Caum Koj Txog Mes Kas Los Tsis Tau KOj

Tus Sau : Khu Lis  : Email: tsabntawvhlub@hotmail.com
Txwv Tsis pub leej twg lam tuaj muab copy los yog coj mus tso rau lwm lub website uas tsis tau kev tso  cai los ntawm peb
Warning: No one can copy these stories at : 3haivhmoob.com to post on your own website without our permission. Thank you.

Nplooj1

  Nws yog xyoo 1985 -1987 nyob rau lub zos tawg rog Xoom Vib Nais uas kuv tus hlub tau muaj npe tuaj mus rau teb chaws Mes Kas lawm. Nws tso tau txoj kev nco lwj siab rau kuv ib leeg nyob tsis pom qab yuav ua dab tsi zoo yam ib tug neeg ntsuag nos..
    Thaum nyob ua ke wb ob leeg nij hmo mus ywg zaub lub caij yuav  tsaus ntuj​. Thaum tsis kawm ntawv wb ob leeg kuj mus nce roob ua si nyob rau roob kaum npaj, koj pw kuv xub ntiag kuv pw koj xub ntiag yam kaj siab lug ...tab sis nyob tau tsis ntev txoj kev kaj siab no kuj tig los ua txoj kev kho siab lwj siab yam uas tsis muaj yam dab tsi yuav los hloov tau vim Nkauj ntxhee thiab tsev neeg tau muaj npe tuaj mus rau teb chaws Mes Kas lawm..
     Hnub tim 15/06/1987 los txog nkauj ntxhee lawv tau muaj npe tuaj mus mes kas . Hmo ua ntej ntawd wb  ob leeg tsuas yog zaum sib puag quaj thiab cog lus tias yuav ntev npaum cas tsawg niaj tsawg xyoo los wb yuav sib tos kom tau. Txawm lub ntiaj nteb no yuav tawg ua hmoov hloov mus ua dej lawm los wb txoj kev hlub yuav nyob ruaj  li qub tsis hloov mus. Kaj ntug tag kis nkauj ntxhee lawv tuaj mus nce tsheb rau tom tshav npas...Nkauj ntxhee nyob saum tsheb kuv nyob hauv av..wb ob sab tes tuav yeej tsis tso li...txog kiag thaum lub tsheb npav khiav tawm lawm wb ob sab tes thiaj li plam...
       Thaum lub tsheb khiav dhau lawm..kuv qi muag pom nkauj ntxhee lub ntsej muag tseem nyob..thaum kuv rua muag​​​ pom tej ntawv khob noom thiab hnab yas nrog pa av ya zom zaws  tsis muaj ib tug neeg li lawm kuv thiaj tau rov los tsev...los nyob tau 10 tawm hnub nco nkauj ntxhee dhau txoj sia yuav tu tiag thiaj tau rov mus saib lawv lub tsev..ntawd xoom 2, nphob xuav tseem tsis tau muaj neeg los nyob, nkauj ntxhee lawv lub vaj ntawm qab tsib taug tsis muaj neeg ywg dej tau tej txuj lom tuag zom zaws...zoo yam li tej txuj lom no nim nrog lawv mus rau mes kas lawm thiab....
       Nkauj ntxhee mus tau ib hlis nws thiaj sau thawj tsab ntawv los rau kuv tias: 
​Xoom Phab Nab Nib Khoo  hnub tim 12 /7/ 1987​​

