Nco Txog Hnub TuagTus Sau: Nyiaj Xyooj Email: tsabntawvhlub@hotmail.com
|
Npaj kev tuav pov fwm koj tsev neeg nco ntsoov
hu rau peb txhob tos tag kis tsam muaj mob yuav tsis tau kev tuav pov fwm rau tus kheej lawm. Ua tsaug Ntau. |
Nplooj1Toj Tsua Dawb yog ib lub zos muaj pob zeb pob tsuas vij ob sab thaum sawv ntxov koj yuav pom hnub tuaj ci ntuas nas noog quaj zom zaws kho siab khuav. Lub zos no yog qhov chaw tshwm sim txoj kev hlub muaj lub npe tias" Nco Txog Hnub Tuag"
Kuv tau ntsib Maiv Yeeb thaum xyoo 1974 - 1975 nyob rau lub zos tiaj tsua dawb teb chaws los tsuas. Lub sij hawm no nws muaj hnub nyoog li 15 xyoo hos kuv muaj li ntawm 16 xyoo. Lawv lub tsev nyob tsis deb pes tsawg ntawm peb. Wb yeej loj hlob los ua ke tab sis tsis xav tias muaj ib hnub yuav ua nkauj ua nraug li. Maiv Yeeb wb nij hnub mus kawm ntawv ib lub tsev kawm tab sis koj yeej tsis hais lus rau kuv hos kuv los yeej tsis hais lus rau koj li tab sis hnub ntawv cuag li lub ntuj rub wb txoj kev nkauj nraug los mus ua ke kom wb sib hlub. Sij hawm thaum rov los tsev, Maiv Yeeb ua ntej hos kuv lawv qab ces kuv txawm pom ib tug xaum poob ntawm kwj ha kuv khaws tau thiab xav tias tej zaum yog nws tus. Kuv nqa khiav khiav los thiab hu tias: " Koj tos tso", nws teb kuv tias ua cas. Kuv hais rau nws tias, khaws tau ib tug xaum ntawm kwj ha tsis paub tias puas yog koj tus. Maiv Yeeb saib saib nws cov tag ces txawm teb tias yog kawg mas ua tsaug nawb. Kuv teb tias tsis ua cas os. Dhau no kuv txawm hais rau nws tias thov ua phooj ywg puas tau nab? Nws tias tau kawg mas. Kuv txawm hais ntxiv tias, ib chim tuaj nrog koj tham yom? Maiv teb kuv ntxiv tias, tsum kiag tsam nej cov hluas nkauj cem kuv ov..kuv thiaj hais rau nws tias kuv tsis muaj hluas nkauj os..., wb txawm nyias los nyias tsev lawm. Hmo ntawd kuv tau mus nrog nws tham thiab ces txij ntawd los wb sib swm zuj zus ib tug tso tsis tau ib tug tseg li lawm. Hnub twg yog nws mob los yog tsis khoom tuaj lawm mas kuv saib lub ncauj ke tshiab heev li laj tos kawm ntawv txog moo rov los tsev kawg li. Hnub twg kuv tsis mus los nws yeej zoo ib yam li ntawd li thiab. Vim txoj kev hlub uas ib tug tseg tsis taus ib tug wb tau cog lus tias noj 30 xyoo 1974 txaus 1975 ntawd wb mam sib yuav, tab sis 30 xyoo ntawd kiag xwb Hmoob tuaj zij kuv tus muam lawm ces kuv txiv lawv tsis pub wb sib yuav, thaum no Maiv Yeeb los quaj kuv los quaj tsis paub tias xyov puas yuav sib tau vim lub teb chaws ua voj ua viag muaj tsov rog qhov txig chaw. Tau kiag 5 lub hlis tom qab xwb peb tau tawg teb chaws ,kuv tsev neeg tau khiav tuaj mus rau thaib teb thiab hla tuaj rau sab mes kas lawm, lub siab mas ua voj ua viag kho siab khuav noj tsis qab pw tsis tsaug zog li yog xav txog Maiv Yeeb thaum twg, hos nws los ntshe yuav zoo ib yam nkaus li kuv thitab. Kuv lam tuaj txog rooj teb teb chaws Mes Kas no xwb los kuv yeej tsis yuav poj niam li vim kuv tsis pom ib tug yuav zoo li nws, yuav hais lus haum kuv , thiab tus me ntxhiab yuav tsw li nws tus. Nyob rau xyoo 2002 tag los ntawd kuv tus kwv wb tau mus rau teb chaws los tsuas, rov mus saib tej qub phooj qub ywg thiab tej qub zej qub zog... wb ncig ntau qhov chaw tag lawm ces wb mam li ho los rau Lav 52.Thawj hnub wb mus noj 30 rau ntawm tshav pob Lav 52, wb tau pom ib tug ntxhais zoo nkauj heev li tuaj pov pob, kuv tus kwv nyiam heev