Txoj Kev Hlub Mob Tag Los Rov Mob Dua Thiab
Tus sau: Tub Ntxawg Muas . Email:uasiabtsokojmusvimkuvpluag@yahoo.com Phone: 984 818 21
Nplooj-1Lub sij hawm kuv sau wb zaj dab neeg no nws yog ib lub sij hawm uas kho siab thiab nco txog wb tej qub chaw tag los tshaj plaws li..txawm tias koj twb tso kuv tseg ncaim mus lawm los tej toj roob hauv pes tseem nyob ruaj tsis hloov li thaum wb tseem sib hlub ntau xyoo dhau mus uas koj tseem muaj kuv thiab kuv tseem muaj koj.....Koj txoj me siav yaj ntsis mus lawm ces ntshe koj yuav tsis nco txog tej kev mob siab tag los lawm..tsuas yog tshuav kuv uas tseem phij nij hnub muab koj nco ua caij ua nyoog thaum kuv ncig mus txog wb tej chaw uas wb kawm ntawv thiab taug kev ua si tag los xwb..... Lub zos tij kum sab yog ib lub zos uas tib neeg nyob coob heev li nws yog ib lub zos uas tej laus yeej nyob ib txwm puag thaum uas hmoob tau tawg rog pem suav teb los txog niaj hnub no. Ib txwm Yav tag dhau los nkauj zoo thiab kuv wb yeej nyob koom ib lub zos nyob rau sab xeev oudomxay teb chaws los tsuas uas yog lub zos (tij kum sab).hauv lub zos no muaj peb haiv neeg nyob koom ib zog . peb haiv hmoob yeej nyob coob kawg nkaus li txawm hais tias nkauj zoo wb nyob koom ib zog los wb yeej tsis sib paub thiab ib txwm tsis tau tham lus ua ke dua li.. Nyob rau lub xyoo 2006 uas txog rau lub sij hawm tuaj mus kawm ntawv nyob rau xyoo tshiab thaum lub 9 hli ntiaj teb . peb tuaj mus kawm ntawv nyob rau ib qho nrug deb ntawm peb lub zos li 10 ki lau mev. Muaj ib hnub nkauj zoo tuaj mus tom tsev kawm ces nws txawm ua nws lub xov tooj poob tom kev kuv tuaj lawv qab kuv thiaj li khaws tau nws lub xov tooj ces peb mus kawm ntawv lawm nyob rau ib tsam yuav tsaus ntuj kuv thiaj muab nws lub xov tooj los qhib saib ces nws txawm hu tuaj tam sim ntawv hais tias! koj nyob qhov twg thiab koj yog leej twg ? kuv teb tias kuv yog tub ntxawg nyob ntawm lub zos no. nws hais ntxiv tias puas yog koj khaws tau kuv lub xov tooj koj puas kam muab rau kuv lawm nab ? Kuv teb rau nws tias tau kawg ma! tab sis kuv tsis paub koj ne ? nkauj zoo thiaj hais tias kuv nyob ntawm zos no thiab os kuv yog nkauj zoo os yog li tsaus ntuj koj nqa tuaj rau kuv os . kuv teb nws tias tau kawg os ces ib pliag tsaus ntuj kuv thiaj mus ntawm lawv tsev nkauj zoo tawm tuaj kuv thiaj muab lub xov tooj rau nws ces nws txawm muab tau ob xeem nyiaj thiab hais rau kuv tias ua tsaug koj tseem muab kuv lub xov tooj rov rau kuv os tub ntxawg kuv muab qhov nyiaj no ua dej siab rau koj xwb os . kuv hais rau nkauj zoo tias kuv tsis yuav koj qhov nyiaj os kuv muab rov qab rau koj xwb es kuv rov mus tsev lawm os nkauj zoo. Nws hais rau kuv tias yog li ua tsaug ntau nawb tub ntxawg ces kuv los 2-3 ruam tom ntej no lawm nws thiaj dhia dhia rov tuaj hais tias kom kuv muab kuv tus leb foos rau nws ces kuv thiaj qhia kuv tus leb foos rau nws ces kuv los tsev lawm .Dhau nov hnub tom qab nws thiaj li hu xov tooj tuaj rau kuv hais tias kuv puas kam thauj nws mus kawm ntawv thiab ? kuv thiaj teb nws tias tau kawg kuv thiaj mus thauj nkauj zoo mus kawm ntawv . ib tsam tsaus ntuj kuv thiaj mus saib nkauj zoo tom nws tsev uas yog thawj hmo uas nkauj zoo wb tau nyob ua ke ces