Maiv Puv yog leej tug nyob qhov twg? Ua dab tsi? Thaum ub nyob lub teb chaws twg? Mus taug nws keeb kwm raws li nram no tau..... 1. Tam sim no koj nyob lub zos hu li cas , teb chaw twg? Maiv Puv: Tam sim no kuv nyob lub zos Khej Me, Tas npoo khej naib( Taboon Khek Noy), As nphaws Qhaum Qhaub, Xeev Phev Tshab Npoo, Thaib teb. 2. Xav paub koj keeb kwm me me , thaum ub niam txiv yug nyob sab teb chaws twg los? Maiv Puv: Kuv niam kuv txiv lawv yug kuv nyob rau lub Zos Aub Am, lub nroog Noom Hej , Xeev Xias Khuam, teb chaws Los Tsuas. 3. Koj lub npe tiag tiag yog hu li cas? Maiv Puv: Kuv lub npe tiag tiag niam txiv tis hu ua Paj , kuv yog xeem Thoj ces yog Paj Thoj. 4. Koj muaj tsawg tus viv ncaus & tsawg tus nus? Maiv Puv: Kuv muaj 6 tus viv ncaus hos 1 tug nus , tag nrho peb yog 7 leej. 5. Ua li lawv puas ua mauv vim (movie), puas hu nkauj li koj thiab? Maiv Puv: Lawv tsis ua mauv vim (movie) thiab nyob Nplog teb tag lawm. Muaj kuv tus niam hluas Dawb Thoj, thiaj li hu nkauj thiab ua mauv vim (movie) ib yam li kuv xwb. Tam sim no nws nyob teb chaws As Mes Lis Kas. 6.Nco puas tau thawj zaj movie koj ua npe hu li cas thiab koj ua tus dab tsi nyob rau hauv? Maiv Puv: Thawj zaj movie kuv ua hu ua Ntxawm Qaum Ntuj, nyob rau hauv kuv yog Phaj Ej tus niam tij. 7. Cov movie koj ua los txog tam sim no muaj tsawg zaj lawm? Txog thaum 2014 no? Maiv Puv: Nco tsis tau lawm vim ntau heev li , kuv xav tias muaj li ntawm 80 mus txog 100 tawm zaj.... 8. Zaj uas koj nyiam tshaj yog zaj hu li cas? Maiv Puv: Zaj hu ua Nom Phaj Thiab Maiv Puv. Muaj ib zaj nco tsis tau npe lawm tabsis yog zaj uas kuv ua tus piav tes xwb ruam raum tsis paub hais lus , kuj yog ib zaj uas kuv nyiam kawg thiab. 9. Zaj mauv vim koj tsis nyiam kiag ne yog zaj twg? Maiv Puv: Zaj uas ua niam hlob niam yau sib ntaus kuv tsis nyiam kiag, vim peb cov poj niam txheej tam sim no tsis kam lees txais yuav tej yam zoo li no 10. Koj ua mauv vim (movie) los tau tsawg xyoo lawm? Maiv Puv:Kuv ua mauv vim (movie) los tau li 10 lub xyoo lawm. 11. Nej ua mauv vim (movie) leej twg yog tus tis lub npe hu ua Maiv Puv rau koj? Maiv Puv: Xab Thoj yog tus tis lub npe Maiv Puv no rau kuv.
12. Tib neeg sij muab koj hu ua Maiv puv no koj pus chim? Maiv Puv: Kuv tsis chim li , vim lub npe no yog lub ua rau kuv nrov txog qhov twg los tej niam txiv kwv tij neej tsa paub kuv zoo. 13. Ua li tam sim no koj puas tseem ua mauv vim (movie) thiab? Maiv Puv: Kuv tseem ua thiab tab sis yuav tsum yog kom kuv ua tag nrho ib zaj , hos yog kom kuv ua tawm me me rau hauv xwb no ces kuv tsis ua lawm. 14. Raws li paub koj hu nkauj thiab, Koj hu tsawg txuv nkauj lawm? Maiv Puv:Kuv twb hu tau 8 xuv lawm, xuv thib 9 tab tom yuav tawm rau lub July 4th los yog lub tsiab 30 Hmoob nyob rau Meskas teb. 15. Tsis ntev no koj twb tuaj rau teb chaws mes kas lawm, ua li koj puas yuav mus rau Fab Kis teb, Nplog teb, suav teb , nyab laj teb , tej qhov chaw uas muaj Hmoob nyob es kom lawv ho tau ntsib koj thiab? Maiv Puv: Kuv xav mus rau cov teb chaws uas muaj peb Hmoob nyob rau yav tom ntej thiab.
16. Koj tus phooj ywg zoo tshaj plaws yog Nom Phaj, Pog nplaum, yawg Nplaum , los yog leej twg? Maiv Puv: Nom Phaj, Pog nplaum, thiab yawg nplaum lawv yog kuv cov phooj ywg ua mauv vim (movie) xwb. Kuv tus phooj ywg zoo thiab paub siab tshaj plaws hu ua Ntxhi Vwj. Ntxhi kuj yog ib tug ua mauv vim (movie) tau ntau zaj thiab. 17.Hauv movie mas Nom Phaj ntaus koj tag li xwb, yog tau ib tug txiv phem npaum ntawd , koj pus uv nyob txog hnub kawg? Maiv Puv: Yog ua mauv vim (movie) kuv thiaj uv taus xwb, lub neej tiag tiag yog tau ib tug txiv phem npaum ntawd kuv yuav nrog nws nyob tsis taus mus txog hnub kawg li.
