Dab Neeg Keeb Kwm

Legendary Stories
Keeb Kwm Kev Ntseeg uas Tshwm Sim Muaj Tseeb: Nias mus saib hauv qab

Keeb kwm Zos Dab

Lub Zos Kuldhara ntawm teb chaws India yog ib lub zos muaj dab nyob rau nij hnub nim no uas yeej tsis tau muaj neeg rov qab mus nyob li yav tag los lawm. Keeb kwm piav tseg tias tau ntev li 200 tawm xyoo lub zos no muaj tib neeg nyob coob li ntawm 1500 leej tab sis tos nco xwb ces cov neeg no cia li ploj tag tsis paub tias xyov lawv khiav mus nyob rau qhov twg tag lawm los xyov yog lawv tuag tag li lawm. Tsis ntev los no lub koom haum Paranormal Society of Delhi tau tso lawv ib co tub ua hauj lwm li ntawm 12 leeg mus pw thiab caws lawv cov cuab yeej rau qhov txig qhov chaw seb ntes puas tau dab. Thaum tsaus ntuj mas lawv hnov li tib neeg caij tsheb khiav vig voog rau ub rau no. Pom tej tug duab tsis tseeb ua zim zuag mus mus los los txaus ntshai heev tsis tas li xwb tseem muaj leej twg los ntaus lawv nrab qaum tab sis thaum tig mus saib tsis pom dab tsi li. Nws yog ib yam txawv thiab tshwm sim uas muaj tseeb nyob nij hnub nim no vim pej xeem ntshai mus nyob rau lub qub zog no yog li thiaj tsis muaj neeg nyob li.

Xyw Dab Tuag Nyob Qub Zej Qub Zos

Keeb Kwm Txoj 1

Lub Zos Vib Nais Uas Tshwm Sim xyw Dab Yog lub saum Toj No

Tshwm Sim Rau NtawmZos Vib Nais
Nyob rau Hmoob tej qub zej zog uas Hmoob nyob nyob ze li kaum tawm xyoo mus rau 20 tawm xyoo es mam li ho tsiv mus lawm. Kev ploj tuag los muaj coob kev ua dab ua qhua los kuj muaj ntau yam. Tej yam uas zoo li no tshwm sim tom qab cov tib neeg no tsis nyob tag lawm tab sis ho muaj neeg los mus nyob los yog tias los pw thiab dhau kev yuav tau ntsib tej yam uas txawv heev twv tsis tau tias yog dab tsi.

Cov Xyw Dab: Raws li ib tug Thaib muaj npe tias: Pib Xuv Xab Nab no tau piav rau Hmongmeka.com mas nws hais tias thaum Hmoob khiav tag tsis muaj neeg nyob lawm , nom tswv tau faib av rau cov pej xeem thaib ib thaj tsam mus nyob rau hauv. Txhua txhua xyoo uas txog rau lub 12 hli ntuj mas yeej hnov ntaus ib co nruas nrov nphi 2 npha2 thoob zej thoob zos thiab hais ib co lus tsis muaj neeg paub li...Nyob rau yav hmo ntuj dev kuj tom ib tsaug ib tsaug rau ub rau no ua rau sawv daws tsis tau luag nyob li...nws yog ib yam uas txawv tshaj plaws...thiab kuj txaus ntshai kawg. Lub caij uas qaim hli thaj tsam li xiab 15 tej mas muaj qee zaum pom tej tug tib neeg hnav khaub ncaws dawb paug taug kev los uas lawv to taub tias yog dab. Thaum zoo li no lawm lawv thiaj kom hauj sam tuaj xeem ces hauj sam qhia tias..cov uas lub caij 12 hlis hnov nruas nrov thiab suab qw zom zaws no mas yog Hmoob noj 30 Hmoob hu plig es cov dab xyw hu plig tseem nyob. Qhov aub tom tom mas vim tej dab tuag tsis tau noj tsis tau haus sij los nrhiav lawv cov neeg aub thiaj tom...Hauj sam tau kom lawv ua ib lub tsev teev hawm cov dab no ces tom qab no thiaj tsis muaj tej no tshwm sim lawm...tsis hais Hmoob xwb haiv neeg twg los yeej muaj xyw dab ib yam nkaus.....ua li koj ho puas ntseeg tias yeej muaj xyw dab thiab ?

