"Tso tsis tso kom kawg ntsis,
Hlub tsis hlub kom kawg siab"
Nplooj1 Ntuj os kuv nplooj siab, Cas ntuj nim tso tau wb los ua nkauj ua nraug, es kuv nim yog tus los tom qab lawm.Wb sib ntsib nyob rau hauv hmoob lub tshiab peb caug. Thaum pom dheev Nws, cuag li kuv pom ib tug phab ej hmoob zoo nraug ntxiag. Thaum kuv nrog nws pov pob kuv lub siab qaug laim rau nws xwb. nws tau thov kuv tus xov tooj tabsi kuv xav twj ywm tias ntshe yeej yuav tsis muaj hnub nws hu kuv.
Hnub tom qab tsiab peb caug tag, nws hu tuaj nrog kuv tham. Ntuj aw, cas nws lub me suab hais lus yuav rub tau kuv lub siab vwm tag rau nws. Ib tsam yuav tsaus ntuj nws tuaj saib kuv thawj zaug tim peb tsev. Wb tham lus tseem txaj txaj muag tsis sib ntsia, tabsi nws ntsia ntsoov kuv, Nws hais rau kuv hais tias, "Tus muam a, cas koj yuav dawb ua luaj. Es puas kam kuv de koj sab plhu nab?" Kuv luag luag es kuv hais rau nws hais tias, " Kuv tsis dawb li os tus nus, tej zaum nej tsis nyiam os" Wb tham ib pliag xwb nws lub xov tooj nrov hu tuaj kom nws mus tsev. Ua ntej nws yuav mus, nws txawm nug kuv hais tias, "Es koj yuav tsis khawm kuv ib zaug ua ntej kuv yuav mus tsev lob?" Kuv thiaj li khawm nws. Kuv tseem nco tau nws lub taub hau txheem zoo zoo cia rau ntawm kuv sab xwb pwg, Thiab hais rau kuv tias, "Koj tsw qab ua luaj li" Tom qab ntawv wb niaj hnub sib ntsib, Muaj ib hmo nws tuaj nrog kuv nyob. Nws rub kuv los ze ze nws thiab tau nug kuv tias, "Koj puas kam kuv hnia koj nab?" kuv teb tias, "Ws... Tau thiab mab... Tabsis hnia ntawm sab plhu xwb ov." nws nug tias, "Es hnia ntawm di ncauj tsis tau lob?" Kuv co co taub hau. Nws khoov los hnia kuv sab plhu thiab rub kuv mus ze ze puag kuv ruaj ruaj ces nws txawm hnia kuv sab plhu li hais es maj mam txav los ze ze kuv di ncauj ces hnia kiag. Ua rau kuv ib ce tuag tag yam li kuv muaj tis ya tau lawm. Thaum nws hnia kuv tag kuv hais rau nws hais tias, "Koj,... Yog thawj tug uas tau hnia kuv. Thiab yog kuv thawj tug hluas nraug." Nws ceeb thiab hais rau kuv hais tias, "Puas yog ma?" Kuv teb nws tias kuv hais tiag tiag. Tom qab ntawv wb kuj tham xov tooj txhua hmo tabsi kuv tseem tsis tau lees ua nws tus hluas nkauj, Nws niaj hnub hais rau kuv hais tias kom kuv hais lo lus tias hlub nws. Tabsi kuv tsis kam hais ib zaug li. Thaum txog lub 2 hlis ntuj vas thib 14, Hnub kev sib hlub. Nws hu tuaj quaj quaj rau kuv, thiab thov tuaj saib kuv. Hmo ntawv nws tuaj kuv muab ib lub paj ntshua nplaim liab liab rau nws khi nrog ib daim ntawv hlub. Nws pom nws txais, ces nws muab kuv rub los ze ze, khawm nkaus kuv. Thiab hais rau kuv hais tias, "Kuv Nco Koj" Kuv khawm nws es kuv hais rau nws hais tias, "Ua li, Kuv kam ua koj tus hluas nkauj lawm" (Nws twb nug kuv tau 6 zaus lawm) "Nraug hmoob koj puas yuav hlub kuv tiag?" Nws txawm teb tias, "Kuv tsis paub xyov kuv hlub puas yuav tau koj, tabsi kuv mam li hlub li qhov kuv hlub tau os." Wb sib hlub tau 2 hlis ntau, kuv twb tso tsis tau nws lawm. Kuv mam li paub hais tias nws muaj ib zaug poj niam dua los lawm. Nrog rau ob tug me nyuam tub meme. Kuv tu siab tias kuv tsis yog thawj tug rau nws, Tom qab nws paub hais tias kuv