Tus sau: Nyiaj Qhov Chaw Ntsib DAB: Nyob Tsev So Washington - Thaib Teb
Thaj tsam ntawm xyoo 2000 kuv thiab ib tug kwv tij HmooB Vaj hu ua Tooj KuB no tau los mus pw rau ntawm ib lub tsev so uas npe hu ua Washinton Hotel nyob rau Thaib teb nram lub nroog tuam ceeb Npas Kauj thiab wb kuj tau ntsib teeb meem yog muaj dab los tsuam thiab los nrhiav teeb meem rau wb ob zaug ua ntej kaj ntug. Wb los them nyiaj thaum 5 teev tsaus ntuj ces lawv muab yuam sij rau wb nce mus pw theem 6 ntawm lub tsev pw no. Thaum wb mus txog chav pw kuj tsis muaj dab tsi tsuas yog zoo li sij muaj ntsis txias siab xwb ua rau yus plaub hau muaj ntsis xob tab sis kuj tsis xav li cas . Wb da dej tag ces nyias pw nyias ib lub txaj, kuv pw lub txaj uas puab ntawm qhov rooj nkag los rau chav pw ho tus phooj ywg Hmoob Vaj no nws pw lub txaj sab tom puab qhov chaw da dej. Thaum wb pw txog li 11 teev ib tag hmo nyias tsaug nyias zog tag lawm kuv txawm ua ib tug npau suav tias muaj ib tug poj niam hnav khaub ncaws dawb paug los tim qhov rooj los hla kiag kuv kaw taw ces nws cia li cev tes los kov kuv ua rau kuv ntshai heev ces kuv cia li qw kiag tam sis ntawv ua rau tus kwv tij no ceeb tag nws thiaj nug tias yog ua li cas. Kuv qhia nws tias npau suav phem tias muaj dab nkag los nrog wb pw no. Tus kwv tij no hais rau kuv tias , koj txhob ntshai kuv txawj khawv koob kuv mam li ua khawv koob nto aub ncaug 4 tawb mus rau 4 ces kaum txaj xwb ces tsis ua cas lawm. Thaum tus kwv tij no ua khawv koob tag wb rov pw..lub sij hawm ntawv kuv yeej ntshai lawm kuv thiaj muab kuv lub txaj txav los ti nkaus rau nws lub ces wb rov tsaug zog...kwv yees li txog thaum sij hawm 1b teev ib tag hmo dhau xwb ces kuv hnov nws qw qw qw tsis nrov li kuv thiaj tsa nws tias yog ua li cas no ces nws hais tias: " Aub ..! Aub..! niag tsov tom dab ntawv nws los zuaj kuv noob qes lawm mob tiag tiag yog koj tsis tsa kuv mas xyov ua cas li lau". Ces kuv hais rau nws tias yog li ko ces wb pw tsis tau lub tsev no lawm cia kuv hu rau hauv lawv chaw ua hauj lwm kom hloov wb mus pw lwm chav . Kuv thiaj hu rau tus ntxhais thaib ua hauj lwm ntawm lub tsev pw no tias wb pw hoob no mas muaj dab yog li thov nej hloov wb mus pw lwm chav..tus ntxhais no hais tias lawv tsis kam hloov , kuv tau hais rau nws tias yog nej tsis hloov ces wb tawm tam sim no lawm tab sis wb yuav mus qhia rau tib neeg tias nej lub tsev no muaj dab kom neeg txhob los pw ntxiv. Nws tias cia nws nrog nws tus thawj coj tham tso mam qhia wb no ces ib pliag thiaj hais tias lawv kam hloov wb los pw rau theem 3 lawm no. Thaum wb los pw theem peb no los tus dab no nws kuj nqis los muab wb mos rau hauv thaum kaj ntug thiab yog li wb thiaj tau tawm lub tsev pw no los lawm. Tom qab no muaj ob tug phooj ywg Hmoob los teb chaws mes kas los pw lub tsev no nkawv kuj ntsib dab ib yam.. ib tug mas mus coj kev cai vaj tswv yes xus lawm hos ib tug tseem coj dab ces nkawv los pw tus mus coj kev cai vaj tswv txawm hais tias kuv mas kuv ntseeg yes xus ces tsis muaj dab los ua cas rau kuv li..ntshe koj xwb tsam dab los ua cas rau koj.
Nplooj 2
Thaum nkawv pw ces tus coj kev cai vaj tswv txawm thov vaj tswv pab nkawv. Ua cas nkawv pw ib pliag xwb qhov muag tawv tawv txawm pom ib tug niam tais hnav khaub ncaws dawb dawb nkag los muab tus coj kev cai vaj tswv nyem noob qes thiab nws qw ..qw...ces tus coj kev cai qub thiaj tsa nws tias yog ua cas. Nws mam qhia tias dab los nyem nws noob qes...nkawv cia li tawm tsis pw lub tsev no lawm thiab. Lub tsev pw no nyob rau thaj tsam ntawm tus choj hu ua xab pha Qhoiy yog nej leej twg mus txog tuam ceeb npas kauj nco ntsoov txhob mus pw lub tsev no, tsis paub tias nim no lawv muab hloov npe los tsis hloov vim twb tau ntev li 15 lub xyoos los no lawm. Thiab yog nej mus pw cov tsev so no lub twg thaum nkag mus es plaub hau xob xob no ces kom lawv hloov lwm chav pw zoo dua. Ua tsaug ntau rau vas sab www.3haivhmoob.com uas tsim qhov chaw no rau suav daws tau tuaj sau dab neeg khaws cia, mam ntsib nej dua lwm zaus. Sau npe: Nyiaj
Ceeb Toom: Txwv tsis pub leej twg tuaj muab peb cov dab neeg hauv no mus tso rau koj lub vas sab website , Forum los yog lwm qhov chaw uas tsis tau txais kev tso cai ntawm peb. Tsis pub muab luam mus muag thiab nov peb tsuas tso rau suav daws tuaj nyeem laug caij nyoog xwb. Ua tsaug. Warning: No one can copy our stories to post on your own website, forum or other internet sites without our permission. Printing for selling is also prohibited . Thank you for your cooperation.
Koj xav li cas txog cov tsev pw xwb ..pus txaus ntshai?