Roob Qau Dab
Keeb Kwm Txoj: 3

Roob Qau Dab yog ib zaj keeb kwm uas peb hmoob tej laus yeej ib txwm paub ib txheej dhau ib txheej los lawm. Txuas ntxiv ntawm no yog keeb kwm hais txog ntawm lub Roob Qau Dab no:
Lub roob Qau Dab no nyob ze rau ntawm looj ceeb sab uas mus rau thab tas nplee, kam looj los yog npoj yais....yog koj mus dhau txoj kev no ces koj yuav tau txua ib rab qau ntoo mus tso rau ntawm pawg Qau los yog lub sam mos txhos no. Muaj ib txhia neeg ces lawv kuj cia li de ib re nplooj tso rau los tau, tab sis tib neeg feem coob yog lawv txua ib tug qau ntoo coj los tso rau ntawm pawg khaub los yog lub sam mos txhos no. Thaum tus neeg txua tau tus qau ntoo coj mus tso rau ntawm pawg khaub no lawv hais rau tias: " Kuv dhau kev los mus es muab yam khoom no rau koj, thov koj nrog pov fwm kuv kom mus noj qab nyob zoo thiab tau lag tau luam raws siab xav yog tias yus mus ua lag luam."Yog hais tias leej twg lam hais lus phem los yog tias ho tsis txua ib tug qau ntoo tso rau ntawm lub sam mos txhos no ces , koj mus kev ib chim xwb yeej cia li mob ceg, los yog mob lwm yam ua rau koj mus tsis taus tsev li lawm. Qhov no thiaj ua rau sawv daws muaj kev ntseeg tias yeej muaj dab tiag, yog li txhua tus hla txoj kev no mus thiaj yuav tsum tau ua raws li hais los saum toj no xwb .
Keeb kwm piav tseg tias lub roob qau dab no mas tim thaum ub muaj ib tug hluas nkauj tsis muaj txiv yuav es nws tau ntim su cab ib tug npua tuaj mus nrhiav txiv yuav. Ces thaum nws mus txog qhov chaw hais ntawv nws tuag lawm, ua ntej nws yuav tuag nws tau foom ib co lus tseg tias " Nws tsis tau muaj txij nkawm dua , yog tus txiv neej twg mus txog thaj chaw ntawv yuav tsum tau txua 2-3 rab qau ntoo ua khoom plig rau nws Yog tias leej twg tsis txua ces thov kom muaj mob rov qab los thov nws."
Muaj qee leej kuj piav tias tus ntxhais uas tuag ntawm lub roob no yog ib tug ntxhais Nplog, niam txiv ua nom es khoo nws heev li tsis muaj ib tug hluas twg tham tau yog li nws tsis tau deev dua txiv neej thaum nws tuaj txog saum no nws yuav tuag nws thiaj foom cov lus no tseg. Nij hnub nim no tib neeg dhau txoj kev no yeej tseem nco ntsoov txua ib rab qau ntoo rau yog li tej laus thiaj muab lub roob no hu ua Roob Qau Dab.

Vim Li Cas Koj Ho Hnov Suab Quaj Nyiav Thaum Koj Hla Roob Toj Ntxas?

Keeb Kwm Txoj #6

Kev hla roob hla hav los yog thaum koj taug kev mus dhau tej roob toj ntxas uas muaj neeg tuag coj mus faus tau ntau xyoo los yog ntau tiam neeg los lawm es koj sij hnov tib neeg quaj nyiav nyiav tab sis thaum koj ho mus txog es tsis pom dab tsi li...tej yam zoo li no mas nws yog ib qho txias siab heev li...
Qhov tseeb ntawm tej yam tshwm sim zoo li no mas tsis yog dab tuag los yog tias yog xyw tuag tab sis tus txiv ntxawm Tswv Lis tau piav tias. " Tib neeg yug los rau lub ntiaj teb no yeej muaj ntau tus plig tab sis muaj ob tug plig uas tseem ceeb tshaj plaws rau tib neeg lub cev thaum tus tib neeg no tuag lawm. Tus plig 1 ces thaum tus tib neeg tuag kiag ces nws yeej tau mus tsis rov los li lawm, tab sis nws tsuas yog mus kawm txuj kawm ci rau saum ub xwb tsis tau mus thawj thiab tseem tos tus ntsuj plig 2 mus txog mas nkawv mam ua ke rov mus thawj thiab dua.
Tus ntsuj plig 2 , yog tus uas nrog lub cev nyob tom qab..tus 2 no mas tus tib neeg tuag lawm los nws yeej tseem mus nyob rau ntawm qhov ntxa zov lub cev, thaum lwj tag ua av lawm mas nws thiaj tau rov qab mus nrog tus ntsuj plig1 nyob nkawv mam ua ke mus thawj thiab."
Lub sij hwm koj mus dhau kev hla tej toj ntxas koj sij hnov quaj quaj mas vim yog tus ntsuj plig uas tseem nrog lub cev nyob ntawv muab cov pob txha coj los sib tib sawv rov qab ua tus tib neeg kom ciaj sia rov tuaj es kom tus ntsuj plig 1 rov los nrog nws nyob, tab sis mas thaum nws muab sib teeb tsa tau zoo zoo ces cov pob txha cia li vau poob tag sawv tsis tau ua neeg lawm nws tu siab heev nws thiaj li quaj.. Nyob rau lub sij hawm koj dhau kev koj thiaj hnov quaj quaj nyiav nyiav mas nws yog li no xwb tsis yog muaj dab ..tab sis yog tus ntsuj plig ntawm tus tib neeg tuag ntawv quaj xwb... Cov lus no piav qhia rau suav daws kom nej dhau kev hnov suab quaj suab nyiav los ho txhob ntshai vim tsis yog muaj dab