nws txawm nqa tog rau wb zaum . ces wb nyob yuav txog li 11 teev ntawv nws thiaj nug kuv tias tub ntxawg koj puas nyiam thiab txaus siab hlub nrog ib tug neeg zoo li kuv no os? Ces kuv txawm rub kiag nws los ntawm kuv xub ntiag ces nwj npuav kiag nws lub qhov ncauj khawm nws ruaj ruaj kuv thiaj teb nws tias nkauj zoo kuv nyiam thiab txaus siab koj os! vim koj yog ib tug uas ntxim hlub heev li os .ces nkauj zoo txawm hais ntxiv rau kuv tias tub ntxawg koj yog thawj tug uas kuv pub rau nwj thiab khawm os . ces kuv txawm los tsev lawm txij ntawv los nkauj zoo wb txoj kev hlub suav hnub zoo thiab loj zuj zus lawm xwb . nkauj zoo wb yeej sib hlub heev li wb niaj hnub caij ib lub tsheb mus kawm ntawv ua ke xwb . kuv niam kuv txiv thiab nkauj zoo niam nkauj zoo txiv lawv suav daws puav leej pom zoo wb sib tham wb txoj kev sib hlub . xyoo ntawv kuv kawm nyob chav mos 7 hos nkauj zoo kawm nyob chav mos 6, los rau xyoo tom qab kuv kawm tiav lawm kuv yuav tau mus kawm nyob rau txawv nroog txawm hais tias nkauj zoo wb yuav sib hlub sib nco npaum li cas los yuav tau ua ib siab mus kawm ntxiv . ua cas tsis ntev xwb lub caij nyoog tig los txog lawm . hmo uas kuv yuav ncaim nkauj zoo mus lawm kuv thiaj li muab tau ib lub nplhaib rau nkauj zoo kuv hais rau nws tias! kuv yuav ncaim koj mus deb lawm kuv tsis muaj dab tsi rau koj kuv tsuas muab lub nplhaib no rau koj xwb txawm kuv muab tsis tau tej yam uas muaj muaj nqis thiab loj loj rau koj los kuv yeej hlub koj tiag txawm kuv mus deb thiab ntev npaum li cas los kuv tsuas muaj koj ib leeg xwb os . koj nyob tsis txhob tham hluas nraug nawb . nkauj zoo thiaj li teb rau kuv hais tias! Tsis ua cas os tub ntxawg txawm yuav ntev npaum li cas los kuv yuav nyob tos koj ib leeg xwb os kuv yuav tsis ua siab dub rau koj os . nkauj zoo thiaj li hle tau nws lub kauj toog npab muab rau kuv nws hais rau kuv tias! tag kis koj twb yuav mus lawm kuv muab lub kauj toog npab no rau koj tau saib xwb koj mus lawm nco qab ntsoov tias tshuav kuv nyob pem tsev no tos koj ib leeg xwb os . kuv hais ntxiv tias! Ua li os nkauj zoo cia xyoo no koj kawm kom tiav es kuv mam coj koj los nrog kuv nyob os . Tag kis ces kuv thiaj li tau ncaim mus kawm nyob txawv nroog lawm . kuv mus tau li 1-2 lub hli ces nkauj zoo lub cev txawm tsis tab seeb ntshe yog muaj me nyuam lawm nkauj zoo thiaj hais qhia rau kuv thiab kom kuv los saib nkauj zoo. Kuv thiaj hais rau nkauj zoo tias twb ze ze yuav txog peb caug lawm es kuv mam los saib koj thaum peb caug nawb. nkooj zoo los npaj siab ntsoov tos hnub kuv los tsev xwb . tiam sis cuag li txoj hmoo tsis muaj los rau 2-3 hnub tom qab lub sij hawm uas ze ze yuav txog peb caug ces hmoob txawm tuaj nqes tsev hais nkauj zoo txawm tias nkauj zoo wb txoj kev hlub yuav zoo npaum li cas los vim yog nkauj zoo niam thiab txiv lawv saib nyiaj txiag loj tshaj lawm. vim nkauj zoo tus txiv ntawv yog neeg muaj nyiaj thiab nplua nuj yog li ntawv nkauj zoo niam thiab txiv lawv thiaj muab nkauj zoo yuam mus yuav nkauj zoo tus txiv lawm. |
