Tsim Lauj Kev Hlub NyoB Moos CaB

Tsim Lauj Txoj Kev HluB Nyob Zos Moos CaB

Tus sau: Tsim Lauj

Email: Laujtshua96@hotmail.com

Phone: 02028488522

Tham txog Lub nroog Moos cab thaum twg rov mob lub siab thiab nco txog ib tug zoo qub hluas nkauj uas tau hlub ib zaug 20 lub xyoo dhau los. 1996 kuv muaj 19 xyoos tuaj kawm ntawv rau lub nroog Moos cab, kuv tham tau ib tug hluas nkauj npe hu "PajyeebVaj". Pajyeeb muaj 16 xyoos nyob lub zos Moos-oo tuaj kawm ntawv rau lub nroog Moos cab.
Lub 11 hlis ntuj yog lub caij paj iab tawg daj rhuv puv roob hav paj vuam tsav tawg dawb vog tim tej roob tsuas, kab nqos via quaj xiv niab tim tej roob siab ntsia rau qhov twg los tshav ntuj nrig kho siab zim. Muaj ib hnub yog hnub so tsis kawm ntawv ob tug phooj ywg tau tuaj yaum kuv nrog nkawv coj hluas nkauj mus yees duab ua si pem hav paj iab. kuv tsis muaj hluas nkauj yog li ob tug phooj ywg ob tug hluas nkauj thiaj yaum Pajyeeb rau kuv. Hnub ntawv peb tau coj Pajyeeb lawv mus yees duab ua si ib hnub pem hav paj iab yam lom zem xauv npo. Txij hnub ntawv los Pajyeeb wb pib sib nyiam sib tham thiab tsim muaj txoj kev lub zoo heev hnub twg hmo twg tsis tau sib ntsib yeej nyob tsis taus pw tsis tsaug zog txawm ntuj teb tag hmo yuav muaj dab tso los nag xauv npos los kuv yeej maub tuaj mus cuag kom tau Pajyeeb xwb lub siab thiaj kaj. Lub sij hawm no Pajyeeb wb sib tseg tsis taus lawm wb tau cog lus khov cia tias tos txog peb caug wb yuav sib sau los ua ib lub neej sib hlub kawg txog hnub kawg.
Lub 7 hlis 1997 kuv xeem ntawv tag mus saib npe kuj xeem tau mus kawm rau nram DongDok, Vientiane. Kuv mus cuag Pajyeeb thiab qhia nws tias kuv yuav tuaj mus kawm rau nram Dongdok kom Pajyeeb ua siab ntev nyob tos txog peb caug kuv yuav los yuav Pajyeeb. Pajyeeb tsis teb kuv pom nws lub kua muag ntws los cuag dej, kuv rub nws los puag kiag thiab hais tias txhob quaj kuv mus kawm rau wb lub neej yav pem suab xwb. Kuv cog lus rau Pajyeeb tias txog peb caug kuv yuav los coj Pajyeeb mus nrog kuv nyob, Pajyeeb los kuj cog lus tias yuav ua lub siab ncaj thiab nyob tos kom tau kuv li cov lus wb tau cog tseg. Hmo ntawv kuv puag Pajyeeb wb nyob ib hmo kaj ntug los tsis dhuav tsis xav sib ncaim li, tiam si lub sij hawm twb los txog zuj zus lawm thiaj ua siab los npaj khoom tuaj mus nce tsheb tuaj rau Vientiane.
Lub sij hawm tuaj txog Vientiane, kuv sau tau ib tsab ntawv xa los rau Pajyeeb piav txhua yam kev hlub kev nco hauv siab rau Pajyeeb, Pajyeeb sau ib tsab ntawv tuaj teb kuv thiab piav txhua yam kev hlub kev nco hauv nws siab rau kuv. Lub sij hawm no tsis tau muaj xov tooj sib hu li, tab si wb yeej sau ntawv sib nug moo txhua hli.
