Meb Yam Wb Txoj Kev HLub
Thov cia kuv hu koj ua meb yam li thaum tseem sib2 hlub ua zaum kawg, lig heev lawm puas yog meb, thov txhob txhawj kuv yeej tsis yuam thiab kom koj ua dab tsi nyob hauv tsab ntawv no, tsuas yog xav qhia qee yam uas xav tseg tsis tau hais qhia koj xwb, tej zaum yuav hais tau tshawv zog thiab tshaj qhov wb ua muaj. Meb tus kuv hlub!! Sij hawm no tsis muaj yam dab tsi yuav los ua kom kua muag qhuav hauv kuv lub siab, tsis muaj yam twg yuav los pauv tau qhov mob thiab qhov chim li lawm os, kuv tsuas paub tias kuv tseem muaj sia nyob hos qhov yuav ua dab tsi txuas mus ntxiv ces tsis paub, hnub no kuv mloog zoo li siab ceev heev thiab tsis pom qab nyob li kuv thiaj mus ua si nram cov kwv tij lawv los yeej tsis pab tau kuv dab tsi li.. tsis tas li ntawv tseem ua rau kuv pom wb tej chaw qub thiab haj yam nco koj heev li xwb..,
Meb txoj ke sib2 hlub li qub ntshe tsis muaj lawm os, meb tej chaw zaum los tsis muaj tag, tej chaw sawv ntawm tej kaum tsev los nphob tag, tsis tshuav tus ntxhiab tus pa li thaum I li lawm saib qhov twg los nqha nrig tsis muaj koj, tej qub kev koj ib txwm tos kuv los tsis muaj koj thiab xav tias zaum no ces yuav tsis muaj ntxiv li lawm, ua rau kuv tsis xav mus pom tej ntawv li lawm os meb. Wb txoj kev hlub zoo zoo thaum I niam no ces raug lwm tus txoj kev hlub los txhub tag lawm, ntshe yuav tsis muaj koj nrog kuv tuav tes rawv mus ua si sib raws hneev taw rau tej ntug dej li lawm, cas wb txoj kev hlub tsis ncav dej huam es wb yuav mus ua si tiaj lag zeb li koj hais , kuv npaj tau ib co nkauj yuav coj koj wb mus thau phaj rau. Kuv yeej tsis ntseeg tias wb txoj kev hlub yuav los muaj zoo li hnub no, txawm niam no thiab lub neej yav uas tseem tshuav los kuv yeej tsis ntseeg li “tias tau ua dab tsi li ?” Tus hlub a! puas yog kuv kav koj dhau, puas yog kuv yuam koj dhau vim khib txoj kev hlub dhau na? kuv muab xav txoj kev hlub yav tag los ntawm kuv tsuas muaj koj ib leej thiaj paub txhua ntawm kuv xwb, kuv tsuas xav kom koj yog kuv li xwb, txoj kev xav no yuav coj tsis tau koj kom rov zoo li thaum I lawm thiab tus cwj pwm no tsis muaj nqi txaus yuav los tauv tau koj nrog kuv nyob, kuv tau yuam kev vim hlub koj ntau dhau, kuv yuam kev vim hlub koj tas siab ntsws, meb koj txhob nkag siab kuv yuam kev nawb. Kuv yeej tsis hais tej qho tsis zoo yuav ua kom koj mob siab li os. Lub neej uas xav tseg rau wb Zaum no tej zaum ntshe yuav yog zaum kuv tau hu meb zaum kawg, tiam sis xyov ua cas kuv ho tsis ntseeg tias yog tiag kuv yeej xav rawv thiab pom ntsoov wb lub neej uas kuv xav tseg I yim neej me me muaj kev sov siab, muaj wb cov me nyuam cov suab luag, yog tub yuav tshaj lij li kuv, hos yog ntxhais yuav yuav mloog lus thiab ntxim nyiam ib yam li koj, wb yuav coj mus ua si wb tej qub chaw ncig, kuv yuav nqa ib tug hos koj yuav tuav ib tug tes thiab nqa pob khaub ncaws, ib yim neej sov siab los zaum puv tsum mov. Muaj nqis li kuv no xwb ces ntshe lub neej uas kuv xav tseg thiab txhua yam puag ncig kuv ces vau thiab ntsoog tag ib yam li kuv lub siab lawm. Txawm li cas los xij kuv ua tsaug koj os meb! Ua tsaug koj tau hlub kuv yam dawb huv, ncaj ncees thiab txhawj txog tag siab ntsws thiab tau muab txoj kev hlub yam li txoj kev tshav ntuj nrig kho siab khuav tsis muaj yam los pauv tau hauv lub ntiaj teb no ua rau kuv nrog luag muaj tus hlub ib ntus ua tsaug uas koj tau pab kuv dhau ntau qhov kev nyuaj siab hauv kuv lub neej thiab tau paub tias mob zoo li no, nws yog tiag, tsis yog dag li. Ua tsuag uas koj tau muab txoj kev sov siab rau kuv mus kawm ua rau kuv muaj siab muaj zog tiv tas ob peb chim ntuj no, tuaj yeem hla dhua kev nyuaj txhua yam vim muaj koj thiaj ua rau kuv muaj yeej txhua yam… |
