Tuag Mus Raug Txim Dab Teb Xeev Rov Los
Tus Sau: Tub Hmoob Xyooj Email: kaohlubkoj@hotmail.com
Nplooj 1Nyob rau lub zos Looj Ceeb thaum xyoo 1970 txog 1974 yawg Nkaj Lis thiab nws cov tub teg tub taws yog ib co uas mus yuav nyuj yuav twm thiab qaib npua los tua muag rau cov tub rog (thab ham )tua noj thiab xa mus rau cov tub rog tom hauv ntej noj. Nkaj Lis muaj nyiaj kawg nkaus li. Tom qab lub teb chaws tau tawg hloov nom tswv lawm lawv cov no nyias kuj khiav mus nyias ib qho thiab tsis paub tias tus Nkaj Lis no nws ho tau tuag rau xyoo twg lawm, tab sis mas Nyiaj Ntaj Vaj uas yog Nkaj lis ib tug tub teg tub taws tua tsiaj muag no kuj tau khiav tuaj rau teb chaws mes kas nyob rau ntawm lub nroog Xee Phau. Nyiaj Ntaj tsuas yog ib tug tub qhev rau Nkaj lis nyob lub caij thaum ua luam muag nyuj twm rau lub nroog Looj Ceeb xwb.
Los txog rau thaum xyoo 2012 tag los no Nyiaj ntaj mob heev tab sis mas coj mus ntsib kws kho mob los luag hais tias nws yeej tsis muaj mob dab tsi li kom coj rov los tsev xwb. Nws txoj kev mob zaum no yog, ib sij tsis nco qab lawm ib chim tsis tas li mas thaum mob sij qw hais tias "kuv tsis tau tua nej,thiab kuv tsis yog tus muag nej rau tib neeg coj mus tua noj." Txoj kev mob no nws yog mob dab lawm, kev ntoj neeb nthuav yaig saib los luag hais tias tim yav thaum hlaus Nyiaj ntaj tau ua phem rau ib co tsiaj xws li nyuj twm qaib npua lawm luag tsis zoo siab mas yog li thiaj yuav los coj kom tau nws mus xwb. Nyiaj Ntaj tsev neeg tau coj nws mus ntseeg Vaj Tswv , kom xib fwb lawv tuaj thov ntuj los yeej pab tsis tau li. Cov tsiaj uas tau tuag mus xws li tej nyuj twm , qaib npua no luag tsuas hais tias, siav pauv siav xwb thiaj tau. Nyob rau lub hnub tim 20 lub 12 Hlis Xyoo 2012 no Nyiaj Ntaj tau tuag mus lawm tab sis tshuav nws lub plawv dhia dhia thiab lub cev tseem sov sov , yog li tsev neeg kuj tsis tau muab nws ua dab ua qhua. Raws li nyiaj ntaj piav thaum nws xeev rov los mas lub sij hawm nws tuag mus ntawv , tsis yog nws tuag tab sis mas muaj 4 tug tib neeg ya ntawm lub qhov muag tsev los coj nws, muaj ob tug yog poj niam, ob tug yog txiv neej , lawv cov no hnav khaub ncaws dawb pawg xwb. Thaum lawv mus ces pom kev kaj lug saum nruab ntug tuaj, muaj ob kab ci kaj nrig li hnub ci thaum sawv ntxov , ces lawv mus dhau plaws qhov no tsaus ntuj nti xwb, ho rov dhau plaws qhov tsaus ntuj no dua ces pom ib txoj kev tawm plua tshauv tog tib neeg mas mus mus los los li tab sis ib tug tsis hais lus rau ib tug li.. Lawv mus pom ib lub pas dej loj heev tib neeg mas haus dej thiab ntxuav muag cuag dab tsi vim tshav ntuj kub heev li, Nyiaj Ntaj thov 4 tug neeg uas coj nws mus no tias nws yuav haus dej no ces lawv tias lawv tsis kam nws haus vim nws tuaj saib thiab tuaj ua pov thawj hais plaub xwb mas nws haus tsis tau cov