paub lawm, Txhua zaus wb tham lus hauv lub xov tooj, nws yeej hais txog nws tus poj niam thiab piav txog nkawv lub neej hais tias nws hlub nws tus poj niam heev li. Tabsis kuv yeej mloog txhua txhua lo, Txawm mob kuv siab los kuv ua tiag uv. Kuv txaus siab Hlub Nws. Thaum nws mob mob kuv nqa tshuaj mus rau nws noj thiab zaws nws taub hau. Thaum txog nws lub hnub yug kuv yuav tau ib lub ncuav qab zib nrog rau phaub ntawv uas kuv sau txog nws. Hmo ntawv kuv tos tos ib tag hmo kaj ntug tag kis, paj tuag tag, cua hlob hlob, lub ncuav qab zib khov tag, los kuv zaum ntawm kuv taw rooj tsis mus tsev, Tuav rawv kuv lub xov tooj tsam nws ho hu tuaj. Kuv hu hu tsis tau nws li. 1 moos sawv ntxov lawm. Kuv tu siab nrho, hais rau kuv tus kheej hais tias, "Nws tsis tuaj lawm os" Ces kuv mus tsev lawm. 3 moos sawv ntxov nws txawm hu tuaj nug kuv tias kuv hu ua dabtsi, kuv hais rau nws hais tias nws ua dabtsi. Nws teb tias, "Kuv tuaj haus cawv tim kuv cov phooj ywg lawv xwb. Koj xav tau dabtsi?" Kuv tsis paub yog vim li cas tabsi kuv cia li poob poob kua muag es kuv hais rau nws hais tias, "Tsis muaj dabtsi os,... Tabsis... Zoo siab hnub yug rau koj os. Es kuv yuav tau ib lub ncuav qabzib rau koj thiab ib phau ntawv kuv sau rau koj, Nrog rau ib rev paj rau koj niam tus mob xwb os." Nws hais rau kuv tias yog vim li cas kuv thiaj li yuav rau nws. Es kuv qhia nws tias, "Vim kuv hlub koj, Es koj yog kuv nplooj siab." Nws hais rau kuv hais tias, "Thov txim kuv nrog tsis tau koj tham tam sim no" Ces nws muab xov tooj tua lawm. Tagkis kaj ntug muaj ib tug phooj ywg nrog kuv tham thiab qhia nws qhov chaw nyob rau kuv. Kuv niam tau thauj kuv mus tim nws tsev, Thaum nws qhib qhov rooj nws ceeb thiab nug kuv tias kuv tuaj ua dabtsi. Kuv cia li cev lub ncuav qabzib, rev paj, thiab phau ntawv rau nws. Kuv hais rau nws hais tias, "Txawm nag hmo koj tsis tuaj los tsis ua li cas, Tabsi, Kuv thov kom txhua txhua xyoo, koj txoj hmoo, tsuas nqa kev zoo, los rau koj lub neej. Thov muab rev paj no rau koj niam os" Nws tsis hais ib lo lus li, Nws tuav ib hwj cawv ntawm nws ib sab tes. Kuv khawm nws ib pliag, kuv lub kua muag rov poob dua. Ces kuv txawm tso nws, los mus tsev lawm. Nws nyiam hu kuv tej lub npe txaus txaus luag los sis dab dab tuag.Thiab tso dag tso luag tas li nrog kuv. Wb twb sib tso 3 zaug lawm, tabsi pheej sib tseg tsis taus xwb. Muaj ib hnub kuv nug nws hais tias, "Cas koj nyiam tso dag nrog kuv ua si ua luaj. Thov koj tsis txhob sim sim kuv lub siab ntxiv lawm os." Nws txawm hais rau kuv hais tias, "Kuv tsis yog nrog koj ua si na. Tabsis kuv tsis muaj hluas nkauj nrog tham lawm es kuv thiaj nrog koj tham xwb. Qhov tseeb kuv pom koj zoo li kuv tus muam yau xwb. Tabsi tej thaum kuv kuj hlub koj tiag tiag lawm thiab hos" Ua rau kuv tu siab dua. Nws cog lus hais tias, nws mam tuaj koom kuv lub hnub yug. Thaum txog hnub ntawv, kuv tos tos ib tav su dhau, ib tag hmo dua tag. Tsis pom nws tuaj, tsis hnov nws xov, tsis hnov nws hu tuaj qhia dabtsi rau kuv li. Ua rau kuv tu siab heev. Ob hmo tom qab, nws sau ntawv tuaj rau kuv hais tias, "Ua tsaug uas koj ua ib tug phooj ywg zoo heev