Los txog lub 11 hlis 1997 tsis pom Pajyeeb sau ntawv tuaj teb kuv lawm. Kuv niaj hnub mus tshawb pem qhov chaw xa ntawv los yeej tsis pom Pajyeeb tsab ntawv li ua rau kuv pib me siab tias tsam nws muaj dua tshiab lawm thiaj tsis teb kuv li yav tag.
2 week tom qab kuv tus kwv sau tau ib tsab ntawv tuaj qhia kuv tias"Pajyeeb yuav txiv lawm". Lawv tus dab laug tus tub tuaj nqis tsev hais Pajyeeb. Thaum hnov tias "Pajyeeb yuav txiv lawm" kuv lub plawv yuav luag nres, tsis quaj los lub kua muag los hnov lub siab mob cuag riam chob tsis qab siab mus kawm ntawv tsuas xav ntsoov Pajyeeb wb kev hlub yav tag los xwb.
Txog lub 12 hlis noj peb caug kuv rov los txog rau lub nroog Moos cab txhua yam tsis yog npau suav Pajyeeb twb mus yuav txiv lawm tiag kho kuv siab heev kuv rov mus ncig xyuas tej kev wb taug, tej chaw wb zaum nyob nphob xuav cia mob kuv lub siab kawg kiag xav tsa suab quaj kom nrov2 seb lub siab puas kaj. Kuv tsis paub tias Pajyeej yeej zoo siab nrog luag mus los yog tej laus yuam nws xwb.
Noj peb caug tag kuv ua ib siab tu siab nrho rov tuaj rau Vientiane. Thaum lub tsheb khiav tawm hauv lub nroog Moos cab txog tim daws kuv tig mus saib lub nroog Moos cab thiab hais hauv siab tias "Pajyeeb, mus zoo koj mog zaum no wb yuav sib ncaim mus tag ib sim os hnub twg lub siab lub ntsws zoo mam li rov los"
Txij li xyoo 1997 - 2016 tau 19 lub xyoos kuv tsis tau rov mus txog lub nroog Moos cab lawm, txawm lub sij hawm yuav dhau mus tau ntau lub xyoo los kuv lub siab lub ntsws tseem tsis tau zoo. Thaum twg hnov lub npe(Moos cab) kuv lub siab yeej xav txog Pajyeeb ua ntej tshaj.
Noj peb caug xyoo 2016 kuv rov mus ncig saib lub nroog Moos cab dua ib zaug rov mus pom tej qub kev, tej qub chaw, pom hav paj iab tawg daj rhuv puv roob hav ca yuav kho siab ua luaj txawm tsis quaj los lub kua muag los vim nco txog ib tug zoo qub hluas nkauj uas tau sib hlub ib zaug hauv lub nroog Moos cab no.
Twb tau ze 20 lub xyoos lawm Pajyeeb wb tsis tau sib pom li xyov nws zoo li ca lawm. Ntuj ni lawv...ib sim nkauj raug sib hlub tsis sib tau los tseem xav ntsib xav pom nws dua ib zaug ua zaum kawg ua ntej txoj pa yuav yaj txoj sia yuav tu ncaim lub nriaj teb no mus.

Ntuj yuad... Pajyeeb, sim mi neej no ca koj yuav ua rau kuv nyiam koj hlub koj nco koj tag lub siab lub ntsws, koj tso kuv tseg yam tus ntses tsis muaj pa dej nyob yam lub nkauj tsis muaj chaw nres, tej lus cog tseg tseem khuam hauv kuv siab, lub nriaj teb tig kuv siab tsis tig, txhua yam hloov kuv siab tsis hloov,tav ntuj no ntshe koj twb tsis nco txog kuv lawm, ntawm kuv qhia koj tias koj zoo yam tus pos chob rawv hauv kuv nruab siab tiam no yuav muab koj nco mus txog hnub qua ntxa tiaj os.
Ua tsaug rau 3Haivhmoob.com thiab cov phooj ywg nej siv sij hawm los nyeem kuv zaj dab neeg: Moos cab chaw tshua.
Tus sau: Lauj Tsim nyob Laos.