Koj Phua Kuv Lub Plawv
Tus sau: Tus muam Txos Lis : Email: tsabntawvhlub@hotmail.com
Nplooj 1" Tsis muaj dab tsis yuav mob npaum qhov koj muab kuv lub plawv phua kiag tawg ua ob sab ntshav tsuag tshaws tawm plaws ua cov me dej nag ntws nto ntawm kuv ob lub qhov muag los...! Quaj tsis nrov..yim xav kua muag yim ntws tawm los ntau npaum ntawd...Lub neej no koj siab phem tshaj..tsis hais tiam no lwm tiam tsawg tiam los kuv yuav tsis zam txim pub rau koj li.." Lub sij hawm ntawd yog xyoo 1989 uas kuv tau ntsib ib tug tub hluas zoo nraug txawj hais lus npe hu Laj Xeeb. Laj Xeeb yog ib tug neeg zoo nraug txawj hais lus ntxim tsis txawj dag, kuv xav tias yog nws tuaj tham kuv no ntshe kuv yeej kam yuav nws nrog nws koom ib lub neej txhog hnub kawg..vim pom xwb twb nyiam lawm.. Laj Xeeb ua hauj lwm nyob rau ntawm lub chaw ua npe rau tib neeg mus txawv teb chaws.
Muaj ib hnub kuv tus phauj kom kuv ua nws luag mus ntxiv npe rau tim Laj Xeeb lawv qhov chaw ua hauj lwm, ces laj xeeb txawm pom kuv thiab nug tias kuv npe hu li cas, xeem dab tsi? Kuv qhia kuv npe rau tag ces nws txawm hais ntxiv tias ib chim tuaj nrog kuv hais lus puas tau? Kuv teb tias tau kawg... Kuv xav tias nws lam hais dag xwb, tab sis tsaus ntuj nws txawm tuaj tiag tiag. Kuv zoo siab heev..xav tias yog tiag los dag..thiab tej zaum nws yeej muaj nws hluas nkauj lawm lam tuaj ua si xwb, tab sis dhau ntawd los nws kuj tau tuaj txhua hmo.. Wb txoj kev hlub kuj loj hlob zuj zus thiab muaj kev sib swm heev tuaj li lawm. Laj Xeeb tau hais rau kuv tias nws tsuas muaj kuv ib leeg xwb, kom kuv txhob siab coob rau nws. Kuv yeej ntseeg txhua lo lus uas nws tau hais rau kuv li.. Thaum wb txoj kev plees nkauj nraum zoo heev li no lawm nws tau hais rau kuv kom kuv swb kuv lub cev rau nws, kuv teb rau nws tias cia wb sib tau tso txhua yam yeej yog nws li tag lawm kom txhob maj . Thaum kuv tau hais li no rau nws ces nws tsuas chim li chim rau kuv xwb thiab hais tias yog kuv tsis kam ces xam tias kuv tsis hlub nws li tej lus uas kuv tias kuv nim hlub hlub nws li no. Txog thaum kawg kuv tsis xav kom nws chim kuv thiaj tau plam kuv lub cev hluas nkauj swb rau nws lawm. Laj Xeeb tau mus tsev luag ntxhi lawm tab sis kuv txhawj tias ib hnub yog nws tsis yuav kuv ces ntshe yuav tu kuv siab tag ib sim neej li, ua cas yuav ua tau yuam kev li no lawm. Dhau no los tau ib ntus kuv tias kom wb sib yuav no los , nws tias tos hli xiab tso, txog hli xiab kom yuav los nws tias sij hawm tsis zoo tos sij hawm zoo tso.. Nws dag kuv ib hnub dhau ib hnub ib hli dhau ib hli, tab sis nws pheej tseem tuaj ntawm kuv thiab vim xav siv kuv lub cev ua chaw so kaw taw.. Thaum kawg kuv lub cev kuj tau xeeb tub, kuv hais rau nws los nws tias kuv dag xwb...hnub hmo dhau mus zuj zus cheem tsis tau caij nyoog, kuv lub cev poj niam nws loj zuj zus tuaj, Laj Xeeb mam paub tias kuv cev xeeb tub lawm tiag no,ces nws cia li tsis tshua tuaj cuag kuv lawm.. Muaj ib hmo kuv tau hais rau nws tias kom nws cia li coj kuv mus xwb, nws tau hais rau kuv tias...tsis muaj nyiaj , tos nws tij laug xa nyiaj tim