Mus Tua Npua TeB Txaus Ntshai
CeeB Toom: Txwv tsis pub koj muaj cov dab neeg hauv no mus hais rau youtube los yog xov tooj cua.
Tus Sau: Hmoob Khej3 Email: Birdybrid@yahoo.com Plob Tua Npua Teb Txaus Ntshai Tej laus hais tias yog mus plob hav zoov yuav tau caiv tsis txhob lam tau lam hais tej yam lus uas tsis tsim nyog yuav hais tsam ces ntsib teeb meem zoo li zaj kuv yuav piav tom ntej no. Nws yog lub caij cov txiv qhib txi txiv qhib tab tom zeeg rau hauv av npua teb nyiam nyiam los noj. Lawv pab kwv tij txiv tub ntawm no txawm sib yaum mus plob npua teb mus zov npua teb. Pab ntawm no txawm muaj ib yawg nws lawm tub ntawm txhua tug tag nrho yawg nov yog ib twg muaj ntsis khib dwb tsawv ces lawv txawm mus pom 1 tug neev taw npua teb mas loj heev li luaj nkaus cov menyuam nyuj tus neev taw ntag. Nws yog 1 tug twm npua teb loj heev nws mus mus los los ib cheeb tsam thaj chaw ntawv. Lawv pab ntawm no kuj tsis muaj leej twg ntsib tus twm npua teb ntawm no thiab tau tua 1 phom hlo li vim tias tus twm npua nov nws los yos noj rau yav hmo ntuj xwb nruab hnub ces nws mus pw rau tej koog niag ntxhov ntxhov uas tsis muaj neeg nkag mus txog. Thaum lawv mus pom li ntawv tag ces yawg khib dwb kuv hais ntawv txawm hais tias "kheev lam kuv ntsib niag twm npua uas niaj tag kis los nov xwb lau...yog kuv lam ntsib mas ntshe kuv lawg phom ua nwg khwb npho mus hlais kiag nws 2 lub niag noob qes coj los rau peb ci ua su tag peb mam li mus hlais nqaij ev mus tsev los twb tseem tsis tau lig" 1 yawg nws lawm txiv ntawm pab ntawv txawm teb tias "yog kawg...hais li koj hais ntawm koj ces hnub no peb pab nyuag txiv tub no ntshe nqaij npua teb peb ev tsis tag" Yog li yawg ntawv hais lawm hnub ntawv lawv pab nyuag txiv tub ntawm no yog 1 hnub tsis ntsib 1 yam dab tsi npua teb cia li tsis los rau lawv tua tsaus ntuj cov yawg cia li rov los tsev lawm xwb. Lawv los nyob rau muaj 5-6 hnub tom qab lawv sawv daws rov sib yaum mus plob npua teb dua ces zaum no lawv mus ntxov heev 12:00 1 tag hmo xwb lawv pib mus lawm lawv pib tsav tsheb ntawm tsev mus rau tim chaw plob lawv mus li 2 xuab moos thiaj li txog thaum mus txog lawm lawv tseem tau taug ko taw nce roob yuav luag 3 xuab moos ntxiv thiaj li txog chaw plob. Lawv mus txog ntua rau ntawm thaj chaw uas tus twm npuaj teb loj loj nyob lawm ntag lawv mus txog nyuam qhuav kaj ntug zuag pom kev dawb vog xwb tiam sis hauv cov niag hav qhib ces tseem tsaus ntuj. Txog rau ntawm kev sib tshuam ces lawv txawm faib nyias mus nyias. Lawv 3 yawg txawm taug kev nqis rau hauv kwj ha taug kuj ha mus rau nram Meskas thaj niag qhaub npleg ua Meskas tuaj cog tab sis mas nws kuj ho tsis yog nyob rau av private nws tseem yog public ua npua teb los noj noj. Hos yawg khib dwb ntawm no ces txawm txiav plas niag hav fab ntawv mus rau sab laug uas yog mus rau tom koog niag qhib tsaus tsaus. Nyob rau hauv koog niag qhib ntawv ces txawm muaj 1 lub nyuag me nyuam pas hawv yog kiag ntawm lub hauv dej txhawv ntws dua hauv kwj ha lawm npua teb nyiam nyiam los da hawv thiab tsau av nkos nyob rau ntawv. Yawg txawm mus txog ntua rau hauv koog niag qhib no ua ciav tsw npua teb tsw xoo ntxiag xwb ntag yawg txawm xav tias tsw xoo npaum no mas npua teb yuav tsum nyob ze ntawm no xwb ntag. Yawg xam pej tej nram tej qhov txhia chaw tej hauv paus qhib txhua qhov tag cas tsis pom npua teb qhov twg li. Yawg txawv xav zoj tias ntshe tsam nyob tom lub niag pas hawv tov pob ces yawg txawm maj mam nyas nkag mus xauj ua ciav yog tib tug twm npua dub nciab hos txoob dawb paug pw da av nkos hauv lub niag pas hawv tiam sis pw tig nruab qaum tuaj tom yawg lawm niag tsis zoo tua thiab. Cua tuaj tom niag npua teb rau sab ntawm yog npua teb tsis hnov yawg ntxhiab. Ntawm yawg sawv mus rau tom niag npua teb deb kwv yees 10 daj xwb. Yawg txawm muab yawg lub hnab plob uas yaws ev btxo cia rau ntawv yawg txawm tshuv zog sab pem toj tso mam li ua qoos qoos rau ntua hauv pliaj tso tib phom rau xwb. Yawg rab phom los kuj tsis yog phom tua mos txwv loj thiab yog rab niag MiNi 14 uas tua mos txwv M16 xwb. Yawg tshuv zog txog sab pem toj ces txawm muaj 1 ya niag cav qhib nkoj cag vau raws hav los mus rau ntawm