Nplooj-2Hmo lawv nqes tsev hais nkauj zoo nws hais rau kuv tias kom kuv los tsev kom tau xwb yog tias kuv los tsis tau ces nws yuav tsis nyob hauv lub ntiaj teb no ntxiv lawm tiam sis tu siab tshaj plaws vim kuv nyob txoj kev deb lawm los tsis ncav lub sij hawm yog li nkauj zoo thiaj li tau mus tom kuv tsev hais rau kuv niam thiab kuv txiv nkawv tias cia nkauj zoo los nrog kuv niam thiab kuv txiv lawv nyob ua ntej thaum uas kuv yuav los txog tiam sis kuv niam thiab kuv txiv nkawv ua tsis tau li cas vim tam sim ntawv kuv twb tsis nyob lawm nkawv thiaj tsis paub yuav ua txoj twg . Lub sij hawm ntawv nkauj zoo niam thiab txiv thiab nkauj zoo tus txiv lawv txawm tuaj muab nkauj zoo chua ntia hauv peb tsev coj nkauj zoo mus lawm . thaum kawg los nkauj zoo yeej ua tsis tau li cas nrhiav tsis tau txoj hauv kev tawm li vim yog nkauj zoo yog ib leeg ntxhais ib leeg me nyuam ntawm nkauj zoo niam thiab txiv xwb . tag nrho nkauj zoo tej niam hlob txiv ntxawm tej txheeb tej ze lawv ntshaw ib tug vauv nplua nuj yog li nkauj zoo thiaj li swb tag nrho lawv suav daws . Tom qab ntawv kuv mam li los txog ces kuv niam thiab kuv txiv lawv thiaj li piav qhia rau kuv ces lawv txawm tsis pub kuv mus ntsib nkauj zoo vim lawv twb hais tiav tag lawm . yog kuv mus ntsib ces yuav muaj teeb meem loj txawm kuv mob siab npaum li cas los kuv thiaj nyob nrog txoj kev mob lub kua muag ntws sis cuag dej xwb . Thaum nkauj zoo hnov tias kuv los txog lawm nws thiaj li nyiag kev tuaj ntsib kuv ntawm peb tsev nws quaj qhov muag o tag li nws tuaj txog ntua nws kua muag si laim ntawm ob sab plhu xwb kuv txawm sawv ntawm peb qhov rooj nws cia li los khawm kiag kuv nwj npuav kiag kuv qhov ncauj ruaj ruaj kuv los yeej tauv tsis tau lub kua muag ib yam li nws thiab . nws hais rau kuv tias cas kuv tsis los kom ncav lub sij hawm? Kuv teb nws tias! vim txoj kev deb kuv los txog ces twb lig dhau lawm . nws hais ntxiv rau kuv tias! Txawm wb tsis sib tau li tej lus cog cia lawm los koj nco ntsoov tias kuv twb xeeb koj ib tug me nyuam lawm cia seb wb puas tau sib ntsib ntxiv lawm xwb os tub ntxawg! es koj ua ib siab mus nrhiav dua ib tug los hlub hlub koj nawb mog! . kuv teb rau nws tias! nkauj zoo zaum no kuv yuav plam koj mus ua luag tus ntshe yog tiam no kuv lub neej pluag koj niam koj txiv lawv thiaj muab nyiaj txiag saib zoo dua wb txoj kev hlub . txij no mus txawm kuv yuav hlub koj npaum cas los koj yuav yog luag tus lawm os . Ces kuv txawm muab nws ob sab tes daws tshem kiag ntawm kuv ces kuv saib nws ntsej muag cas txawv kiag lawm ces nws cia li ntog kiag lawm kuv mus khawm kiag nws puag cas nws tsis hnov li lawm . thaum ntawv tab tom nws niam thiab txiv thiab nws tus txiv lawv tuaj nrhiav nws txog ntawm peb tsev thiab .ces lawv cia li muab nws thauj mus tim tsev kho mob lawm . Txawm kuv yuav nco nkauj zoo npaum twg los nws yeej mus ua luag tus lawm tiag kuv thiaj ua ib siab rov qab mus kawm ntawv lawm . los rau xyoo tom qab kuv los kuj mus yuav poj niam muaj cuab muaj yig tag lawm thiab. hos nkauj zoo ces nws twb mus yug tau ib tug me nyuam tiam sis nws mus ua lub neej tsis raws siab xav vim nws tus txiv tsis xav hlub nws thiab nws tus me nyuam nkauj zoo tus txiv thiaj muab nws nrauj rov qab los nrog nws niam thiab nws txiv lawv nyob. Ces txog caij so kawm ntawv tag kuv rov los saib tsev. muaj ib hnub ces nws cia li hu xov tooj tuaj rau kuv