     " Nyob zoo leej nus Khu​,
         Kuv ncaim koj tuaj lawm koj nyob li cas lawm xwb? Koj pus tseem nco txog wb tej qub chaw nyob..koj puas tseem nco txog wb tej lus zoo lus qab zib ntuj teb tag hmo neeg pw tag lawm los tseem tshuav wb nyob..? ​​ Ua li koj puas nco kuv li kuv nco koj..Koj puas hlub kuv li kuv hlub koj thiab...Qhia rau koj tias kuv nco nco koj os nawb...txhua hmo pw tsis tsaug zog tseem sij ua yog toog npau suav pom koj thaum qi lub qhov muag....ntshe koj twb mus muaj tus tshiab tsis nco txog kuv lawm...Tsis ntev no ces ntshe peb yuav muaj npe mus rau mes kas lawm. Ntshe yuav ncaim koj thiab lub teb chaws Thaib mus. Txawm li cas los kuv mam nyob tos koj es txhob ua siab dub nawb mog..Kuv nij hnub kawm ntawv thiab tsis khoom kiag muaj caij mam rov sau ntawd los saib koj nawb mog."
                      Sau npe: Nkauj Ntxhee....
Thaum kuv nyeem nkauj ntxhee tsab ntawv tag ua rau kuv lub kua muag poob​ ntws cuag dej tawm los tsis muaj dab tsi yuav los cheem tau kuv txoj kev kuv nco txog nws li lawm...nyob rau hnub ntawd nws yog ib hnub kuv kho siab thiab nco nkauj ntxhee tshaj plaws hauv lub neej..
             Kuv tawm mus ncig saib wb tej kev ua si yad tag los tsuas pom toj roob iab oo pos oov niab...tsis muaj tus neeg uas kuv ib txwm hlub nrog kuv li yad tag los li lawm...yim xav lub kua muag yim poob....kuv zoo yam li tus neeg ntsuag nos...thaum zoo li no kuv pib yoo mov thiab tsis hnov tshaib plab li vim txoj kev nco txog nws xwb.. txawm li cas los xij thaum kawg kuv niam kuv txiv nkawd kuj tso cai kuv tuaj mus rau mes kas ...kuv thiaj ua npe tuaj mus caum Nkauj Ntxhee tab sis thaum kuv tuaj xog rau Xoom Phab Nab Nib Khoom nws kuj tuaj dhau rau mes kas lawm thiab.
     Txog rau thaum xyoo 1989 lub ob hlis ntuj kuv kuj tuaj txog rau teb chaws Mes kas ntawm lub Lav Viv Khos Xees (Wisconsin) hos Nkauj Ntxhee lawv tuaj mus nyob rau lub Lav Mis nis xaus tas ntawm lub nroog Xee Phau.​  Lub caij kuv tuaj txog tsis ntev wb tau teem caij sib ntsib nyob rau Zos Xee Phau thaum lub caij ntuj so yog lub 5 hlis ntuj xyoo 1990.  Kuv tus phooj ywg thauj kuv mus hos nws tus niam laus thauj nws tuaj...
      Peb mus sib ntsib nyob rau ib lub vaj paj uas yog mes kas hu ua lub phaj (Park). Hnub wb sib ntsib no Nkauj Ntxhee hnav lub tsho liab dawb lias ho kuv hnav lub tsho txaij dawb daj...Wb txoj kev sib ntsib zaum no zoo nkaus li ib zaj muv vim yeeb yaj kiab es tus phaj ej thiab tus nas ej khiav los mus sib puag.  Kuv mloog mas Nkauj Ntxhee tus me ntxhiab thiab nws tus pa tseem tsw qab thiab yog tus qub...kuv puag nws ruaj ruaj rau kuv lub xub ntiag hos nws puag kuv ruaj rau rau nws ob sab caj npab thiab..  

