Tuam Thiab Maiv Koob
|
Txwv: Txwv tsis pub leej twg lam muab peb cov dab neeg hauv no coj mus tso rau nws lub Vas sab los yog lwm qhov chaw uas tsis tau txais kev tso cai los ntawm peb. Warning: No one can copy these stories at www.3haivhmoob.com to post on your own or other websites without our permission. Thanks.
|
Nplooj-1 Tuam & Maiv Koob
Txoj Kev Hlub Nrog Txoj Kev Tu siab"Muaj Hnub sib hlub los yuav muaj hnub sib ncaim"Kuv thiab Maiv Koob wb yog 1 nkawm hluas nkauj hluas nraug uas nyob koom zos ua ke thiab kuj nyob sib ze heev li. Maiv koob yog 1 tug ntxhais uas nyuam qhuav hlob tiav nkauj rau thaum xyoo 2001 no xwb, hos nyob li ntawm kuv ces twb kawm ntawv chav mos 6 lawm uas yog qib kawg ntawm high school lawm. Ntawm peb lub tsev thiab Maiv Koob lawv lub tsev nyob sib nrug deb li 50 kauj ruam xwb. Maiv Koob yog 1 tug ntxhais txom nyem muaj niam muaj txiv tib si tiam si lawv tsev neeg no khwv heev nyob nruab liaj nruab teb ntau xwb. Maiv Koob yog 1 tug ntxhais uas nquag heev thiab txawj xav txawj hais lus txawj hwm lwm tus txawm tias nws nyuam qhuav loj thiab tsis tau mus kawm txawj kawm ntse los Maiv Koob yeej yog 1 tug ntxhais zoo uas tsis hais lus siab leej twg li. Txhua txhua tag kis kuv pom Maiv Koob tuaj mus nqa dej, kwv dej 1 leeg tas li xwb ua rau kuv hlub thiab nyiam nws heev li. Muaj 1 tag kis kuv thiaj li sawv ntxov ntxov los ua tshais siav tag thaum 4:00 moo sawv ntxov, vim tias kuv tsis muaj 1 tug muam li yog li no kuv thiaj li yog tus uas yuav tau sawv los ua tshais ntxov ntxov txhua tag kis xwb. Tag kis ntawd kuv ua tshais siav tag ces kuv tawm mus cheb qab vag tsib taug seb puas pom nws tuaj nqa dej dua. Kuv nyuam qhuav tawm mus cheb zoj 1 pliag xwb cas txawm siv pom Maiv Koob nqa thoob dej nrov nkhis nkhoos tuaj txog ntawm peb tus ntsas laj kab lawm, kuv thiaj saib na ha ciav yog Maiv Koob tiag . Kuv tau tawm plaws mus caum Maiv Koob thiab nug nws tias: Maiv Koob ,koj tuaj mus nqa dej lov? Maiv Koob teb kuv tias: awh..! tuaj mus nqa dej na ha. Kuv rov nug ntxiv tias: Cas koj yuav tuaj ntxov ua luaj ma? Nws teb ntxiv tias: Es tuaj nqa ntxov ntxov mus cia , yuav npaj mus teb os. Ess koj tsis mus nqa dej thiab lov? Kuv tias yog koj kam no nrog koj mus ua ke na has. Maiv Koob teb tias: Tau los ma ; ces kuv thiaj li nrog Maiv Koob mus nqa dej lawm. Txij li thaum ntawd los ces Maiv Koob wb txoj kev hlub loj zuj zus tuaj, txhua txhua tag kis wb yeej mus nqa dej ua ke tas li xwb, 1 leeg yeej tseg tsis taus 1 leeg li. Kuv tseem nco ntsoov tsis ploj li tias txhua txhua hmo thiab txhua tag kis uas kuv mus nrog Maiv Koob nyob thaum kuv yuav rov qab los tsev Maiv Koob yeej muab kuv hnia 1 pas thiab nws yeej xa kuv los txog ntawm peb tsev rxhua