lub niag pas hawv niag npua teb pw. Yawg nyuam qhuav mus txog ntua rau ntawm yav niag cav vau xwb ces yawg tsuj khaub dam niag npua teb sawv tsees tsa hlo taub hau xam rau ub rau no. Yawg rau ntua niag twm npua teb ntawv hauv pliaj ntag tib teg nrov nkig nkuav rau ua cas tsis yog yawg tua raug niag npua teb hauv pliaj hos yog teg npua teb ib sab niag nplooj pu xwb xyov yog yawg co los ua cas thiaj li xu lawm. Teg rau ntawv ces ua nwg lub niag mos txwv tawg tag rau ntawm npua teb daim niag tawv xwb hos chob tsis to mus rau hauv cov nqaij (peb nyob California nom tswv tsis pub xuas cov mos txwv Full Metal Jacket plob hom mos txwv peb siv tau plob ces yog cov Hollow Point Non Lead ntawv xwb....yog tias koj plob nyob rau Condor Range koj yuav tau siv cov Non Lead Projectile....tsis li ntawv ces raug ticket vim tias yog koj siv cov mos txwv muaj lead ces cov niag dav qhuav condor mus khawv tau noj tus tsiaj koj tua ntawv ces ua rau dav tuag) teg ua nwg to qhov nplhaus nplhiv cuag phom suab tua xwb. Thaum no ces npua teb tsis tuag npua teb ua nrov awg..awg..awg..hauv niag bpas hawv hos dhia tuaj mus tom yawg ntag lau...tiam sis mas ho tsis yog dhia ntuaj ntawm yawg hos yog dhia ncaj qha rau tawm yawg lub niag hnab plob yawg txo cia npua teb teg nqa hlo yawg lub hnab ua nwg hnab ntuag tag yawg pob mov su poob nchuav tag npua teb muab 2 nchos siav sis tseg ua nwg yawg cov niag taub dej ntim mus haus poob dawb vog. Yawg nce hlo rau saum lub niag tsag av uas yog ntawm niag hauv paus qhib vau yawg tsa hlo yawg rab phom nyem 3-4 teg rau niag npua teb twb tsis muaj 1 teg raug vim tias yawg lam tua lawm xwb tsis tsom kom ncaj hos niag npua teb los khiav pev khiav nrav tsis nyob twj ywm qhov qub tua tsis raug. Npua teb saib pom yawg nyob tom niag hauv paus cav npua teb khiav kiag los tom yawg ntag yawg txais nphawv nphoov muaj 5-6 phom ntxiv thiab twb tsis raug niag npua teb li. Yawg sawv saum hauv paus cav ces siab lawm npua teb khiav los txog ntawv npua teb 2 nce 2 nce rau saum yav niag cav niag npua teb nce tsis niam tau npua teb lub niag taub hau thiab 2 txhais niag tes khuam rau ntawm yav niag cas tsis deb ntawm yawg kotaw xwb. Thaum ntawv yawg mos txwv hauv phom tag lawm vim yawg muab txais npua teb tag lawm lawm (nyob California hauv koj lub magazine lawv tsuas pub muaj 10 lub mos txwv xwb tsis tshaj ntawv li) tsis pom qb yuav ua li cas niag npua teb yuav tom yawg tiag tiag yog tias nws nce tau rau saum cav qhov yawg sawv. Thawm ntawv yawg ntshai los ntsai tsis paub ua cas yawg cia li xuas yawg rab niag phom ntaus niag npua teb taub hau 2-3 teg ua nws phom nkhaus tag hos txhab khaum phom tawg tag. Npua teb thiaj mam tso yawg tseg thaum niag npua teb khiav mus ces ho tsis khiav mus lawm lwm qhov thiab hos niag twm npua teb ntawv txawm khiav ncaj qha nqis hav taug kwj ha mus rau nram lawv 3 yawg uas ua ntej mus zov ntawv lawm thiab ntag. Thaum yawg tua phom pem no ces lawv 3 yawg nrav lawv twb ceev faj lawm tsam yog muaj npua teb yawg tua npua teb ho dhia los nrawm lawv ces lawv twb ua qoos qoos tos lawm. Lawv 3 yawg nrav mas kwv tib co phom mos txwv loj xws li yog .270 thiab 30-06 xwb. Tib pliag ntsis tom qab ntawv xwb ces npua teb khiav raws hav pev los ntag lau...tib tug twm npua loj kawg kaus nkhaus nkoo ntev muaj 1 niag dos khiavtsig tsuag los txog ntawv ntag muaj 1 yawg thiaj li tsa hlo yawg rab 30-06 teg nruab tso npua teb ntog vig voog rau hauv kwj hav qhov niag ntxhab ntxhab lawm qoos lawm ntag lau zaum no. Sawv daws thiaj mus xauj no ntog tib tug khwb rwg npho rau niag kwj deg. Thiaj li hu CB rau yawg pev kom los...yawg thiaj li mam los tib tug tshee tshee los txog lawv nug tias yog ua cas yawg tua heev ua luaj...yawg thiaj li mam piav raws li kuv sau hauv no rau lawv mloog. Lus Ua Tsaug: Hmong Khej 3 is a dedicated writer for this website. Thank you for your time. Ua tsaug ntau koj sau cov dab neeg zoo zoo tuaj ua kev lom zem rau ib tsoom niam txiv kwv tij neej tsa. 3Haiv HmooB Admin. |
Lwm Yam Uas Koj Xav Mus SaiB
Suab Nag Lauj Tham
|
Koj xav li cas rau txoj Dab Neeg saum no sau nram qab no. Nias nov rov mus Nplooj Kev SiB HLUB
Widget is loading comments...