sij hawm ntawv yog lub sij hawm uas nkawv muaj kev sib nco, sib tshuas tshaj plaw lo zoo li lub sij hawm twb qee tsis muaj pub rau nkawv sib tham, sib cuag li thiab. Dhau ntawv los lub sij hawm ib hnub dhau mus lawm zuj zus hmo ta hmo tuaj, hli dhau hli tsis nco qab ntev twb rov txog lub caij uas rov qhib kev kawm tshiab los yog twb yuav txog lub sij hawm uas Tub Nuj yuav ncaim mus kawm deb deb. Lub sij hawm ntawv haj yam ua rau nkawv muaj kev sib tshuas thiab muaj kev nyuaj siab tshaj plaws. Vim tias kev kawm lo twb yuav txog caij uas nkawv nyias yuav rov mus kawm nyias hos nkawv txoj kev hlub lo twb ho yuav tau sib nrug mus yam ntev niaj ntau xyoo uas yog yuav tsis tau sib pom txog li 7–8 lub xyoo nkau. Dhau ntawv los lub hli tom qab uas yog hnub tim 28 lub 8 hli ntuj; Tub Nuj Niam thiab Txiv, tag tsoom Kwv Tij lawv tau ua ib rooj mov noj koom siab koom ntsw ua ke, uas yog rooj mov noj cim ntsej cim muag cia ntawm lawv txhuas leej txhuas tus. Hnub ntawv tag Tub Nuj ib tsoom Phooj ywg uas sib paub lawv tau mus koom Tub Nuj rooj mov ua kev zoo siab thiab txhawb lub dej siab rau Tub Nuj tus uas yuav ncaim mus kawm deb deb. Hnub ntawv Nkauj Zuag thiab Tub Nuj nkawv tau los zaum noj mov ua ke cim ntsej cim muag tseg yam ntsej muag luag ntxhi, tab si mas hauv nkawv ob lub siab mas nws twb quaj li dhi tsis xav sib nrug li. Sij hawm ntawv nkawv tau noj mov zaum ua ib ke Tub Nuj hais rau Nkauj Zuag tias: Txawm li cas tau lo xij! Koj nyob koj rau rau siab kawm ntawv nawb mog, es zaum no wb tau los noj mov ua ib ke li no dhau nov mus ces ntshe wb yuav tsis muaj sij hawm rov tau los noj mov ua ke li no lawm, zaum no ces wb noj cim ntsej cim muag cia mog es xyov yuav rov txog hnub twg, lub xyoo twg es wb thiaj li mam rov tau sib ntsib, tau zaum ua ib ke li no dua os, ntshe txhuas txhuas lub xyoo yuav tshuav koj ib leeg nyob nrog wb tsoom phooj ywg lawm xwb, es koj nyob koj rau rau siab kawm ntawv tsis txhob lam tso txoj kev kawm tseg mog. Es thaum twg muaj sij hawm lo kuj ho tuaj saib kuv Niam thiab kuv Txiv lawv hauv peb lub tsev no thiab os Nkauj Zuag. Dhau ntawv los hnub tom qab uas yuav txog hnub Tub Nuj sawv kev mus kawm tiag tiag, hmo ntawv Tub Nuj mus nrog Nkauj Zuag nyob daws txoj kev sib nco, sib tshuas. Hmo ntawv nkawv sib tshuas tshaj plaw txhuas txhuas zau yav dhau los, hmo ntawv Nkauj Zuag tau hais rau Tub Nuj tias: Tij laug Nuj! Wb txoj kev sib tham sib pom txawm yuav tshuav 1 hnub ntxiv lawm xwb es koj txawm yuav mus tiag tiag li lawm lov! Es uas li koj mus koj puas hlub kuv lawm thiab puas tseem xam muaj kuv nyob nrog lub kua muag tom qab no lawm thiab os? Cas wb nyuam qhuav los sib nyiam, sib paub ua ke twb tsis tau txaus, koj tseem siv yuav ncaim kuv mus deb deb li no thiab es kuv nyob kuv yuav ua li cas nco koj mus txog hnub twg es koj thiaj li mam kawm tiav rov qab los os? Kuv me siab tias tsam koj mus es koj kawm tag koj tsis rov qab los nyob peb teb chaws no lawm es koj yuav kom kuv ua li cas os Tub Nuj? Nco koj ua luaj li no koj mus lawm kuv tsis xav ua neeg nyob li lawm os tij laug Nuj! Thaum Nkauj Zuag lo lus xaus nkau Nkauj Zuag lub kua muag poob nthav quaj nyo nri rau ntawm txaj yam tu siab heev thiab ntsia yam txaus hlub kawg nkau. Sij hawm ntawv Tub Nuj rub kiag Nkauj Zuag los puag rau hauv xub ntiag thiab cev tes mus so Nkauj Zuag lub kua muag ntxuag lo lus hais rau Nkauj Zuag tias: Tsis txhob quaj os mog Nkauj Zuag! Kuv lo ib yam thiab os nco nco koj ua luaj li no es xyov yuav ua li cas kuv thiaj li yuav mus kawm tag rov qab los. Txawm li cas tau lo zoo koj nyob koj ua siab loj tsis txhob tham tham hluas nraug, txhob muab txoj kev hlub nrog luag saib loj mog, es rau rau siab kawm ntawv nyob tos kuv nawb mog. Nkauj Zuag koj nco ntsoov tias tiam no hauv kuv lub neej tsua txais hlub koj ib leeg lawm xwb os Nkauj Zuag! Hmo ntawv, tsis hais Nkauj Zuag lo ib yam li Tub Nuj nkawv leej twg lo muaj lus sib nco sib tshuas kawg nkau li ua rau