Haus Ntshav Tes
|
Tus Sau: Nyiaj Nkaub:
Txwv: Txwv tsis pub leej twg tuaj muab cov dab neeg hauv 3haivhmoob.com no coj mus tso rau lwm lub Vas Sab los yog website ua ntej tau txais kev tso cai los ntawm peb. Warning: No one can copy these stories at: www.3haivhaivhmoob.com to post on your website or any other websites without our permission. Thank you for your cooperation.
Txwv: Txwv tsis pub leej twg tuaj muab cov dab neeg hauv 3haivhmoob.com no coj mus tso rau lwm lub Vas Sab los yog website ua ntej tau txais kev tso cai los ntawm peb. Warning: No one can copy these stories at: www.3haivhaivhmoob.com to post on your website or any other websites without our permission. Thank you for your cooperation.
Nplooj1 Zaj Kev Hlub Haus Ntshav Tes no tshwm sim nyob rau xyoo 1974 - 1975 ntawm lub zos Phav Kheb uas ze ntawm nroog Looj Ceeb teb chaws los tsuas los txog nij hnub no tseem tshwm sim rau tus txiv tsev hu ua Choj no...
Raws li Choj tau piav mas nws tham tau ib tug hluas nkauj npe hu ua Maiv Iab thaj tsam thaum lub teb chaws ua voj ua viag nkawd sib hlub heev li. Nkawd twb yuav sib sau ua neej tab sis mas vim choj tus muam yuav txiv lawm ces nkawv thiaj tseem tos dhau xyoo mam sib yuav no uas teb chaws tawg ces nyias cia li khiav nyias mus lawm Kiag lub sij hawm uas paub hais tias yuav sib ncaim tsis sib tau no nkawm nkauj nraug no nkawd kuj tau mus cog lus haus ntshav tes nyob rau ntawm ib lub pob zeb uas yog nyob rau tim ntug zos. Raws li Choj piav mas nkawd txoj kev cog lus zaum no nkawd tau hais tias: " Wb sib hlub ua luaj no los tsis sib tau hnub no wb yuav tau sib ncaim yog li wb thov cog lus cia rau ntawm koj lub pob zeb no ua pov thawj hais tias yog leej twg xub tuag ces los nyob ntawm lub pob zeb no tos es mam li sib tuav tes ua txij ua nkawm rov mus thawj thiab dua lwm tiam". Thaum nkawd cog lus tag li no Choj kuj mus de tau ib daim nplooj coj los ua lub taus thiab Maiv Iab muab nws rab koob los hno ces nkawd tso nkawd cov ntshav los ua ke rau hauv lub taus nplooj. Nkawd tseem tau muab sib do ua ke ob peb lwm nkawd mam li haus ib leeg ib nrab. Qhov no mas yog raws li Choj piav. Tom qab no lub tej chaws tsis thaj yeeb ces Choj txiv lawm tau tsiv los rau sab Thaib teb thiab tuaj rau teb chaws Mes Kas lawm. Nyob li ntawm Maiv Iab tsev neeg ces kuj tsiv mus rau sab xeev khuam teb lawm vim lawv muaj nyuj twm ntau tej laus tsis kam muab tso pov tseg. Los tau ze 30 tawm lub xyoo no ib tug yeej tsis hnov ib tug moo li lawm, Choj kuj tau mus yuav nws tus poj niam thiab ua ib yim neej kaj siab nyob rau Mes Kas teb. Los txog rau thaum xyoo 2006 no Choj thiab nws tus poj niam thiaj tau rov qab mus saib neej saib tsav nyob rau teb chaws los tsuas, vim niam Choj tseem tshuav ib cov nws thiab viv ncaus nyob rau zos Lav 52. Thaum Choj nkawd mus txog rau Vees Cam, teb chaws los tsuas, thawj hmo nkawd pw rau ntawm ib lub tsev tos qhua , choj txawm ua ib tug npau suav pom Maiv Iab los hais rau Choj tias:" Koj dua twg lawm ua cas ntev tag npaum no kuv nrhiav tsis tau koj li hnub no koj ho los txog ntawm nov"? Hais li no tag nrho ces tus hluas nkauj Maiv Iab no txawm los zaum kiag ntawm ib sab txaj tuav nkaus Choj sab tes uas puab qab txag thaum no ua rau choj nti tsis taus li nws sij chua nws sab tes kom plam thiab qw qw qw....ua rau tus poj niam hnov thiaj tsa choj tiaskoj txiv, koj ua dab tsi es koj sij qw txuj txwv na?. Choj tsim nto plaws los nws thiaj hais rau nws poj niam tias, kuv ua npau suav xwb. Choj poj niam nug tias npau suav li cas na qhia kuv seb, Choj kuj tsis kam qhia thiab hais tias , kaj ntug muaj dab tsi kuv mam piav rau