Nkauj See Txoj Kev Hlub
Tus sau: Nkauj See Yaj
Txwv: Txwv Tsis pub leej twg lam muab peb cov dab neeg ntawm www.3haivhmoob.com no coj mus tso rau lwm lub vas sab los yog website uas tsis tau kev tso cai. Waring: No one can copy these stories at www.3haivhmoob.com to post on your own or other website without our permission. Thanks
Txwv: Txwv Tsis pub leej twg lam muab peb cov dab neeg ntawm www.3haivhmoob.com no coj mus tso rau lwm lub vas sab los yog website uas tsis tau kev tso cai. Waring: No one can copy these stories at www.3haivhmoob.com to post on your own or other website without our permission. Thanks
Nplooj1 Txoj Kev Sib HLub Thiab Txoj Kev Sib Ncaim
"Kev hlub ua rau tib neeg kaj siab, kev hlub ua rau tib neeg los koom lub neej ua txij nkawm, kev hlub tsim tau kev phooj ywg, tab sis kev hlub ua rau tib neeg dig muag thiab kev hlub txo tau tib neeg txoj sia.." Thaum ntawd yog xyoo 1988 nyob rau lub zos tawg rog Xoom Vib Nais Thaib Teb, kuv tseem yog ib tug me nyuam ntxhais me ...kuv tau ntsib kuv thawj tug hluas nraug nws hu ua Koob. Koob yog ib tug neeg txawj xav zoo nraug txawj hais lus thiab nws yog ib tug kws qhia ntawv nyob ntawm ib lub tsev kawm ntawv As Kiv. Tib neeg zoo nraug yeej txawj hais lus ua rau yus hlub yus nyiam. Txhua hmo Koob tuaj nrog kuv tham nws hais rau kuv tias, " Nkauj See, hnub no koj ua dab tsi xwb, qhia koj tias hnub no kuv nco koj ib hnub xav pom koj tag li tos tsis taus tsaus ntuj li... yuav rawm tuaj ntsib koj..", kuv tau teb nws tias.." puas tiag ma..txhob dag ov...kuv los ham tsis ib yam tos tsis taus ntuj tsaus xav pom koj thiab xwb tiag". Dhau nov wb kuj hloov mus tham lwm yam lawm, nov nws yog ib lub caij nyoog uas zoo tshaj plaws ntawm wb. Txhua tag kis Koob kom kuv sawv ntxov ntxov nws tuaj cuag kuv, wb qhov kev zoo siab tshaj plaws ces yog, nws muab kuv rub mus puag ruaj ruaj rau nws lub xub ntiag thiab kuj tau tso wb ob lub qhov ncauj los mus sib hnia , npuav ruaj ruaj yam tsis pub dim pa tau li, zoo yam nkaus tej laus hais tias...koj pa xws kuv pa koj pus tau kuv ya ntag.. Tsis hais tsaus ntuj los sawv ntxov kuv yeej yuav ib co khob nom kheej coj los npuav noj ua si...thaum Koob tuaj txog nws rub kiag kuv mus hnia, npuav nkaus kuv qhov ncauj thiab kuj muab nws tus nplaig cev kiag los kaus lub khob noom ntawm kuv qhov ncauj mus noj lawm yam uas tsis qias kuv li..kuv los yeej muaj qee tsam uas tau ua li rau Koob thiab. Wb txoj kev hlub suav hnub hmo loj lawm zuj zus xwb...kuv tsuas muaj Koob thiab Koob kuj muaj kuv xwb lub caij ntawd. Muaj ib zaug Koob tau sim kuv siab thiab nws tsis qhia kuv li.. Koob tau hais rau kuv tias nws tawm npe mus Mes Kas lawm kuv nyob kom nco txog nws thiab, kuv xav tias nws dag..kuv tau nug nws ib tug phooj ywg kuj hais tias muaj tseeb li ntawd tiag, nyob rau hnub ntawd tsaus ntuj Koob rov tuaj thawj lo kuv hu