"Nyiaj Vwj Zaj Dab Neeg Kawm Ntawv"
Nplooj1 Vim li cas Qee leej niam thiab txiv ho yuav txwv txiav txoj kev kawm? Kuv xav thov kom nej cov tub txawj ntxhais ntse muaj txoj kev kawm siab ho rhiav txoj hauv kev los daws thiab nthuav tawm pub rau peb sawv daws tau kawm los sis yog rau cov niam cov txiv uas tsis to taub tau mloog seb puas yuav ua kev kawm rau lawv kom qhib txoj kev dav rau tej me nyuam.
Tej zaum muaj tej los kuj tau hais tshaj lawm los thov nej sawv ho pab qhia los sis sau ntawv rau kuv paub thiab thov cov niam cov txiv kwv tij muam phooj ywg sawv daws ho zam lub txim pub rau kuv. Kuv Lub be hu ua Nyiaj vwj. Ziag no kuv muaj hnub xyoog yog 27 xyoo thiab kuv tau kawm tiav me me qib siab. Hais txog ntawm kuv los sis yog ntawm kuv tsev neeg, kuv yog ib tug nyiam kawm ntawv tshaj plaws tsuas yog npau suav toog txog txoj kev kawm tias yuav npaj mus kawm kom tau raws li lub siab xav tseg xws li: BA & Master. seb puas muaj hnub los hlub tau niam thiab txiv. Thaum kuv muaj hnub xyoog li 7-9 xyoo kuv ntshai kuv tus tij laug thiab kuv txiv heev vim yog thaum twg kom kuv saib ntawv ces yeej npaj ib tug qws loj li tus ntiv taw maum xoo tej thaum kuj yog rab rauj rau ntawv. Thaum qhia ntawv tsuas qhia nyeem ib zaug xwb dua li ces yeej ntaus lawm xwb kuv yeej lees txhaum vim kuv yeej tsis saib ntawv, tab sis txawm yuav ntaus los thov txhob ntaus taub hau, lwm qhov tsis hais. Thawj xyoo kuv kuj tau xeeb poob ua rau kuv ntshai heev kuv txiv kuj tau ntaus kuv. Dhau li ntawv los kuv kuj paub txog tias lawv xav kom yus txawj yog li kuv thiaj li rau siab kawm thiab saib ntawv heev lawv kuj tseg tsis ntaus kuv lawm muaj qee xyoo niam thiab txiv kuj tua ib tug qaib rau kuv ntim mus peb ua party ua dej siab. Thaum zoo li no ua rau kuv kuj zoo siab heev tuaj kuv thiaj xav tias zaum no kuv yuav tsum rau siab mus kom txog hom phiaj. suav txij li thaum kuv kawm hoob 6 los mus ces tsis zoo li ntawv lawm tsuas yog hais kom kuv tag kev cia siab lawm xwb. Thaum twg yuav mus kawm ntev los yog mus kawm deb qhov uas muaj kev sib tw ces kuv txiv yeej hais ub hais no kom kuv tag kev cia siab lawm xwb. Kuv tau hais rau kuv txiv tias: kuv xav mus kawm ntiav xav mus kawm lwm qhov chaw uas muaj xib hwb qhia zoo thiab thiaj yuav mus sib tw tau pob peev nom tswv pab mus kawm los kuv txiv tau hais tias: Txawm kawm tag siab los yeej xaus rau tus poj niam thiab yeej tsis tau ua nom ua tswv ces kav tsij los xyaum kev cai dab qhua hmoob es ua noj ua haus xwb zoo dua. kuv kuj teb tias: Qhov kawm no tsis yog kawm kom tau ua nom ua tswv os... thiab yeej xaus rau tus poj niam xwb la mad, tab sis xav kawm kom txawj ntse thiaj los tsim kho tau lub neej tsis txhob txom nyem li tej laus thaum ub lawm xwb vim tej laus thaum ub tsis muaj txoj kev kawm thiaj li tsis paub khwv nyiaj thiab thiaj li txom nyem tsuas yog tau qhov mov noj dhau xyoo xwb yeej tsis muaj nyiaj li, ces kuv txiv kuj tau cem hais ub hais no ntxiv kuv kuj tsis cam kom dhau cov laus dua li thiaj li tsis teb ntxiv. Muaj ntau zaus kuv txiv kuj tau los hais kom kuv kawm kev cai hmoob yog tham txog txoj kev ua noj ua haus ces yuav tham 24 xuab moo los yeej tham lom zem xauv bo, Txhua lo lus kuv yeej ntseeg thiab khaws cia tias nws muaj nuj qhi heev. tabsi thaum kawg ces kuv kuj txuas me me lu tias yeej zoo kawg tab sis kom zoo yeej yuav tau muaj ib qho hauj lwm thiab kawm paub los mus ua lag ua luam es thiaj tsis txom nyem thaum kuv lo lus no poob ntav ces kuv txiv lub suab luag lo lus yeej ntsiag thiab tsis nrog yus tham lawm. Txog rau xyoo 2003 kuv kawm hoob 9 ces kuv txiv yuav niam yau. kuv txiv hais tias: niam yau muaj neeg tim mes kas thiaj yuav pab tau peb cov me nyuam mus kawm tab sis thaum kuv hnov tias kuv txiv yuav niam yau ces kuv tag kev cia siab kiag hnub ntawv los mus lawm. |