Keeb Kwm Pob Zeb Tsov

Keeb Kwm Txoj 2

Lub Pob Zeb Tsov Raws Zaj Keeb Kwm

Lub Pob Zeb Tsov no nws nyob rau ntawm Qaum Pas Dej Tauv los yog nyob rau Txoj Kev Mus Na Xu Thiab Looj Ceeb hauv teb chaws Nplog. Keeb kwm piav qhia txog yav tag los nws muaj ntau txoj dab neeg hais txog lub pob zeb no tab sis qhov uas tib neeg hnov hnov mas nws qhia tias:
Keeb kwm tom qab ntuj tsim teb raug twb muaj ib neeg lawm, nyob rau ntawm lub zos no muaj ib co tib neeg los nyob thiab kuj muaj ib tug txiv neej Hmoob ( ib txhia mas tias yog ib tug yawg Nplog) nws txawj cov khawv koob uas fiab ib lub pob tawb coj los khwb tau hau ces yus cia li mus ua tsov tom nyuj tom twm los yog tom zej zog tej npau lawm.
Tus yawg Hmoob no nws tso nws cov dab khawv koob tsov no mus noj zej zog tej tub ki uas yug tshiab. Cov dab no mas noj thawj tug me nyuam tub uas niam thiab txiv yug los xwb..yog li tib neeg ntshai heev, tom qab no mas yog koj yug tau koj tus me nyuam yog me nyuam tub los yeej dag tias yog tus ntxhais thiab muab khaub ncaws poj niam rau hnav xwb, ua ua li no ces nws nrhiav tsis tau me nyuam tub rau nws cov dab tsov khawv koob noj lawm, yog li nws thiaj tau mus yuav ib tug niam yau coj los yug me nyuam rau nws cov dab noj, vim cov khawv koob no yuav leej mas yuav tsum yog tau noj ib co tib neeg hauv tsev thiab.
Thaum nws tus niam yau no yug tau thawj tug me nyuam ua cas yog tus ntxhais, ces cov dab khawv koob tsov tsis noj..nws chim heev thiaj muab tus niam yau no nrauj xa rau neej tsa lawm...tab sis lub caij ntawv tus niam yau lub cev twb xeeb ib tug tub uas tus yawg Hmoob no tsis paub. Tom qab mus yug tau tus me nyuam no ces tus yawg Hmoob no mam paub tias nws tus niam yau tus me nyuam ob no yog tus tub. Muaj ib hnub tus niam yau no tau ev nws tus me nyuam tuaj mus ua teb ces tus txiv yawg Hmoob no thiaj txia ua tus txiv tsov loj heev nyob tom kev tos..thaum tus niam no tuaj txog ntawm kev uas tam sim no yog lub pob zeb tsov, tus txiv tsov Hmoob no dhia los tom ob niam tub tab sis tus niam tau hu ntuj thov kom pab ces lub sij hawm ntawv tswv ntuj thiaj nkaug kiag ib tug hmuv saum ntuj los ntsia nkaus tus txiv tsov no nrab qaum ua rau nws tuag kiag tam sim ntawv thiab nws lub cev cia li khov ua pob zeb kiag raws li peb pom daim duab no. Nij hnub no sawv daws taug txoj kev no los yeej tseem pom.
Teeb meem tsis yog tas li no xwb..txawm nws tuag ua pob zeb lawm los nws yeej tseem heev kawg nkaus yog tias leej twg dhau kev hla ntawm nws taub hau los yog lub qhov ncauj dhau txoj kev no mus ces nws yeej ua rau tus tib neeg no mob mob txog qhov uas kho tsis tau es tuag mus lawm xwb..yog li tom qab no cov nom tswv thaj tsam ntawm no thiaj tau kom hauj sam tuaj xeem seb yuav ua cas thiaj li thaiv tau qhov teeb meem no..Thaum hauj sam xeem tag, qhia tau tias lub pob zeb tsov no yuav noj yuav hau, yog tau noj tau haus ces yuav tsis ua teeb meem rau tib neeg lawm yog li lawv thiaj tau ua lub tsev teev hawm me me ntawm ib sab uas nej pom no , zoo caij nyoog lawv nqa dej cawv thiab mov mus tso rau hauv rau tus dab tsov no noj, nim no tib neeg thiaj tsis muaj mob lawm

