Poj Ntxoog Ntaus tus Txiv neeb vim nws tuaj kho tus mob ces thaiv tau lawm ua rau poj ntxoog coj tsis tau tus neeg mob ntawv mus ua poj niam..... Nyob rau ntawm lub zos Roob Tauj uas ntu kev ntawm zos moos cab hla mus rau thoob miab thoob khu ntawv thaum xyoo 1974 uas cov tib neeg tseem nyob coob heev muaj ib tug hluas nkauj zoo nkauj heev peb yuav tsis tuav nws lub npe vim tsev neeg no tseem nyob thiab tus hluas nkauj no nim no nws kuj ua neej nyob muaj me tub me nyuam coob heev. Tus ntxhais hluas nkauj no tib neeg yeej cav tias nws zoo nkauj heev li ua rau dab los yeej hnov txog yog li ntawv tom qab noj 30 xyoo 1973 txuas kiag mus rau xyoo 1974 ntawv nws txawm pib mob thiab nws tus mob mas tsaus ntuj yeej hnov sib tham thiab sib ntxhi cuag dab tsi ntawm tej qhov tsev tuaj li, tsis tas li no xwb nws sij hais rau nws niam lawv tias nws yuav mus vim lawv los tos nws lawm. Ib tag hmo tej mas aub tom thoob zos li ...thaum yuav kaj ntug ces aub tom tom mus rau tim ntug zos lawm ua rau tej hluas nkauj hluas nraug lub caij ntawv yeej tsis tau luag tawm mus sib tham li yav tag los li lawm. Tus ntxhais no niam thiab txiv tau hu ntau tus txiv neeb tuaj ua neeb saib los kuj tsis ntxim li yog li thaum kawg lawv thiaj li tsawv tau ib tug yawm txiv npe hu ua Neej Thoob no, lawv tau kom tus yawm txiv neej thoob no tuaj mus ua neeb saib lawv tus ntxhais no vim tias mob heev thiab dab poj ntxoog yeej tsis tso tseg vim tsaus ntuj zus ces dab poj ntxoog nyob ti nws heev li. Hmo ua ntej yawm txiv Neej Thoob yuav tuaj mus ua neeb saib thiab kho tus ntxhais no nws ua npau suav hais tias muaj ob tug ntxhais los hais rau nws tias." Hnov lawv tias koj yuav muaj mus ua neeb kho tus txhais ntawm zos roob tauj no mas wb los hais rau koj tias koj thiab peb tsis tau muaj caub muaj chim yog li koj tsum txhob mus zoo dua, yog tias koj tsis tsum koj tseem tuaj ua neeb thiab thov txhob tu siab nawb" Tus yawm txiv Neej Thoob no tsim dheev los no ua cas twb pom pom kev lawm thiab ua cas yog ua yoog toog xwb tsis yog npau suav. Txawm li cas los nws tau txiav txim siab tuaj mus ua thaj neeb no yog li thiaj tau hais kom nws tus tij laug ob tug tub tuaj mus saib neeb. Lub sij hawm thaum ntawv lawv kwv ob rab phom kas las npees ua luag tuaj mus thiab. Thaj neeb no yog ib thaj neeb hnyav heev yog li lawv ua neeb ntaus rog caum poj ntxoog thiab dab tso ua ke, cov niam cov txiv ntawm lub tsev tus ntxhais mob no yeej kib tau hmoov pias, npaj tau kua txob, pob kws liab zoo zoo tib si tos lawm. Thaum tus txiv neeb tuaj txog ntua ces nws nws cia li ntaus nruas neeb txheev qhua kiag tam sim ntawv thiab cov kwv tij neej tsa thaj tsam no tuaj pab lawv thiab , lawv muab pas ntaus vaj ntaus tsev phoo hmoov pias, txawb pob kws liab thiab noob taum rau qhov txig chaw thoob plaws tsev, muab nplawm txiv duaj nplawm qab txag qab txees thoob plaws ces yawm txiv neej thoob nce thaj ua neeb kiag tam sis ntawv. Lub sij hawm yawm txiv neej thoob ua neeb no mas tus neeg mob no nws nriaj tes nriaj taw kom lawv tso nws vim nws cov neeg los tos nws lawv mus tag lawm nws yuav mus thiab no mas niam txhiab txiv ntshai kawg nkaus tau muab ib txoj saw hlau los khi nws rau ntawm rooj txag... Yawm txiv neej thoob ua neeb nqis kiag ces nws muab tus ntxhais no daws dua ib lub npe tshiab, khi kiag ib co hluas khawv koob cim rau tej tes tej taw tag nrho. Thaum sij hawm no kuj tsis muaj dab tsi tab sis ua thaj neeb no nqis kiag xwb noj mov tag ces lawv peb txiv tub rov qab los tsev lub sij hawm no ntxoov ntxoo los luas hnub twb yuav poob tim npoo ntuj lawm.