wb thiaj mus nug no yog xeem Hmoob lis. Wb tau pov pob ib pliag thiaj nug tias ua li nws txiv npe hu li cas lawv nyob puas deb ntawm tshav pob no thiab. Tus ntxhais no qhia tias nws txiv hu ua Nyiaj Huas tab sis tau tag sim neej li 7-8 xyoo los no lawm. Kuv nug ntxiv tias ua li koj niam puas tuaj, wb xav mus saib nej tsev thiab. Nws thiaj teb tias kuv niam tuaj kawg yog tus kwv kaus liab es saib Hmoob hais kwv txhiaj nrad, yog neb xav nrog kuv niam tham no kuv mam mus hu nws los. Thaum tus ntxhais hluas nkauj no hu tau nws niam los txog , thiaj hu wb tias , nyob zoo ob tug me tub, neb tuaj Mes Kas teb tuaj los? Kuv teb tias yog kawg. Tus niam tais no nug ntxiv tias , thaum ub nej nyob lub zos twg ob tug tub? Kuv teb nws tias thaum ub peb nyob lub zos Tiaj Tsua Dawb xyogv nej puas paub li os phauj . Kuv lam muab nws hu ua phauj vim tsis pom qab hu li cas. Ces nws txawm nug ntxiv tias nej nyob lub Zos Tiaj Tsua Dawb no ua li koj niam koj txiv npe hu li cas? Kuv qhia kuv txiv npe rau nws tag, ces nws nug tias ua li koj yog tus tub npe hu li cas? Kuv hais rau nws tias kuv yog tus hu ua Tub Txos. Thaum kuv teb tus niam tais no cov lus tag xwb ces kuv cia li pom nws ob lub kua muag ntws kiag ntawm sab plhu los, thiab nws quaj li quaj xwb ua rau kuv ntshai tag li tias ntshe kuv txhaum plaub lawm los ua cas zaum no.. Kuv thiaj tau nug tus niam tais no tias koj quaj dab tsi os phauj, tsis yog kuv hais lus saib koj lawm los thov zam txim nawb mog.. nws tsis teb li nres ib pliag thiab thiaj tau teb kuv tias: Koj yeej tsis paub kuv li lawm puas yog Tub Txos.....? Kuv teb tias kuv tsis paub koj lawm es koj ho yog leej twg os phauj...nws thiaj li hais rau kuv tias...Tub Txos..! Kuv yog koj tus Maiv Yeeb os nawb mog..koj puas tseem nco tau tus Maiv Yeeb uas koj tias koj ib txwm hlub nws txawm koj nyob rau rooj teb twg lawm los xij...Koj tus Maiv Yeeb uas nyob ntawm lub Zos Tiaj Tsua Dawb na....( Nws paub kuv lawm vim kuv qhia kuv npe thiab kuv niam kuv txiv rau nws..) Hos kuv tsis paub nws vim nws laus tsis zoo li tus thaum ub lawm, thaum sij hawm Maiv Yeeb tau hais cov lus no rau kuv ...ces kuv mam li quaj...thiab mus tuav nkaus nws sab tes..tias puas yog koj os Maiv Yeeb? Yog tiag los npau suav wb nyias laus nyias tag lawm..Lub sij hawm no yuav luag tag nrho cov niag Hmoob hauv tshav pob cia li los ntsauv wb ob leeg , muaj tej tug lawv kuj nrog wb quaj thiab vim wb ua tau tu siab heev li... |
Nplooj230 tawm xyoo hnub no kuv rov ntsib tus neeg kuv hlub los kuv twb laus tag, plaub hau do tag tsis zoo li tus qub thaum xyoo 1974, hos Maiv Yeeb ces laus tag tawv nqaij ntsws tsis zoo li tus qub lawm thiab.....txawm yuav zoo li no los wb yeej zoo siab tias wb rov ntsib tus neeg yus ib txwm hlub ib txwm nco. Tus neeg laus txawm hloov cev nqaij lawm los wb ob lub siab tsis tau hloov.. Maiv Yeeb hais rau kuv tias, kuv lam mus ua neej lawm xwb kuv lub siab lub ntsws yeej nyob ntawm koj los txog hnub no, tab txawm tias kuv tuag lawm los tiam no kuv zoo siab vim tau ntsib tus neeg kuv hlub lawm os mog...Kuv tau muab kuv ob sab me tes los so nws lub kua muag thiab phlws lub taub hau kom txhob quaj lawm... Lub sij hawm no tib neeg coob dhau lawm Maiv Yeeb tus ntxhais thiaj tau kom peb mus tsev. Wb tau nrog nkawd ob niam tub mus tsev thiab kuv mloog mas kuv lub siab kaj hla tsis muaj ib