Ob txiv tub tuag ib lub qhov dej yog ib yam tshwm sim txawv kawg nkaus rau ib tsoom Hmoob uas pom thawj zaug nyob rau ntawm lub Zos Vaj Loog Tsuas Thab Kab Npauj. Thaum xyoo 2004 uas yog lub sij hawm Mes Kas tuaj ua npe rau cov neeg nyob lub zos no tuaj mus nyob rau teb chaws Mes Kas muaj ob txiv tub tau tuag rau ib lub qhov dej. Qhov teeb meem no tshwm sim vim yog ntawm nkawv ob txiv tub no lub tsev nkawv khawb tau ib lub qhov dej haus tab sis lub caij ntuj so dej tsawg heev lawm txawm muaj ib co nplooj qhua poob ntau ntau rau hauv qhov dej, tus txiv tau tuam ntaiv nqis mus yawm cov nplooj qhua tawm los, tab sis thaum nws nqis mus txog rau hauv ces nws cia li vau hlo rau hauv qab thu dej qw tau ib suab tias kom pab nws no ces tus tub nyob rau saum tug qhov dej no nqis kiag mus pab nws tab sis thaum tus tub nqis mus txog rau hauv ces nws cia li poob kiag nrog nws txiv lawm thiab xwb..yog li tshuav ib tug tub Hmoob nyob rau ib sab ntawv pom tias nkawv ob txiv tub tau poob rau hauv lawm..nws thiaj tau qw kom cov neeg nyob ze tuaj pab..tab sis thaum tib neeg tuaj txog lawv kuj tsis tau luag nqis mus pab lawm. Ntev li 20 feeb tom qab lawv tau hu rau cov tub rog Thaib uas nyob lub zos no tau tuaj muab nkawv, ... lawv nqis mus lawv yeej ua tsis taus pa li..yog li ntawv lawv thiaj tau tso kiv cua tshuab cua rau hauv lub qhov dej lawv mam li mus muab tau nkawv ob txiv tub ces nkawv yeej tuag tag ib tsim lawm. Yam uas tshwm sim txawv tshaj plaws thaum nkawv poob lub qhov dej no tuag ces yog..muaj ib tug Hmoob tab tom cuag dej nyob tsis deb ntawm ob tug neeg tuag no lub tsev..cia li pom cov dej uas nws cug cug ntawv daj rhuv nro heev uas yeej haus tsis tau li tawm los rau hauv nws cov thoob dej thiab cia li los nag tshav ntuj tuam tsam loj heev li...thaum zoo li no ces nws hnov tib neeg qw zom zaws tias muaj ob txiv tub poob qhov dej tuag lawm no. Tej yam zoo li no Hmoob xav tias yog zaj muab nkawv lawm yog li thiaj los nag tshav ntuj thiab thiaj li pom cov dej cia li nro daj rhuv sij hawm uas nkawv poob rau hauv qhov dej.. Nrog tsev neeg no tu siab uas ib zaug cia li tuag ob tug neeg ua ke kiag. Tom ntej tom qab lawv yeej tsis npau suav phem los yog pom tej yam dab tsi txawv li tsuas yog thaum nkawv poob qhov dej lawm es tshwm sim ob yam piav tag los no xwb. Ua tsaug ntau uas vas sab www.3haivhmoob.com muab qhov chaw no rau peb tuaj piav keeb kwm khaws tseg, mam ntsib nej suav daws dua. Tsu sau: Hmoob nyob zos Vaj Loog Tsua.
Koj ntseeg tau tim puas yog zaj muag los yog tim li cas rau zaj keeb kwm no pab sau rau nram no.