rau kuv. Thov koj ua siab mus zoo mog. Kuv zoo siab nrog kuv lub neej tam sim no lawm os. Mus zoo koj" Kuv quaj quaj. tau 3 hnub. Nws rov hu tuaj nrog kuv tham thiab nug kuv hais tias kuv puas tseem hlub nws. Lub sij hawm ntawv nws mus rau hauv California rov qab mus thov nws tus poj niam rov los thiab mus saib nws ob tug me tub lawm. Tabsis nws tus poj niam tsis kam rov los lawm. Kuv tu tu siab, tabsi haj tseem teb rau nws tias, "Kuv tseem hlub koj heev li os" Ua rau wb rov qab zoo li qub dua. Muaj ib tug phooj ywg qhia rau kuv hais tias, "Koj tsis txhob rov qab mus hlub koj tus qub hluas nraug li os. Kuv twb pom lawm. NWS TWB TSIS HLUB KOJ LI NA! Yog koj rov qab hlub nws ces, zoo li koj muab ib lub mos txwv rau nws tua koj dua vim thawj zaug nws tua tsis raug koj xwb na" Kuv hais tias, "Kuv paub ma, Tabsis... Kuv lub siab tseem tseg tsis tau nws, kuv tseem xav muaj lub sij hawm nrog nws." Thaum nws rov qab los, Wb kuj rov sib raug zoo thiab nws hlub kuv tshaj qub, Meme. Muaj ib lub me nyuam tsev kawm ntawv nyob tsis deb ntawm kuv tsev, thaum twg nws tuaj wb yeej mus ncig ua si hauv. Lub sij hawm ntawv lom zem thiab yog ib lub sij hawm uas zoo siab tshaj plaws rau wb. Tabsi kuv yeej paub zoo hais tias, nws lam nrog kuv xwb, Nws lam nyiam kuv xwb, yeej tsis tau hlub kuv tiag. Tabsi thaj chaw ntawv yog thaj chaw uas kuv nyiam tshaj plaws. Muaj ib hmos twb yog 3 moos sawv ntxov lawm, nws txawm hu tuaj hais rau kuv hais tias, "Kuv mob siab heev li. Mob siab heev li os." Kuv nug nws tias ua cas, nws hais rau kuv hais tias, "Kuv tsis paub tabsi kuv nco kuv tus poj niam heev li os." Lus Ceeb Toom:
Cov dab neeg kev hlub thiab txhua yam hauv 3haivhmoob.com no peb tsuas yog tso rau sauv daws tau tuaj nyeem laug caij nyoog xwb txwv tsis pub leej twg muab luam mus muag los yog ua lag luam, yog koj coj mus kho los yog ua lwm yam tsis tau qhia rau peb paub , thaum peb tshawb tau lawm koj yuav raug nplua raws txoj cai ntawm lub teb chaw koj nyob ko. Ua tsaug ntau: 3HaivHmooB.Com Nco Ntsoov: Txhob hu xov tooj rau lawv cov kev lag luam lawv tso hauv no yog tias koj tsis muaj feem txog kev lag luam nawb. Ua tsaug
|
Nplooj2 Thaum kuv hnov li no kuv mloog twj ywm xwb, tabsi mob kuv siab tshawj plaws, Leej nus os leej nus, cas koj nim hu tuaj thaum 3 moos sawv ntxov kuv los teb tus zoo siab hlo, los thaum kawg haj tseem yog koj qhia kuv hais tias nco tsis nco leej twg tabsi nco koj tus poj niam xwb. Hmo ntawv kuv quaj quaj ib leeg. ob peb hnub dhau ntawm hnub wb mus ua si hauv tsev kawm ntawv chaw ua si. Kuv hu mus rau nws es nws hais rau kuv hais tias, "Kuv tseem ua hauj lwm os, Wb tham li no xwb, ib pliag kuv lub xov tooj tuag lawm os." ces wb txawm khwb xov tooj. Hnub ntawv kuv rov mus ncig ua si rau hauv lub tsev kawm ntawv ntawv thiab nqa ib phau ntawv uas kuv sau txog nws dua nrog kuv. Thaum kuv tus niam hluas wb yuav rov los tsev, peb ib tug niam tais tus tub txawm tuaj txog ntawv thiab ces wb tseem tham txog qhov uas nws mus tim suav teb rovlos. Thiab kuv tham txog kuv tus hlub rau nws tasli xwb. Wb tseem tham tham xwb no, cia li hnov kuv tus niam hluas hu kuv kom kuv sawv.