Nim no kuv ua koj tsaug uas koj tau tso kuv yam ua rau kuv tu siab nrho, thiab koj tau ua tej txoj hauj lawm uas hauv kuv lub neej kuv yeej tsis muaj peev xwm ua tau rau kuv pom. Koj yuav muaj kev sov siab os nawb, yeej yuav tsum muaj li ntawv xwb puas yog? Kuv xav li ntawv, kuv yuav muaj kev sov siab thaum kuv pom koj muaj kev sov siab. Aw yog lawm os, kuv tsis nco qab lawm! Meb koj pab kuv ua tsaug rau tus tub uas tau muab txoj kev sov siab thiab kev hlub rau koj ntawv thiab nawb vim nws tau ua txoj hauj lwm rau koj tam kuv nawb mog. Meb a! qhov wb yuav rov los sib hlub ces ntshe tsis muaj lawm os tiam sis koj paub sab hauv kuv lub siab, koj li duab yeej tsis tuag hauv kuv lub ntsiab muag thiab kuv lub siab. Kuv yuav tsis ua dab tsi kom koj… , kuv yuav mus mus kom deb kom tsis txawj txoj kev tias yuav los cuam tshuam tau koj lawm...wb txoj kev hlub qhov kuv khaws cia, meb a kuv yuav tsis cuam tshuam koj ntxiv lawm os vim kuv tsis xav kom nram qab koj lub neej tsis zoo es tias yog vim kuv , thov koj nkag siab kuv nawb meb, tsis muaj leej twg yuav pauv tau koj hauv kuv lub siab nyob lub neej no li.. Kuv lub hom phiaj kuv xav tau tas los, tias yuav ua dab tsi hauv kuv lub neej thiab kuv txoj hauj lwm…, niam no txhua yam ces tsuas yog yav tag lawm xwb kev sib hlub zoo zoo ces cia nws pw nws rau yav tas es txhob tsa nws sawv los es wb thiaj tsis mob ntxiv lawm, hos qhov wb tseem muaj thiab yuav muaj txuas ntxiv ces yog kev sib raug zoo, kev sib pab ntawm fab khwv noj khwv haus txhim kho lub neej lawm xwb thiav hnov qab qhov wb tau ua zoo zoo ntawv kom tag txhob… Tus hlub a! wb yeej tsis muaj dab tsi khaws ua dab muag ntau tab sis yog muaj dab tsis yog wb li no koj muab pov tseg kom tas nawb, kuv xav kom ua li ntawv, tus uas hlub koj ntawv yuav muaj kev sov siab dua thaum koj thiab txhua yam puag ncig yog nws ntiag tug tag, yam no kuv nkag siab nws lub siab dua koj os mog.. Meb koj yuav tsum ua li kuv hais nawb ua txhua yam zoo thiab ua kom muaj kev lom zem thiab zoo siab li koj ib txwm ua rau kuv rau nws os nawb li ntawv xwb ces yeej nqa tau ib txoj kev kaj siab rau kuv lawm thiab. Txawm nyob qhov twg thiab thaum twg los kuv tsuas thov kom txhua yam zoo thiab muaj nqis tsuas tshwm sim rau neb lub neej xwb mog.. Tsab ntawv no los ib yam nyeem tas muab pov tseg thiab os nawb. Kawg no thov ua tsaug rau 3haivhmoob.com uas muaj qhov chaw kaj siab no pub rau peb ib tsoom phooj ywg tus nyuaj siab thiab kaj siab tau tuaj so ib pliag kom txoj me pa loj zog es mam ho rov mus lawm tom ntej...Es kuv mam rov ntsib nej dua rau lwm zaus. Sau Npe: Yaj Yaj Nco Ntsoov: Txhob hu xov tooj rau lawv cov kev lag luam lawv tso hauv no yog tias koj tsis muaj feem txog kev lag luam nawb. Ua tsaug
|
Lus Ceeb Toom:
Cov dab neeg kev hlub thiab txhua yam hauv 3haivhmoob.com no peb tsuas yog tso rau sauv daws tau tuaj nyeem laug caij nyoog xwb txwv tsis pub leej twg muab luam mus muag los yog ua lag luam, yog koj coj mus kho los yog ua lwm yam tsis tau qhia rau peb paub , thaum peb tshawb tau lawm koj yuav raug nplua raws txoj cai ntawm lub teb chaw koj nyob ko.
Ua tsaug ntau:
3HaivHmooB.Com
Cov dab neeg kev hlub thiab txhua yam hauv 3haivhmoob.com no peb tsuas yog tso rau sauv daws tau tuaj nyeem laug caij nyoog xwb txwv tsis pub leej twg muab luam mus muag los yog ua lag luam, yog koj coj mus kho los yog ua lwm yam tsis tau qhia rau peb paub , thaum peb tshawb tau lawm koj yuav raug nplua raws txoj cai ntawm lub teb chaw koj nyob ko.
Ua tsaug ntau:
3HaivHmooB.Com