hais tias! Koj puas ntxub kuv os ? kuv teb nws tias ua cas koj thiaj nug li ntawv ? nws hais ntxiv tias kuv tus txiv tsis yuav kuv lawm kuv rov los nrog kuv niam lawv nyob lawm es koj puas kam tuaj ntsib kuv ib zaug ntxiv nab ? kuv teb nws tias cia kuv xav tso . tau ob hnub tom qab kuv thiaj mus ntsib nws ces nkauj zoo txawm hais rau kuv tias ? tub ntxawg tiam no kuv tsis muaj hmoo tau koj es kuv thov koj coj tus me nyuam mus nrog koj nyob vim tus me nyuam no yeej yog koj thiab kuv wb tus tiag tiag vim kuv tsis muaj hmoo li koj kuv tsis paub kuv lub neej tag kis xyov yuav zoo li cas . kuv thiaj teb rau nkauj zoo tias koj ua ib siab nawb mog ntshe kuv yuav coj tus me nyuam mus nrog kuv nyob tsis tau os vim nws tsis zoo nkauj rau txoj cai lawm . tiam no koj yeej yog tus kuv hlub tshaj los mas tab sis kuv twb muaj cuab muaj yig tag lawm kuv yuav ua tsis tau li cas lawm os es koj ua ib siab mus nrhiav dua ib tug los hlub hlub koj lawm yav tom ntej mog. ces kuv rov qab los tsev lawm . txog caij kawm kuv rov mus kawm lawm cuag li yog txoj hmoo lom txwm ua rau nkauj zoo wb mob siab tag los yuav rov mob dua los txog rau lub ob hli (2) npaum nkaus li lub ntuj tsim txom siab ntsws lub sij hawm ntawv kuv tseem nyob nram tsev kawm ua cas nkauj zoo cia li hu xov tooj rau kuv hais tias! thov koj los saib kuv ua zaum kawg ? kuv nug nws tias yog ua cas ? nws thiaj qhia tias! Tam sim no kuv pw tim tsev kho mob kuv tau ib tug mob phem heev li xyov nws puas yuav zoo lawm . thaum kuv los txog kuv mus saib nws cas nws mob nyhav heev li nws hais rau kuv tias kom kuv pab hlub thiab saib tus me nyuam thiab ces nkauj zoo txawm muab lub nplhaib uas thaum i kuv muab rau nws rov rau kuv nws hais rau kuv tias kuv rov muab rau koj tiam no hmoov tsis zoo tsis tau ua koj poj niam tuav koj lub nplhaib no mus tag ib sim neej os es koj khaws cia tau saib nawb mog .ces nws thiaj rub kiag kuv mus puag ua zaum kawg .tom qab ntawv ces nws tus mob loj zuj zus tuaj ces nkauj zoo txawm tau tso peb tseg lawm Cov phooj ywg txoj kev sib hlub uas mob siab li no yog tias raug leej twg los ntshe yuav mob siab ib yam li kuv no mus tag ib txhis os . tom qab no thov ua tsaug rau www.3haivhmoob.com uas nej tseem cia peb sau cov kev hlub no uas yog ib qho tso tau pa thiab daws tau peb txoj kev lwj siab , kev chim siab lawm qhov ntau. Zaj kev hlub los xaus li no xwb mam sib ntsib dua suav daws nyob zoo. Tubntxawg muas |
Txwv: Txwv tsis pub leej twg lam tuaj mob cov dab neeg kev hlub thiab dab poj ntxoog los yog keeb kwm hauv no coj mus tso rau lwm lub vas sab website los yog forum los yog luam mus maug uas koj tsis tau txais kev tso cai los ntawm peb. Txhua txoj dab neeg hauv no peb tsuas tso rau suav daws tuaj nyeem laug caij nyoog thiab daws kev nyuaj siab ntawm tus tswv sau xwb. Vam tias koj yuav muaj kev koom tes. ua tsaug.
Warining: No one can copy our stories at www.3haivhmoob.com to post on your website or forum or print for selling without our permission. Thank you for you cooperation. Thanks.
Warining: No one can copy our stories at www.3haivhmoob.com to post on your website or forum or print for selling without our permission. Thank you for you cooperation. Thanks.