Yog Neej Los YoG DaB
Tus sau: HmooB Khej3
Nws yog xyoo 1986 thaum lub 6 hli ntuj. Hnub ntawv nws yog ib hnub Saturday sawv ntxov tseem sij hawm kwv yees 6 moos tawm nws kuj yog ib hnub niag los los nag kawg. Peb nyob rau Vib Nais yog tias los nag ces dej nag kuav tej kwj ha to tog ces nws pheej muaj ib co roob ris liaj thiab cov niag ntses qau daum pheej nyob raws tej kwj ha uas tauv tej lub nyuag pas dej. Kuv txawm sawv ntxov tuaj ntawm peb tsev uas yog nyob Khej 3 Tsev As Qhas 27 tuaj mus hla rau ntawm Xum Xab Nuv mus rau tom tug nyuag menyuam dej uas yog ntawm tsev cov Thaib tuaj tso TV peb nyiam nyiam mus saib ntawv ntag. Kuv npaj yuav tuaj mus txhom ntses thiab txhom roob ris. Kuv tuaj hla ntawm tsev TV ntawv mus rau tom cov qhov dej uas Hmoob tuaj khawb coj los siv hla Thaib thaj nyuag teb taum pauv xyaw tsawb pes dhaw tuaj mus rau tom kwj haj. Thaum kuv tuaj mus yuav luag txog rau tom kwj ha tsis deb lawm thaj tsam 10 tawm daj xwb txog kwj ha lawm twb hnov dej nrov nrov qhov nyuag ntawv tuaj lawm xwb. Thaum ntawv txawm cia li hnov ib lub suab yog suab me nyuam ntxhais hluas nkauj hu tuav nkaus kuv npe ntag..."Tub...tos kuv thiab ma....koj mus dab tsi" Kuv tig mus saib tsis pom muaj tib neeg nyob qhov twg. Niag teb taum siab txij duav muaj kuag tus tsawb nyob sib daws lam cum lug rau tim ub tim no yeej tsis pom muaj neeg nyob qhov twg. Lub suab hu tuav kuv npe ntawv mloog yog nkaus ib tug hluas nkauj nrog kuv kawm ntawv ua ke nws lub suab ntag. Kuv xav tias tej zaum yog nws tuaj laub dej nram cov qhov dej nws pom kuv es nws hu tiam sis kuv saib mus rau nram cov qhov dej niag du lug tsis pom tib neeg cov qhov dej twb tsis dhib nws xauv nws zoo zoo cia. Kuv mus zoj 4-5 ruam kev tom ntej xwb rov hu kuv dua "Tub aw..." Tsis paub xyov yog tus twg nyob qhov twg thaum ntawv nyuam qhuav sawv ntxov tsees yeej tsis lam muaj neeg tuaj nyob tej no nws ib leeg pob. Kuv mus ceev ceev txog rau tom kwj ha dej ntws sis txij plab hlaub kuv nqis rau hauv dej pib xuas roob ris raws tej qab pob zeb kuv taug dej nce toj deb li 3-4 dag ntawv xwb rov hu dua kuv saum tus ntug dej tuaj kuv tig mus saib kuj tsis pom tus dab tsi li qub. Thaum no kuv plaub hau xob xob hos zoo li pib ntshai lawm kuv thiaj li khiav los tsev. Tau 2-3 hnub tom qab kuv mus kawm ntawv pom tus hluas nkauj uas kuv hais tias niag hu kuv ntawv lub suab yog nkaus tus hluas nkauj ntawm no nws lub suab kuv thiaj li mam nug nws tias hnub ntawv nws puas tau tuaj pem kwj ha Khej 3 nws teb kuv tias nws yeej tsis tau tuaj mus rau qhov kuv hais no hlo li. Muaj ib zaug thaum ntawv mas twb yog tom qab no lawm nws yog xyoo 1988 lub 12 hlis no no ntawv ntag. Kuv tuaj mus tham hluas nkauj nyob sab Khej 2 sab nyob npuab Khej 4. Kuv tuaj txog ntawm Taj Lab Khej 3 kuv tuaj hla tus nyuag kwj ha ntawv tso yuav hla mus rau tim Khej 4. Thaum kuv nqis mus txog rau hauv tus kwj ha kiag ntawm ncauj ke yuav hla mus rau sab kwj ha tim ub kuv pom muaj ib pab tib neeg coob thaj tsam ze 20 leej zaum pawg lug ntawm tus ntug kwj ha ntawv. Sij hawm thaum ntawv yog 3 moos sawv ntxov yuag luag 4 moos. Kuv thiaj li mam nug lawv tias lawv yog leej twg lawv tuaj nyob dab tsi ntawm no. Thaum ntawv muaj ib tug laus zog nws teb rau kuv tias lawv tuaj Teb Chaws Nplog tuaj tab sis tus uas coj lawv kev tuaj nws tseem mus nrhiav lawv cov txheeb ze lawm kom lawv nyob ntawm no tos nws. Thaum ntawv kuv tsis nco ntshais dab tsi kuv cia li hla zog lawv mus hla tus kwj ha rau sab tim ub thiab mus tham hluas nkauj lawm xwb.
koj xav li cas sau rau nram no
HTML Comment Box is loading comments...