nkawv ob leeg lub kua muag ntw sis yam tsis muaj leej twg paub, hmo ntawv nkawv txoj kev Nkauj, kev Nraug, kev hlub nkawv tau muab cog cia yam ruaj nree tseg kom ua lub siab ntev ntev sib tos tsis hais Nkauj Zuag tus uas nyob rov tom qab lo ib yam li Tub Nuj tus uas yuav ncaim mus kawm deb deb. Dhau ntawv los hnub tom qab uas yog kiag hnub Tub Nuj sawv kev kiag mus kawm hnub ntawv Tub Nuj sawv ntxov ntxov mus saib Nkauj Zuag thiab Nkauj Zuag Niam lawv ua zaum kawg nkau uas Tub Nuj yuav sawv kev mus tiag tiag cim ntsej cim muag cia ua zaum kawg nkau nyob rau lub xyoo ntawv. Thaum mus txog ntua ntawm Nkauj Zuag Tub Nuj lo lus uas xub xub hais rau Nkauj Zuag ua ntej tshaj plaws tias:Leej muam Nkauj Zuag mam nyob zoo koj nawb mog! Hnub no kuv sawv kev mus lawm tiag tiag es koj nyob tsis txhob lam tawm ntawv rau rau siab rau koj txoj kev kawm es koj thiaj li yuav tswj tau lub siab nyob tos kuv mog. Es tsis txhob quaj ua siab loj es kuv tus mus lawm lo thiaj li tsis nyuaj nyuaj siab mog, txawm tias kuv yuav mus deb deb npaum li twg lawm lo mus kawm xwb koj ua siab loj rau rau siab kawm ntawv nyob tos kuv nawb mog, es koj nco ntsoov tias yeej yuav muaj ib hnub twg kuv yuav rov qab ua lub me ntsej muag luag ntxhi rov qab los cuag koj, los puag koj rau hauv kuv lub xub ntiag mus kom tag ib sim no os mog Nkauj Zuag tus kuv hlub! |
Es ib pliag pom kev seb koj puas khoom mus saib kuv nce tsheb mus os nawb. Sij hawm ntawv Nkauj Zuag tu siab heev xav tsis tawm dab tsi li ua lub me ntsej muag ntshau li ntshov kua muag ntw sis Nkauj Zuag tsuas teb tau tib lo lus tias: Tau kawg os tij laug Nuj! Dhau ntawv los Tub Nuj rov qab los txog hauv tsev tag Tub Nuj Niam thiab Txiv lawv twb npaj nra, khoom txhij tag rau Tub Nuj npaj xa Tub Nuj mus nce tsheb lawm xwb. Dhau ntawv los lawv suav daws nqa nra mus txhij rau ntawm chaws tos ntsheb sij hawm ntawv pom Nkauj Zuag nrog Nkauj Zuag ib tug Viv ncau tuaj yam ntsej muag nro li ntshi tuaj txog ntua ntawm Tub Nuj, Nkauj Zuag lub kua muag poob nthav tam sim ntawv ntxuag lo lus hais rau Tub Nuj tias: Leej Nus! Zaum no txawm yuav mus tiag tiag li lov! Mus lawm no ces rau rau siab kawm tsis txhob ua dog dig nawb, kuv lo ib yam li koj Niam thiab koj Txiv lawv peb txhuas leej txhuas tus nyob tom qab no lo peb yeej muaj kev cia siab heev rau koj ib leeg xwb, es mus txog chaws lawm hos sau ntawv rov qab los saib peb suav daws thiab os nawb. Lo lus uas Tub Nuj nco ntsoov rau hauv siab ua ib siab tuaj mus kawm mas yog lo lus uas Nkauj Zuag hais tias: Tub Nuj! Los txog rau hnub no koj ua siab loj txiav txim siab mus kawm nawb Tub Nuj! Txawm tias koj mus deb deb lawm lo kuv tus uas nyob tom qab no lo yuav rau rau siab kawm ib yam thiab, txoj kev hlub kuv yuav tsis pub kom muaj nrog luag lwm tus, kev phooj ywg kuv yuav tsis nrhiav tiam no twb los nyiam tau koj lawm kuv yuav txiav txim siab ua lub siab ntev kawm nyob tos ntsoov koj ib leeg xwb, kuv yuav ua lub siab dawb paug ncaj ncee nyob tos kom txog hnub koj kawm tiav kuv kawm tag es wb los sib sau ua txij ua nkawm sib hlub sib puag mus kom kawg wb ob leeg txoj sia os Tij laug Nuj tus kuv tshuas, thiab lub sij hawm ntawv Nkauj Zuag muab tau ib tsab ntawv cev rau Tub Nuj thiab ntxhuag lo lus hais ntxiv tias:
Tub Nuj! Los txog hnub no koj yuav ncaim peb suav daws mus kawm deb deb kawg lub ntsua muag rau ib sb ntuj, kuv uas yog tus koj hlub tsis muaj ib yam dab tsi kom tsim nyog ua kev zoo siab lo yog txhawb lub dej siab rau koj kuv zoo siab muab tsab ntawv no rau koj es koj mus txog chaws lawm koj mam li muab thuav saib seb muaj dab tsi nyob hauv os nawb. Sij hawm ntawv Tub Nuj lub ncauj hais tsis tau li cas rau Nkauj Zuag li, vim tias yog Tub Nuj lub suab lus tawm ces Tub Nuj lub kua muag poob xwb Tub Nuj tsuas hais tau ob peb lo lus rau Nkauj Zuag tias: Ua tsaug ntau ntau os Nkauj Zuag! Thiab lo lus uas Nkauj Zuag nco ntsoov rau hauv siab zoo siab hlo nyob mas yog lo lus uas Tub Nuj tau hais