nws tias," Koj tuaj los"..li no xwb kuv kua muag mas ntws sis sib txhaws yaws tawm ntawm ob lub qhov muag los mus rau ob sab plhu hais tsis taus lus li.. Koob nug kuv tias Nkauj See koj quaj dab tsi...? Muaj dab tsi no qhia kuv os.. Kuv hais rau nws tias..., koj tawm npe mus Mekas lawm zaum no yuav sib ncaim tiag , tu kuv siab kuv thiaj quaj xwb... Koob luag luag thiab hais tias, " Niag ruam aws..! quaj dab tsi na , kuv sim koj siab seb koj puas hlub kuv xwb..kuv yeej tsis ncaim koj mus Mes Kas os...qhov tseeb tiag Koob thiab nws tus phooj ywg sib tuav tswv yim sim kuv siab xwb.. Thaum zoo li no lawm Koob tau rub kiag kuv mus puag , nws muab kuv hnia kiag ua rau kuv lub siab rov kaj , kua muag thiaj tu lawm.. Koob hais ntxiv tias ,"Txhob quaj lawm mog..kuv txoj sia kuv cog rau koj xwb..lub neej no yog tsis muaj koj ces kuv tsis muaj nuj nqis dab tsi os nawb Nkauj See , kuv yuav nrog koj nyob ua ke tsis ncaim koj mus os mog.." Kuv ntseeg Koob siab thaum hnov cov lus no tag vim xav tias nws lam sim kuv siab xwb tiag. Wb txoj kev hlub zoo zoo no lub sij hawm kuj tsis ntev tsuas tau li ntawm 4-5 lub hlis xwb...txoj kev sib ncaim kuj tau los txog.. Thaum Txoj Kev Sib Ncaim Tau Los Txog.... Ua ntej hmo wb yuav sib ncaim, cuag li lub ntuj twb paub ua ntej lawm. Nyob rau hmo ntawd lub ntuj tsaus nti los nag xuaj xuav, lub ntuj cov me kua muag poob xuaj xuav ib hmoo tsis tu li. Koob tuaj txog lig zog ces kuv twb pw lawm, nws tau los ntawm phab ntsa wb sib tham qhov tsev lawm xwb. Koob tau hais rau kuv tias xyov ua cas hmo no nws nrog kuv tham nws kua muag lam cia li poob cuag dab tsi, thiab nws tau hais rau kuv tias kom kuv hlub nws txhob dag nws...li ntawd ces kuv kuj cev tau 4-5 lub khoob noom pev xij rau nws noj. Kuv hais rau nws tias tsis muaj dab tsi tej zaum lam poob kua muag xwb tsis muaj dab tsi thiab kom nws txhob poob siab kuv tsuas muaj nws ib leeg xwb. Cuag li lub ntuj qhib qhov ncauj rau txoj kev sib ncaim zaum no, kuv kuj tau hais rau Koob tias yog ib hnub tsis sib tau wb sib ncaim lawm thov kom nws hlub thiab ho nco txog kuv thiab. Koob tau teb rau kuv tias..." Yog koj mus tau ib tug hlub hlub koj lawm ces tag, yog tau tus tsis hlub koj ces muaj ib hnub koj yuav nco txog kuv os mog Nkauj See". Wb sib tham li no xwb ces Koob tau mus tsev lawm thiab. Nyob rau tag kis sawv ntxov txuas los , Koob kuj tsis tuaj ntsib kuv vim ntuj los nag tsis tu li.. Kiag hmo tom qab ntawd xwb kuv tab tom npaj tawm mus da dej ces Hmoob cia li tuaj zij kuv lawm. Kuv tus txiv uas tuaj zij kuv no , kuv yeej tsis tau tham nws tab sis lawv pom kuv es lawv nyiam kuv lawv tuaj zij xwb.. lawv muab kuv chua thiab nqa , tos nco li 20 nas thi xwb kuv txog pem lawv tsev lawm, kuv mas tshai heev ib ce tshee na xwb, Hmoob kuj tuaj saib coob kawg nkaus. Tom qab ntawd li 40 nas thi ces kuv niam kuj tuaj ntaus kuv rov