Nplooj-2
Thaum lawv los txog ntua ntawm ib lub kwj ha ces yawm txiv neej thoob hais rau ob tug tub tias nkawv nawb npaj neb ob rab phom kas las npees tam sim no vim muaj neeg nyob pem dawm tos peb lawm. Yawm txiv neej thoob cov qhua neeb twb qhia rau nws tias poj ntxoog tos lawv kev lawm no nws thiaj paub li ntawv. Ob tug saib neeb uas yog neej thoob ob tug tub no muab nkawv ob rab phom txo kiag los tuav ntawm tes thiab nkaug kiag mos txwv rau, hos yawm txiv neej thoob ces nws cov qhua neeb twb ua rau nws pib tshee lawm. Lawv nce los nto plaws roob ces yawm txiv neej thoob hais rau nkawv tias neb saib ntawm kev tav ntawv seb yog dab tsi,? Thaum ob tug hluas no saib kiag no ua cas muaj 4 tug me nyuam poj ntxoog tos lawv kev, muaj ob tug nyob qab ke ob tug nyob qaum kev, ces yawm txiv neej thoob hais tias tua tam sim no nov yog poj ntxoog no ces nws ob tug tub no twb tsis tau nco qab tua tos nco xwb nkawv ob rab phom poob ntag nrho hos yawm txiv neej thoob rab txiab neeb ces nrov ziag ntaus kiag ib tug poj ntxoog vau hlo rau nram qab ke lawm. Muaj ob tug poj ntxoog tib tsaug ntaus tus txiv neeb no ua rau nws ob lub tswb neeb taug tag nrho hos nws tus txiab neeb nkhaus kiag ces nws ob tug tub mam li sawv tau tab sis mas lawv yeej sib ntaus vig voog rau ub rau no, nkawv mam khaws tau nkawv ob rab phom thiab muab tua cuag dab tsi rau qab ke qaum ke, tsuas hnov ib lub suab quaj " iav ...! iav ...iav ...! no...thiab ib tug poj ntxoog hais tias, kuv twb hais tias kom tsum nej sij yuav kom los tos kev ntaus seb zaum no peb tuag ob tug lawm los pov....iav iav iav...quaj cuag dab tsi li no ces lawv peb txiv tub cia li sib tu khiav los mus lawm xwb, thaum lawv los txog tsev mam li saib no yawm txiv neej thoob rab txiab neeb dam tag, hos nws ob lub tswb neeb tawg tag..nyob rau ntawm ncej puab mas siav dub nciab xwb tsis paub tias yog poj ntxoog ntaus raug los xyov yog khiav los dawm pob zeb pob ca es roog ntshav li.. Thaj neeb no muaj yeej lawm vim lawv ua rau cov poj ntxoog tuag lawm ob tug tab sis yog ib qho txaus ntshais kawg nkaus ntawm kev ua neeb ua yaig tsis hais lub neej thaum ub los nim no nco ntsoov yuav tsum xyuam xim vim koj ua neeb thaiv poj ntxoog ces poj ntxoog tsis txaus siab yuav los ntaus kom tus txiv neeb tuag thiab yog koj tsis muaj fwj huaj pab ces yus yeej tuag taus. Thaum kawg no thov ua tsaug rau vas sab www.3haivhmoob.com uas muaj qhov chaw zoo zoo no rau suav daws tuaj sau dab neeg dab txaus ntshai rau peb tau nyeem. NPaj siab tos nyeem zaj txuas ntxiv tom ntej no yog zaj hu tias; " Dab Tuag nyob hauv tsev kho mob Hoo Maum Na Xus "
Ceeb Toom: Thov txhob muab cov dab neeg dab los yog kev hlub hauv no coj mus tso rau ntawm koj lub website los yog Forum yog tias koj tsis tau qhia rau peb paub vam tias nej suav daws yuav koom tias. Nov yog ib qho peb yuav tau fwm tus neeg uas nws tau tuaj sau rau suav daws nyeem laug hnub nyoog kom txhob laj nyob. Ua tsaug ntau. 3HaivHmooB