koj, ces nkawv txawm rov pw dua lawm tab sis mas tsaug tsis taus zog li lawm, Choj tau los qhib this vis (TV) saib lawm xwb thiab nws kuj rov qab xav txog maiv iab dua. Nyob rau Choj lub siab nws xav tias , eb ..ua cas lam npau suav pom tus hluas nkauj no los hais li rau kuv ne?. Choj hais tias nws xav txog nkawd tej kev haus ntshav tes ua rau nws nyuaj siab heev nyob rau sij hawm no. Kaj ntug tag kis nkawv tus dab laug tau tuaj tos nkawd mus nram tsev thiab lawv tau mus tom tshav pob nyob rau hnub ntawv, Choj kuj tau mus ntsib nws ib tug phauj uas paub txog Maiv Iab lawv tsev neeg no zoo. Choj thiaj nug txog ntawm tsev neeg no, ces tus phauj qhia rau nws tias. Maiv Iab txiv tag sim neej rau thaum xyoo 1977 lawm, hos Maiv iab mus yuav txiv tab sis tsis muaj hmoo nws kuj tau tag sim neej nyob thaum xyoo 1982 lawm thiab tseg tau ib pab menyuam ntsuag nrog tus txiv nyob xwb. Nij hnub no nws tus txiv tseem tsis tau yuav poj niam li. Thaum hnov cov lus no tag ua rau choj pib txhawj thiab nws yeej tsis qab siab mus ncig saib hmoob pov pob li lawm, tab sis nws kuj tsis qhia nws poj niam tias yog ua li cas . Lawv tsuas pom choj lub ntsej muag puas puas hos tsis hais ib lo lus zoo li nyuaj nyuaj siab xwb. Txij li thaum choj los tsuj daim av nplog uas ua rau Maiv iab taug tau choj tus ntxhiab thiab tus lw lawm, choj txog twg maiv iab yeej txog twg tsuas yog tsis ua rau choj pom kiag nws xwb. Hmo ntawv tsaus ntuj nkawd tus dab laug kuj tau thauj nkawd los pw pem tsev tos qhuas dua, ua cas thaum nkawd los txog chaw pw no pom ib lub ncuav hmoob nyob saum lub rooj. Nkawv twb tsis tau yuav ncuav qhov twg los noj li. Nkawv kuj tsis tau xav li cas thiab, tab sis ua cas choj mus da dej, nws tshawb khaub ncaws hauv nws lub hnab no, pom muaj ib thij txiv tsawb siav siav nyob rau hauv thiab , tsis paub tias yog Maiv Iab ntim su rau Choj los cas li.. Thaum zoo li no lawm choj thiaj hais rau nws poj niam tias wb mus hais pib nyooj hoom tso rov qab mus tsev lau koj niam. Hmo ntawv nkawd kuj tseem pw ib hmo thiab, tab sis mas tus dab Maiv iab no heev kawg nkaus nws muaj peev xwm los muab choj daim pam yaws pov tseg kiag rau qab txag. Choj hais rau nws poj nias tias , koj yaws pam los, tus poj nias tias kuv tsis tau hos es puas yog koj yaws thiab ma, Choj kuj tias nws tsis tau yaws li thiab. |
Nplooj2Thaum no nkawd tsis pw li lawm, kaj ntug thiaj tau mus hais pib nyooj hoom ntxiv nyiaj rau es nkawd rov los tsev sai dua qhov qub. Hmo kawg nkaus yuav los tsev ces nkawv tsis tau luag li lawm, nkawd cia li nqis los nyob ntawm cov rooj zaum tos qhuas tib neeg coob coob lawm xwb, kaj ntug hnub tom qab nkawd tau ya nyooj hoom los rau Mes Kas lawm. Choj kuj xav tias nyaj yuav dim tus dab hluas nkauj Maiv Iab no lawm. Tab sis kuj tsis yog li ntawv, vim choj tau mus ua rau nws pom ces nws tau raws nkawd los rau teb chaws Mes Kas lawm thiab. Thaum Choj nkawd los txog tsev, choj tau mus da dej tom chav dej no, ua cas nws pom ib thooj niag nqaij mas lwj tshaj plaws, kas mas npau xi xwb tsw lwj ntxiag , ua rau choj mas quaj qw quaj qw khiav tawm los, nws poj niam thiaj nug tias ua cas na. Choj thiaj piav raws cov lus rau nws poj niam, nws poj niam mus saib tom chaw da dej no tsis muaj dab tsi li... Choj tau ntshai heev li lawm nws thiaj qhia nws zaj dab neeg kev hlub rau nws poj niam paub txog qhov haus ntshav tes nrog Maiv iab, thiab xav hais tias ntshe nws yeej yuav tuag xwb. Choj poj niam nkawd pib nrhiav neeb los ua quas tus dab maiv iab no, tab sis yim ua neeb tus dab no yim ua phem rau choj, nws muaj peev xwm muab nkawd tej khaub ncaws coj mus tsau dej ntub tag