(Peb zaum ntawm ib tug ntaiv muaj li 50 theem ntaiv, Kuv tus niam hluas nyob puag sauv hos tus tij laug wb nyob sab hauv) Kuv yog ib tug neeg coj iav es kuv tsis pom thiab tsis hnov kuv tus niam hluas zoo vim nws nyob deb deb. Tabsi kuv pheej tham tas zog txog kuv tus hlub rau peb tus niam tais tus tub. Ib pliag ntshis xwb txawm hnov nws lub suab nug tias Kuv nyob qhov twg. Thaum kuv nkag siab hais tias, Nws tuaj txog ntawv thiab ua rau kuv poob siab loj tshaj plaws. Vim tsam nws nkag siab yuam kev kuv nrog kuv niam tais tus tub. Nws txawm los nrog kuv niam tais tus tub tham tham tso dag tso luag. Lub sij hawm ntawv nws kuj coj ib tug hluas nkauj tuaj thiab. Kuv zaum ntawm nkawv ib sab tsis ntsia nws li. Kuv pom tus hluas nkauj ntawv mus ua viv vias nrog nws ib tug niam hluas es kuv thiaj li mus nrog nws tham. Thaum kawg, tus hluas nkauj ntawv, tseem yog ib tug phooj ywg kuv paub uas peb kawm ntawv ua ke xwb thiab. Ua rau kuv haj yam mob siab thiab tu siab tshaj plaws. Kuv txawm nug kuv tus phooj ywg ntawv hais tias, "Es koj paub nws thiab lob? Lig ua luaj lawm es neb tuaj dabtsi no os?" Nws teb tias, "Wb nyuam qhuav sib paub tsis ntev xwb os. Ws nws tias kom wb tuaj ncig ua si no es kuv thiaj li nrog nws tuaj xwb os. Es koj paub nws thiab lob?" Kuv hais rau kuv tus phooj ywg hais tias, " Ws.... Kuv paub thiab mab. Nws lub neej lwj siab heev li os. Es koj puas nyiam nws mas? Vim zoo li nws yeej nyiam koj lawm laiv" Kuv tus phooj ywg teb tias, "Ws... Kuv tsis paub thiab, Kuj tsis nyiam tag tag thiab tabsi cia tham mus seb. Es... Neb puas tau sib tham no?" Kuv teb rau kuv tus phooj ywg hais tias, "Wb..... tham lus thiab mab. haha... Li ntawv xwb os." Nws ntsia ntsia kuv xwb. Tabsi kuv tus phooj ywg twb tsis paub hais tias, Kuv twb ua tsis taus pa lawm, Kuv lub siab twb tawg ntsoog kiag tag nrho thaum kuv hais rau nws tias wb tsis muaj dabtsi. Tabsi kuv xav twj ywm rau kuv tus kheej hais tias, Tsuav tus neeg kuv hlub zoo siab xwb ces, kuv txaus siab, dag li no. Kuv ua tiag uv kom kuv kua muag txhob poob. Thaum peb rov mus tsev, peb sib faib kev, lawv peb leeg mus lawv ib txoj hos kuv mus kuv ib txoj. Kuv ua tib zoo mus thaumlawv tseem pom kuv, tabsis thaum dhau kiag lawv lawm kuv khiav khiav mus tsev ces kuv txawm qaug zog heev. Kuv zaum pheeb ib tug ntoo, ces kuv quaj kiag ib suab nrov nrov. Thiab muab wb ib daim duab hauv kuv phau ntawv hlub dua pov tseg tag. Xav rau kuv tus kheej hais tias, "Thaj chaw no ib txwm yog thaj chaw kuv nyiam tshaj plaws thiab zoo siab tshaj plaws, Ib ntsais muag xwb, txawm siv hloov mus ua thaj chaw uas kuv ntxub tshaj plaws nyob hauv kuv lub neej." Kuv mus txog tsev ces kuv quaj quaj ib tug vwm ntsuav rau kuv tus niam hluas, Tias cas kuv twb hlub nws tag npaum nov. Twb xav tias nws yog ib tug yawg nrauj thiab lub neej tsis tsheej es kuv twb tseem hlub nws. Cas nws ho tseem yuav mus tham hlub dua lwm tus, Thaum kawg ho tsis yog leej twg es ho tseem yog kuv ib tug phooj ywg xwb thiab. Hmo ntawv 1 moos sawv ntxov nws hu tuaj rau kuv tias, "Kuv hu zaum no yog kuv hu tuaj xaus txhua yam. Kuv twb xav hais tias koj txawv lwm tus hluas nkauj es kuv ntseeg koj. Xav tsis txog hais tias, Koj