Pw Qub Zog Ntsib Dab Tuag Quaj

Zaj Keeb Kwm no tshwm sim rau  ntawm lub zos  Xam Xauj teb chaws Los Tsuas thaum xyoo 1974. Nyob rau xyoo ntawv  teb chaws ua voj ua viag tib neeg nyob tsis taus lawv tej zej zog vim yog kev tsov rog lawv tau khiav mus nyob rau lwm lub zos  lawm. Kuv thiab kuv tus txiv txawm  Tooj Kaim wb ua hauj lwm nyob rau tim lub nroog  Looj Ceeb  thiab nom tswv tau tso cai wb rov qab  los mus tsev.  Lub sij hawm ntawv nws yog lub 7 hli ntuj uas  ntuj los nag loj heev 7 hnub  7 hmo tsis tu li ces wb ob txiv tub tau los tsaus ntuj rau ntawm lub  qub zog Xam Xauj uas Hmoob yeej ib txwm nyob coob coob tab sis tib neeg khiav tag tau li 2 xyoos tawm tsis muaj neeg nyob lawm. 
               Thaum wb los txog nov tsaus ntuj heev lawm thiab nag kuj los tuam tsam tsis tus li  yog li ntawv kuv tus txiv ntxawm tau hais tias kom wb mus nkaum nag thiab pw hauv Hmoob lub qub tsev uas nyob rau ntawm qaum kev. Wb kuj tsis nco qab xav los yog ntshai dab tsi,  thaum wb mus txog hauv lub tsev wb tau muab Hmoob tej phab ntsa tsev rhuav coj los rauv cig ntsaj  thuav thiab muab wb cov ris tsho dai ziab rau ntawm ib sab.   Lub sij hawm no  twb lig heev kwv yees yog  11 teev ze ib tag hmo lawm wb thiaj li tau muab cov phab ntsa no coj los pua rau ntawm tag wb pw.  
              Lub qhov cub tuag tag ces wb txawm tsaug zog hlias lawm...tos wb hnov ces  tib neeg twb quaj nyiav  suab nrov heev hauv Hmoob lub qub txaj tuaj thiab yeej tsis ntsiag li ..kuv thiaj tau tsa kuv tus txiv ntxawm ces wb ob leeg sawv los zaum mloog los cov suab quaj nyiav no yeej tsis tsuam li..zoo nkaus li yog muaj tib neeg nyuam qhuav tuag kiag es  cov tsev neeg tab tom quaj nyiav thiab hu tus tuag ntawv. Thaum no mas wb plaub hau xob loj npaum nkaus li lub phawv thiab ntshai heev li... Kuv tus txiv ntxawm thiaj li  tau hu  txog nws pog thiab nws yawg nkawv tuag tag lawm kom los pab wb thiab hu lub ntuj lub teb tias wb yog tub rog  rov los vaj los tsev xwb tab sis wb los ntsib dab hmo no thov kom  lub ntuj  cov tim tswv los cheem qhov  dab tuag quaj nyiav no..ib pliag zoj ces thiaj li ntsiag lawm..thaum no wb  cia li  sau khaub ncaws ces  maub tiv nag  ib hmo los tsev dhau plaws lub zos no lawm.   
               Thaum los txog tsev wb thiaj piav cov xwm txheej no rau kuv txiv ces kuv txiv piav tias lub tsev wb los pw  ntawv yog toj xeem  Tsav zeb lub , thiab nws niam tau tuag rau lub tsev no lawm...wb mam to taub tias yog tus xyw dab tuag  no sawv los quaj xwb.  Ib tsoom Phooj  ywg Hmoob nco ntsoov yog nej mus kev deb es los tsaus ntuj rau cov qub zog li wb no thov maub los kom dhau vim yeej  muaj dab tuag thiab xyw dab rau lawv tej tsev lawm yog leej twg pw ces yuav ntsib teeb meem ib  yam nkaus li wb. Nov yog ib qho txaus ntshais kawg nkaus ntawm kuv lub neej.  Es ua tsaug ntau ntau rau  www.3haivhmoob.com uas  muaj qhov chaw piav dab no rau peb tau tuaj nyeem thiab ua kev kawm, mam ntsib nej dua.
Sau Npe:   Nkaj ci   nyob ze qub zog Xam Xauj
           
           

Zaj Keeb Kwm no puas txaus ntshai heev thiab sau rau nram no  :

Comment Box is loading comments...