Mes Kas los tso mam tuaj yuav kuv. Qhov tseeb tiag nws tsis yog tham kuv xwb, tab tsis tham ib tug ntxhais nyob ntawm lawv tsev, wb ob leeg thooj txhij muaj tus nraug Hmoob siab dub siab phem no me nyuam tib si. Muaj ib hmo nws tau tuaj hais rau kuv tias nws yuav qhia ib qho dab tsi rau kuv kom kuv txhob cem thiab txhob chim rau nws. Nws hais rau kuv tias, nws tau tham ib tug hluas nkauj muaj menyuam lawm thiab, niam thiab txiv yuav kom nws yuav tus ntxhais ntawd, kuv tso los nws dim , kuv tua los nws tuag xwb ntshe nws yuav tsis tau kuv lawm, vim nws tsis xav muaj lub neej ua niam hlob niam yau kom nyuaj siab yad tom ntej. Thaum kuv hnov nws cov lus no tag ua rau kuv lub siab phua rhe ib ce tuag tag tsis muaj zog li lawm. Chim siab kuj chim, npau taws kuj npau xav muab nws tua ntsuav mos mos los yeej tsis zoo kuv siab li.. Laj Xeeb tsis yog rhuav tshem kuv lub siab xwb nws tseem rhuav tshem kuv lub cev hluas nkauj, muab kuv lub plawv phua rhe ua ob sab, kuv cia li ua tus neeg vwm plaub hau tsis nco ntsis ntxho nyho twb zoo tsis npaum tus poj ruam lawm.. Zaum no txoj kev tuag ntshe thiaj yuav pab tau kuv lawm xwb..ntshe cov laus paub ces lawv yuav muab kuv tua pov tseg li.. Tus txiv neej siab phem no hais ntxiv rau kuv tias..kom kuv txhob mus thawj nws, kuv mus thawj nws ces nws muab kuv rub tawm nraum zoov, yog kuv tuag ces nws nqa nyiaj tuaj pam kuv xwb, yog kuv nyob twj ywm ces mam nqa nyiaj tuaj kho ....nws cov nyiaj txawm yuav txij taub hau los yeej kho tsis tau kuv li lawm. |
Nplooj 2Ua cas tus txiv neej uas ib txwm zoo zoo ntawd nim no nws cia li tig los ua ib tug txiv tsov uas nyaum li nyaum es txav ze leej twg los tom tus ntawd li, lub neej no txiv neej ntshe siab yuav phem ib yam nkaus li Laj Xeeb. Nws hais ntxiv tias yog nws tsis dim kuv ces nws xum mus dai tuag kom dim kuv, lub sij hawm no ua cas kuv cia li yog zoo li ib tug poj dab uas nws ntshai tshaj plaws li.. thaum kuv paub li no kuv xav tias tsis tsim nyog tuag rau tus txiv neej siab phem no lawm, kuv muaj nws ib nplooj siab lawm los cia kuv mam yug thiab kuv mam hlub seb ib hnub nram ntej kuv lub neej puas yuav kaj li siab xav..ntshe yog vim kuv txoj hmoo yeej los li no. Tsis ntev tom qab lawv kuj coj nyiaj tuaj kho kuv , kuv txiv lawv cem kuv heev tab sis vim yog lawv yug ces lawv cem tas los lawv kuj hlub kuv li qub thiab. Txoj hmoo muaj kuv kuj yug tau ib tug me tub ntxim hlub , nws kuj loj hlob nplhis ncos yam tsis muaj mob li. Wb ob niam tub tau tuaj nyob rau lub teb chaws vam meej no, kuv tus me tub kuj tau mus kam ntawv tiav ua ib tug kws kho mob , ua hauj lwm ntawm ib lub tsev kho mob loj nyob rau ntawm ib lub xeev uas Hmoob nyob coob tshaj nplaws li. Txij hnub ntawd los txog hnub no kuv yeej tsis tham ib tug txiv neej Hmoob ntxiv li lawm vim kuv xav tias ntshe txiv neej txhua tus siab yuav phem ib yam nkaus tus neeg kuv tau ntsib los ntawd. Rov qab los tham txov tus txiv neej siab phem ntawd, nws tau yuav tus viv ncaus Hmoob uas muaj nws menyuam nrog kuv ua ke ntawd thiab nkawd ob niam txiv tau tuaj mus nyob rau teb chaws