dej no. Yog tus neeg twg haus cov dej no thiab ntxuav muag lawm ces yuav tsis nco qab nws lub neej tom qab li lawm Nyiaj Ntaj lawv tau taug txoj kev no mus txog ib txoj kev tshuam pom ib cov neeg mus rau txoj sab xis lawm, 4 tug tub txib uas coj Nyiaj Ntaj no hais tias cov mus rau txoj nrav yog cov ntseeg kev caiVaj Tswv, cov mus pem no yog cov tseem coj kev cai qub..dhau ntawm no mus tsis deb heev muaj ib lub rooj vag, nyob rau ntawm ob sab mas muaj ob tug tib neeg loj heev ib leeg tuav ib rab ntaj, hauv plawv mus ib lub rooj ob tug neeg sau ntawv , ib tug yog poj niam ib tug yog txiv neej, cov tib neeg uas dhau los mus mas yuav tsum tau raug txheeb lawv cov npe tag mam dhau mus, nyob rau sab tom ntej muaj tib txoj kev los mus...cov neeg los pev los mas coob kawg li thiab, tau raug txheeb npe tag mas tso los mus lawm, lawv qhia tias cov los txoj kev sab tov yog los mus thawj thiab lawm ntiaj teb, cov los txoj tom no yog rov los mus hloov cev dua vim ntaub noj ntawv haus tag lawm (Ces yog cov tuag los mus). Thaum ob tug tub txib no txheeb npe los txog Nyiaj Ntaj ces 4 tug uas los coj nyiaj ntaj no cia li muab ib daim ntawv ntaus thwj liab ploog rau nkawv saib tag ces nkawv cia li qhib rooj vag rau lawv mus lawm xwb. Thaum Nyiaj ntaj lawv mus dhau plaws lub rooj vag no tsis deb ces txawm pom kiag ib lub zos hluav taws mas ncho zom zaws tom tej qhov muag tsev tab sis cov tib neeg no tsis tawm li, pom tsawg tus heev thiaj tawm tuaj nraum zoov xwb tab sis mas nyias mus nyias zom zaws tsis hais lus li. Nyob rau ntawm plawv zos muaj ib lub tsev 9 ceg siab heev ua ib tug kub ntse ntse rau saum theem kawg uas yog qib 9 ntawm lub tsev lawv hais rau nyiaj ntaj tias nov yog lub tsev txiav plaub , peb yuav coj koj mus hais plaub rau hauv. Thaum nyiaj ntaj lawv mus txog hauv lub tuam tsev no nws tau pom luag muab Nkaj Lis khi ntxeev tis qaib sawv ntsug hos nyob rau ntawm ob sab taw xauv ob txoj saw hlau loj heev li. Nyob rau ob sab rooj tag nrho muaj 24 tug neeg txiav plaub, ib sab yog 12 leeg hos pem lub hauv rooj kawg tus thawj txiav plaub yog tus nom loj nyob rau pev, ntoo ib lub kaus mom 13 ceg, ib ceg cig lawm ib yam mas ntsias cuag dab tsi, nyob ntawm nws ib sab muaj ib rab rauj loj heev li. Cov nyuj cov twm thiab qaib npua uas tsis txaus siab rau Nkaj lis mas lawv nyias zaum nyias ib pawg ntawm ib lub rooj, koj saib mas lawv lub cev yeej tseem yog nyuj yog twm thiab yog qaib yog npua tab sis mas lawv lub taub hau nyog tib neeg thiab hais lus ib yam li tib neeg lawm... Rooj plaub no luag twb hais tiav lawm tab sis mas Nkaj Lis tsis kam lees lub txim li yog li ntawv cov tsiaj no hais tias Nyiaj ntaj yog tus ua pov thawj cab lawv mus tua kom Nyiaj Ntaj mus ua pov thawj no mas luag thiaj tso neeg los tos Nyiaj Ntaj mus, thaum tus nom hais es