Nkauj Dab Maiv XyoobTus sau: Ab Pheej Email: [email protected]
|
Txwv: Txwv tsis pub leej twg lam muab cov dab neeg ntawm www.3haivhmoob.com no coj mus tso rau lwm lub Vas sab uas tsis tau txais kev tso cai los ntawm peb. Warning: No one can copy these stories at www.3haivhmoob.com to post on your own or other websites without our permission. Thank you for your cooperation.
|
Nplooj-1Zaj keeb kwm no tshwm sim nyob ntawm lub zos Tiaj Tauj Thaib Teb. Zos Tiaj Tauj yog ib lub zos Hmoob loj heev uas kev vam muaj tseem mus tsis tau txog.
Nyob rau lub zos no tej hluas nkauj hluas nraug sib yaum mus ua liaj ua teb nchuav ntws li yav thaum ub tej laus ib txwm coj noj coj ua los yam lom zem xauv npo tsis nco qab nkees li. Maiv Xyoob thiab Ab Pheej yog ib nkawm nkauj nraug sib hlub heev li tab sis tsis sib tau vim Ab pheej niam thiab txiv tau xa nws mus kawm ntawv rau lub nroog Koos Thej lawm. Txoj kev sib ncaim zaum no ua rau Maiv Xyoob kho siab heev , nws rov mus ua liaj ua teb pom nkawv tej qub chaw mas quaj tag li thiab nij hnub hais kwv txhiaj qwv nplooj rau ub rau no. Txoj kev uas sij hais kwv txhiaj qwv nplooj no thiaj tau ua rau nws raug tau ib tug dab poj ntxoog nyob rau yas kev yas ncua. Txawm li cas los xij Maiv Xyoob kuj tseem mus ua liaj ua teb li txhua zaus, muaj ib hnub nws tau mus ua teb thiab ntim ib pob su mus noj, thaum tav su nws los noj su nthuav nws pob mov noj no ua cas pom muaj ib tug ncej puab qaib qhwv nrog ib pob ntsev nyob hauv kawm. Hnub ntawv Maiv Xyoob tsuas ntim ib pob mov thiab ib hnab zaub qaub mus ua su xwb yog ib qho txawv heev thiab nws xav tsis tag li. Maiv Xyoob kuj tsis xav li cas , nws tsuas xav tias tsam ho yog nws niam ntim rau nws, tab sis nws tsis muab noj vim nws kuj tsis paub tseeb tias tsam ho tsis yog nws niam ntim rau nws. Tsaus ntuj nws rov los tsev thiaj nug nws niam no, nws niam hais tias nws niam tsis tau ntim vim lawv twb tsis muaj ib tug qaib loj zoo tua noj li. Qhov no tau ua rau Maiv Xyoob poob siab thiab ntshai kawg nkaus. Dhau nov kuj tsis muaj dab tsi tab tsis tau ob lub hlis tom qab Maiv Xyoob mus ev pob kws nram teb no ua cas nws rov los saib pom ib co ntshav tshiab tshiab heev lo rau nws ob txoj hlua kawm, nov yog zaum ob uas nws pom tshwm txawv heev rau nws. Hmo ntawv Maiv Xyoob los pw ces nws txawm ua ib tug npau suav , tab sis mas ho zoo li yog ua yog toog xwb tias muaj ib tug tub hluas zoo nraug heev los coj nws mus ua si mas pom kev tshav ntuj nrig, tib neeg coob heev mus mus los los tab sis mas tsis muaj ib tug hais lus rau ib tug li. Thaum ua si txaus ces tus tub hluas no xa nws rov qab los tsev. Yim ntev hnub Maiv Xyoob yim tsis nco Ab Pheej lawm vim nws pw thaum twg ces tus tub hluas no yeej los coj nws mus ua si tag li thiab zoo li nws mas swm tus tub hluas dab no heev li. Maiv Xyoob tau piav tus hluas nraug dab no rau nws tus phauj hu ua Maiv Paj no, ces Maiv Paj thiaj mus qhia rau Maiv Xyoob niam, ob tug laus nug Maiv Xyoob los nws yeej piav ib yam nkaus li thiab, tsis tas li nws hais tias hmo twg yog nws tsis npau suav pom tus tub hluas dab no mas nws nco heev li kaj ntug tag kis lub siab yeej nyob tsis tswm li xav pom mas siab thiaj nqig xwb. Maiv Xyoob niam nkawv tau txhawj heev thiaj tau nrhiav neeb nrhiav yaig los ua pab, lawv yim ua neeb mas tus dab no yim ua phem , yeej los tsaj lawv lub tsev xam kas xim mas nrov cuag dab tsi rau ub rau no li, tsis tas li xwb tseem los muab lawv tej qaib dob plaub quaj cuag dab tsi kaj ntug mus saib mas plaub dawb vog ntawm tej li. Maiv Xyoob niam nkawv tau kom Maiv Xyoob nug seb nws yog leej twg thiab tuaj qhov twg tuaj, tus tub hluas dab no hais rau Maiv Xyoob tias nws yog tus uas ntim ncej puab qaib rau Maiv Xyoob noj su, thiab yog tus uas nto qaub ncaug rau Maiv Xyoob ob txoj hlua kawm. Qhov nws tias nto qaub ncaug rau txoj hlua kawm no yog cov ntshav uas Maiv Xyoob pom lo nws ob txoj hlua kawm tshiab tshiab i. |