kawg nkau rau Nkauj Zuag tias: Nkauj Zuag! Txawm yuav pe tsawg xyoo lo koj ua siab ntev kawm nyob tos kuv nawb, tiam no nyob hauv kuv lub neej tsuas pub muaj koj ib leeg los nyob lawm xwb os Nkauj Zuag! Tos kuv ho txiav txim siab ncaim koj, ncaim kuv Niam thiab kuv Txiv nej suav daws mus kawm deb deb li no lo vim yog peb lub neej tseem poob qab deb thiab tsis txawj ntse li luag tej,es tsam tom ntej no peb tsis muaj leej twg yuav los pab peb lo yog los txhim kho peb lub neej, es txawm tias kuv yuav nco, yuav tshuas koj nrog rau kuv Niam thiab kuv Txiv nej npaum li twg lo ntshe kuv yuav tau txiav txim siab ncaim nej suav daws mus kawm, koj ua siab loj kuv mus nyob muaj chaws lawm mam li sau ntawv rov qab los rau koj thiab kuv Niam nej os nawb, es koj nyob tseg koj lub cev nkauj xwb nyob tos kuv ib leeg xwb nawb mog Nkauj Zuag.Dhau ntawv los tsis muaj pe tsawg teev xwb tsheb khiav yeev los lawm tiag tiag sij hawm ntawv Nkauj Zuag lub kua muag ntw sis lub siab yeej tsis xav kam Tub Nuj ncaim mus kiag li tab si vim tias yog txoj kev kawm lawm es Nkauj Zuag thiaj lam ua ib siab lawm xwb, sij hawm thaum lub tsheb los nre nkau Tub Nuj cev tes mus so kiag Nkauj Zuag 2 lub kua muag , nkawv sib tuav tes kiag ua zaum kawg nkau nyob rau lub xyoo ntawv thiab Tub Nuj tuav txhuas leej txhuas tus tes ua zaum kawg nkau Tub Nuj nqa loo hnab nce loo saum tsheb sij hawm ntawv Nkauj Zuag lo lus uas hais kawg nkau rau Tub Nuj tias: Tus kuv hlub! Mam mus zoo koj mog nco ntsoov tias kuv hlub koj! Tsheb khiav yeev nkawv sib tsa tes ua baiv bai (bye-bye) ua zaum kawg nkau ntawm lawv txhuas leej txhuas tus nyob rau lub xyoo ntawv. Dhau ntawv los Tub Nuj ua ib siab tuaj mus nce dav hlau. Ib sij huam xwb Tub Nuj mus txog ntua txawv teb chaws lawm tiag tiag Tub Nuj mus nyob ib leeg kho siab li khuav zoo tam li tus neeg ntsuag nos xwb ua hnub ua hmo nco Nkauj Zuag thiab Tub Nuj Niam thiab Txiv lawv txhuas leej txhuas tus nyob rov tom qab muaj ib hmo Tub Nuj mam li muab Nkauj Zuag tsab ntawv coj los thuav saib seb muaj dab tsi nyob hauv muab qhib saib pom ib qhov khoom me me tab si mas nws muaj nuj nqi thiab tsim nyog heev nrog rau ib daim nplooj ntawv uas Nkauj Zuag sau tag txhuas yam ua kev zoo siab rau Tub Nuj lo yog hais txog ntawm nkawv txoj kev hlub, nyob hauv Nkauj Zuag tsab ntawv Nkauj Zuag sau tias: Tub Nuj! Txaus siab, nyiam thiab hlub koj npaum li no lawm koj ua siab loj mog koj nco rawv rau hauv koj siab tias Nkauj Zuag yuav tsis thov ncaim ntawm Tub Nuj txoj kev hlub mus rau leej twg li yuav nyob tos kom tau xwb no mog leej Nus. Lub xyoo ntawv Tub Nuj mus nyob ib leeg kho siab li khuav tsis muaj leej twg pom tsis muaj leej twg paub, ua hnub ua hmo nco txhuas leej txhuas tus tom qab tshwj xeeb tshaj plaw mas yog nco Nkauj Zuag heev, vim tias thaum Tub Nuj yuav ncaim mus Nkauj Zuag quaj heev ntshai ib tsam Nkauj Zuag lam muab mob tej. Dhau ntawv los mus Tub Nuj txoj kev kawm suav hnub suav kawm ntau thiab suav hnub suav kawm nyuaj zuj zus mus yam li txoj kev suav hnub suav taug mus deb zuj zus lawm xwb thiab vim Tub Nuj mus kawm deb deb heev ua rau Tub Nuj tsis muaj peev xwm yuav nrhiav tau lub sij hawm rov qab los mus saib tauTub Nuj Niam thiab Txiv lo yog rov qab los mus cuag Nkauj Zuag tsis tau. Thaum Tub Nuj mus nyob muaj chaws lawm Tub Nuj thiaj li sau ntawv thiab muab chaws nyob rov qab los mus qhia rau Nkauj Zuag thiab Tub Nuj Niam lawv kom paub tseeb tias Tub Nuj mus nyob li cas lawm tiag. Dhau ntawv los Tub Nuj thiab Nkauj Zuag nkawv txawm tias nkawv nyob deb deb ib leeg ib sab ntuj lawm lo nkawv txoj kev hnov moo yeej tsis tu ncua nyob rawv hauv tsab ntawb mus-los sib cuag txhuas hli txhuas xyoo cuag li nkawv ob leeg twb tau sib pom, sib cuag lawm, tab si mas nyob rawv hauv Nkauj Zuag txhuas txhuas tsab ntawv Nkauj Zuag yeej sau rawv tias: Tij laug Nuj! Nco koj ua luaj li no es kuv yuav ua li cas laj nyob tos txog hnub koj kawm tag rov qab los os Tij laug Nuj! Koj