zaus nws mam li rov qab lawm xwb. Qhov nov yog maiv koob txoj kev zoo uas kuv nco mus tsis ploj os . Tsis tas li xwb niaj hnub niaj hmo ua ke mus ywg zaub mus de zaub npuas ua ke yam tsis nco qab txaj muag rau leej twg li lawm. Wb tau sib hlub los tawm rau xyoo 2002, thaum no kuv kawm high school tag ces kuv ho xeem tau mus kawm ntxiv qib University nyob rau nram nroog uas yog lub tsev kawm ntawv DongDok. Xyoo ntawd haj yam ua rau wb sib nco thiab sib hlub loj tshaj qub tuaj lawm ntau npaug thiab thaum ntawd kuv tsis tau muaj xov tooj siv li, txawm kuv tuaj mus kawm ntawv lawm los Maiv Koob wb yeej sau ntawv 1 week 1 tsab ntawv sib nug moo tas li xwb. Thaum caij noj 30 xyoo tom qab no, kuv tau rov los tsev thiab mus nrog Maiv Koob pov pob ua si tau 3 hnub nkaus ces hnub 4 yog hnub kuv yuav rov tuaj mus kawm ntawv dua. Hnub xiab 3 hmo ntawd wb pov pob yuav tsaus ntuj ces Maiv Koob txawm yaum kuv nrog nws mus de zaub nram lawv vaj zaub. Thaum wb mus txog nram vaj zaub kuv thiaj li muab Maiv Koob puag lias thiab hais rau nws tias: Maiv Koob, koj puas hlub kuv tiag os? Kuv mas ntshai tsam noj 30 no tag ces muaj neeg tuaj zij koj lawm ces kuv yuav ua cas nco koj. Maiv Koob teb tias Tuam, wb twb sib hlub sib tham tau 2 xyoos no lawm luag tej yeej paub tias wb yog nkauj nraug lawm lawv yeej tsis zij kuv li os. Kuv yeej hlub koj 1 leeg xwb yuav nyob tos koj kawm ntawv tag los wb mam sib yuav xwb os. Thaum hais tag li no kuv ntsia tej paj zaub mas zoo li tej paj zaub tawg zoo nkauj daj vog puv vaj xwb kuv thiaj hais rau Maiv Koob tias: Maiv Koob, wb sib hlub npaum no lawm thov koj ua siab ntev nyob tos kuv nawb, kuv mus los kuv yuav rau siab kawm kom tiav es rov los yuav koj xwb os. |
Nplooj-2 Hnub sib ncaim Kuj Tau Los Txog
Kuv rov qab mus nram tsev kawm yog hnub xiab 3, kuv mus tau 6 hnub xwb txawm pom 1 tsab ntawv sau tuaj rau hauv kuv lub Box, kuv thiaj muab qhib saib na has ca yog Maiv Koob tus niam hluas lub npe thiab yog tsab ntawv xa ceev nyuam qhuav tuaj txog ntua xwb. Hauv tsab ntawv sau tias: "Tij laug Tuam kuv yog Maiv Lis os , kuv sau tsab ntawv no tuaj qhia koj tias Hmoob muab Maiv Koob zij thaum hnub xiab 4 ntawd lawm os. Maiv Koob mas quaj da luam hauv av lo av tag los Hmoob cia li muab tsaws kiag rau saum tsheb lawm xwb os. es koj txhob tu siab nawb".Txoj Kev Hlub Nrog Txoj Kev Tu siab "Muaj Hnub sib hlub los yuav muaj hnub sib ncaim" Thaum kuv nyeem los txog qhov no cia li ua rau kuv ua pas tsis nto thiab ua rau kuv tsaus muag kiag tsis nco qab dab tsi lawm thaum kuv tsim los ces kuv 2 tug phooj ywg kawm ntawv ua ke twb coj kuv mus txog tim tsev kho mob 150 lub txaj lawm..Kuv tau mus pw tau 1 hmo tim tsev kho mob kuv mam rov qab los mus kawm ntawv