los kuj LIAM ib yam li lwm tus hluas nkauj xwb. Nrog koj zoo siab, txhua niaj txhua zaus kuv quaj kuv haus cawv tsuas yog rau kuv tus poj niam xwb. Tabsis zaum no kuv nrog koj zoo siab uas kuv lub kua muag poob zaum no yog rau koj. Tom qab kuv khwb lub xov tooj no ces kuv yuav tsis muaj hnub hu tuaj rau koj ntxiv li lawm. Kuv tsis xav hnov dabtsi kiag li! Li no xwb. Nws yeej tsis muaj txoj kev hlub tiag. Goodbye." Ces nws txawm muab xov tooj tua lawm. Hmo ntawv kuv quaj quaj ib leeg saib lub hli, ci ntsa iab zoo ib yam li hmo ntawv kiag ntag, hmo uas nws tau rub kuv los hnia thawj zaug. Zoo nkauj heev. Kuv tu siab tshaj plaws. Kua muag ntws si laws. Kuv hais rau nws hauv kuv tus kheej hais tias, "Nplooj siab, kuv tsis ua li luag hais, Kuv hlub hlub koj, kuv thiaj li rov muab ib lub mos txwv rau koj tabsi zaum no koj tua kuv tshab plaws kuv lub siab lub ntsws ntsoog tag nrho. Ces koj yuav sawv khiav mus tsis tig saib qab. Kuv tseem khaws cov hmoov nov, Thov kom lwm zaus wb sib ntsib, kuv yuav muaj lub zog, sawv, thiab tawm tsam rov qab." Nyob rau wb txoj kev hlub, kuv tsis tu siab tias nws tsis hlub kuv vim thaum pib nws twb yeej hais rau kuv hais tias xyov nws hlub puas yuav tau kuv. Tsis tu siab qhov tias thaum tsis tau sib hlub nws niaj hnub thov kuv hais rau nws tias kuv hlub nws es thaum wb ua nkauj nraug lawm kuv hais rau nws tias hlub thiab nco nws ces nws tseem cem tias cas tsis paub hais lwm lo lus li los cas. Thaum nws hu kuv npe li ub li no, thaum nws tham txog nws txoj kev nco nws tus poj niam, thaum nws tham txog hais tias nws lam tham kuv xwb. Kuv tsis tu siab thiab tsis ntxub nws li. Tabsi qhov kuv ntxub tshaj thiab tu siab tshaj hauv wb txoj kev hlub, yog qhov kawg ntawm wb txoj kev hlub. Vim hais tias Nws nkag siab kuv yuam kev. Wb txoj kev hlub sib hlub tau 8 lub hlis, twb yuav nto ib xyoos. Tabsis ntshe tsuas los li no xwb. ob peb hnub tom qab, nws nqa kuv txoj hlua khi caj dab thaum caij ntuj no ntawv rov qab tuaj rau kuv. kuv cev nws lub kaus mom uas nws muab pub kuv ntoo rov qab rau nws, Nws sawv ntsia kuv ib pliag, Thiab hais rau kuv hais tias, Nws mus lawm. Kuv co taub hau tias aws. Tabsi kuv hais tsis tau ib lo lus rau nws. Kuv tsuas ua lub ntsej muag luag ntxhi rau nws. Thaum nws tsav tsheb mus. Kuv poob kiag kua muag thiab qaug zog tamsim ntawv. Hais rau kuv tus kheej hais tias, "Ntuj os me nraug hmoob, ntshe yuav tsis muaj hnub koj rov tuaj rau thaj chaw ntawm no ib zaug ntxiv li lawm os." kuv quaj tau 6 hnub. Twb xav hais tias yuav ua tau ib siab lawm tiag tiag, Nws tseem rov hu tuaj dua thiab tabsis siv xov tooj txawv, Thiab hais rau kuv tias, "Es koj puas tseem hlub kuv lawm os." Txoj Kev Hlub Yog Txoj Kev Mob siab...Ntiaj teb no kev hlub puas muaj tiag? Es cia kuv muab xaus li no.....mam li maj mam peem lawm tom ntej seb puas muaj ib hnub yuav muaj ib tug hlub yus tiag...thiab seb nrhiav puas tau txoj kev hlub uas muaj tseeb nyob lub ntiaj teb no lawm... xwb..ua tsaug ntau rau www.3haivhmoob.com uas muaj tej qho chaw zoo zoo li no rau ib tsoom phooj ywg kaj siab , nyuaj siab,..thiab zoo siab tuaj sau txoj kev hlub tawm kom peb ho kaj siab mog....Mam ntsib suav daws dua... HKY- Yaj |