Tub Lis Thiab Yiv Txoj Dab Neeg Kev Hlub
Nplooj -1 Tus sau: Phoos Yaj
Ntawm: Teb Chaws Los Tsuas - Nplog Zaj Keeb Kwm Kev Hlub Tu siab no tshwm sim Nyob rau lub zos tiaj suab sab xeev VT teb chaws los tsuas muaj ib nkawm nkauj nraug uas muaj txoj kev sib sib hlub tab sis tsis sib tau thaum kawg ib tug tuag mus ua dab lawm ces ib tug thiaj ua siab muab lub qub zog uas lwj siab no tso pov tseg khiav mus nyob rau lwm lub zos lawm.... Thaum lub 3 hlis ntuj xyoo 1998 kuv tau pom ib zaj dab neeg nyob rau hauv zos tiaj suab nyob xeev V T lub zos ntawv yog ib lub zos uas nyob deb nroog loj thiab ib thaj tsam ntawv tsis muaj zos ntau. lub zos ntawv tsuas yog ib lub zos me me xwb muaj thaj tsam li 40 tawm yim xwb tau muaj ib txwm hluas nkauj hluas nraug tau muaj txoj kev sib hlub zoo heev... tus hluas nkauj hu ua yiv hos tus hluas nraug hu tub lis. Tub lis thiab yiv nkawv tau ua nkauj ua nraug tau 4 xyoos txwm rau lub 3 hlis yiv thiaj hais rau tub lis tias . "Tub li wb twb sib tham tau ntev lawm e thaum twg koj mam tauj coj kuv mus nrog koj nyob os tub li?" Tub Lis teb rau Yiv tias peb lub zos no yog zos me me xwb kuv yuav koj los yeej tau kawg tab sis koj ua siab ntev tos kom tag xyoo no seb nom tswv lawv puas tshem peb lub zos tso kuv mam coj koj nrog kuv mus nawb vim tias kuv yuav koj ziag no tsam peb yuav tsiv teb tsaws chaw e koj niam thiab kuv niam lawv tsis mus ua ke ces wb yuav ua cas? Thiab nws hais ntxiv tias. Yiv koj nyob tos kuv mus kawm kom tiav qib siab muaj ib hnub twg yog peb tawm lub zos no mus lawm es wb thiaj tsis txom nyem nawb. Yiv teb tias ua li os tub lis txawm lub zos no yuav kub nyiab tag thiab koj yuav mus ntev npaum twg los kuv yuav nyob tos kom txog hnub koj los coj kuv wb mam mus ua ke os nawb....tag kis sawv ntxov yog hnub uas tub lis yuav sawv kev mus kawm ntawv rau nroog VT yog li hmo ntawv nkawv thiaj tau nyob ib hmo kaj ntug thaum kaj ntug yiv thiaj sawv los ua tshais thiab tua ib tug qaib ntim ib pob mov rau hauv daim nplooj tsawb thiab xa tub lis mus txog tom ntug zos tub lis thiaj tau hais rau yiv tias. yiv koj nyob kuv yuav mus li 4 lub xyoos xwb kuv mam rov qab los... koj nyob thaum twg koj nco kuv no koj muab kuv rab ncas coj los tshuab es xav tias muaj kuv nyob ntawm koj ib sab no nawb. Es koj thiaj li tsis nco kuv os, yiv los kuj hais ib yam li ntawv thiab muab tau ib lub raj nplaim rau tub lis. Thiab nkawv tau cog lus tias tom qab 4 lub xyoo tub lis yuav rov qab los yuav yiv. Thiab yiv yog tus nyob txawm li cas los yiv yuav nyob tos tub lis ib leeg xwb. Nkawv taug kev mus ib pliag li ib lub sij hawm ntev loo tub lis hais tias: yiv koj txawm yuav nrog kuv mus deb npaum li cas los wb tej lus wb yeej tham tsis tag li tej no yog hav zoov xwb ces koj rov qab mus tsev nawb mog, nkawv thiaj tau tuav tes ua zaum kawg thiab yiv thiaj tau tig rov qab los mus tsev yam tus ntsoos ntsoos rov los tsev lawm. Sij hawm dhau mus tau 3 lub xyoos tom qab xwb tub rog nyab laj tuaj muab cov niam txiv pej xeem hmoob nyob lub zos tiaj suab, zos kho siab thiab zos tsua dawb tua yam tsis txuag lawv siav li peb hmoob ib txhia thiaj tau khiav los nyob rau Paj Xas( pak xan) hos muaj ib co los nyob rau xauv yuam naj yuam, muaj ib pab tau khiav los hla tus niam dej naj qhoom rau thaib teb lawm thiab kuj muaj coob leej uas tau tag lub neej txoj sia rau ntawm zos tiaj suab yam tu siab heev li vim peb hmoob tsis muaj nrim teb nrim chaw thiaj tsis muaj tus pab , hos hais txog ntawm tub lis niam thiab txiv nrog rau nws tsev neeg tau tuag tag lawm. Nyob li ntawm yiv niam lawv kuj yog pab uas khiav los hla dej naj qhoom mus rau thaib teb lawm lub sij hawm ntawv cov nyab laj tua lawv hlawv zos tiaj suab muab lawv txhom mus tua pov tseg yiv kuj yog ib tug uas raug lawv ntes tau thiab muab tua tuag kiag rau hauv yiv lawv tsev pw ntawm qab cub xwb lub sij hawm no yiv twb mus ua dab lawm tab sis yiv yeej tsis mus thawj thiab li vim yiv ntseeg tias tub lis tseem yuav los nrhiav yiv dua. |
