Tshuaj Vwm Yas NpaB - Los Ntawm Khun Sa (Khum Xaj)
By: Hmoob Khej3
birdybrid@yahoo.com Nplooj-1 "Av Xaub Xeeb Kaum" los yog lus As Kiv hu ua "Golden Triangle" nws yog ciam teb ntawm 3 lub teb chaws xaus laug los ua ke xws li yog Thaib Teb, Nplog Teb thiab Pab Mab los sis Myanmar. Ib cheeb tsam ntawm no peb sawv daws cov uas paub lawm los kuj paub tiam sis tshuav qee tus kuj tsis tau paub zoo> Thaj chaw ntawm no nws yog ib thaj chaw ua "Yeeb Tshuaj (Drugs) ua lag luam yeeb tshuaj loj. Cov yeeb tshuaj uas lawv ua tawm nws muaj xws li yog Yaj Yeeb los sis Yeeb Dub Heroin,Yas Mab los sis Yas Npab thiab Yas Ice. 30 tawm xyoo yav nram ntej ub yog muaj Yawg Khun Sa los yog Chang Chi Fu uas yog ib tug thawj coj tub rog ntawm haiv neeg Mong Tai hauv lub Xeev Shan State nyob rau Teb Chaws Phab Mab nws coj tub rog nrog Phab Mab ua tsov ua rog sib txeeb teb chaws kom haiv neeg Mong Tai muaj teb chaws. Lub sij hawm tiam thaum ntawv yawg Khun Sa yog ib tug ua lag luam Yaj Yeeb thiab Heroine loj tshaj plaws nyob rau Av Xaub Xeeb Kaum nws muaj koob muaj npe nrov txog sab ua lag luam yeeb tshuaj. Thaum ntawv cov Yas Mab los sis Yas Npab ntawm no nws yeej muaj tshwm sim tau los ntev lawm tiam sis nws tseem yog tsawg tsawg xwb tsis ntau li tam sim no. Thaum ntawv Yas Mab los yog Yas Npab nws tsuas yog siv los ntawm cov ua hauj lwm nyhav, cov neeg tsav truck thauj khoom xwb neeg tseem tsis tau paub coob thaum ntawv cov yeeb tshuaj uas neeg nyiam siv tsuas yog Yeeb Dub thiab Heroin xwb. Lub sij hawm thaum ntawv hais txog yeeb tshuaj nws tsis tau txaus ntshai npaum li tam sim no. Yeeb tshuaj tuaj mus nkag rau Thaib Teb los sis coj tuaj mus muag rau Thaib Teb nws yog siv tib neeg mus thauj mus ris coj mus muag rau nram tej nroog loj xws li hauv Bangkok. Lub caij nyoog thaum ntawv Thaib cov tub ceev xwm thiab tub rog lawv tseem tsis tau ua nruj zov nruj li tam sim no kev ua lag luam yeeb tshuaj nws tseem yooj yim.Kev mus thauj yeeb tshuaj pem ciam teb Thaib thiab Phab Mab cov tub lag luam yeeb tshuaj lawv nyiam siv cov neeg nyob toj roob xws li yog Hmoob, Co, Mus Xaws Dub ua cov mus ris mus thauj coj los rau lawv muag.Lawv kuj them tus nqi ntau kawg li rau cov mus thauj pem ciam teb los rau lawv thaum ntawv lawv mam li coj mus muag tom ntej lawm xwb. Txog rau xyoo 1988 Khun Sa tau xa 1 ton Heroin tuaj muag rau Teb Chaws Meskas ntawm nov tiam sis raug tub ceev xwm Meskas ntes tau lub court hauv Meskas Teb no thiaj li tau txiav txim ntiav txog $2 million rau tus ua txhom kom tau Khun Sa coj tuaj hais plaub nyob Meskas. Nom tswv Phab Mab thaum ntawv lawv tsis muaj cuab kav yuav ntes kom tau Khun Sa vim tias thaum ntawv Khun Sa nws muaj tub rog muaj riam phom tiv thaiv nws. Kev ua lag luam Heroin ntawm Khun Sa yeej muaj ua ntu zus los txog rau xyoo 1996 muaj kev sib ntaus sib tua los ntawm Khun Sa nrog rau cov tub rog Wa uas yog lwm