Nkaj Lis tsis lees mas lawv muab ib tug qws los ntaus nws tej tes tej taw dam tag nrho thiab cov tsiaj no mas qw ib tsaug ib tsaug tias rau txim kom sab zog ntxiv thiab nws tua peb mas tsis ntshai peb tuag li ...ces luag mam rov ntov kiag ib tshob dej rau nws ces tej nqaij tawv mam rov txuas zoo li qub rau, tab sis luag tsis pub dej puab mov rau noj li mas Nkaj Lis ntshee ntshee qaub ncaug si laim xwb..thaum yuav tuag tiag tiag no ces luag tshuab ib co pa rau nws qhov ncauj ces zoo li txoj pa rov loj thiab hais tau lus li qub lawm.. Tus txiav plaub tau nug Nyiaj Ntaj tias puas yog Nkaj lis muab cov tsiaj no txoj sia mus muag noj muag haus li lawv hais..kom Nyiaj Ntaj qhia ncaj ncaj yog tsis li ces nws yuav raug txim loj ib yam Nkaj Lis.. Lub sij hawm no yeej muaj ob tug tub txib mas tuav rawv Nyiaj Ntaj ob sab caj npab li thiab. Tus txiav plaub thiaj tau kom cov tsiaj no los teev lawv cov lus dua seb yog li cas vim tus pov thawj tuaj txog lawm...Qaib los teev ua ntej vim thaum tus tib neeg tuag ces muab qaib ua tus coj kev , tus qaib no los hais tias, ntuj tsim lawv los rau ntiaj teb tib neeg noj, tus noj tsis txhaum, lawv tsis chim thiab tsis tu siab, tab sis tus uas muab lawv txoj sia muag ua luam rau lwm tus coj mus tua noj mas lawv tsis txaus siab rau nws li..Vim Nkaj Lis muab lawv txoj sia muag yuav nyiaj lawm yog li lawv thiaj chim ua luaj no, kom tus txiav plaub pab muab kev ncaj ncees rau lawv.. Nyiaj ntaj piav tias, tus tswv plaub tau nug nyiaj ntaj tias puas yog li ntawv, nyiaj ntaj teb tias yeej yog li.. Cov nyuj cov twm los yeej qw ib tsaug ib tsaug tias yeej yog li qaib hais lawv thiaj tsav chim siab ua luaj no thov kom tus txiav plaub muab kev ncaj ncees.. Thaum no tus tswv plaub tsis hais li cas li lawm cia li ntaus rab rauj nrov nrawj saum rooj thiab kom cov tub ceev xwm nqa riam los maj mam muab Nkaj Lis hlais ib qho zuj zus..thaum kawg tshuav cov pob txha xwb , cov nqaij ces lawv muab hliv kiag rau ib lub cua kiv ib lwm ua hmoov tag, cov pob txha ces lawv muab pov kiag rau ib lub yias kub kub liab ploog yog kua tooj kua hlau xwb ib pliag ces yaj ua cov hmoov dub dub ploj kiag lawm, dhau no ces tus txiav plaub hais rau cov qaib npua nyuj twm no tias plaub tas li no lawm kuv mam ua ntawv rau nej tus xav mus yug ua yam dab tsi los nej mam xaiv nej mus nco ntsoov txhob tsim txom thiab muab lwm tus txoj sia mus muag lawm yog nej tshwm sim ua lwm tiam neeg. |
Nplooj2Tus txiav plaub tau hais rau Nyiaj Ntaj tias koj yeej muaj lub txim loj heev thiab vim koj tau koom tes tua cov tsiaj no tab sis zaum no yuav zam txim rau koj vim yuav kom koj rov mus qhia neeg ntiaj teb txog qaum ntuj lub txim txhaum thaum koj nyob ntiaj teb koj ua kev txhaum rau lwm tus tib neeg...los yog lwm tus tsiaj uas yog cov muaj sia ib yam li koj...