qab, tab sis kuv tus txiv lawv thaiv coob heev kuj coj tsis tau kuv rov qab.. Cov coj tshoob mus nrog kuv txiv lawv sib tham ces kuv txiv lawv xav txog ntawm Hmoob tej kev txheeb kev ze, kuj cia li muab kuv rau kuv tus txiv yuav lawm. Hmo ntawd kuv pw tsis tsaug zog xav txog Koob ib leeg lub siab mas kub ntsim hlua, thiab xav tias ua cas hmo no yuav tau muab yus lub cev hluas nkauj rau ib tug tib neeg yus tsis tau hlub li los pw, es tus yus hlub ne nws ho zoo li cas lawm? Pw puas tsaugt zog thiab? Ntshe nws yuav nyuaj siab heev li thiab... |
Nplooj2Kuv tus niam hlaus tau qhia rau kuv tom qab peb tuaj hais tshoob tias thaum Hmoob zij kuv mus dhau lawm , Koob kuj tau tuaj txog thiab nws qhia rau Koob tias Hmoob zij kuv mus lawm..Koob tau hais rau kuv tus niam hluas tias nws tu siab heev ntshe vim nws tsis zoo kuv thiaj mus lawm.. Koob tseem hais ntxiv rau kuv tus niam hluas tias ua cas nws saib zoo li lub ntuj kiv pes lees mob siab heev zoo li txoj sia nim yuav tu tiag.. kuv tus niam hluas qhia nws tias kuv niam lawv mus ntaus seb puas tau kuv rov los, muaj dab tsi mam qhia rau Koob no, ces Koob kuj tau mus tsev lawm... Nyob rau thawj hmo ntawd kuv siab nyob tsis kaj li..kuv tus txiv nrog kuv pw , nws tau kuv lub cev los tsis tau kuv lub siab..vim kuv lub siab nyob nrog Koob xwb. Kuv xav tias hmo no ntshe Koob lub siab yuav kub lug pw tsis tsaug zog ib hmo ib yam nkaus li kuv thiab..ua cas hmoov yuav phem ua luaj...hmo ntawd kuv tsis npau suav pom Koob li ...nws los ntshe yuav tsis npau suav pom kuv li thiab.. Tom qab 3 tag kis , kuv tus txiv peb kuj tau tuaj mus hais tshoob , kuv tus niam hluas thiaj piav cov lus tag los sawv rau kuv mas , kuv hlub Kooob heev ...siab nyob tsis tswm li los kuj ua tsis tau li cas.. Kuv tau hais rau kuv tus niam hluas tias muaj caij koj tau ntsib Koob no ces koj hais rau nws tias, " Kom Koob txhob tu siab rau kuv , txawm kuv rov los los ntshe Koob yeej tsis yuav kuv lawm, tiam no Koob wb thov tau daim ntawv los ua nkauj ua nraug xwb tsis tau ntawv ua txij ua nkawm wb thiaj tsis sib tau, thov cia lwm tiam yog muaj tseeb tiag kuv mam thov kom tau ntawv los ua Koob tus poj niam thiab hlub nws ib leeg kom txog hnub kawg , ntawm kuv ces kom Koob txhob nco txog lawm, nws kav tsij mus nrhiav ib tug hlub hlub nws es ua lub me neej kom zoo xwb ces kuv zoo siab lawm." Lub caij kuv hais cov lus no rau kuv tus niam hluas mas kuv cov me kua muag ntws poob cuag dej nag saum lub ntuj los rau ntiaj teb..nws yog ib lub caij uas tu siab thiab nyuaj siab tshaj plaws li..vim yuav tus tov los yus tsis swm , rov qab los los ntshe tus tom no tsis yuav yus lawm thiab...txoj sia mas me heev li yuav tu lawm tiag tiag..li. Rov qab los hais txog ntawm kuv tus txiv, wb sib yuav tau li 17 -18 lub xyoo kuj muaj me tub me nyuam 4-5 leeg , kuv lub siab kuj qaug los hlub nws ua ib tug zoo