RooB Phom XeB

Hmoob Khej3 - RooB Phom XeB

birdybird@yahoo.com

Zaj ntawm no kuj yog ib zaj tshwm sim txawv txawv nyob rau Teb Chaws Meskas nyob rau California. Kuv thov muab tis npe hu hais tias "Roob Phom Xeb"

Mus hauv Lub Nroog Fresno Xeev California mus rau sab hnub poob taug Highway 180 mus rau Lub Zos Mendota deb kwv yees yuav luag 5 miles ces txog Mendota muaj ib txoj nyuag kev lem sab laug mus hla rau Meskas cov teb txiav mus hla Kev 5 (Interstate 5). Dhau Kev sab hnub poob ces yog txoj kev Panoche Road tau txoj kev Panoche Road ntawm no mus deb kwv yees yuav luag 5 miles muaj ib lub nyuag menyuam gate nyob rau hauv qab qe sab xis hla lub gate ntawm no mus rau sab tim ub ces nws yog roob hav lawm xwb tab sis nws yog niag roob qhuav ua suab puam xwb tsis muaj ib tug ntoo li yog tias lub caij ntuj qhuav ces nyoom daj rhuv xwb.

Nyob raws cov roob qhuav hauv qhuav ntawm no nws kuj muaj npua teb nyoob coob vim tias tsis deb ntawm no Meskas lawv cog txiv qab rog (Almond) ces npua teb xij pheej mus no Meskas cov txiv qab rog npua teb los mus pw rau tij kis hav los nkaum rau tej kis hav qhov uas muaj tauv puav nyuag nroj.

Nws yog ib qhov zoo rau peb mus raws cov npua teb ntawm no tua. Xyoo 2013 Kuv thiab peb ib pab nyuag phooj ywg kwv tij muaj 6 leej peb txawm sib yaum mus tua pab npua teb ntawm no. Tsis ntev tag los no tau muaj 1-2 weeks dhau los no xwb lawv ib pab lawv mus raws tua kuj tua tau tug puav cov loj tswv thiab. Ces hnub ntawv peb txawm sib yaum mus tua.

Mus ntawm Zos Fresno mus rau thaj chaw ntawm no deb kwv yees ze 40 tawm miles thaum mus txog peb nres tsheb ntawm ntug kev nqis mus rau hauv lub gate thiab chaws lub gate ntawm no mus rau sab tim taw roob. Thaum mus txog rau tim taw roob lawm ces tsis deb lawm mus ko taw tsuas yog kwv yees 1 mile xwb ces txog ntua rau ntawm qhov npua nyob lawm ntag.

Lub roob ntawm peb mus plob npua teb no nws ua av xuab zeb thiab ua hmoov zeb sib dawb paug xwb tej nyuag pob zeb ces niag phom phom xuas tes ntais xwb yeej ntais tau.

Sawv ntxov tsees peb txawm mus txog npua teb tsis los tsis pom muaj npua teb los rau peb tua. Kab npa thiab neev npau mas lwj ntsuav xwb tiam sis kuj ho tsis pom npua los. Hnub ntawv peb zov ib hnub tsis tau npua tuaj tej zaum kuj ho yog lawv nyuam qhuav mus tua lawm npua ntshai npua khiav deb lawm tsis tau los.
Peb tuav tuav phom ib hnub npua tsis los nkees tuav phom nqa phom ntawm tes ces peb txawm muab peb cov phom tso rau hauv av cov niag av xuab zeb. Nyob nyob ib hnub tsis muaj qab hau dab tsi peb cia li cuab los tsev.

Los txog tsev tau 2 hnub xwb kuv saib kuv rab phom xeb tag li daj nrhuv liab ploog raws tus kav hlau lawm xwb. Nyuam qhuav yog 2 hnub xwb phom cia li xeb npaum nkaus li koj muab pov nraum zoov tsau nag tsheej lub hlis es xeb li ntag qhov twg yog hlau ces yeej xeb liab ploog li lawm ntag.

Kuv hu mus nug phooj ywg txhua tus lawv li los puav leej xeb tib yam. Nug pab uas mus plob ua ntej peb tib thaj chaw ntawm no lawv li los yeej xeb li kuv hais ntawv. Thaum xeb li no lawm koj muab tshuaj muab roj los txhuam tag nws cia li ua qhov ntshaus ntshiv rau ntawm tus kav phom tsis zoo nkauj tsis du du lawm.

Kuj tsis paub tseeb tias yog vim li cas yuav txawv ua luaj tsuas yog tib thaj chaw ntawm no xwb thiaj li ua li ntawv lwm qhov chaw kuj tsis ua li ntawv thiab. Lwm thaj chaw koj txawm nqa phom mus tua ib ob lwm los txog tsis tag muab clean muab cia tsheej ib ob lub hlis phom tseem zoo li qhov qub. Thaj chaw kuv hais saum toj no 2 hmos xwb phom xeb liab ploog lawm.

Hos muaj tej thaj chaw koj nqa phom mus sim phiaj phom ncaj muaj tej thaj chaw mas tseev tua li ntag tua ze 100 lub mos txwv yeej kho tsis tau phom ncaj hlo li tsis paub tias vim licas?

Puas muaj leej twg paub tias vim licas phom thiaj li xeb sai ua luaj qhia kuv paub thiab.