Nplooj2Suav txij hnub ntawv los txog xyoo kuv kawm tiav hoob 12 (High School) ces peb txom nyem zuj zus suav txij hnub kuv txiv yuav niam yau los lawm. Kuv niam 2 tug niam hluas nyob tim mes kas los tsis xa nyiaj los rau peb li lawm. tom qab kawm tiav hoob 12 ces npaj mus sib tw kom muaj npe mus kawm hauv tsev kawm DONG DOK UNIVERSITY OF LAOS. Kuv taij nyiaj li ntawm 1,000,000 kip=100$ kuv txiv tias: Mus nug koj niam ces kuv thiaj nug kuv niam tias puas muaj ib qho nyiaj rau kuv mus xeem ntawv rau qhov tsis muaj chaw pw yuav tau nrog cov phooj ywg ntiav tsev pw li ntawm 2-3 hmo tsis muaj ntau lo li ntawm 3-400.000 kip rau kuv ces kuv txiv thiaj li hais rau kuv niam tias muab nees nkaum phav kij (20.000 kip) seb puas txaus thaum kuv txiv hais li tag ces kuv thiaj tsis mus xeem ntawv kuv thiaj los nyob tau 3 lub xyoo tom qab kuv niam tuaj rau teb chaws mes kas tau ib lub xyoo ces kuv thiaj li tuaj mus kawm thaum no los kuj nyuaj rau kuv heev vim kuv txiv yeej tsis pub kuv tuaj mus kawm tab sis txoj kev kawm nws tsis yog ib qho tsis zoo ces thaum kawg kuv kuj tau tuaj kawm nyob rau Vientiane Capital.
Niaj hnub no Txoj kev kawm los yog kuv yuav kawm yam twg ces kuv yeej tsis qhia tias kuv yuav kawm yam no yam no txog txij lawv paub ces kuv kawm twb yuav tiav lawm xwb yog tsis ua li no ces yeej tsis tau kawm li. kuv txiv kuj chim rau kuv heev txawm li no los kuv yeej tsis tu siab rau kuv txiv vim yog nyob rau ntu txom nyem txhua yam uas kuv txiv tau hais no kuj yog ib txog kev qhia kom kuv haj yam rau siab xwb. Txawm niaj hnub no kuv txiv tseem tu siab rau kuv los kuv yuav nco lawv tej txiaj ntsim uas yug tu kuv loj hlob thiab kuv yuav tsis tu siab rau lawv ib qho meme li. Txawm li cas los xij niaj hnub no kuv kuj tau mus ua hauj lwm nyob rau PHUBIA MINNING lawm txawm yuav ua dag zog xwb los yeej zoo dua tsis muaj hauj lwm ua niaj hnub no ces kuv kuj pab tau kuv tus kheej lawm tab sis kuv tseem tshuav 2 tug muam nyuam qhuav tuaj pib 2013 lub 11 hlis ntuj ntiaj teb no kuv mam li maj mam pab seb puas muaj ib hnub ho hla dhau txoj kev txom nyem kom nws ho pab tau nws tus kheej. Txawm li cas los zoo kuv lub siab xav tsis tag kom yuav muaj nyiaj nplua nuj mam li kawm tsuas yog xav thov kom ib tsoom niam tsoom txiv uas nej yuav txhawb nej tej me tub me nyuam mus kawm yuav tau txhawb dej siab dej ntsws kom nws muaj siab kawm xwb muaj li cas muab li ntawv yeej zoo lawm vim niam thiab txiv yog tus txha nqaj qaum uas khov.Tsis txhob hais kom tej me tub me nyuam tag kev cia siab. Kuv muaj li no xwb mam li ntsib nej dua lwm zaj dab neeg, kawg no thov ua tsaug rau vas sab 3haivhmoob.com uas qhib kev dav muaj qhov chaw no rau peb suav daws tuaj tawm tswv yim los yog piav peb tej dab neeg ua kev kawm rau suav daws . Uatsaug Nyiaj Vwj. |
Lus Ceeb Toom:
Cov dab neeg kev hlub thiab txhua yam hauv 3haivhmoob.com no peb tsuas yog tso rau sauv daws tau tuaj nyeem laug caij nyoog xwb txwv tsis pub leej twg muab luam mus muag los yog ua lag luam, yog koj coj mus kho los yog ua lwm yam tsis tau qhia rau peb paub , thaum peb tshawb tau lawm koj yuav raug nplua raws txoj cai ntawm lub teb chaw koj nyob ko.
Ua tsaug ntau:
3HaivHmooB.Com
Cov dab neeg kev hlub thiab txhua yam hauv 3haivhmoob.com no peb tsuas yog tso rau sauv daws tau tuaj nyeem laug caij nyoog xwb txwv tsis pub leej twg muab luam mus muag los yog ua lag luam, yog koj coj mus kho los yog ua lwm yam tsis tau qhia rau peb paub , thaum peb tshawb tau lawm koj yuav raug nplua raws txoj cai ntawm lub teb chaw koj nyob ko.
Ua tsaug ntau:
3HaivHmooB.Com