lub caij ntawd peb tab tom pib xeem ntawv thiab mas ua rau kuv nyuaj siab ntxhov siab xav tias tuag xwb yuav zoo dua ua neeg nyob txhua yam tsis muaj nqis dab tsi rau kuv lawm kuv tsis quaj los kua muag yeej ntws npaum dej tawm los, lub siab xav tias Maiv Koob cass koj siab yuav phem ua luaj zaum no koj tso kuv tseg lawm tiag es kuv yuav ua cas ua neeg nyob os Maiv Koob. Txawm kuv yuav quaj thiaj nco nws npaum twg los ntshe nws twb yog luag tug pw hauv luag lub xub ntiag lawm xwb kuv yim xav yim ua rau kuv ua pas nyuaj nyuaj tuaj xwb. Hos li ntawm Maiv Koob ces Maiv Lis rov qab sau 1 tsab ntawv tuaj rau kuv tias: "Tuam Maiv Koob lawv mus tau 3 tag kis lawv tuaj ua tshoob es Maiv Koob tsis kam yuav lawv li nws yeej tsis pub nws tus txiv txav tis nws li os tiam si kuv txiv lawv sib hais tau 3 hnub nkaus es lawv thiaj kom Maiv Koob ua 1 siab yuav lawv no lawm. Txawm Maiv Koob tsis yuav lawv es rov qab los los paub tias koj yeej tsis yuav nws lawm no es Maiv Koob thiaj li ua 1 siab yuav lawm. Koj txhob tusiab nawb tseem tshuav kuv uas yog nws tus niam hluas yog tsis xav li cas no los tsev no los saib kuv thiab os. Sij hawm dhau lawm zuj zus thiaj ua rau kuv tu siab zuj zus lawm tias Maiv Koob yeej tsis rov los li lawm ces cia rau rau siab rau txoj kev kawm kom tag xwb yuav zoo dua. Kuv thiaj li tau kawm tag rau xyoo 2006-2007. Thaum kawm tag kuv rov qab los txog tsev rov qab mus pom Maiv Koob wb tej chaw ua si chaw sib hlub tej qab vag tsib taug nphob xuab mas nco Maiv Koob tshaj plaws li lub siab xav lawm tias ntshe yog tsis tau Maiv Koob lawm ces yuav tsis pib lub neej nrog leej twg li lawm os Maiv Koob, kuv mas nco koj tshaj plaws hauv lub ntiaj teb no es koj puas tseem nco kuv thiab na, ntshe koj mus ua lub neej zoo lawm koj yuav tsis nco txog kuv lawm os. Twb tau 9 lub xyoos no lawm los kuv yeej tseem hnov qab tsis tau koj ploj hauv kuv lub siab mus li os. Thov kom koj ua lub neej sib sib hlub mus kom kawg nawb. Thaum kawg no thov kom nej cov muaj txij muaj nkawm los sib sib hlub thiab sib hwm thiaj tsim nyog txoj kev nkauj nraug zoo zoo sib sib nco nawb. Thaum kawg no thov ua tsaug ib tsoom phooj ywg uas tseem tuaj nyeem Maiv Koob wb txoj me kev hlub tu siab tsis sib tau no thiab mog... Sau npe: Tuam Hawj, tus neeg raug tso nyob kho siab... |
Ceeb Toom: Cov dab neeg kev hlub thiab txhua yam hauv 3haivhmoob.com no peb tsuas yog tso rau sauv daws tau tuaj nyeem laug caij nyoog xwb txwv tsis pub leej twg muab luam mus muag los yog ua lag luam, yog koj coj mus kho los yog ua lwm yam tsis tau qhia rau peb paub , thaum peb tshawb tau lawm koj yuav raug nplua raws txoj cai ntawm lub teb chaw koj nyob ko.
Ua tsaug ntau:
3HaivHmooB.Com
Ua tsaug ntau:
3HaivHmooB.Com