nyob deb deb lawm koj tsis paub kuv tus nyob tom qab no mas muaj coob leej coob tus, tus hais li cas rau kuv lo muaj, tus hais zoo lo muaj, tus hais phem lo muaj tshaj plaws mas yog ib tsoom tub ntxhais hluas lawv ib cov yeej tias kom kuv txhob nyob tos koj lawm kom kuv kav tsij nrhiav dua tus tshiab xwb, tus hais li cas lo muaj li os Tij laug Nuj, tab si txawm tias leej twg yuav hais npaum li cas lo kuv yuav tsis mloog, koj yeej paub zoo tias Nkauj Zuag hlub koj heev es koj yuav tsum ntseeg thiab tso siab rau koj tus Nkauj Zuag tias Nkauj Zuag yuav tsum ua kom tau raws li wb cov lus cog tseg, nyob txhuas txhuas lub sij hawmNkauj Zuag tsuas nco ntsoov koj lub xub ntiag xwb os tus neeg kuv nco! Txhuas txhuas lub xyoo txog nkawv lub caij so kev kawm Tub Nuj yeej xav rov qab los mus saib Nkauj Zuag thiab Tub Nuj Niam lawv kawg nkau li, Tub Nuj lub siab yeej tsis kheev cia Nkauj Zuag nyob ib leeg tom qab kiag li, tab si Tub Nuj paub zoo tias Tub Nuj lawv yog neeg txom txom nyem xwb tseem tsis tau muaj li luag tej es Tub Nuj Niam thiab Txiv lawv tsua pab tau Tub Nuj mus kawm xwb yuav pab tsis tau Tub Nuj rov los mus saib tsev txhuas xyoo thaum txog lub caij so kev kawm, vim li ntawv txawm tias Tub Nuj yuav nco thiab yuav tshuas Nkauj Zuag nrog rau Tub Nuj Niam thiab Txiv lawv npaum li twg los Tub Nuj thiaj li rov los mus saib lawv suav daws tsis tau li lub siab xav. Txij li thaum Nkauj Zuag paub Tub Nuj chaws nyob lawm Nkauj Zuag lo ib yam li Tub Nuj nkawv ib hli ib tsab ntawv mus–los sib nug moo ntsoov yam tsis tu ncua, ua rau nkawv txoj kev hlub yeej tseem ruaj nree ib yam li thaum nkawv tseem nyob ua ke. Txawm tias nkawv yuav sib nco, sib tshuas npaum li twg lo nkawv yeej tsis pub leej twg paub, nkawv nyias yeej rau siab ntso rau nyias txoj kev kawm mus tau zoo nrog nraim nkawv txoj kev hlub nyob txhuas hli txhuas xyoo thiab. Xyoo dhau xyoo tuaj nkawv ob txoj kev kawm mus siab zuj zus zoo tam li tus dej ntw mus deb zus dav zus lawm xwb, tshaj plaws mas yog Tub Nuj tus uas mus kawm nyob deb, ua rau Tub Nuj tsis muaj lub sij hawm rov qab los mus saib tsev lo yog tsis tau rov lo pom Nkauj Zuag li, hos Nkauj Zuag tus nyob tom qab lo kuj muaj txoj kev ntxhov siab ntau yam kawg li vim tias txoj kev kawm lo suav hnub suav mus siab zuj zus nyuaj zuj zus thiab ho muaj lus nco nco Tub Nuj ua hnub ua hmo nyob hauv lub siab ntsw thiab. Nkauj Zuag nws yog ib tug Ntxhais kawm ntawv thiab ho yog ib tug neeg uas txawj hais lus heev thiab zoo nkauj tshaj plaws txhuas txhuas tus ntxhais nyob hauv lub zos hais los ntawv thiab, ua rau ib tsoom Tub hluas leej twg lo yeej nyiam thiab ntshaw xav tau ua tus hlub kawg nkau. Tab si vim Nakuj Zuag yog Tub Nuj tus hlub lawm leej twg lo thiaj ua tsis tau li cas, txij li thaum Tub Nuj ncaim mus kawm deb deb lawm cia Nkauj Zuag nyob ib leeg rov tom qab, txawm tias leej twg yuav mus nrog Nkauj Zuag tham npaum li twg lo Nkauj Zuag yeej xav tsis txog tias yuav cog phooj ywg lo yog kev hlub li, Nkauj Zuag tsuas yog lam tham ua si raws li txoj kev sib paub suav daws nyob ua zej ua zos ua ke, thiab tsuas lam tham daws txoj kev nco Tub Nuj xwb.Vim tias Tub Nuj nkawv ib txwm yeej sib nyiam, sib hlub, sib ntseeg siab los puag thaum nkawv pib sib paub los lawm. Txawm tias Tub Nuj yuav mus nyob deb deb npaum li twg lawm lo Nkauj Zuag yeej ua lub siab ntev dawb paug ncaj ncee tiag tiag rau siab ntso kawm ntawv nyob tos ntsoov Tub Nuj ib leeg raws li nkawv cov lus tau cog tseg, txawm tias leej twg yauv hais npaum li cas lo Nkauj Zuag yeej tsis pauv siab li. Xyoo dhau xyoo tuaj tsis muaj pe tsawg lub xyoo tom qab no xwb Tub Nuj thiab Nkauj Zuag nkawv ob txoj kev kawm twb yuav tiav raws li nkawv lub hom phiaj uas yog tsuav 2 lub xyoo lawm xwb Tub Nuj twb yuav tau rov qab los pom Nkauj Zuag. Lub xyoo ntawv Tub Nuj xav tsis txog dab tsis li tsua yog rau siab ntso kawm ntawv tsuag tsuag kom tiav maj rov mus pom Nkauj Zuag xwb, muaj ib hmo Tub Nuj pw tsaug