|
Txwv: Txwv tsis pub leej twg tuaj muab cov dab neeg kev hlub thiab lwm yam hauv no coj mus tso rau lwm lub vas sab yog tsis tau txais kev tso cai los ntawm 3haivhmoob.com.Warning: No one can copy these stories at 3haivhmoob.com to post on your own or other website without our permission. Thank you for your cooperation.
Tus sau: Laj Tshua E-mail: mobtsisnco@gmail.com
Tuaj ntawm: Teb Chaws Nplog - Laos |
Npaj kev tuav pov fwm koj tsev neeg nco ntsoov hu rau peb txhob tos tag kis tsam muaj mob yuav tsis tau kev tuav pov fwm rau tus kheej lawm. Ua tsaug Ntau.
|
Ib Vuag Dua Nyob Tiaj Rhawv Zeb
Nplooj1
“Ib vuag dua nyob Tiaj rhawv zeb…”
Txog rau ib tug neeg uas tau sib paub dhau los…tab si ho hla hiav txwv mus lawm. Twb tau li 8-9 lub xyoo dhau los lawm tab sis kuv tus kheej los yog lub siab tseem xav ntsuj ntsoov txog zos tiaj rhawv zeb lub chaw tshua, zoo li tseem muaj qee yam uas tau tshwm sim ntawm kuv tus kheej thiab ib tug neeg thaum I pheej tseem ntab yuj yees saum kuv li paj hlwb yam tshem tsis tau tawm kiag li…. Paj nras yog ib tug hluas nkauj uas thaum kuv pom dheev nyob rau hnub xiab 3 thaum txog 30 nyob rau hauv lub zos tiaj rhawv zeb xyoo 2003-2004, thaum kuv pom dheev nws xwb kuv paub kiag lawm tias Paj nras xwb thiaj yog tus uas kuv nyiam thiab xav nrog pov pob nyob rau sab Xieng khouang, cuag li wb muaj txoj kev xav thiab siab sib thooj, Paj nras kuj hu kuv yam luag ntxhi thiab tseem cuam kiag lub pob tsw tsw qab tuaj rau kuv tam sim uas kuv twb tsis tau nqis saum tsheb cav (motorbike) los… Paj nras muaj ob tug niam hluas uas zoo nkauj cuag li nws thiab lawv cov viv ncaus no kheev tham, luag ntxhi deev tau ib tsoom hluas nraug siab tej siab tej ntsws, tej me plab me plawv kawg nkaus li, Paj nras kuj tsis yog hom neeg siab heev heev, tsis rog thiab kuj tsis yuag, nws luag ntxhi pom muaj ib tug me nyuam hniav ntxaib yam ntxim hlub kawg nkaus. lub 30 xyoo no zoo li muaj nuj nqis thiab tsim nyog kawg lawm uas kuv tuaj txog thiab ncig ua si rau sab xeev khuam no, paj nras a… koj puas paub tias yog kuv qeeb zog ib kauj ruam xwb ces ntshe koj twb mus nrog niag ntsej muag thaub laus ntawv lawm os, koj puas paub tias kuv tseem nco tau txhua lo lus uas kuv tus phooj ywg wb tau nrog nws sib cav sib ceg ntawm nej tsev vim qhov koj zoo nkauj thiab wb tus twg los nyiam koj tsis xav tso koj, kuv paub zoo tias ntsej muag laus ntawv lam los dag koj xwb kuv thiaj li tsis nyo taub hau rau nws thiab tseem khuj nws tias yog nws heev no ces kom thau nws phau passport los saib es wb mam mus sib hais tom tus tswv zos, thaum ntawv koj twb nyob hauv tsev mloog wb sib cav ne koj puas nco qab lawm os? Paj nras…kuv twb ua neej los laus tav li no, muaj poj niam nrog luag, me nyuam los twb txib tau lawm tab sis koj puas paub tias kuv tseem nco tau wb tej kev mus ua si tim tiaj rhawv zeb, nco tau txhua tus hneev taw thiab txhua kauj ruam uas wb sib tuav tes mus ua ke, kiag tam sim no los yog kuv qi muag xwb los tseem mus xuas tau lub rhawv zeb uas koj coj kuv mus ua pos muag tsiv nraim es koj qhia tias kom ib tug nyob sab nrauv hos ib tug nyob sab hauv es mam cev tes tuaj sib tuav thiab muab ob daim di ncauj tuaj sib twb….koj puas tseem nco lawm os? txawm tias koj mus tau tus txiv