Tus txiav plaub tau coj Nyiaj Ntaj mus saib cov neeg raug txim raws li nws piav nram no. 1. Cov tib neeg uas nyob ntiaj teb no sij mus muab tej xyoob ntoo txiav los yog kaw los mus muag ua luam rau lwm tus mas, thaum mus txog rau hauv dab teb lawm luag muaj ib lub tsev txim, ib hnub no mas luag muab koj coj los teem rau ntawm ib tug cuab ncau ob ceg ruaj ruaj mas - lawv muab kaw coj los kaw koj lub plab mas quav tawm cuag dab tsi, tej zaum lawv muab riam los tsuav koj lub cej ib yam li koj txiav ntoo..tabsis mas tsis pub koj tuag li, ntshav mas liab vog, cov neeg raug txim ntov ntoo no mas quaj qw mob hu niam hu txiv cuag dab tsi li...lawv qhia nyiaj ntaj tias cov neeg ntov xyoob ntoo muag ces raug txim li no, yog koj ntov ua koj lub tsev xwb tsis txhaum, tab sis ntov muag ces txhaum li no.. koj ntov coj los ua liaj ua teb noj xwb kuj tsis txhaum thiab. 2. Cov neeg ua tub sab ntxhais sab cov tib neeg tub sab luag yuav coj mus rau txim rau hauv dab teb 2 theem, theem ib yog nyuam qhuav raug txim, lub tsev txim no yuav coj mus nyob zoo li lub nkuaj rau npua pw xov zoo heev, quav npua , quav qaib mas puv nkaus xwb, tab sis mas liab qab ploog pw pawg lug cuag cov npua pw xwb, cov yoov tshaj cuam luaj ntiv taw xoo ya los nqus ntshav tej tug tib neeg mas qhov muag tho tag li plaub hauv ntev heev tsis paub tias luag twb kaw tau ntev li cas lawm. Theem ob yog luag muab tso tawm los nyob tos ntaub ntawv mus hloov dua cev tshiab kom txhob tub sab ntxiv lawm, tab sis lub sij hawm koj los nyob theem ob no, yog tias cov tib neeg ntiaj teb rov qab piav txog koj lub npe tias tus neeg npe hu li no mas thaum i tub sab kawg no ces cov lus no nrov nto plaws rov rau saum ntuj, tus tswv saib neeg raug txim yuav hais tias, nev nev koj lub npe tub sab rov nrov tuaj txog saum no lawm koj yeej yog neeg phem tiag, peb rov muab koj kaw dua tso no ces tus neeg ntawv rov mag kaw dua, thaum tsis muaj tib neeg hais txog koj npe li lawm ces luag mam ua ntaub ntawv muab koj mus hloov siab hloov ntsws cia koj xaiv seb koj yuav los ua yam tsiaj dab tsi dua rau ntiaj teb mas cov neeg no raug txim txom nyem kawg nkaus li thiab... 3. Cov neeg noj yeeb noj tshuaj Cov tib neeg noj yeeb noj tshuaj mas raug txim txom nyem kawg nkaus vim thaum koj yuav los ntiaj teb, koj thov tau daim ntawv zoo tab sis tsis tau txog caij tuag koj twb ho txo koj txoj sia lawm, nyiaj ntaj piav tias , cov neeg no lub txim mas luag muab yuam ev pob zeb nce roob ib hnub no yog 10 zaus, mus , 10 zaus nqis roob rov los, yog koj noj yeeb ces txog lub caij yeeb tawm yeej tuaj ib tsob yeeb hauv qhov ncauj tuaj, noj tshuaj ces yeej muaj ib tsob tshuaj hauv qhov ncauj tawm tuaj, tsob niag yeeb thiab tsob niag tshuaj tuaj siab tshaj koj lub taub hau tab sis mas koj tseem tau ev ib nras poob zeb nce roob nce hav hav thiab, yog koj nroo tias sab koj no ces luag muab pas nplawm koj lub cev mas ntshav tawm cuag dab tsi li vim tus pas nplawm ko no yog ib tug pos tuaj kub cuag dab tsi , nplawm ib teg mas pos chob koj lawm 10 tawm lub qhov li.... Thaum koj nyob tag koj lub txim lawm, luag mam coj koj mus rho koj tsob yeeb tsob tshuaj tawm, muab koj lub cev mus hlawv ua hmoov , thiab hloov dua siab dua ntsws. Cov noj tshuaj no luag tsis pub los thawj ua tib neeg lawm, tiam tshiab ces nws tau los mus ua nroj ua ntsuag thiab ua xyoob ua ntoo rau lwm tus tuaj txiav lawm xwb raws li cov tub txib no piav rau nyiaj ntaj 4.Cov neeg sib daj sib deev Cov neeg uas muaj cuab yig lawm tab sis nyiag sib deev cov no mas thaum mus pom luag kom nce ib tug ntoo , thaum koj nce tu ntoo mas muaj ib co pos tawm hauv tuaj hno yus lub cev, yog koj