thiab coj lo pov puav nkaus tsev. Muaj ib zaug ib tug txiv neeb tseem tab tom ua ua neeb, nws los ntau ua nws lub tswb neegb tawg nrhe, tus txiv neej ntshai heev thiaj cia li nqa twj neeb khiav mus tsev lawm. Nkawv kuj tau mus thov xib fwb tuaj thov tswv ntuj pab los haj yam ua phem rau choj suav hnub suav hmo, pom ntshav liab vog rau tej tais diav thiab hauv chaw da dej li. Qhov thaum kawg kiag no pab tau ces yog choj nkawd mus ntiav tau ib tug niam poj saub thaib tuaj ua kev cai thov tus dab Maiv Iab no tias kom nws yuav tsum tos choj ntaub noj ntawv haus tas tso vim choj muaj ib pab menyuam me me yog nws coj choj mus lawm cov me nyuam no yuav txom nyem ces yuav yog ib qho kev npam rau Maiv iab. Maiv iab tau tuaj yeem lees hais tias ua li los tau tab sis mas nws nyob ntawm lub pob zeb tos choj ntev hwv lawm, yog li choj yuav tsum tau xa ib tug tib neeg mus ua Maiv iab qhev mas Maiv iab thiaj kam. Tus poj saub hais rau nws tias, ua tsis tau li ntawv , yog choj xa ib tug tib neeg mus ces txhaum ntuj txhaum av, vim choj yuav tau tua tus tib neeg no ces yuav npam saum neej no thiab nruab dab tib si. Thaum kawg tus dab Maiv Iab no thiaj hais tias yog li xa dab tsi los tau tsuav kom nws tau ib tug qhev xwb. Choj thiaj li tau ua ib tug moj zeej nqeeb loj heev hlawv mus ua poj dab Maiv iab qhev ces thiaj tag qhov no. Tab sis nws tau hais tias txawm nws tsis tos choj mus lawm nws yeej yuav nrog nraim choj tsis hais nyob qhov twg vim nws mus tsis taus lawm. Choj kuj tau zoo nyob txij li no los tab sis yog muaj hnub twg nws poj niam cem nws ces yeej ua yog toog pom tus hluas nkauj Maiv Iab no los coj nws mus, ntxias nws , hais lus zoo zoo rau nws kom nws zoo siab txhob chim. Choj piav ntxiv tias muaj ib zaug choj tsav choj lub tsheb mus hauj lwm ces choj txawm mloog ib daim nkauj uas muaj Pov Thoj cov nkauj nyob rau hauv. Thaum choj mloog txog zaj nkauj hu tias:" Nco Qub Hluas Nkauj" Choj txawm xav tias txhob moog tsam lam muaj dab tsi. Choj muab zaj nkauj no nias dhau plaws rau tom ntej, cia li muaj leej twg nias kiag rov los, Choj nias ceev ceev dhau plaws mus li 4- 5 txoj tom ntej , nws cia li muab nias ceev ceev los rau txoj Nco Qub Hluas Nkauj no, Choj ntshai heev thiab npau taws heev nws thiaj muab daim niag nkauj no thau kiag tawm pov tseg kiag rau hauv ko taw. Thaum no zoo li muaj ib tug tib neeg cia li los zaum kiag lub rooj sab tov ua rau choj lub tsheb saj zog. choj ntshai heev nws yeej tsis kam saib daim iav tsheb rau tom qab txhua zaus uas zaum tsav tsheb li, vim rhiab qhov muag heev tsam lam pom tib niag khaub hlab liab khaub hlab ntsuab hos ob sab qhov muag mas ntshav liab ploog nyob tom qab . Txawm li cas los xij nyob rau nij hnub nim no Maiv Iab nyeej nrog nraim choj tsis nrug li. Zaj keeb keem no tag li no xwb tab sis tsis paub tias tom ntej no choj lub neej yuav mus zoo li cas vim tus dab no yeej nrog nraim choj ua ke txhua lub caij. Nco ntsoov koj txoj kev hlub txhob muab saib hlob hlob thaum ib tug tuag lawm yus ho ntshai nws heev. Yog tias koj hlub nws tiag txawm ciaj txawm tuag los txhob ua neeb thaiv nawb...mog.....Cia nws tos es ob leeg mus xwb vim thaum hluas hluas ob leeg twb sib sib hlub... |
Ceeb Toom: Cov dab neeg kev hlub thiab txhua yam hauv www.3haivhmoob.com no peb tsuas yog tso rau sauv daws tau tuaj nyeem laug caij nyoog xwb txwv tsis pub leej twg muab luam mus muag los yog ua lag luam, yog koj coj mus kho los yog ua lwm yam tsis tau qhia rau peb paub , thaum peb tshawb tau lawm koj yuav raug nplua raws txoj cai ntawm lub teb chaw koj nyob ko.
Ua tsaug ntau:
3HaivHmooB.Com
Ua tsaug ntau:
3HaivHmooB.Com