zog Tub Nuj tau ua npau suav pom Nkauj Zuag taug ib txoj kev deb deb muaj muaj paj xyoob paj ntoo zoo zoo nkauj pom Nkauj Zuag mus ib leeg xwb Tub Nuj hu npaum li cas lo Nkauj Zuag yeej tsis tig tuaj teb Tub Nuj li tsua yog tawg kev mus lawm zuj zus mus yuav ploj nraum roob lawm xwb. Tub Nuj tsim dheev los lub ntuj twb kaj kaj lawm Tub Nuj lub ncauj tsis hais siab xav ntsuj ntsoov tias yog vim li cas, cas lam npau suav pom Nkauj Zuag yam ploj pliag li no nthsai tsam Nkauj Zuag lam noj tsis qab nyob tsis zoo li cas, vim tias twb tau ntau hnub los no lawm twb tsis pom nws sau ntawv tuaj li lawm thiab lo yog nco nco nws es thiaj li ua npau suav pom nws li no xwb. Txij li hnub ntawv los txawm tias Tub Nuj yuav muaj lub ntsej muag luag ntxhi nrog ib tsoom phooj ywg lo Tub Nuj lub siab yeej tsis kaj yeej xav ntsuj ntsoov txog Nkauj Zuag tus nyob rov tom qab ta li xwb. Dhau ntawv los tau ib lub hli tom qab Tub Nuj txais tau ib tsab ntawv tuaj ntawm Tub Nuj tus phooj ywg Meej sau mus saib Tub Nuj, vim nkawv ib txwm kawm ntawv ua ke los puag thaum nkawv me me los uas nkawv muaj kev sib ntseeg siab tam li kwv tij kiag. Nyob hauv tsab ntawv Tub Nuj tus phooj ywg Meej sau tias: Tau ntev los no tsis hnov koj moo li koj kawm ntawv li cas lawm xwb os Npawg? Npawg Nuj! Tej zaum koj twb paub lawm lo kuj muaj es ua ntej thaum koj yuav nyeem kuv tsab ntawv no koj ua lub siab tus tus nawb. Npawg Nuj! Pab koj tu siab ntau qhia koj tias thaum lub qab hli dhau los no koj tus Nkauj Zuag nws tau tag lub neej txoj sia tau ncaim koj, peb suav daws thiab lub ntiaj teb no mus lawm yam tsis muaj hnub uas yuav tig tau rov qab los pom peb suav daw thiab lub ntiaj teb no ntxiv lawm os Npawg Nuj, kuv lo kuj paub tsis zoo tias qhov tseeb yog li cas tiag. Tab si raws li suav daws paub ma yog muaj leej tib neeg lub siab tsis ncaj ncee tau tsim txom nws txoj sia nws thiaj li tau ncaim koj thiab peb suav daws mus lawm. Hos tus tib neeg uas siab tsis ncaj ncee ntawv lo vim nws txaus siab rau koj tus Nkauj Zuag heev li nws lo zoo siab txo nws txoj sia tuag nrog Nkauj Zuag lawm thiab, es nyaj ob peb hnub tom ntej no qhov tseeb yog li cas tiag lo nyaj Nkauj Zuag Niam lawv yuav qhia tau tuaj rau koj paub os Npawg, es koj ua ib siab tsis txhob nco nco nws lawm mog tsam ua rau koj kawm tsis tau ntawv. Es rau rau siab kawm tsuag tsuag kom tiav rov qab los hnub twg los txog lawm mam li nrhiav dua lwm tus mog. Tej hauj lwm no kuv yeej tsis xav qhia tuaj rau koj li os Npawg, tab si li cas lo kuv yuav tau qhia rau koj paub vim wb ib txwm kawm ntawv ua ke muaj dab tsis lo yeej sib qhia kom sib paub. Sij hawm thaum Tub Nuj tau hnov lo lus no kiag Tub Nuj lub siab poob nthav ua lub ntsej muag ntshau li ntshov xav tias yog tiag lo dag cas lam txais tau Nkauj Zuag lub moo tsis zoo li no. Dhau ntawv los Tub Nuj muaj txoj kev nyuaj siab ntxhov plawv kawg nkau xav tias yog npau suav lo yog tiag cas xyoo no lam tau txais kev nyuaj siab li no, tab si Tub Nuj kuj tseem tsis tau ntseeg tag tag thiab. Los tau ob lub hli tom qab no txais tau Nkauj Zuag Niam ib tsab ntawv sau mus qhia Tub Nuj hais txog li ntawm Nkauj Zuag. Nyob hauv Nkauj Zuag Niam tsab ntawv Nkauj Zuag Niam tsua sau qhia Tub Nuj tsawg tsawg tias: Tub Nuj! Zaum no ces ntshe Nkauj Zuag neb yuav tsis sib tau raws li neb txoj me kev ntshaw, kev sib nyiam os thiab ntshe yuav tsis tau raws li peb cov ua Niam ua Txiv txoj kev cia siab os Tub Nuj, qhia koj tias koj tus Nkauj Zuag nws tau tag lub neej txoj sia tau ncaim koj thiab kuv ua Niam lo yog tau ncaim peb lub ntiaj teb no mus lawm yam tsis muaj hnub yuav tig tau rov qab los pom lub ntiaj teb no ntxiv li lawm es nws twb ncaim mus tau peb lub hli ntau no lawm nawb es koj ua ib siab tsis txhob nco nws lawm mog kuv ua Niam yeej paub zoo tias Nkauj Zuag neb sib nyiam, sib hlub heev li yog thaum koj hnov li no lwm ntshe yuav ua rau koj muaj kev tu siab heev li os Tub Nuj. Es koj ua ib siab txhob nco nws lawm