Nplooj-2 Tuav tes ncaim zaum kawg
Twb tau 1 lub xyoos tom qab tub lis mam kawm tiav los nws cia siab tias yuav tau los cuag tus neeg nws hlub thiab yuav los pom niam thiab txiv pem qub zog thaum nws los txog tom ntug zos uas thaum ub yiv xa nws tuaj ntawv nws thiaj thau yiv lub qaj nplaim coj los tshuab lub sij hawm no lub zos tiaj suab twb ciaj zoov tag tsuas tshuav yiv lawv lub tsev nyob pem hauv zos lawm xwb thaum yiv lub suab raj nrov yiv thiaj tau mus muab yiv cov khaub ncaws coj los hnav thiab nqa nws daim paj ntaub tuaj zaum xaws nraum qhov rooj tos tub lis. Thaum tub lis twb los txog kiag rau hauv zos ua cas tsis muaj neeg li lawm tsuas pom nyuag nroj tsuag ntsuab xwb xiab lawm xwb thiab pom tib neeg tej pob txha dawb vog hauv av lawm xwb nws poob siab loj heev nws thiaj los txog tom nws tsev cas lawv lub tsev twb vau tag tsuas tshuv tej ncej tse lawm xwb nws thiaj ceev nrooj mus txog pem yiv lawv tsev ua cas tseem pom yiv lawv lub tsev ncho ncho pa thiab pom yiv tseem nyob ua paj ntaub nyo hau nyes xwb nws thiaj zoo siab heev tias yiv tseem nyob tos nws tab sis nws kuj tsis tau mus kiag ntawm yiv lawv tsev vim tsis tau tsaus ntuj. Ib pliag li 3 teev tom qab tsaus ntuj zuag lawm nws thiaj tshuab raj thiab taug kev mus kiag ntawm lawv lub tsev ua cas tsis pom nws tawm tuaj hu li yav tag los lawm tub lis thiaj tau mus xauj qhov tsev ua cas pom muaj ib lub chaw nyob nram qab cub thiab pom lub qhov cub cig cig tab sis cig tsis loj thiab kuj pom yiv zaum dub nciab ntawm qhov cub nws thiaj hu tias. Yiv kuv yog tub lis os kuv los lawm os es los qhib qhov rooj rau kuv os. Yiv teb tias koj los koj xwb mas qhov rooj twb tsis kaw ne tub lis thiaj tau los rau hauv tsev thiab los nrog yiv tham nws thiaj mam nug yiv tias ua cas tsis muaj neeg li lawm yiv thiaj mam hais tias kuv piav rau koj es koj txhob ntshai kuv nawb. Yiv thiaj qhia txhua yam tag rau tub lis thiab Tub Lis tau hais tias. "tus neeg kuv hlub txoj hmoo tsis muaj es thiaj zoo li no lawm es koj ua ib siab mus thawj thiab nawb mog txawm wb nyuav nyob ua ke mus los yeej tsis tau lawm e kuv yuav mus nrhiav koj niam lawv rau thaib teb nawb." Lub sij hawm ntawv nkawv thiaj sib qawg quaj thiab nyob txog 3 moo kaj ntug yiv thiaj sawv los ua tau ib raj mov thiab tuav ib qho kua txob npaj rau ib lub plhaub taub thaum kaj ntug lawm thiaj muab rau tub lis coj mus ua su thiab tub lis thiaj hais rau yiv tias yiv koj mam ua ib siab mus nrhaiv kuv niam thiab kuv txiv lawv es koj mus ua lawv tus ntxais thiab mus hlub lawv nawb mog nyob li ntawm kuv ces kuv mam mus nrhiav koj niam lawv rau thaib teb es kuv mam mus ua lawv ib tug tub hlob thiab mus hlub lawv os nyob li ntawm wb ces mam sib ntsib rau fab lwm tiam lawm xwb nawb mog . Dhau ntawm no los tub lsi thiaj tau los rau ntawm lub zos nab poom moos hooj thiab hla los rau thaib teb thaum xyoo 2004 lawm hais txog ntawm yiv ces tsis paub tias zoo li cas lawm zaj dab neeg no kuv tsuas paub txog li no lawm xwb Thaum lub 5 hli xyoo 2009 tag no ntawv kuv tau mus txog rau ntawm lub zos tiaj suab lawm tsuas pom tej qhov txos thiab cov txwm zeb tej ncej txag thiab tseem pom tej qho chaw tiaj tiaj uas tseem paub tias yog qua tsev lawm xwb tsis muaj dab tsis li lawm tsuas pom nas thiab pom noog lawm xwb os ib tsoom phooj ywg. Zaj keeb kwm no yeej muaj tseeb tiag tiag hnov tias nim no Tub Lis tau los nyob rau ntawm Av Liab lawm vim hla tsis tau dej mus rau sab Thaib teb. Thaum kawg no thov ua tsaug rau www.3haivhmoob.com los yog tus tij laug uas tsim muaj qhov chaw no rau peb tuaj sau keeb kwm rau suav daws kawm nawb. Sau npe: Phoos Yaj |
Txwv: Tsis pub leej twg tuaj muab cov dab neeg kev hlub thiab keeb kwm los yog poj ntxoog hauv no coj mus tso rau lwm lub vas sab los yog vej xaij ua ntej tau kev tso cai ntawm peb. Ua tsaug rau koj txoj kev koom tes. 3haivmoob.com