Zaj Vij Hnub Thiab Zaj Vij Hli

Keeb Kwm Txoj 4

Peb Hmoob txoj kev ntseeg tej laus ib txwm coj noj coj ua los lawm tau ntau tiam los yog ntau pua xyoo ntawm peb tsev neeg Hmoob tej laus txoj kev ntseeg. Nyob nyob yog tias koj saib rau saum ntuj koj pom muaj zaj Vij Hnub (Ua ib lub Voj Voog zoo li tus zaj Kauv lub hnub) los yog tshwm sim zoo tib yam nkaus li no rau lub hli thaum yav tsaus ntuj es koj pom, qhov no ntaus nqi tau tias nyob rau lub sij hawm ntawv nws tau muaj ib tug tib neeg laus, los yog ib tug laus uas tseem ceeb tau tag sim neej lawm, yog li thiaj muaj qhov kev tshwm sim zoo li no rau lub hnub los yog lub hli. Li piav tag los saum no yog ib qho kev ntseeg uas feem ntau yeej tshwm sim muaj tseeb rau haiv neeg Hmoob, tab sis kev ntseeg ntawm lwm haiv neeg tej zaum nyias yuav txawv nyias tsis sib thooj.

Pob Zeb Pog & Pob Zeb Yawg

Keeb Kwm Txoj: 5

Lub pob zeb pog no nws txawm ua tus poj niam li chaw mos hos lub pob zeb yawg txawm ua txiv neej li chaw mos. Ob lub pob zeb no nyob rau ntawm lub xeev Xub Laj Thas nis teb chaws Thaib sab qab teb. Raws li tej dab neeg ib txwm hais ntau tiam neeg los mas lawv piav tias: " Tom qab ntuj tsim teb raug txawm muaj lub ntiaj teb no muaj ob lub zej zog nyob ua ke ces nkawm niam txiv uas tam sim no nkawv tau tshwm sim khov mus ua pob zeb no tau mus cog lus rau lub zos sab tim ub tias nkawv yuav coj nkawv tus tub mus yuav ob niam txiv lub zos sab dej tim ub tus ntxhais, lawv tau sib cog lus cia li ntawv. Txog lub caij hli xiab nkawv tau npaj nyiaj txiag thiab qaib npau coj mus ua tshoob. Lub sij hawm no lawv caij nkoj tuaj mus txog ib nrab dej los nag loj , cua daj cua dub tau nplaum ua rau tej mej koob thiab nkawv tus tub , phij laj niam tais ntsuab poob dej tuag tag lawm. Nkawv ntshai tias tsam ob niam txiv sab ntug dej lub zos tim ub xav tias nkawv lom txwm tsis tuaj mus ua tshoob li tej lus cog tseg xwb, yog li nkawv thiaj tau thov lub ntuj thiab daim av tias yog nkawv tuag lawm no kom muab nkawv ob lub cev mus tshwm sim ua ib yam dab tsi rau neeg ntiaj teb tau pom. Tom qab nkawv tuag tag , ob lub cev thiaj tshwm sim khov ua pob zeb raws li ob daim duab peb pom saum no.