tsis kam nce tsob ntoo no ces luag tso ib tug aub loj thiab nyaum heev muab koj caum tom kom koj ntshai es koj nce tsob ntoo, thaum koj txog ib nta cov pos tawm hauv tsob ntoo tuaj chob koj ntawv, tseem muaj ob tug tub txib muab ob rab hmuv ntshe heev nkaug koj, tsis tas li xwb nyob rau saum ntshis ntoo tseem muaj ib tug txiv dais nyaum heev nqis sauv los muab koj tom thiab.... thaum kawg koj poob rov los rau hauv no ces koj lub cev khaub hlab tag, tab sis luag tsis pub koj txoj sia tu li...dhau no luag mam muab koj pov rau yias dej kub dej npau mus lim thiab hloov koj lub cev, hloov siab hloov ntsws tag, mam cia koj tawm los, thiab muab ntaub ntawv rau koj los mus tshwm sim ua yam tsiaj tshiab rau lub ntuj los yog lub neej rov tom ntej. Ib co lus no mas yog 4 tug tub txib piav rau nyiaj ntaj, thiab raws li nws pom tus tib neeg raug txim.. 5. Cov Txiv Neeb Ua Neeb . Thaum muaj tib neeg mob es cov tseem coj kev cai qub, cov txiv neeb ua neeb mas, nws muaj nws ib txoj kev tuaj mus lawm, koj pom tus tib neeg yuav ntoo ib lub kaus mom tseeb thiab nqa ib tug pas uas yog tus cuj , lawv qhia tias tus no yog tus cwj neeb no mas, nplawm ib teg qab ke ib teg qaum kev tuaj mus caum tus neeg mob lawm...cov neeg mob uas los tsis tau txog txoj kev tuag ces lawv mus ntes tau caij neeg rov qab los mus lawm..muaj tej tug ces tus tib neeg mob twb taug kev los txog ntawm txoj kev tuag uas cov tuag taug los mus lawm ces caum tsis tau tus txiv neeb cia li rov los lawm, ces tus mob thiaj tuag lawm. Qhov no mas vim nws daim ntawv tag lawm, raws li cov tub txib piav rau Nyiaj Ntaj - Mas txoj kev neeb thiab txoj kev tuag no nkawv los ib txaig thiab los sib tshuam rau ntawm qhov yuav txog lub pas dej iab dej daws uas cov tuag haus coob coob kom lawv txhob nco txog lawv lub neej tiam tag los lawm. Thaum dhau mus saib cov neeg raug txim no tag ces nyiaj ntaj tau rov mus ntsib tus txiav plaub thiab nws tau hais rau nyiaj ntaj tias zaum no koj yuav tau coj tej koj pom no mus qhia rau ntiaj teb kom tseg txoj kev ua phem ua qias, es kuv yuav zam lub txim rau koj, nco ntsoov yog tias leej twg tau hnov koj cov lus lawm tsis tsum txoj kev muag lwm tus txoj sia coj los ua lag luam , txov tej xyoob tej ntoo, tej tsiaj tej txhuv ,ua tub sab tub nyiag , deev luag teej luag tuag ces yuav raug lub txim raws koj pom no. Thaum dhau ntawm no lawm tus txiav plaub thiaj kom 4 tug tub txib coj nyiaj ntaj rov los, tos nyiaj ntaj pom ces lawv twb los txog ntawm nws tog tsev thiab 4 tug tub txib hais tias peb xa koj los txog nov xwb. Nyiaj ntaj hnov nws tsev neeg sij hu nws lub suab ploj loog , nrov zus , nrov zus ces nws mam xeev, saib mas lawv tus quaj li cas los muaj ces nws rua muag saib lawv thiaj taij dej haus thiab hais tias tshaib plab heev, nws poj niam thiaj mus ua kua dis rau nws noj. Tau 3 hnub tom qab nyiaj ntaj thiaj mam piav tej nws mus pom no rau suav daws tau paub. Nov yog ib zaj keeb kwm tuag mus hauv dab teb xeev rov los, yog tias nej sij tua tsiaj muag no ces yuav tau ua zoo saib vim muab luag txoj sia coj mus muag noj muag haus . Muaj qee yam peb kuj sau tsis tas li nws piav los xav tias cov peb sau tau no yuav yog ib qho kev kawm rau suav daws zoo lawm. Ua tsaug. Tus sau; Tub Hmoob Xyooj Lus Ceeb Toom:
Cov dab neeg kev hlub thiab txhua yam hauv 3haivhmoob.com no peb tsuas yog tso rau sauv daws tau tuaj nyeem laug caij nyoog xwb txwv tsis pub leej twg muab luam mus muag los yog ua lag luam, yog koj coj mus kho los yog ua lwm yam tsis tau qhia rau peb paub , thaum peb tshawb tau lawm koj yuav raug nplua raws txoj cai ntawm lub teb chaw koj nyob ko. Ua tsaug ntau: 3HaivHmooB.Com |