Ntev los lawm muaj ib tug Noog Kaus ncauj ntev ya los pom ib tug hma nti huaj cheej yuav tuag ntxeev mus ntxeev los ntawm ib tsob qab ntoos thiab nws cov aub ncaug nrog zig xwb...Tus noog Kaus Ncauj Ntev no saib mus saib los txaus hlub dhau hwv lawm thiaj ya nqis mus nug tus hma tias" Phooj Ywg yog ua li cas rau koj lawm cas koj yuav nti mus los heev ua luaj no yuav tuag li?". Tus niag hma teb tias: " Thov koj lau phooj ywg.. twb yog kuv noj nqaij es ib tug pob txha daig kuv caj pas lawm thau tsis tau tawm los kuv thiaj yuav tuag li no. Koj pab cev koj tus kaus ncauj ntev ntev ko mus tais es muab rub tawm los kuv thiaj li yuav tsis tuag nawb thaum pab tau kuv lawm kuv mam li muab ib qho khoom plig ua koj tsaug". Ces tus hma txawm rua ncauj, tus noog kaus ncauj ntev no thiaj cev nws tus kaus ncauj mus lauj tau thooj nqaij thiab pob txha uas daig hma caj dab tawm los lawm. Thaum thau tau thooj pob txha tawm los lawm ces niag hma no cia li khiav tiaj lias mus lawm xwb tsis quav ntsej tus noog kaus ncauj ntev li. Tus noog kaus ncauj ntev thiaj hu hma tias:" Phooj ywg, koj muab koj qhov khoom plig uas koj kom kuv pab koj es koj yuav muab rau kuv no tso koj mam mus ma?. Niag Hma teb tias: " Koj tseem yuav khoom plig thiab los!..Kuv tsis muab koj caj dab xo thaum koj cev caj dab nkag kuv qhov ncauj ces twb zoo kawg lawm ..Kav tsij ya khiav mus tsam kuv tig rov qab los ces koj sab thiab caj dab tu nawb..! Ces tus noog Kaus Ncauj Ntev thiaj li ya mus lawm..
Zaj Dab Neeg no qhia tau tias: " Ua phooj ywg nrog neeg phem ces luag yeej tsis nco yus tus txiaj ntsim li tseem hais lus saib tsis taus yus xwb..tsis nco thaum uas nws yuav tuag es yus tau pab nws li lawm" -Ceev faj ua ntej koj yuav pab leej twg tsam Koj ntsib li tus Noog Kaus Ncauj Ntev No.
Koj xav li cas rau zaj dab neeg no pab qhia rau nram no.