18. Saib hauv mauv vim ( movie) mas koj siab ntev kawg, tus neeg tiag tiag, koj siab pus ntev li hauv thiab? Maiv Puv: Kuv siab kuj tsis ntev heev , kuj ho yog cov neeg uas siab tsis luv thiab. Kuv yog cov nrab xwb, tab sis kuv ua dab tsi yuav tsum yog tias muaj paus muaj ntsis zoo kuv thiaj yeem.
Nplooj - 2
19. Hauv mauv vim (movie) nom phaj ntaus koj tag li xwb, tawm sab nraud tsis ua movie lawm , koj pus pauj rov qab thiab? Maiv Puv: Nyob hauv mauv vim (movie) tsuas yog ua raws zaj dab neeg xwb, tawm sab nraum no kuv kuj tsis chim rau Nom Phaj los yog tias pauj rov qab rau nws thiab. 20. Pog nplaum neb mas sib tsuab tag li xwb nyob hauv mauv vim ( movie), tawm sab nraum no neb puas yog zoo phooj ywg? Maiv Puv: Wb kuj yog phooj ywg zoo xws teb xws chaw thiab xwb. Sib ntsib los kuj sib hu nug kev noj qab nyob zoo tej li lwm tus tib neeg xwb. 21. Thawj zaug uas koj tu siab tshaj nplaws ntawm lub neej yog vim li cas ho tu siab, thiab tau ntev npaum cas los lawm? Maiv Puv: Thawj zaug uas kuv tu siab tshaj plaws ntawm lub neej yog lub caij thaum kuv tsiv teb chaws sab Nplog teb hla dej los mus rau sab Thaib teb. Vim tso tej laus thiab lub teb chaws yug yus tseg... 22. Thawj zaug uas koj zoo siab tshaj plaws ne ho yog dab tsi? Thiab ntev li cas los lawm thiab? Maiv Puv: Thawj zaug uas kuv zoo siab tshaj plaws yog thaum xyoo 2011 uas kuv ua tau npe tuaj saib teb chaws mes kas. 23. Puas muaj lus dab tsi yuav hais pub cov niam txiv uas pab txhawb koj cov nkauj thiab cov mauv vim (movie), es lawv yog koj cov zoo phooj ywg thiab.? Maiv Puv: Kuv thov ua tsaug ntau ntau rau ib tsoom niam txiv kwv tij Hmoob nyob rau txhua lub teb chaws uas nej pab txhawb kuv cov mauv vim (movie) thiab kuv cov nkauj yad tag los es kuv thiaj li muaj hnub no. Nej tus txiaj ntsim kuv yuav nco ntsoov mus tag ib sim neej tsis nploj. 24. Yog xav tiv tauj koj ua mauv vim (movie) no ho ua cas thiaj nrog tau koj tham? Maiv Puv: Sau ntawv rau kuv es kuv mam li ho hu rov qab rau nej los kuj tau. Tam sim no kuv tsis tau cog lus nrog leej twg li tsis hais ua nkauj los yog ua mauv vim, kuv ua tau rau txhua tus . 25. Ua li koj puas siv internet, siv email los yog siv Facebook es koj cov phooj ywg xav pom koj lawv ho tuaj saib hauv tau thiab? Maiv Puv: Kuv yeej muaj ib tug account hauv tab sis kuv tsis muaj caij tuaj siv ces kuv tsis tuaj hauv li. 26. Txawm koj muaj caij thiab tsis muaj caij, koj siv internet thiab tsis siv los zaum no peb tso koj rau hauv peb lub website lawm ces lawv yeej yuav tuaj pom koj hauv xwb xwb li yog lawv xav paub txog koj tus kheej los yog tias lawv nco koj hahaha….? Mauv Puv: Hehhehe...! Yog lawm , ua nej tsaug nawb. 27 . Koj puas muaj dab tsi ntxiv thiab? Maiv Puv: Tam sim no kuv tus ntxhais npe hu ua Mi Mos Xeem Vaj , tab tom yuav tawm nkauj tshiab thov cov niam txiv kwv tij neej tsa nej pab txhawb nqa nws thiab. 28. Yog leej twg xav nrog koj tham los yog nrog koj ua kev lag luam no yuav tham tau li cas? Maiv Puv: Nej sau ntawv rau kuv raws qhov chaw nyob ntawm no tau, tso nej xov tooj & chaw nyob kuv mam hu los yog sau ntawv rov qab rau nej kom sai li sai tau.
Pa Thao (Paj Thoj) 97 M 8 Taboon Khek Noy A. Khao Khao C. Phetchabun, Thailand 67280
Lus Qhia:Cov lus sib tham no yog peb twb nrog Maiv Puv sib tham thaum xyoo 2012 lawm tsuas tso rau suav daws tau nyeem xwb tej zaum qee yam ntawm Maiv Puv yuav hloov mus lawm. Ua tsaug.