niam tsev lawm , tab sis nws tsis hlub kuv li...phij mus tham hluas nkauj tag li...hais thaum twg ces sib ceg xwb...Kuv tau nug nws tias koj tsis nyiam kuv ua cas thaum ntawd koj ho zij kuv ua tus dab tsi? Nws teb tias kuv los yeej tsis tau tham dua hluas nkauj xav tias poj niam zoo ib yam xwb, nim no mam paub tias poj niam ib tug tsis zoo li ib tug. Koj xav nyob los nyob tsis xav nyob koj mus los kuv tsis cheem koj li...thaum kawg wb kuj tau sib nrauj cov menyuam nyob nrog kuv , hos nws mus thawj poj nrauj lawm thiab xwb. Rov qab los hais txog Koob, thaum kuv tus niam hluas tau hais kuv cov lus saum toj sawv rau Koob tag ces Koob hais rau nws tias," Koob tsis tu siab rau kuv , vim kuv pom lwm tus zoo tshaj Koob lawm, thov kom kuv mus zoo ua lub neej kaj siab xwb Koob zoo siab lawm...nyob li ntawm Koob kom kuv txhob txhawj txog, nws yuav tsis yuav poj niam mus ib sim neej vim poj niam tsis muaj ib tug muaj kev hlub tiag". Koob cov lus no ua rau kuv nyuaj siab los tau 10 lub xyoos tias yog tim kuv , los yog tim Hmoob txoj cai tsis zoo es yus tsis tau tham los cia li tuaj zij thiab tej laus cia li muab yus yuam mus yuav lawm... Kuv tsis pom qab yuav tu siab rau Koob los yog leej twg..ntshe yog vim txoj hmoo xwb. Koob wb sib ncaim hnub ntawd los txog hnub no kuv yeej tsis tau ntsib nws li lawm tab sis kuj hnov moo tias nws yuav tau ib tug zoo poj niam hlub hlub nws , nkawd muaj tub kis coob lawm thiab. Kuv nrog tus viv ncaus ntawd zoo siab uas nws tau ib tug zoo txiv. Txawm kuv tsis tau Koob lawm los, kuv xav tias Koob yuav kaj siab rau nws lub neej tam sim no thiab nws yuav zam lub txim rau kuv yad tag los.. yog tias lwm tiam muaj tseeb tiag kuv thov los ua nws ib tug me zoo hluas nkauj ib zaug , mam li los hlub nws pauj txoj kev nco nyob rau tiam no thiab yuav tsis ncaim mus ntxiv lawm. Dhau no mus ntawm kuv tus kheej, kuv yuav thov ua ib tug niam zoo rau kuv cov me nyuam. Kuv yuav tsis mus nrhiav kuv lub neej ntxiv lawm. Kuv yuav ua ib tug me zoo poj nrauj kom lwm tus neeg txhob ua tau tej yam saib tsis taus rau kuv tej menyuam poob ntsej muag. Thaum kawg no kuv thov ua tsaug rau Hmongmeka.com uas nej muab qhov chaw no rau kuv tau tuaj sau zaj dab neeg no, nws ua rau kuv lub siab kaj lawm ntau tsis tas li los kuv nrog tus viv ncaus muaj hmoo uas koj tau los yuav Koob es tau ib tug me zoo txiv...thov kom neb ua neej sib sib hlub os mog.. Nkauj See |
Click to set custom HTML
Ceeb Toom: Cov dab neeg kev hlub thiab txhua yam hauv 3haivhmoob.com no peb tsuas yog tso rau sauv daws tau tuaj nyeem laug caij nyoog xwb txwv tsis pub leej twg muab luam mus muag los yog ua lag luam, yog koj coj mus kho los yog ua lwm yam tsis tau qhia rau peb paub , thaum peb tshawb tau lawm koj yuav raug nplua raws txoj cai ntawm lub teb chaw koj nyob ko.
Ua tsaug ntau:
3HaivHmooB.Com
Ua tsaug ntau:
3HaivHmooB.Com