Nplooj2

        Rov los xaus thaum kawg wb ob lub qhov ncauj sib npuav ruaj ruaj tsis plam kiag ntev kwv yees li ntawm 15 feeb ( kaum tsib nas thi) wb mam sib tso... Kuv pom Nkauj Ntxhee ob lub kua muag ntws poob cuag dej tawm los thiab nws hais rau kuv tias", Leej nus Khu, kuv nco koj tshaj plaws li xav tias ntshe yuav tsis tau ntsib koj lawm".Kuv kuj hais rau nws tias...hiav txwv quas xwb ces wb yeej sib cuag yog av luaj quas ces wb thiaj tag xwb mog...txhob quaj kuv twb tuaj txog lawm...
           Lub sij hawm khiav mus ceev heev , lub hnub twb yuav poob tim npoo ntuj txog lub caij Nkauj Ntxhee nkawd rov mus tsev hos wb rov mus rau Viv Khos Xees (Wisconsin) lawm thiab. Ua ntej yuav mus kuv hais rau Nkauj Ntxhee tias:" Kuv thov cog lus rau koj tias txawm yuav ntev npaum twg? nyob rau rooj teb twg? Los kuv yuav yuav kom  tau koj xwb...tsis hais tiam no lwm tiam tsawg tiam koj yuav yog kuv ib leeg tug tsis muaj hnub ncaim, es dhau caij ntuj sov no kuv mam tuaj tos koj mus nrog kuv nyob nawb mog.."Nkauj Ntxhee kuj teb kuv tias ua li ntawd, thiab nyob rau hnub koj tuaj tos kuv mus nrog koj nyob , kuv muaj ib co lus zoo zoo yuav hais rau koj". Kuv hais rau nws tias kuv tos mloog koj cov lus zoo nyob rau hnub ntawd...tom qab hais cov lus no tag ces peb nyias mus nyias lawm...    
Hnub Sib Ncaim Kuj tau los Txog​   ​
       ​​ 
   Kuv rov los tsev tau ob hnub tom qab thiab hu xov tooj nrog Nkauj Ntxhee tham no, nws tus niam laus los teb kuv thiab tau qhia rau kuv tias Nkauj Ntxhee nrog  nws tus nus lawv mus nuv ntses  cua hlob heev ua rau lub nkoj nchuav thiab Nkauj Ntxhee tau ploj lawm lawv tseem nrhiav tsis tau nws lub cev li..tsev neeg tab tom nyuaj siab kawg nkaus...Thaum kuv hnov li no ua rau kuv ib ce tuag tag thiab thov lub ntuj tias kom tej lus no dag xwb tsis muaj tseeb no los tus niam laus tias  yeej muaj tseeb tiag tiag li.....Lub sij hawm no kuv nyuaj siab heev li..nco Nkauj Ntxhee kawg nkaus thiab.. 
           Ib Chim yad tsaus ntuj kuv thiaj hu rov mus ntsib Nkauj Ntxhee niam, ces nws niam quaj heev rau kuv thiab qhia kuv tias lawv nrhiav tau Nkauj Ntxhee, nws tag sim neej lawm. Nkauj Ntxhee niam hais rau kuv tias koj tham nws ntev ua luaj , nyob Thaib teb tuaj txog teb chaws no koj tsis yuav nws, yog li zaum no koj thiaj tau plam nws  lawm os me tub..thaum zoo li no lawm kuv tsuas yog quaj nrov nrov thiab xav tias cia kuv tuag raws nws qab seb puas tau sib ntsib lawm xwb..
               Kuv xav txog Nkauj Ntxhee cov lus tias​​ " nyob rau hnub koj tuaj tos kuv mus nrog koj nyob , kuv muaj ib co lus zoo zoo yuav hais rau koj".  Kuv tseem tos los txog nij hnub nim no tias nws cov lus no yog nws yuav hais dab tsi rau kuv...tab txawm nws tau tag sim neej lawm los kuv yeej tsis npau suav pom nws li ..txhua hmo yuav pw thov kom nws los ua npau suav rau kuv pom los yeej tsis los li..nws tuag ces nws tuag lawm tiag tiag... Yam uas kuv tau los ntawm Nkauj Ntxhee ces tsuas yog nws daim ntawv uas thaum nws tuaj txog rau Phab Nab Nib Khoo es nws sau rau kuv xwb...Kuv tseem khaws cia txog nij hnub no ua dab muag...thiab yuav khaws cia mus kom txog lwm tiam muaj tseeb tiag mam coj mus qhia nws tias kuv yeej hlub nws tsis hais tiam twg...tsuas yog txoj kev tuag muab nws ncaim kuv mus lawm xwb...
Nkauj Ntxhee koj txawj tuag es koj tuag mus ua tus me ntses lawm..kuv xav tias cia kuv tuag raws koj qab es kuv los ua tus me dej seb kuv puas pom koj pus tau nrog koj nyob no los kuv tuag tsis taus...ntshe kuv yuav muab koj nco mus tag kuv tiam neej no es seb lwm tiam puas tau rov ntsib koj dua lawm xwb...Lwm tiam muaj tseeb tiag wb yuav tsis sib ncaim zoo li tiam no lawm...thov qhia koj paub tias kuv hlub koj nawb mog.... Caum Koj Tuaj txog Mes kas los tseem tsis tau koj  los xaus li no lawm xwb...thov ua tsaug ib tsoom phooj ywg uas tuaj nyeem kuv zaj dab neeg no....Qhov tseem ceeb tshaj yog ua tsaug rau 3haivhmoob.com uas pub lub chaw no rau kuv tau tuaj tso kuv txoj kev hlub tseg ua puav pheej mus ib sim neej...thiab yog ib zaj dab neeg lawm xwb...Thov kom vej xaij 3haivhmoob .com nrog peb tsoom Hmoob nyob mus kom ntev ntev...Es mam rov ntsib nej dua
  Ua tsaug ntau,
 Khu Lis​​​

Ceeb Toom: Cov dab neeg kev hlub thiab txhua yam hauv 3haivhmoob.com no peb tsuas yog tso rau sauv daws tau tuaj nyeem laug caij nyoog xwb txwv tsis pub leej twg muab luam mus muag los yog ua lag luam, yog koj coj mus kho los yog ua lwm yam tsis tau qhia rau peb paub , thaum peb tshawb tau lawm koj yuav raug nplua raws txoj cai ntawm lub teb chaw koj nyob ko. 
                 Ua tsaug ntau:  
                       3HaivHmooB.Com