muaj nyiaj thiab hlub koj, pw lub txaj zooj npaum twg lawm los kuv ntseeg tau tias tej kuv piav no tseem nyob nraim hauv koj siab tsis ploj ib yam li kuv vim koj ib txwm hais rau kuv tias yog tiam no wb tsis sib tau ces koj ib nplooj siab yeej tsis qhuav ntshav li. Paj nras..cas lub sij hawm yuav khiav ceev ua luaj li, lub tsiab 30 xyoo ntawv zoo li tib ntsais muag xwb kuv twb rov ncaim koj los mus rau nram kuv chaw lawm tab sis kuv nco tau tias thaum ntawv mas no thiab cua hlob heev koj tau hais rau kuv tias “Laj tshua…ua cas koj tus phooj ywg neb tuaj tau 2-3 hnub no xwb es neb ob sab plhu dub tas li lawm…” thaum koj hais li no ua rau kuv txaj muag thiab tsis pom qab ua li cas tag li tsuas yog tau muab sab tes los plhws thiab thaiv npog kuv lub ntsej muag xwb…txawm li ntawv los kuv zoo siab heev uas lub sij hawm kuv tuaj nrog koj nyob no zoo li koj kuj muab siab los nrog kuv tsim kev phooj ywg, zoo li koj kuj txawj txhawb dej siab rau kuv kom kuv tsis txhob nkees nyob kawg li thiab… dhau ntawv los txawm tias koj yuav mus nrog leej twg tham thiab pov pob los xij peem vim kuv tsis pom thiab twb tsis muaj leej twg qhia kuv tias koj tham leej twg ntxiv yog li kuv thiaj li tshwj nyiaj zias yuav npav los hu xov tooj rau koj… koj puas tseem nco lawm tias sij hawm ntawv peb tsis tau muaj xov tooj siv kom yooj yim li niaj hnub tam sim no yog li no. txhua zaus uas kuv yuav tau hnov koj lub suab qab zib thiab lo lus mos mas yuav tsum yog muaj neeg tuaj hu koj mus tham tom lawv tsev xwb yog li no tej zaum koj kuj txaj ob lub qhov muag kawg thiab thiaj li tsis kam hais tag tag koj tej lus zoo rau kuv mloog hauv xov tooj, kheev lam tias yog tig tau lub sij hawm tam sim no mus rau thaum xyoo 2003 ntawv ntshe kuv yuav tuav koj kom ruaj ruaj tsis tso koj mus rau lwm tus thiab yuav nrog koj tham ib hnub 10 zaus hauv xov tooj kom tsim nyog thiab tsis tas li xwb ntshe koj twb los ua tus kho chaw rau kuv pw txhua hmo lawm os Paj nras… Lub sij hawm khiav ceev cuag li zaj movie uas muab tso saib hauv tsev es yus xav kauv li cas los tau, muaj ntau zaus uas koj thiab kuv wb tau rov sib ntsib tom qab tsiab peb caug thiab ntev ntev tom qab no koj niam lawv tau rhais chaw los nyob rau hauv nroog tab sis mas koj kuj tsis tau xav ncaim sab xeev khuam ko los thiab vim tseem xav tsim kom muaj ntau yam cia kom tsim nyog tsam tsis muaj caij nyoog lawm, yog li no kuv thiaj li tshwj lub sij hawm zias tuaj mus ntsib koj, tab txawm thaum ntawv nej cov viv ncaus twb tsis nyob ntawm nej lub qub tsev uas thaum ntawv wb sib ntsib thawj zaug lawm los kuv tseem yuav tuaj nrhiav kom tau koj thiab nrog koj nyob, noj nej li mov, pw hauv nej tsev (lub tsev uas muaj koj nyob) txawm kuv yog ib tug neeg uas koj paub tam li tus hluas nraug xwb los kuv twb tsis nco qab txhawj thiab tsis nco qab txaj muag rau koj txiv ntxawm lawv li, muaj ib hnub koj tau coj kuv mus ncig ua si thaij duab tim tus pej thuam ab nub xam vab lis uas nyob ze ntawm nej…thiab koj tseem coj kuv nrog koj mus nthua koj txiv ntxawm lawv lub vaj zaub nram qab tsib taug yam tsis nco qab nkees li, thaum ntawv kuv tus kheej los yeej tsis nco qab yuav mob duav los yog hnov sab li niaj hnub no li os Paj nras… Lus Ceeb Toom:
Cov dab neeg kev hlub thiab txhua yam hauv 3haivhmoob.com no peb tsuas yog tso rau sauv daws tau tuaj nyeem laug caij nyoog xwb txwv tsis pub leej twg muab luam mus muag los yog ua lag luam, yog koj coj mus kho los yog ua lwm yam tsis tau qhia rau peb paub , thaum peb tshawb tau lawm koj yuav raug nplua raws txoj cai ntawm lub teb chaw koj nyob ko. Ua tsaug ntau: 3HaivHmooB.Com |
Nplooj2 Tej thaum lub caij nyoog zoo, lub sij hawm kaj es maj mam rov muab tej nyuag qub kev uas qub qub no coj los xav ua rau kuv cia li nyo nyo hau zoo li tus qaib mob aws lawm tsheej chim os Paj nras… kuv paub zoo tias muaj ntau yam uas los cuam tshuam rau ob tug kheej nyob rau lub sij hawm dhau los tab sis txawm li ntawv los yeej tseem muaj qhov ua rau kuv zoo siab tshaj plaws xws li txij li hnub uas koj kawm ntawv high school tag ces koj kuj tau lawv koj txiv lawv qab los rau nram nroog cuag li los cuag kuv nram kuv chaw kawm ntawv ua rau kuv zoo siab tsis txawj tag os Paj nras…
Thaum lub sij hawm zoo li no lawm ua rau kuv haj yam tau kev tuaj ntsib koj yooj yim thiab tuaj ntsib koj tau txhua lub sij hawm yam tsis nco txhawj dab tsi li, thaum koj niam koj txiv nej muaj noj muaj haus los kuv tuaj koom tau thiab thaum noj tsau lawm tseem nrog koj ntxuav tais diav, ntsaig rooj tog thiab mus yuav khoom ua ke, kuv tsuas paub tias lub sij hawm no mas ua rau kuv zoo siab thiab mus qhov twg los luag ntxhi, txawm tej phooj ywg yaum kom kuv nrog lawv mus ua si nram tej av liab, 52, veunkham los kuv yeej tsis xum mus vim vas xaum vas thiv yog hnub uas kuv yuav tuaj nrog koj nyob ua ke ntawm nej tsev, nrog koj tham thiab saib nam, mloog nkauj ua ke…. Paj nras a…lub neej kev hlub nyob hauv nroog mas txawv thaum koj nyob toj siab es kuv mam tuaj cuag koj ntau heev li os, cuag li nws yog qab tes ntxeev mus ua qaum tes lawm kuv los kuj tsis paub thiab xav tsis txog tias muaj qee yam yuav tshwm sim rau wb li os…tab sis tam sim no kuv mam paub tias lub neej tub kawm noj mov qhuav ntxuag qe thiab mij caws ces yus txoj kevhlub yeej yuav nkhaus thiab lem cuag li cov mij ntawv…los txog niaj hnub tam sim no kiag los kuv tseem tshawb tsis tau pom thiab paub tsis tau tseeb tias qhov uas kuv plam koj mus yog dab tsi? Zoo li kuv kuj ua zoo kawg rau koj lawm tab sis xyov yog muaj yam dab tsi los npog kuv qhov muag lawm es kuv thiaj li tsis tau koj, koj los thiaj cia li khiav mus yuav tej neeg uas vaj tse nyob rau sab hiav txwv sab nrauv lawm… Txiv neej yawg li kuv no cas siab me ua luaj es tsis tuav koj kom zoo zoo cia thiaj tsis tshuav lo lus “Khuv xim” no nyob rawv hauv nruab siab os…koj puas paub tias yog kuv ua qhov twg txhaum rau koj los yog tsis hlub koj es wb thiaj li ho nyias mus nyias lawm os…zoo li lub sij hawm tseem muaj ntau rau wb thaum uas wb tsis tau sib ncaim ntawv cas koj ho tsis hu qhia kuv os Paj nras… kuv tseem nco tau lub sij hawm kawg uas kuv tau pom koj ces yog thaum uas koj thiab koj niam neb tuaj yuav khoom ntawm ib lub khw uas nyob ze ze ntawm qhov chaw kuv so (Dongdok-Tanmixay) es kuv thiaj tau hais lus nrog koj zaum kawg ntawv xwb.... Dhau los ntawv ces kuv kuj mus hauj lwm nyob txawv nroog tsis muaj sij hawm tuaj cuag koj li lawm, tom qab no hnov tias lawv tab tom tuaj nqis tsev hais koj thiab kaj ntug tag kis