Ab Roj Hmab Dab
Keeb Kwm Txoj # 7

Zaj Keeb Kwm no tshwm Sim nyob rau Teb Chaw : Yiv Pooj -Japan. Tus menyuam roj hmab no nyob rau ntawm tsev teev hawm: Mas Nes - lub xeev Hauv Kais Daus. Tus me nyuam ntxhais uas yog tus tswv ntawm tus me ab roj hmab no npe hu ua: Khib Khub Kaub. Khib Khub Kaub hlub thiab nyiam tus ab roj Hmab no heev txhua hnub nws muab mov thiab dej rau tus me ab roj hmab no noj thiab haus, hmoov tsis muaj nws tau ib tug mob thiab nws kuj tau tuag mus lawm. Khib Khub Kaub niam thiab txiv lawv yuav muab tus ab roj hmab no tso rau hauv nws lub hleb faus nrog nws tab sis mas thaum faus ho tsis nco nqa mus tom qhov ntxa yog li lawv thiaj nqa tus ab roj hmab no mus tso rau ntawm nws lub ntxa. Txhua xyoo lawv nqa paj mus hawm no ua cas saib pom tus me nyuam ab roj hmab no cov plaub hau txawj ntev tuaj, xyoo no muab txiav tag lawm los lwm xyoo yeej rov ntev tuaj dua li.. xyoo 1938 nws niam nws txiv tau tsiv mus nyob rau lub xeev Xus Xus Kis lawm thiaj tau muab tus ab roj hmab no mus tso rau tsev teev hawm Mas Nes ua tus saib xyuas txuas ntxiv.
Nij hnub no cov hauj sam uas nyob rau lub tsev teev hawm no piav tias ib xyoo puag ncig lawv yeej muab tus ab roj hmab no txiav plaub hau ib zaug thiab tom qab no saib mas zoo li nws lub qhov ncauj txawj rua thiab luag luag rau suav daws. Koj puas tau luag yuav ab roj hmab los tso hauv tsev thiab? Nov yog ib qhov kev tshwm sim muaj tiag rau nij hnub nim no

Keeb Kwm Zaj Thiab Tib Neeg Txoj #8

Keeb Kwm Txog Zaj & Tej Yam Tshwm sim Muaj Tseeb
Zaj yog ib hom nab loj uas raws li tib neeg lub qho muag tau pom thiab txoj kev ntseeg uas yog hom tsiaj muaj hwj huaj. Zaj muaj peev xwm muab tau neeg, ua tau toj pob pes nphau los yog toov dej. Raws li kev ntseeg nyob rau sab Thaib teb thiab Nplog teb mas nyob rau ntawm lub nroog Phoo Mib Xaim Xeev Noom Qhais sab Thaib teb thiab ncaj ncaj rau ntawm lub nroog Paj Xas sab nplog teb, hauv tus niam dej Naj Khoom no mas muaj ib lub qhov zaj loj los yog ib lub nrog Zaj nyob rau sab hauv nruab tiv hauv. Ib xyoos mas zaj yeej ua kev lom zem koob tsheej tua hluav taws liab hluav taws ntsuab tawm tuaj rau tib neeg pom rau tus niam dej Naj Khoom pib txij li qhov piav tas los no mus txog rau ntawm Xim Xias Maij
Tau muaj ib Zaj dab neeg keeb kwm uas zaj coj ib tug ntxhais Thaib nqis mus rau hauv zaj teb nyob rau ntawm lub nroog Phoo Mib Xaim li piav tas los saum no.
Muaj ib hnub ib tug txhais nyob rau lub zos Phoo Mib Xaim no tau nqa ib lub raj dej mus nqa dej ntawm lub qhov dej uas niam txhiab txiv khawb nyob rau ntawm ntug dej naj khoom nyob rau lub caij ntuj so. Tus me ntxhais no mus ntev heev tsis pom los niam txhiab txiv thiaj lawv qab mus saib no ua cas tsis pom nws lawm tab sis pom lub raj dej nyob ntawm lub qhov dej xwb. Cov neeg zej zog yeej tuaj nrog nkawv nrhiav tau ntau hnub tsis pom yog li niam thiab txiv thiaj tau ua ib lub ntees tso plig rau nws. Tus ntxhais no nws ploj mus tau 7 hnub kiag lawm, thaum lawv tab tom ua dab ua qhua tso plig rau nws ntawv tos nco ua cas tus ntxhais no cia li tawm plaws los, tej neeg tuaj hauv lub ntees dab ntees qhuas no mas ntshai tag li tus khiav li cas los kuj muaj, tab sis ib pliag nws thiaj tau hais kom lawv txhob khiav nws mam li piav rau lawv mloog tias yog ua li cas rau nws lawm tiag.
Nws tau piav tias hnub ntawv mas tshav kub heev li nws tau mus nqa dej thaum mus txog ntawm qhov dej ua cas nws pom ib tug npua los ze ze nws sij muab ib sab tes tib tsa tib tsa zoo li yuav kom nws mus tov, thaum nws mus txog no cas tus npua no txawj hais lus thiab hais rau nws tias kom nws qi muag tus npua no yuav coj nws mus saib npua niam thiab npua txiv....Nws qi muag tib nplig cas tus npua kom nws rua muag , thaum rua muag no cas yog ib tug tub hluas xwb. Nws pom muaj vaj tse zoo ib yam nkaus li saum neej no tib neeg mas mus mus los los, kuj muaj tsheb khiav zom zaws thiab. Nws pom cov neeg nyob rau hauv lub zos no mas muab ib txoj ntaub liab coj los pav rau saum lawv taub hau quav nkhaus zoo li lub taub hau nab. Thaum nws nrog tus hluas no mus teg kev , kuj muaj neeg nug tias koj coj tus neeg nos los dab tsi? Tus hluas ntawv teb tias kuv coj tuaj ncig peb lub zos xwb. Tus ntxhais Thiab no piav tias , nws nug tus tub hluas no tias qhov no yog qhov twg? Tus tub hluas no teb tias ntawm no yog lawv lub zos Pas Zaj uas nyob rau Zaj teb.
Thaum nkawv ncig txaus tus hluas no thiaj xa tus rov los, nkawv taug ib txoj kev los deb kawg tab sis thaum los yuav txog tus hluas no kom nws qi muag thiab tos nws nco ces nws twb rov los nyob rau ntawm sab ntug pas dej lawm xwb....txawm li cas los xij, tus ntxhais Thaib no nws los nrog niam thiab txiv nyob tau 7 hnub ntxiv xwb cia li mob heev heev thiab tuag mus lawm....Cov neeg zej zog ntseeg tau tias yog tus tub hluas zaj ntawv tau rov los tos mus ua poj niam lawm...Tsis hais hmoob los Thaib nplog suav daws yeej ntseeg tias muaj zaj tiag