pab cov minority. Cov Wa ntawm no lawv muaj peev xwm tua yeej Khun Sa thaum Khun Sa tau swb rau cov Wa ntawm no lawm Khun Sa thiaj li poob tag nrho txhua tsav yam tej chaw ua Yaj Yeeb ua Heroin tej cuab yeej cuab tam rau cov Wa ntawm no ua cov los mus tswj los kav lawm.Khun Sa thov kom lawv tsis txhob muab nws xa tuaj rau Meskas rau txim tso nws tuaj yeej ua tus swb nws muaj txhua tsav yam rau cov Wa ntawm no cov Wa los kuj tsis xa Khun Sa tuaj rau Meskas rau txim lawv cia Khun sa nws nyob nws los txog rau xyoo 2006 Khun Sa mam li tuag lawm. Tom qab cov Wa txeeb tau Khun Sa tej chaw ua yeeb tshuaj tej cuab yeej cuab tam lawv thiaj li tau los ua tej yeeb tshuaj xws li cov Heroin thiab cov Yas Npab txij thaum ntawv los Yas Npab yog cov lawv ua ntau tshaj plaws tseem tshaj cov Heroine lawm thiab. Cov Yaj Yeeb los sis Yeeb Dub tam sim no kuj tseem muaj muag thiab tab sis nws tsawg heev lawm vim tias Yeeb Dub lawv siv nyoj coj los ua Heroin tiam sis kuj ho tseem muaj muag nyob raws ciam teb xws li Thaib, Phab Mab thiab Nplog. Yas Npab thaum ub Thaib hu ua Yas Mab los sis tshuaj nees vim tias cov neeg haus lawv pheej vwm vwm thiaj li muab hu dua npe tshiab tias Yas Npab los sis tshuaj vwm. Yas Npab los sis Methamphetamine lawv muab 5 yam chemicals coj los tov ua ke thiaj li ua tau Yas Npab xws li yog Amphetamine, Amphetamine Sulfate, Methamphetamine Hydro Chloride thiab Caffeine. Yas Npab nws ua ntsiav (tablet) luaj nkauj li ntsiav tshuaj Paracetamol (Acetaminophen los sis Tylenol Teb Chaws Meskas ntawm nov) tiam sis mas nws ib nyuag tuab zog ntawv thiab nws yog color orange los is liab tseb. Yas Npab nws muab ua tau 4 yam siv xws li noj li noj tshuaj, muab tov dej ua kua muab txhaj li txhaj tshuaj, muab tso rau hauv daim foil haus li lawv haus yeeb daws los sis Heroi thiab muab haus li haus luam yeeb. Kev siv Yas Npab thaum nyuam qhuav siv cov tshuaj tab tom yaj ua hauj lwm rau tib neeg lub cev yuav ua rau tus siv ntawv nquag heev tsis nco qab nkees li ua rau lub plawv dhia ceev ntshav ntoj siab heev tsis tsaug zog tsis nkees li tiam sis cov tshuaj mus tua nws lub hlwb ua rau hlwb puas. Thaum cov tshuaj lub zog tag lawm ua rau tus tib neeg nkees nkees hev pw tsheej hnub tsis xav sawv. Thaum nws quav Yas Npab tuaj lawm yuav ua rau tus neeg daj ntseg yuag tsis qab los noj mov thiab tho muag thiab vwm tuaj vim cov tshuaj mus tua nws lub hlwb tag ua rau nws tsis meej pem pheem pom tej tug neeg yuav tuaj tua nws tuaj txhom nws ua rau nws qw ceeb thiab ntshai ua ib tug neeg tsis nco qab tsis meej pem thiab vwm tuaj lawm. Nyob rau Thaib Teb muaj cov quav Yas Npab coob txog 3 million tus ib nrab ntau ntawm cov no yog cov tub hluas ntxhais hluas lawv pib haus Yas Npab thaum lawv muaj hnub nyoog 12 xyoos. Yas Npab raug xa tuaj mus muag nyob rau Thaib Teb ib lub xyoo twg txog 500 million ntsiav nws muaj txog 32 lub chaw