Lub sij hawm kuv rov muab wb zaj dab neeg no los mus sau..nws yog lub caij ntuj no uas snow los xuaj xuav thiab tawm plaws txog nraum zoov pom tej me snow dawb vog qhov txig chaw li yav thaum kuv tseem ua hluas nkauj nrog kuv niam lawv nyob es koj tuaj ntoj tuaj thuv kuv.
Kuv yog Maiv Nos Lis, zaj neej neeg sab sij huam sib hlub nrog Tub Tuam Vaj pib thaum 08/24/2003:
Nco txog sij hawm thaum koj tuaj zov zov kuv ntawn phab ntsa qhov rai txaj. Tej hmo kuv nyob tej hmo kuv twb tsaug zog koj mam tuaj tsa tiv no tsuj tsuj nroj tsuag tuag tas nraum maum kaum tsev.
Hmo 02/12/2004 koj tsa tes saum lub ntuj cog lus hais tias, "Sim neej no kuv yog tus hluas nkauj koj hlub & nyiam tshaj plaws yuav kuv ib leeg ib tug tsis hais pes tsawg tiam yuav hlub xwb yog kuv nrog koj mus ua koj tus poj niam". Wb tuav tes zoo siab hlo mus lwm qaib pem nej tsev tos tos nraum zoov ntev thiab no heev koj hle koj lub tsho loj rau kuv hnav. Lub neej no cas kuv yuav nco koj lo lus mos txhua zaus thaum rub zog kuv rau koj xub ntiag hnia ntshis kuv tus ntxhiab tsw tau haum xis siab tshaj. Kuv lub cev tsis muaj hnub koj dhuav.
Thawj zaug koj tso kuv pw txias to ib leeg quaj thiab nco koj heev. 2 hmo tom qab koj los txog tsev nyob rau hmo ntawd koj puag kuv, ncaj npab ua tog hauv ncoos rau kuv pw cas dab ntub tuaj laum ncaws nris kuv pw ua qaj qaug nyos tsis nco xyov thaum twg lub hnub tuaj ziab txaj chaw mam sawv twb tav su lawm.
Ib zaug lub caij ntuj nag koj thiab kuv caij motocycle mus ua si kuv ntshai heev. Koj kom puag khawm koj ruaj ruaj txav ze ze thiaj tsis ntshai. Wb luag ntxhi ob leeg muaj kev zoo siab luag suab qhuab npho.
Muaj qee hmo ntuj wb txhoj pob tsav lub tsheb Honda Accord. Koj tsav ceev heev cua laj ntxiag raug wb siab wb luag nyav lom zem xauv npo muaj kev xyiv fab luag ntxhi tsis nco ntshai kev phom sij los yog raug txhom raug ntes wb tsav tsheb dhau speed limit.
Nyob Region Hospital lub caij kuv los so wb thawj tug menyuam thaum ntawd kuv tau ntuav heev zog ntaug. Ua tsaug muaj koj nyob ib sab txhawb dej siab tuav rawv kuv txhais tes. Lub sav tsam no kuv sab tshaj yug ib tus menyuam tsis yooj yim muab siav pauv siav xwb. Mob plab zaj tas zaj tuaj, kuv huas pa lub cev qhuav tsis muaj dej. Koj ua tus muab dej rau kuv haus. Zoo siab koj yog kuv tus txiv zoo.
Poob rau lub caij nyuab. Ntsuj plig tsis npuab cev ntshav tsis khiav li tus neeg tuag lwj puv ntsug 13 hnub. Sab nrawd ua tsis taus ntsej muag luag, tshaus ntsho tsis qab siab ua noj nrog luag khwv hnav, phlu daj tseem cuag qaib vom txhaug daim nqaij daim tawv. Puas siab puas ntsws piav tsis tau qhia leej twg hauv lub siab tsaus li hav zoov dub yam nkaus li tus kab taw teeb tuag npoos ai cia yog leej twg ntsib thiaj paub lub neej ua txij ua nkawm.
Mob zaum ntawd hlais kuv 40 nplooj siab 8 nplooj ntsws raug koj hniav ntaj riam suam nqaij to ntshav nrog raug nej ua plaub ua ntug liam ua tub sab nyiag nej cuab yim neej kob huam. Mob tshaj yog koj muab nkauj nyab mus ua nyuj dab rau niam pog txiv yawm. Tua tsis taus vim kuv yog tus neeg tsis yog tsiaj. Sij hawm dhau tso kuv theeb kab tim puam tsis hlub tsis xyuas, nrauj los kuj tsis nrauj kom tu taw, sib yuav los kuj zoo li tsis yog vim tsis nyob ua ke lawm.