Qaib Tsis TXaus Siab Txoj#9

Keeb Kwm Hnub Vas Lees Thais - Valentine's Day Txoj # 10

Kev tua tsiaj ntau heev yog ib qho kev khaum txhaum txim rau ntawm tus tib neeg uas tua ntawd. Zaj Keeb kwm no tshwm sim rau ib tug txiv neej Hmoob laus kwv yees li ntawm 60 xyoo lawm. Thaum no yog lub xyoo 1990 nyob rau lub zos xoom Vib Nais Thaib teb. Tus txiv neej Hmoob no nws kev nrhiav noj yog mus yuav qaib los tua coj mus muag rau ntawm khw los yog taj laj..thaum nws ua luam tau li 4-5 lub xyoo thiab tua cov qaib txog li pua pua phav phav tus lawm xwb, ces nws txawm muaj mob tej tes tej taw tej caij dab. Muaj ib hmo nws pw ces pom muaj ib tug tub txib ris ib rab ntaj los tos nws mus rau saum ub. Thaum nws mus txog rau sauv ua cas yog ib lub tsev txim. Tus neeg txiav plaub tab tom hais rooj plaub no vim cov qaib uas nws tua ntawv coob dhau lawm ces qaib tsis txaus siab rau nws tias ua cas tsis yog tua noj xwb hos , nws muab lawv tua mus muag. Raws li tus txiv neej no piav mas nws hais tias nws yeej tsis lees tias nws tua cov qab li, ces thaum no tus txiav plaub tib yoj teg tawm plaws ib qho zoo li lub this vis (TV) tuaj, nws saib kiag mas cov qaib coob heev muab ib txoj hlua xov paj coj los khi lawv cov daj dab sib ntxuas zws ua ib kab sab ntev li peb roob peb ha cov qaib tseem tsis tau kawg rau puag tim ub lawm, thaum no nws thiaj tau lees tias nws tua cov qaib no muag lawm tiag. Muaj ib tug qaib tau thov kom tus txiav plaub muab nws txiav caj dab ib yam li nws txiav cov qaib thiab no ces nws thov thov thov tias yuav nyiaj ntau npaum cas los nws mam los them lawv cov nqi taub haus. Thaum no tus txiav plaub thiaj kom nws rov los es los qhia tib neeg ntiaj teb txhob muab lwm tus txoj sia mus tua muag lawm, yog tua noj ces tsis txhaum. Tus txiav plaub zam txim rau nws them qaib cov nqi taub hau xwb vim yuav kom nws los qhia tib neeg txog cov keeb kwm no. Thaum nws tsim los mas nws ntshai heev txij hnub ntawv ces nws tsis tua ib tug tsiaj ntxiv li lawm. Nws tau hlawv xyab ntawv ntau heev txhua xyoo xa mus them rau cov qaib no, raws li piav rau Hmongmeka.com mloog, yog li thiaj muab tso ua keeb kwm kom suav daws tua noj xwb txhob muab lwm tus txoj sia tua mus muag ua luam lawm, tsam koj tus kheej raug teeb meem li tus txiv neej hmoob no.