ntawv ces kuv thiaj tau txais ib tsab xov tooj tias kom los koom koj rooj mov thiab pab khi ib txoj hlua tes ua kev zoo siab rau neb ib nkawm niam txiv tshiab tab sis Paj nras…cas lub sij hawm no es kuv yuav nyob deb koj ua luaj xav tuaj ntsib koj thiab foom ib lo lus zoo rau neb los tuaj tsis tau li lub siab xav li os…txog niaj hnub no los koj txoj hlua khi tes tseem nyob nraim ntawm kuv tus kheej tsis tau pawv thiab tseem khaws cia rau nruab siab os. Kuv paub zoo tias koj txiv lawv tau ib tug vauv zoo thiab lawv tus ntxhais los tau txoj kev kaj siab lawm tab sis koj yeej tseem nco txog kuv me ntsis thiab vim thaum mus txog tsis ntev xwb koj tseem hu xov tooj los nrog kuv tham tab sis tu siab tias wb tham tsis muaj tsawg lo koj cia li muab xov tooj khwb lawm os Tus me neeg zoo a… Kuv nkag siab tias tam sim no koj muaj zoo vaj tsev nrog luag nyob, muaj zoo txiv los puag koj pw thiab nrog tuav tes mus ua ke, muaj me nyuam los deev siab tag thiab tsis nco txog wb tej kev qub qub 8-9 xyoo dhau los lawm os…ntawm kuv tus kheej los yeej muaj cuab yig tag, muaj tub, muaj ntxhais txib tau lawm thiab, xav tias yuav muab piav rau lawv mloog los ntshai tsam qeej hnov ces qeej ho nrov, nruas hnov los nruas ho to qhov, ho cia li yuav muab piav rau me nyuam mloog los lawv tseem tsis tau rua muag los rau txoj kev nkauj nraug thiab yog yuav tham qhia rau tej phooj ywg los ntshai tsam lawv coj mus ua paj lugtham rau tej kwv tij hnov ces ho ntsib kev tsau ntuj hauv lub cuab yig… yog li no kuv thiaj xav tias cia muab sau tso rau hauv Hmongmeka.com no seb lub siab puas kaj thiab thiaj tsis muaj neeg paub tias yog kuv sau tab sis tsuas yog kuv, koj thiab koj tus niam hluas xwb thiaj li paub tias zaj no yog leej twg sau thiab sau rau leej twg…. Thaum no ces kuv zoo li koj ib tug qhua uas tau tuaj saib nej ib zaug dhau xwb thiab koj yeej paub zoo tias tej kuv sau no tsuas yog zoo yam li lub txiv qaum uas kuv tsuas phua ib txauj me me coj los faib rau sawv daws noj xwb, yog tias yuav chais kom tag wb tej kev taug uas tau tsim muaj los los yeej tau kawg tab sis xyov lawv puas xav nrog wb nyeem, yog li txhob xav kom ntau tshaj no thiaj tsis nyuaj siab thiab koj thiaj li xav pib lub neej mus kom kawg ntsis os mog, tsis ntev hnub thiab tsis pes tsawg hmo ntxiv xwb ces koj yuav hnov qab wb tej kev taug yav tag los lawm os Paj nras. Ua tsaug ntau ntau rau lub sij hawm uas koj muaj thiab muab pub rau kuv yav tag los, tsis tas li xwb koj tej kev ua zoo rau kuv nws yuav nyob nraim hauv kuv siab tsis ploj tab txawm koj thiab kuv wb tsis tau nyob koom ib lub ntuj lawm los xij peem tsuav yog koj tseem ua neej qhuas ntxhias thiab kuv los tseem tau mus taug wb tej qub kev xwb ces siv tau rau tiam no lawm os.. Ib zaug ntxiv..thov ua tsaug ntau ntau rau lub tsev vas sab “hmongmeka.com” uas tau muab chaw tso kuv zaj dab neeg no, thiab ua tsaug ntau ntau rau ib tsoom phooj ywg uas tau siv lub sij hawm los nyeem kuv zaj lus no. thov foom lus zoo rau nej txhua tus kom tau txais kev kaj siab thiab kom 3haivhmoob.com tsuas vam meej mus lawm yav pem suab. Ua tsaug. Laj tshua. Nco Ntsoov: Txhob hu xov tooj rau lawv cov kev lag luam lawv tso hauv no yog tias koj tsis muaj feem txog kev lag luam nawb. Ua tsaug
|
