Nyob rau ntawm lub zos xoom Vib Nais tawg rog Thaib Teb thaum xyoo 1987 ntawv kuv thiab ib co phooj ywg peb kawm ntawv ces cov kws qhia ntawv kom peb mus pw zov tsev kawm ntawv li txhua zaus. Ib txwm yav tag los yeej tsis muaj teeb meem dab tsi tab sis hmo peb pw no yog xiab 15 qaim hli heev li, nyob rau ntawm tog tsev muaj ib lub me nyuam kwj ha thiab ob lub pob luaj loj tsim tsawv puab kiag rau peb lub tsev kawm. Thaj tsam li ntawm 11 teev yuav txog ib tag hmo ces peb cia li hnov ib lub suab quaj qw thiab ntsaj heev heev sab nraum tog tsev tuaj ua rau suav daws tsis tau luag li. Hmo ntawv peb 3 leeg tuaj pw xwb tau hnov cov suab kab npis suab kab cis liv thiab lub suab quaj qw ntsaj no sib xyaws daws mas peb plaub hau xob tag thiab nti tsis taus tsis tau luag li..kuv yog tus pw hauv lub nrab kuv ntshai tab sis tseem muaj nkawv ob tug nyob ob sab thaiv kuv lawm hos ntawm nkawv mas tshee ntshee peb tsis tau luag tawm li..qaim hli kawg nkaus tab sis xauj raws cov qhov tsev mus yeej tsis pom muaj dab tsi li tsuas pom cua tshuab es cov nroj mas ya zom zaws qaug cuag dab tsi raws qhov cua tuaj xwb. Lub suab quaj qw ntsaj no nws ua tau ntev kwv yees li ntawm 40 feeb los yog 40 na thi mam li ntsiag ces hmo ntawv peb cia li sawv los muab taws rauv ib hmos kaj ntug tag kis mam qhia rau cov xib fwb thiab cov phooj ywg xwb ces txij li ntawv xib fwb lawv thiaj tsis kom suav daws tuaj pw zov tsev lawm vim muaj tej yam txias siab heev li no tshwm sim. Nyob tsis deb ntawm lub tsev kawm ntawv no muaj ib yim Hmoob xeem lauj nyob rau ntawv lawv muaj ob tug ntxhais thiab peb tau mus nrog tham ua si thiab piav txog cov xwm txheej no rau lawv, ces tus niam tais thiaj piav tias nyob qhov chaw no lawv nyeej hnov lub suab zoo li peb hais no thiab, qhov teeb meem mas ntshe yog muaj tib neeg sib tua tuag ntawm no es zoo hnub zoo hmo tus xyw dab tuag no sawv rov qab los quaj xwb. Tej thaj chaw muaj neeg sib tua tuag mas tom qab ntau ntau xyoo yeej muaj tej yam zoo li no..txaus ntshai kawg nawb cov phooj ywg. Es mam ntsib nej dua lwm zaus, ua tsaug rau www.3haivhmoob.com uas muab qhov chaw no rau kuv tuaj piav zaj keeb kwm dab tuag no rau suav daws tau kawm. Sau npe: Tub Kawm Ntawv nyob xoom Vib Nais.
Tej yam zoo li no koj pus ntshai thiab puas ntseeg?