Hnub Kev Hlub Vas Lees Thais (Valentine's Day) twb los yuav txog tiag, yog li peb mus taug txog Keeb Kwm seb yog li cas? Muaj qeej leej yeej paub keeb kwm ntawm Hnub Kev Sib Hlub Vas Lees Thais lawm, tab sis qeej leej tsis tau paub tias vim li cas ho hu ua Hnub Vas Lees Thais ? Thiab nws muaj nuj nqis li cas?
Nyob rau tiam Fuab Tais Laus Mas (The Roman Empire) tau muaj tsov rog loj sib ntaus sib tua, tej nom tswv txwv tsis pub tub ntxhais hluas sib yuav, vim cov muaj cuab yig tsis kam mus tiv thaiv lub teb chaws, tab sis muaj ib tug xib fwb teev ntuj npe hu ua Xee Vas Lees Thais (Saint Valentine) no tau yuam nom tswv txoj cai. Xee Vas Lees Thais tau pab ua kev cai tshoob kos sib yuav rau tej tub ntxhais kom muaj txij nkawm, vim nws ntseeg tias kev hlub yog ib qhov loj heev ntawm tib neeg lub neej. Qhov no tau hla nom tswv txoj cai lawm, yog li nws thiaj tau raug tub ceev xwm ntes coj mus kaw nyob rau tsev txim. Qhov no tshwm sim nyob rau kwv yees li tom qab Fuab Tais Yes Xus tag sim neej li xyoo 270.
Tom qab raug kaw hauv tsev txim nws tau ntsib tus thawj coj tsev txim ib tug ntxhais uas qhov muag tsis pom kev thiab tau qaug txoj kev hlub nrog tus ntxhais no. Vim txoj kev hlub rau leej tib neeg, nws tau thov tswv ntuj thiab kuj ua rau tus ntxhais no qhov muag pom kev rov tuaj. Nws yeej tseem nthuav tawm txoj kev hlub rau tib neeg yam tsis tu ncua li txawm nom tswv yuav txwv npaum cas los xij. Qhov xwm txheej no tau paug mus txog nom tswv pob ntseg yog li tsoom nom tswv npau taws heev thiaj tau tawm lus coj nws mus txiav caj dab pov tseg.
Ua ntej hmo uas nws yuav tau raug coj mus txiav caj dab pov tseg ntawv nws tau sau ib tsab ntawv mus rau tus ntxhais qhov muag tsis pom kev uas nws hlub ntawv hais tias:" From Your Valentine." - "Tsab ntawv sau los ntawm koj tus Vas Lees Thais." ,nyob rau hnub tim 14 Lub 2 hlis Xyoo 270. Xee Vas Lees Thais tau raug txiav caj dab thiab nws lub cev tau coj mus faus rau ntawm toj ntxas Fes Mis Nias Ves.
Vim txoj kev hlub uas muaj nqi ntawm xib fwb Xees Vas Lees Thais rau nws tus hlub ua ntej tag txoj sia thiab rau ib tsoom tib neeg, hnub no thiaj yog ib hnub uas nco txog Xee Vas Lees Thais txoj kev hlub. Nij hnub nim no tib neeg thoob qab ntuj thiaj muab los ua hnub kev sib hlub, tsis hais yog hlub niam hlub txiv , hlub tus neeg koj hlub, los yog hlub tej me tub me nyuam thiab hlub lwm tus tib neeg