Ua zoo mloog cas kuv txoj sia tseem ua nruj nriaj tsis tau tu. Xyoo tshiab ntawd koj yuav tau ib tsob paj tuaj rau kuv ua kev hlub rau hnub Valentine Day. Tom qab tsis ntev koj coj mus tab laj yuav tau ib nkawm khau thiab ib ce khaub ncaws koj thiaj hais tias, "Ua ib sim niam txiv los nrog koj nyob zaum no yog thawj zaug. Ib txwm koj yuav tsis tau ib yam dab tsi pub kuv li. Thov txim ntau ntau txhob tu siab yeeb vim yog koj siv lub sij hawm ntau dhau mus tu tsiaj txhuv yug aub sib tog mus tso qaib sib ncaws lawm tas li thiaj nkim tag lub sij hawm muaj nuj nqis. Ntxiv, koj kuj hais tias, "Koj yeej meem mus yuav txiv txhob tos kuv lawm mog. Kuv txoj kev ua si no ua txawm ua tag tiam no los yeej tsis txaus. Kuv tso kev rau koj tham hluas nraug. Leej twg nyiam tsum ntshaw txog koj los kav tsij mus txhob tos khi nyuj tos zaub hlob. Hnub no tsis zoo li 2 hnub ram ntej ub. Hnub no kuv lub siab twb tsis muaj koj lawm. Nyob rau 3 lub xyoo no tsis tsim nyog kuv rov tuaj nrog koj ua niam txiv dua tsis tsim nyog wb nyiag ntsib rau tej ya kev ya ncua. Zoo siab peb cov niam txiv tub tau siv lub sij hawm no nyob ua ke. Ua koj tsaug rau koj txoj kev hlub thiab txoj kev zoo. Txij no mus kuv tsis yog koj tus txiv".
Tseg ncua ib ntus, nrug zog txoj kev mus los sib cuag tso zuj zus txoj nyuag kev nyiag tuaj mus sib ntsib. Kuv tus kheej nyob tau yam li tsis muaj siab ntsws. Kev hlub tsis nrog luag ntshaw vim lub siab cug teev kua muag ntshav lawm. Tus plig mus thawj thiab puag pem yawm saub ntuj teb chaws tsuas tshuav lub cev qhuav qhawv nyob ntiaj teb. Ib hnub kuv pom ib qhov message koj sau rau kuv tias kom saib xyuas kuv tus kheej. Koj nyob deb deb rau ib sab ntuj lawm. Niam coj tus me tub mus xaiv nyab cov ntxhais mos ab nyob Los Tsuas teb chaws nplog. Txij li ntawd los Maiv Nos tsis hnov Tub Tuam ntab ntus xyov ciaj los tuag mus tau zoo los txom nyem. Maiv Nos quaj pos muag nti tag txoj kev cia siab lub neej tom ntej choj lov kev tu lawm tiag tiag. Thov xa xov nrog huab cua xa moo rau Tub Tuam tias Maiv Nos ib nplooj siab tseem hlub mog. Yog ib hnub twg Tub Tuam tau hnov thiab pom Maiv Nos daim ntawv no thov kom ho poob ib lub kua muag tias nco Maiv Nos, tus neeg uas koj yuav thawj zaug.
11 xyoo thiab 7 lub hli ntawn lub neej niam nkauj txhav qaib thiab txiv nraug txhav noog los xaus li no tab sis ua neej tsis pom hmoov. Ua tsaug rau lub ntuj txoj kev hlub nws tseem quas tau ib tug hlub los ua teev dej muaj tshuaj cawm siav los cawm kuv txoj sia, hnub no rov muaj txij muaj nkawm muaj ntsej muag luag nyob kaj huv si. Ncaim mus nyob txawv nroog nyob ib ceg qaum ntuj deb seb puas daws txoj kev kho siab Tub Tuam tsim tseg rau Maiv Nos tiam no lub kiav txhab thaum twg mam ua kab caws pliav. Thov kom yawm saub pov hwm kuv lub neej zaum ob, Amen.
Thaum kawg no thov ua tsaug rau 3Haivhmong.com uas tseem cia kuv siv lub sij hawm no los piav kuv zaj neej neeg tawm thiab...thov kom suav daws ntsib kev noj qab nyob zoo mam ntsib nej dua rau lwm zaus..
Sau Npe: Maiv Nos Lis.
Ceeb Toom: Txwv tsis pub leej twg tuaj muab peb cov dab neeg txhua hom hauv no mus tso rau koj lub vas sab website los yog forum thiab lwm qhov uas tsis tau txais kev tso cai los ntawm peb. Peb tsuas tso rau suav daws tuaj nyeem laug caij nyoog xwb, tsis pub muab luam muag thiab vam tias koj yuav muab kev koom tes. Ua tsaug ntau.
Warning: No one can copy any of our stories to post on your own website , forum or any other site without our permission. Printing for selling is also prohibited. Thank you for your cooperation.
Koj xav li cas rau txoj kev hlub no pab qhia peb paub:
|
|
|