ua Yas Npab los sis cov company ua Yas Npab xa tuaj muag hauv Thaib Teb nkaus nkaus xwb. Ntawm 32 lub company ua Yas Npab ntawm nws nws yog ua los ntawm peb pab neeg xws li yog cov MNDAA (Myanmar National Democratic Alliance Army) los yog Ko Kang pab ntawm no lawv Ces Lab Cas nrog nom tswv Phab Mab lawm nom tswv xa tub rog tuaj mus saib kev ruaj nreg rau lawv hais txog txoj kev ua yeeb tshuaj. Ib pab yog pab hu hais tias UWSA (United Wa State Army) pab ntawm no yog pab uas kuv tham ua ntej ntawv lawv yog cov tau Khun Sa tej chaw tej cuab yeej cuab tam ua yeeb tshuaj lawv tsuas yog ua Yas Npab nkaus nkaus xwb pab saum toj lawv ua Yas Npab thiab Heroin ua ke. |
Nplooj-2
IB pab yog Wei Sia Kang tus ntawm no nws yog ib tug neeg Suav Taiwan tuaj mus nqis peev ua Yas Npab thiab Heroin nyob rau Golden Triangle nws muaj nyiaj heev nws cov nyiaj tseem ntau tshaj li tag nrho Thaib cov nyiaj nyob Teb Chaws Thaib ua ke lawm thiab nws muaj nws tub rog nws muaj nws riam phom tiv thaiv nws. Dhau li lawv 3 pab ntawm no nyob rau Teb Chaws Nplog hauv lub Xeev Borkeo sab npuab Thaib Teb Hmoob muaj 2 lub company ua Yas Npab cov Hmoob ntawm no lawv kom tes nqis peev ua ke nrog cov Thaib sib koom ua cov Yas Npab ntawm no xa tuaj mus muag rau Thaib Teb. Ib hnub twg cov company ua Yas Npab ntawm no lawv muaj peev xwm ua tau Yas Npab 200,000 ntsiav tauj ib hnub. Nyob rau hauv cov Wa li lawv muaj 6 lub company ua Yas Npab Wei Sia Kang nws muaj tham tsam 8 lub company ua Yas Npab dua li ntawv ces yog cov MNDAA lawv li. Thaum lawv ua tau lawv cov Yas Npab tag lawm nws muaj nws cov Meb tuaj mus txais lawv cov tshuaj vwm ntawm no coj mus muag lawm. Thaum no cov Meb ntawm no mam nrhiav neeg tuaj mus thauj thiab ris cov Yas Npab ntawm no coj mus rau lawv cov neeg muag nyob thoob plaws hauv lub Teb Chaws Thaib. Cov Meb ntawm no muaj xws li tus 1. Yawg Lieutenant Colonel Yij Xes tus ntawm no yog ib tug thawj coj ntawm haiv neeg Mus xaws Dub. Cov neeg toj siab tsis Hais Hmoob, co, Mus Xaws, Is Kaub yog lawv mus ris Yas Npab mus thauj Yas Npab lawv mus tiv tauj Yawg Yij Xes ntawm no xwb. Tus 2. yog Yawg Prayuth los yog Mes This yawg ntawm no yog ib tug neeg Thaib cov Thaib lawv mus ris Yas Npab thauj Yas Npab lawv tiv tauj yawg ntawm no. Tus 3 yog Yawg Nor Kham tus ntawm no yog ib tug Neeg Phab Mab tab sis nws raug tub ceev xwm Thaib txhom tau thiab muab nws xa mus rau Suav tom qab ntawv Suav muab nws tua pov tseg lawm. Tus 4 yog Yawg Na Kham Muy tus ntawm no nws yog ib tug Mejor General yog neeg Phab Mab cov Thaib uas lawv nyob rau sab Xeev Kan ja na buri thiab Xeev Tak lawv mus thauj Yas Npab yog lawv tiv tauj yawg ntawm no. Tus Meb Thib 5 ntawm no yog nyob rau Teb Chaws Nplog thiab yog ib tug Meb loj heev li muaj peev xwm xa tau Yas Npab ntau heev hla Dej Naj Khoos tuaj mus muag rau sab Thaib. Tus no nws tsis yog neeg Nplog nws yog neeg