mog, kav tsij rau rau siab kawm kom tag ho rov qab los Nkauj Zuag tau ncaim koj thiab peb suav daws mus li no lawm kuv ua Niam lo kuj nco nco koj lo yog Nkauj Zuag neb kawg nkau li os Tub Nuj awd! Es qhov tseeb yog li cas tiag lo nyaj koj tus Nkauj Zuag yuav qhia tau qhov tseeb txhuas txhuas yam nyob hauv nws tsab ntawv no tuaj rau koj. Es qhia koj tias Nkauj Zuag tsab ntawv no ces yog Nkauj Zuag tsab ntawv uas nws sau sau nws txoj me siav tu nrho nawb es nws kom kuv ua Niam muab khaw tseg kom tau rau koj txawm tias yuav pe tsawg xyoo lo xij kom kuv ua Niam muab khaw tseg kom tau rau koj no, es kuv xav xav kuv ua Niam thiaj li muab xa tuaj rau koj kom koj paub es hnub twg koj rov los txog koj thiaj li yuav tsis tu siab rau kuv ua Niam, es thaum koj tau hnov nws cov lus lawm koj txhob nco nco nws mog tsam ua rau koj kawm tsis tau ntawv nawb mog me Tub Nuj. Sij hawm ntawv Tub Nuj mam li muab Nkauj Zuag tsab ntawv coj los thuav nyeem, nyob hauv Nkauj Zuag tsab ntawv Nkauj Zuag sau tias: Tub Nuj tus kuv hlub! Zaum no ces ntshe wb yuav tsis sib tau raws li wb cov lus cog tseg thiab ntshe yuav tsis tau raws li wb txoj me kev cia siab ib txwm os Tub Nuj, qhia koj tias koj sij mus nyob deb deb koj tsis los nrog kuv nyob, nag hmo kuv Niam thiab kuv Txiv nkawv tsis nyob lawm tshuav kuv thiab kuv tus Niam Hluas me me wb nyob xwb Tsim Laj uas yog koj ib tug phooj ywg sib paub thiab, nws tuaj nrog kuv nyob tham ua si kuv xav tias nyaj nws tsua lam tuaj tham ua si xwb no, wb nyob tham ua si Tsim Laj cia li hais rau kuv tias kom kuv yuav Tsim Laj es txhob tos koj lawm no kuv tsis kam li Tsim Laj nyiam thiab txaus siab rau kuv heev nws tias nws yeej nyiam kuv los puag thaum koj tseem nyob los lawm tab si vim muaj koj nyob nrog nraim kuv es Tsim Laj nyiam, txaus siab rau kuv npaum li twg lo Tsim Laj ua tsis tau li cas rau kuv, txij li thaum koj mus lawm koj tso kuv nyob ib leeg xwb Tsim Laj yeej hais ta li tias kom li cas lo kom kuv yuav Tsim Laj xwb. Kuv tsis kam li vim twb los nyiam tau koj lawm txawm li cas lo kuv yuav ua ib siab nyob tos kom tau koj ib leeg xwb. Vim tias lub sij hawm tshuav 2 lub xyoo lawm xwb koj twb yuav rov qab los nrog kuv nyob, Tsim Laj hais li cas lo kuv tsis kam tsis pom zoo yuav Tsim Laj li vim kuv tsis nyiam. Tsim Laj ua li cas lo ua tsis tau li Tsim Laj thiaj li nyiag muab tshuaj txhaum tso rau hauv taub dej los ce rau wb ob leeg haus ua ke, kuv lo kuj xav tsis txog tias Tsim Laj yuav muaj tau nplooj siab phem muab tshuaj los tua kuv li ntawv thiab. Txij li thaum haus dej tag ua rau kuv tsis nco qab dab tsi tag li lawm dhau ntawv los kuv Niam lawv muab tshuaj los pab pab kuv lo kuv mloog yeej pab tsis tau dab tsi li, thiab koj yeej paub zoo tias peb suav daws lo nyob deb deb ntawm tsev kho mob, yog li ntawv thiaj tsis muaj ib yam tshuaj dab tsi los pab tau kuv. Es Tij laug Nuj! Tej zaum kuv yuav ua tsis taus neeg nyob lawm mog es kuv sau tsab ntawv no rau kuv Niam khaw cia rau koj kom koj paub tau qhov tseeb tias kuv tau tau qi lub qhov muag ncaim cai npho ntawm koj lub xub ntiag mus yog vim li cas tiag. Es qhov ntsiab lus tseeb ces tsua muaj li no xwb es yog thaum twg koj tau hnov kuv cov lus no lawm thov koj tsis txhob nco nco kuv lawm tsam ua rau koj nyuaj nyuaj siab kawm tsis tau ntawv mog. Es tij laug Nuj tus kuv hlub! Tag koj Niam peb suav daws yeej paub zoo tias koj yog ib tug uas txawj xav heev koj yuav tsis pub koj Niam peb suav daws tag txoj kev cia siab rau koj li, es yog tias koj hlub kuv tiag no ces kuv thov koj kav tsij rau rau siab kawm kom tiav es koj ho los txhim kho peb ib tsoom Hmoob suav daws lub dej siab kom ncaj ncee kom tsis txhob muaj leej tib neeg lub siab phem siab tsis ncaj mus tsim txom luag lwm leej lwm tus txoj me kev sib hlub, es kom luag lwm tus tsis txhob txais tau lub neej tu siab es kom lug lwm tus tsis txhob txais tau txoj kev hlub ntxuag lub kua muag li tsam no wb tau no mus lawm yav tom ntej mog Tij