Auv Tas Lias lawm. Tom qab no nws tus poj niam kawd kuj tau sib nrauj lawm thiab, vim txoj kev tham hluas nkauj coj tus me cwj pwm li yad thaum hluas. Kiag tsis ntev tag los no nws nug tau kuv xov tooj ntawm kuv ib tug phauj uas nyob teb chaws Auv Tas Lias, thiab nws tau hu xov tooj tuaj nrog kuv tham ib zaug. Thaum nws hu tuaj , nws hais tias, nws xav nrog kuv tham?. Kuv nug nws tias koj yog leej twg? Nws teb kuv tias nws yog kuv ib tug zoo phooj ywg yad tag los thaum ub lawm xwb. Kuv hais rau nws tias yog koj tsis qhia tias koj yog leej twg ces kuv yuav tsis nrog koj tham. Thaum kawg nws ua tsis tau li cas thiaj li qhia rau kuv tias nws yog Laj Xeeb tus txiv neej siab dub siab phem uas tau muab kuv tso pov tseg thaum nyob Thaib teb, yad tag los thov kom kuv zam txim rau nws tej yam uas nws tau ua txhaum dhau mus lawm. Nws txawm muaj qhov phem nrog kuv lawm los thaum ua nkauj ua nraug wb yeej muaj qhov zoo thiab kom kuv zam txim, txhob xav yad tag los lawm. Kuv kuj tau hais rau nws tias thov kom txhob hu xov tooj tuaj thab plaub lawm, vim wb ces twb tag rau 30 xyoo dhau mus ntawd lawm , nij hnub no kuv tsis muaj ib tug phooj ywg hu ua Laj Xeeb lawm. Laj Xeeb ces twb tuag tau 30 tawm xyoo dhau mus lawm. Thaum kuv hais li rau nws ces nws ua txuj quaj quaj thiab hais tias txawm li cas los nws twb cog tau ib nplooj siab rau kuv lawm, tsis xav ntawm kuv los kom xav ntawm tus me nyuam. Nws tej lus nws hais yeej tseem tsis tau tag tab sis kuv cia li muab lub xov tooj khwb kiag lawm. Txoj kev khaum tau caum cuag nws lawm, tus viv ncaus ntawd los tsis yuav nws , ntawm kuv los nws plawm lawm nim no nws ua lub neej ncav tsis cuag ob tog. Lub neej tam sim no ces tsaus xaus nrog tus txiv neej Laj Xeeb siab dub siab phem ntawd li no xwb, tab sis tom ntej no kuj tsis paub tias dab tsi yuav tshwm sim mus ntxiv ..vim kuv tus me tub sij nij hnub nug kuv tias nws txiv yog leej twg? Nws txiv nyob qhov twg? Nws txawm kawm ntaub ntawv siab npaum cas los nws xav muaj txiv li luag tej thiab. Yog li kuv kuj tsis paub tias ho yuav tshwm sim li cas ntxiv rau lub neej tom ntej..Txawm li cas los xij, ntawm tus txiv neej siab dub siab phem uas phua kuv lub me plawv puas ntsoog ntawd ces tag li no lawm xwb, tsis hais tiam no lwm tiam, tsawg tiam los yuav tsis ntsib nws ntxiv lawm... Kuv zaj kev hlub: Koj Phua Kuv lub Plawv tau los xaus li no lawm xwb, thaum kawg no thov ua tsaug rau lub Vas Sab: www.hmongmeka.com uas pub qhov chaw no rau kuv tuaj piav kuv zaj dab neeg tawm, thiab thov ib tsoom viv ncaus ceev faj tus txiv neej uas hais lus zoo zoo rau koj tsam koj ho tau txoj kev nyuaj siab li kuv os nawb... Nyob zoo suav daws. Maiv Txos Lus Ceeb Toom:
Cov dab neeg kev hlub thiab txhua yam hauv 3haivhmoob.com no peb tsuas yog tso rau sauv daws tau tuaj nyeem laug caij nyoog xwb txwv tsis pub leej twg muab luam mus muag los yog ua lag luam, yog koj coj mus kho los yog ua lwm yam tsis tau qhia rau peb paub , thaum peb tshawb tau lawm koj yuav raug nplua raws txoj cai ntawm lub teb chaw koj nyob ko. Ua tsaug ntau: 3HaivHmooB.Com |