Thaib yog cov Thaib uas nyob rau sab qab teb nrav npe hu ua Usman Slae Ming los yog Suk Xaixana. Yawg ntawm no yog ib tug support nyiaj mus rau cov tsim kev kub ntxhov nyob rau sab Qab Teb Thaib. Yawg ntawm no muaj cov thauj Yas Npab rau nws coob heev tsis hais Thaib thiab Nplog. Xyoo no thaum lub 1 hlis ntuj yuav luag txog lub 2 hlis yog tias nej saib xov xwm txawv teb chaws uas yog hauv lub Teb Chaws Thaib nej yuav pom muaj ib qho xov xwm tawm tub ceev xwm Thaib txhom tau ib tug neeg muag yeeb tshuaj uas yog neeg Nplog Yawg Xaixana Keo Phim Pha hnub nyoog 42 xyoos yawg ntawm no yog ib tug ua hauj lwm rau yawg Usman uas kuv hais los ntawm no. Yawg Xaixana Keo Pim Pha ntawm no muaj nyiaj thiab tsis muaj los kawg yawg lub tsev zoo npaum nkaus li lub castle lawm xwb yawg muaj peev xwm yuav tau 4-5 lub tsheb uas yog cov super car kim kim teb chaws no tus nqi txog $ million lawm xwb xws li yog cov Porsche thiab cov Lamborghini uas kim kim ntawv ntag. Teb Chaws Nplog yog cov muaj muaj nyiaj muaj vaj tsev zoo zoo thiab muaj tsheb txog 4-5 lub ib txhia yog ua lag luam Yas Npab nkaus xwb. Kauv Maim los sis kev cai lij choj Thaib rau txim rau cov haus Yas Npab,, cov muag, thiab cov thauj tib yam nkaus 10,000 ntsiav rov sauv lawm ces txim tuag lawm yog thaum lawv muab nws los hais hauv court yog nws lees nws lub txim qhov nws tau ua ntawv ces Thaib tsis muab nws tua pov tseg Thaib kaw nws tag nws sim neej xwb yog nws tsis lees nws lub txim qhov nws ua ntawv ces Thaib tua nws pov tseg tiag thiab. Cov Neeg uas mus thauj Yas Npab muaj ib txhia lawv tsis kam hla ciam teb los rau sab Thaib vim tias muaj tub ceev xwm thiab tub rog zov txhua lub hau kev thiab Thaib muaj cov Xaim Lav (Secret Agent) uas tuaj mus muab xov xwm qhia rau tub ceev xwm txhom. Lawv xum hla los rau sab Nplog Teb vim tias hauv Nplog ces Nplog tsis tshua ua nruj thiaj muaj toj roob hauv pes muaj hav zoov hav tsuag zoo zais cev lawv mam li tau Dej Naj Khoos nqis hav los rau sab Thaib xwb. Cov Yas Npab ntawm no nyob Thaib Teb lawv muaj ib ntsiaj nraug nqi nyiaj Thaib thaj tsam 150-320 Npaj. Muaj ib yam niag lawv hu ua Yas Ice yam ntawm no nws ci ci zoo li ice los sis Nab Kuab lawv siv ib yam li siv Yas Npab xws li noj, txhaj thiab haus. Yam ntawm no kuv ho tsis paub tias tus nqi lawv muag ib gram no yog rau nyiaj Thaib li cas. Txhua yam kuv tham los ntawm no puav leej yog hais txog Yas Npab los yog tshuaj vwm rau peb ib txhia cov uas paub lawm los ha yam zoo cov tsis tau paub los kom paub tias Yas Npab yog vim li cas tam sim no thiaj li yuav ntau ua luaj nws yog leej twg tsim cov Yas Npab ntawm no tiag thiab lawv ua li cas thiaj li coj tau tuaj muag puv Thaib Teb tag. Above picture was taken by: Piers Cavendish 1989
|
Koj xav li cas rau Hmoob Tej khoom Pov Haum Sau rau nram qab no . Ua tsaug. Nias nov mus nplooj Dab neeg
Widget is loading comments...