laug Nuj. Tij laug Nuj tus kuv hlub! kuv yeej paub zoo tias koj hlub kuv heev li yog thaum koj tau hnov kuv lub moo tsis zoo li no lawm ntshe nws yuav ua rau koj lub me kua muag ntw sis nyob ib leeg kho siab li khuav, ntshe yuav ua rau koj ua lub neej nyob ntshau li ntshov cias thiab ntshe yuav ua rau koj tau txais txoj me kev nyuaj siab ua lub neej nyob tsau ntuj li nti kua muag ntw sis nrog neeg ntiaj teb os Tij laug Nuj! Es qhia koj tias daim ntawv no ces yog daim ntawv uas kawg nkau tu moo nrho ntawm wb txoj me kev sib hlub, kom koj nco ntsoov tias daim ntawv no ces yog daim ntawv uas sau kawg nkau ntawm kuv tuaj rau koj no mog Tij laug Nuj tus kuv hlub! Es thov koj ho zam lub txim pub rau kuv txhuas yam thiab mog Tij laug Nuj! Es lus tag li no xwb kuv hlub koj os tus neeg siab zoo! Thaum Tub Nuj nyeem Nkauj Zuag tsab ntawv tag nrho Tub Nuj lub kua muag ntw sis xav tias tej zaum yuav muaj tseeb lawm tiag tiag, vim Nkauj Zuag nws yeej tsis tau dag Tub Nuj ib zaug li thiab tej yam no yog tsis muaj tseeb Nkauj Zuag yeej tsis lam hais tau. Tsis ta li xwb, twb yog kiag Nkauj Zuag Niam hais lawm thiab. Tub Nuj muaj lus nco thiab hlub tshuas txog Nkauj Zuag tus uas tau qi lub qhov muag kiag ncaim fee hlo ntawm Tub Nuj lub me xub ntiag mus lawm yam cai npho uas tsis muaj hnub yuav tig tau rov qab los pom Tub Nuj thiab lub ntiaj teb no kawg nkau li thiab Tub Nuj ho muaj lus chim siab kawg nkau rau tus leej tib neeg uas lub siab tsis ncaj ncees uas tau tsim txom Tub Nuj txoj kev hlub yam tu nrho kawg nkau lo Tub Nuj ua tsis tau li cas li. Sij hawm ntawv Tub Nuj muaj lus tu siab, chim lub siab kawg nkau Tub Nuj xav quaj qw nrov nrov kom neeg thoob ntiaj teb nrog hnov thiab nrog paub lo vim Tub Nuj nyob ib leeg deb deb rau ib lub teb chaws, rau ib sab ntuj nrog mab nrog suav nyob xwb. Txawm tias Tub Nuj yuav quaj quaj kua muag ntshav los kiag thiab txawm tias yuav qw qw Tub Nuj txoj sia tu nrho lo ntshe yuav tsis muaj leej twg pom thiab ntshe yuav tsis muaj leej twg nrog paub.Sij hawm ntawv Tub Nuj muaj lus hlub tshuas txog Nkauj Zuag kawg nkau Tub Nuj xav rov qab los mus saib Nkauj Zuag npaum li twg lo vim Tub Nuj nyob deb deb rau ib sab ntuj txoj kev mus–los twb tsis yooj yim li lub siab xav, Tub Nuj ua zaj twg lo ua tsis tau li cas li tsuas yog tau txoj kev tu siab, kev chim siab nyob ib leeg ntxuag lub kua muag xwb.Suav txij li hnub ntawv los mus Tub Nuj nyob ib leeg kho siab li khuav mov tsis xav noj dej tsis xav hau nyob nro li ntshi nrog lub kua muag lawm xwb. Nkauj Zuag tau tag lub neej txoj sia ncaim lub ntiaj teb no mus yam tsis muaj hnub yuav tig tau rov los lawm ces li ntawm Tub Nuj tus kheej lo tig saib txhuas tsav txhuas yam hauv lub ntiaj teb no ces zoo li tsis tshuav ib yam uas yuav zoo li yav tag los lawm thiab zoo li txhuas tsav txhuas yam ces zoo li tsuas muaj ploj zuj zus mus raws Nkauj Zuag lawm zoo li tsis tshuav ib yam uas yuav tsim nyog rau Tub Nuj li lawm. Hos txhuas tsav txhuas yam li ntawm Nkauj Zuag ntiag tug ces tsuas yog tshuav Nkauj Zuag daim me Duab uas tseem pom Nkauj Zuag lub me ntsej muag luag ntxhi nyob ua puav pheej cia saib ua Tub Nuj lub chaws nco thiab ua qhov chaws cim tseg hauv Tub Nuj lub neej mus ib sim lawm xwb. Dhau ntawv los Tub Nuj tos tos tau 6 lub hli tom qab no tsis pom Nkauj Zuag sau ntawv mus saib Tub Nuj li lawm tiag tiag. Txij li hnub ntawv los mus Tub Nuj mam li ua ib siab tu lub siab nrho xav tias tej zaum Nkauj Zuag yuav tau tag lub neej txoj sia ncaim lub ntiaj teb no mus tiag tiag li lawm. Txij ntawv los mus txawm tias Tub Nuj yuav nco thiab yuav tshuas Nkauj Zuag npaum li twg lo nyob rov tom qab teb chaws los tsuas Nkauj Zuag tsis muaj txoj sia nyob tos lawm ces Tub Nuj mam li ua ib siab nyob ib leeg tu siab li nrho tsis nug leej twg xov, tsis nug leej twg moo nyob rov tom qab teb chaws los tsuas li lawm. Tub Nuj tsuas nco tias nyob rov tom qab teb chaws los tsuas ces tsuas yog tshuav Niam thiab Txiv