Nplooj-2Kev neeb kev yaig pab tsis tau yog li nws txiv nkawv thiaj mus thov xib fwb tuaj thov vaj tswv pab los yeej tsis tau ib yam, tus dab no yim ua phem rau lawv xwb...txog thaum kawg Maiv Xyoob mob mob thiab tau tag txoj sia rau lub 12 hlis ntuj xyoo 2011 tag los ntawd. Hmo uas Maiv Xyoob tuag ntawv nws tau mus ua ib tug npau suav rau Ab pheej nyob nram Koos Thej hais tias nws mus yuav txiv lawm es kom Ab Pheej nyob no pab hlub nws niam thiab nws txiv, kaj ntug tag kis ces Ab Pheej tus muam txawm hu pem tsev tuaj tias Maiv Xyoob tau tuag lawm. Thaum uas lawv muab Maiv Koob pam hmo ob xwb nws lwj heev thiab thaum lawv tsaug zog tag tshuav ob tug txiv qeej tshuab qeej xwb, ib tag hmo dua cia li pom muaj ib tug Miv dub loj heev los zaum saum niag tuag plab ua rau ob tug txiv qeej txiv nruas ntshai heev tau qw ua tib neeg mas sawv tag sib tw nraum zoov muaj tej tug twb rau tsis tau khau li vim lawv xav tias yog niag tuag sawv lawm. Tom qab lawv muab Maiv Xyoob mus faus tag puv tsug kiag xwb ces tej tib neeg mus ua liaj ua teb hla lub dawmTsua Dub txawm hnov ib lub suab poj niam mas quaj qw tag li saum roob tsuas tuaj mas hav yeem lug li. Lub hnub qaij kiag xwb ces yeej quaj txhua hmo li ua rau tej tib neeg tsis tau luag li, lawv mus ua teb mas yeej sib yaum mus thiab los txhua hnub tsis zoo li yav tag lawm. Thaum kev quaj qw no tshwm sim tsis tu ncua li thiaj tau kom ib tug txiv neeb mus saib tsawv xeem saib yog dab tsi ua cas yuav ua tau txaus ntshai ua luaj li. Nws xeem tag txhua yam yeej tsis tuav lub qe li , tab sis hais txog Maiv Xyoob lub npe xwb lub qe cia li tuav kiag. Tus txiv yaig no ho nug tias vim li cas ho quaj qw no ces tsis tuav qe li thiab, thiaj xeem txog qhov tias yog li kom los ua npau suav no ces lub qe mam li tuav. Hmo uas xeem saib yaig tag no, Maiv Xyoob txawm los ua npau suav rau nws niam tias vim nws mus ua nyab tshiab tshiab es niam pog txiv yawg tsis nyiam nws txog lub caij ua hmo noj ces lawv muab hluav taws coj los hlawv nws es mob dhau lawm thiaj tau quaj qw thov cov tib neeg uas mus ua liaj ua teb los kom pab nws tab sis tsis muaj neeg pab tau nws li. Nws tau thov nws niam kom nkawv ua ib thaj neeb xa ob tug moj zeej nqeeb , kom muab hnav khaub ncaws Hmoob, hlawv xa mus rau nws, thiab xa ib co nyiaj kom ntau mus tso nws, dhau ntawv kom muab nws tso plig kom sai li sai tau nws thiaj tau kev mus thawj thiab dim kev tsim txom mus. Tag kis nws niam thiaj tau piav tus npau suav rau nws txiv Nkawv ob tug laus tau muab npaj ua raws nraim Maiv Xyoob cov lus hais. Dhau qhov no los ces thiaj tsis hnov lub suab quaj qw rau ntawm lub dawm tsua no lawm. Zaj keeb kwm no yog ib zaj uas tshwm sim txawv kawg nkaus thiab ntseeg tau tias lub neej nim no los kev dab tso yeej tseem muaj li yav thaum ub ob peb tiam neeg los thiab, yog li ntawv tej tub ntxhais uas mus ua liaj ua teb rau yaj sab los kom suav daws txhob lam seev seev los yog hais kwv txhiaj , qwv nplooj tej tsam ho muaj tej zoo li Maiv Xyoob tau ntsib no thiab , tsis tas li xwb nej cov niam cov txiv uas nco nco cov tub cov ntxhais mos mos tim nplog los txhob seev seev hais hais kwv txhiaj tsam nej ho ntsib dab mes kas los yog dab mev los tos yus mus....hos cov me tub me ntxhais mos mos tim nplog los nej txhob seev seev nco nco cov tim Mes Kas no heev tsam seev seev tau dab thiab.... Es mam ntsib sawv daws rau lwm zaus.. Tus sau: Ab Pheej |
Ceeb Toom
Cov dab neeg kev hlub thiab txhua yam hauv3haivhmoob.com no peb tsuas yog tso rau sauv daws tau tuaj nyeem laug caij nyoog xwb txwv tsis pub leej twg muab luam mus muag los yog ua lag luam, yog koj coj mus kho los yog ua lwm yam tsis tau qhia rau peb paub , thaum peb tshawb tau lawm koj yuav raug nplua raws txoj cai ntawm lub teb chaw koj nyob ko. Ua tsaug ntau: 3HaivHmooB.Com |
|