yam nyob nruab siab tseem phij xav tias kuv plam ib yam kuv hlub hlub mus lawm.. Maiv Yeeb ntes tau ob tug qaib los tua rau kuv tus kwv wb noj nyob rau hmo ntawd. Noj mov tag ces wb tau rov los pw tom tsev tos qhua lawm. Kaj ntug tag kis, peb tau rov sib ntsib nram tshav pob dua. Kuv tau hais rau Maiv Yeeb tias wb mus yos ntau qhov chaw los wb lub caij lub nyoog txog ces tag kis xwb wb twb yuav tau rov mus Mes Kas teb lawm. Nyob nco txog kuv thiab mog...ua li koj puas kam mus nrog kuv nyob Mes Kas teb? Kuv tsis yuav poj niam los txog hnub no twb yog vim koj xwb? Nws thiaj teb tias kuv laus lawm kav tsij mus nrhiav ib tug hluas hluas kom phim koj mog...Kuv mloog mas nws yog tus thaum ub kuv ib txwm hlub xwb...kuv thiaj hais rau nws tias tiam no yog tsis tau koj kuv yuav tsis yuav poj niam mus ib sim neej cia fab lwm tiam seb pus tau koj lawm xwb... Thaum kuv hais cov lus no tag Maiv Yeeb thiaj tias, koj nim hlub kuv npaum ko ntag..kuv teb nws tias kuv hlub koj npaum no mas... Kuv cog lus rau nws tias kuv rov los txog Mes Kas kuv yuav ua ntaub ntawv los tos kom tau koj mus nrog kuv nyob , tau nws rau yav laus lawm los kuv yeeej zoo siab...Lub sij hawm dhau sai kawg nkaus...kaj ntug tag kis kuv tus kwv wb twb yuav los tsev lawm tiag....Maiv Yeeb thiab nws tus ntxhais tau tuaj saib wb, thiab tua tau ob tug qaib tuaj ntim wb su...Hos kuv muab tau ib phav daus las rau nws....Kuv tus kwv ho muab tau 4 puas daus las rau tus ntxhais... Thaum lub dav hlau ya dhau plaws lub tshav dav hlau Vav Tais lawm kuv lub siab khuam nkaus rov tuaj tom qab lub kua muag poob ntws nto...rov zoo kiag li lub caij Maiv Yeeb wb sib ncaim thaum xyoo 1975 dua. Kuv lam los lawm xwb lub siab lub ntsws poob rau Nplog teb, lub siab rov mob dua thaum rov ntsib Maiv Yeeb zaum ob no. Xav tias ntshe Maiv Yeeb los yeej txawv tsis deb kuv kiag li thiab... Thaum los txog kuv pib ua tej ntaub ntawv tos Maiv Yeeb tuaj, tab sis txoj hmoo tsis zoo tau ob hlis tom qab xwb..nws tau mob heev heev thiab tag sim neej lawm. Txoj kev mob zaum no tus ntxhais qhia kuv tias kws kho mob hais tias yog mob plawv. Hnub kuv hnov tsab x ov tooj tias nws tag sim neej lawm..kuv ci li tsis mus ua hauj lawm..tsis qab siab ua dab tsi li..zaum no kuv rov mus Los Tsuas teb los ntshe yuav tsis ntsib ib tug neeg kuv hlub ntxiv lawm...txoj kev tuag los txiav wb txoj kev hlub thiaj tag lawm... Kuv tau txiav txim siab tsis yuav poj niam thiab twb mus ua hauj sam tau 3 lub xyoo no lawm los kuv lub siab yeej tsis kaj haj tseem mob kub lug xav txog Maiv Yeeb... tag li....Ntshe kuv yuav nco nws mus txog hnub kuv tuag kiag thiab thiaj mam tsis hnov qab lawm....Es txoj kev hlub "..Nco Koj Txog Hnub Tuag" los xaus li no xwb..thov kom Maiv Yeeb mus zoo fab lwm tiam wb mam rov ua nkauj ua nraug dua mog......Ib tsoom phooj ywg muaj kev hlub ntshe nej yuav lwj siab thiab kho siab ib yam li kuv os nawb.......es mam ntsib nej dua lwm zaus. Ua tsaug Tub Txos. Lus Ceeb Toom:
Cov dab neeg kev hlub thiab txhua yam hauv 3haivhmoob.com no peb tsuas yog tso rau sauv daws tau tuaj nyeem laug caij nyoog xwb txwv tsis pub leej twg muab luam mus muag los yog ua lag luam, yog koj coj mus kho los yog ua lwm yam tsis tau qhia rau peb paub , thaum peb tshawb tau lawm koj yuav raug nplua raws txoj cai ntawm lub teb chaw koj nyob ko. Ua tsaug ntau: 3HaivHmooB.Com |