lawm xwb thiaj li tseem ceeb rau Tub Nuj, hos dua li ces yeej tsis tshuav ib yam dab tsi uas yuav tseem ceeb nyob hauv Tub Nuj lub siab ntsw lawm xav tias txawm tias xyoo yuav los no kawm tiav lawm lo yuav thov kawm txua mus ntxiv vim tsis xav rov qab mus pom teb chaws los tsuas ntxiv lawm. Xav tias hnub twg kawm tiav yog tias Niam thiab Txiv tseem muaj txoj sia nyob, muaj zoo lub sij hawm thaum twg los kuj mam li rov mus saib Niam thiab Txiv, vim Tub Nuj xav tias yog Tub Nuj tseem yuav tsis rov qab mus saib Niam thiabTxiv ib zaug li thiab ntshe yuav haj yam ua rauTub Nuj Niam thiab Txiv nkawv lub kua muag poob, tsis ta li xwb ntshe yuav haj yam ua rau Tub Nuj Niam thiab Txiv nkawv tag txoj kev cia siab rau Tub Nuj mus tag ib sim, vim Tub Nuj tsis xav kom Tub Nuj Niam thiab txiv nkawv lub kua muag poob thiab tag txoj kev cia siab rau Tub Nuj. Yog li ntawv Tub Nuj thiaj xav tias hnub twg kawm tag li lub siab xav yog tias Tub Nuj Niam thiab Txiv tseem muaj txoj sia nyob muaj sij hawm zoo lo kuj mam li hos rov mus saib Tub Nuj Niam thiab Txiv ib zaug nyob tom qab teb chaws los tsuas. Hos yog tias hnub twg Tub Nuj kawm tag yog tias Tub Nuj Niam thiab Txiv tseem tsis muaj txoj sia nyob tos lawm thiab ces ntshe yuav ua ib siab tsis thov rov qab mus pom teb chaws lo tsuas ntxiv lawm. Yuav ua ib siab nrog mab nrog suav nyob, xub ntiag ncaj twg ces mus twg yuav ua neeg tsis nrog luag muaj vaj muaj tsev mus ib sim, hnub twg txoj sia mus xaus rau thaj chaws twg ces tseev qhov ntawv mus yuav tsis rov qab mus teb chaws los tsuas li lawm. Vim tias nyob rau teb chaws los tsuas Nkauj Zuag tsis muaj txoj sia nyob tos lawm ces tu siab nrho tsis rov mus lawm.Vim teb chaws los tsuas tsis tshuav ib yam dab tsi uas yuav tseem ceeb lo yog tshwj xeeb nyob huav Tub Nuj lub neej lo yog nyob hauv Tub Nuj txoj hau kev lawm. Vim Nkauj Zuag ib leeg xwb thiab yog tus Tub Nuj hlub thiab tshuas tshaj plaws yav tag dhau los, yog tias Tub Nuj tseem rov qab mus pom Nkauj Zuag nkawv tej me kev taug, tej me chaws nyob, chaws ncig, chaws ua si puag thaum nkawv pib sib paub los txog rau tam sim no thiab ntshe Tub Nuj yuav tsis xav ua neeg muaj txoj sia nyob nrog neeg ntiaj teb. Nkauj Zuag thiab Tub Nuj nkawv yeej ib txwm sib hlub thiab Sib nyiam heev los puag thaum nkawv pib sib paub los lawm, Txhuas txhuas lub sij hawm uas nkawv tau los sib cuag, sib tham Nkauj Zuag yeej hais rawv rau Tub Nuj tias: “Tub Nuj! Koj nco ntsoov tias txhuas txhuas lub sij hawm kuv yuav nyob hawv koj lub xub tiag li no mus kom tag ib sim, yuav tsis muaj leej twg los tshem tau kuv tawm hauv koj lub xub ntiag no mus li os Tub Nuj” Zaj dab neeg Tub Nuj thiab Nkauj Zuag nkawv tsua los xau tag li no xwb thov hais rau peb ib tsoom phooj ywg tias yog leej twg muaj zoo txoj kev hlub lawm yuav tsum ua tib zoo tswj fwm yus txoj kev hlub mus kom kawg, vim tias twb muaj Tub Nuj thiab Nkauj Zuag nkawv los ua dab neeg tseg rau peb suav daws lawm thiab peb txhuas leej yuav tsum nco ntsoov thiab ceev faj txhuas txhuas lub sij hawm tias peb los ua neeg nyob rau lub ntiaj teb no peb feem coob kuj coj tau lub dej siab ncaj ncees lawm tab si kom peb nco ntsoov tias kuj tseem muaj qee leej neeg uas tseem coj tau lub siab tsis ncaj ncees mus tsim txom luag lwm tus txoj kev hlubli zaj dab neeg no. Thov ua tsaug ntau ntau rau tus uas tau siv lub sij hawm los pab nyeem zaj Dab neeg no thiab, tsis ta li xwb vam thiab cia siab ntsoov tias ib tsoom phooj ywg suav daws leej twg nyeem tag lawm yuav pom tau nws txoj me kev hlub muaj nuj nqi thiab. Tub Hmoob Lis |
Ceeb Toom: Cov dab neeg kev hlub thiab txhua yam hauv 3haivhmoob.com no peb tsuas yog tso rau sauv daws tau tuaj nyeem laug caij nyoog xwb txwv tsis pub leej twg muab luam mus muag los yog ua lag luam, yog koj coj mus kho los yog ua lwm yam tsis tau qhia rau peb paub , thaum peb tshawb tau lawm koj yuav raug nplua raws txoj cai ntawm lub teb chaw koj nyob ko.
Ua tsaug ntau:
3HaivHmooB.Com