Nplooj1
Nplooj Ib
Kawm Khawv Koob
Sau Kev Hlub
Dab Neeg Kev Hlub
Zos Dab-Ghost
Neej Neeg
LoJ Huam ThiaB PaJ Vuam Txoj Kev HluB
TXOJ HMOOV TSO TUS NEEG KUV NCO
Loj
huam thiab Pajvuam txoj kev hlub tau tshwm sim rau lub zos Phajluj nroog Mooscab xeev Xiaskhuam tebchaws Nplog. Kuv thiab Pajvuam wb tau nyob thooj zej koom zos thooj teb koom chaw rau lub zos Phajluj uas ib sab yog toj kub zeb dawm kub tsua, hauv nruab nrab raws txoj ntug kev loj yog nras liaj nras teb tus thiab ib sab yog toj teb roob nqeeb roob tauj. Txhua hnub ntxov yuav pom ntxim lib, diab, tseev thiab noog liab txia ya quaj cuag tsi qab vag tsib taug. Tsa muag saib ncig lees lub zej zog yuav pom tauj khaub rhuab, tauj ntxhw, hav nqeeb, xyoob puj/tuam tswm, hav txiv yeem, pob zeb pob tsuas, teb npleg, teb pob kws thiab teb liaj puv toj puv hav. Tawm rooj plaws tseem hnov puj daum dab laug quaj nqaj to tim ntug tsua. Tsaus ntuj yuav hnov qav liaj quaj qog qees. Phab tsua ntawm sab ntug dej Phajluj yuav pom nas ntab dai daj vog. Hauv tus dej Phajluj tseem pom ntses khiav zom zaws. Kuv yuav tsis qhia txog wb txoj kev hlub tias chivkeeb huamyuaj tshwm sim licas vim piav ntau ntshav nce taubhau. Pajvuam wb tau ua nkauj nraug thiab sib hlub yam kawg siab kawg ntsws loj hlob rau Phajluj txog rau duas wb txiav txim siab los sib sau ua ib cuab tabsis hmoov tsis muaj Pajvuam tus phauj tus tub tau tuaj nqis tsev hais Pajvuam txog rau qhov cov laus txiav txim siab yuam laub Pajvuam rau phauj tus tub yuav. Thaum ntawv tsis hais kuv losyog Pajvuam wb tau nyuaj siab ntxhov plawv, pw tsim tsis xav sawv. Chim siab dhau tsuas hnov mob yus lub taubhau, mov tsis nco noj dej tsis nco haus, ntuj kaj nrig los zoo li ntuj tsaus. Lawv tau tuaj nqis tsev hais Paj vuam tau 3 hnub 3 hmos raws Liajlwg Rhwvmws txoj kab tshoob kev kos txog rau qhov lawv saws tau Pajvuam mus ua lawv nyab, hos kuv ces nyob nros ntshi de tes nruj nrho tuaj tom qab. Xyoo ntawv kuv lub sia lub ntsws zoo li lwj tag thiab nws mob cuag rwj aws ncus, yim xav txog Pajvuam wb txoj kev hlub yim ua rau kuv txoj pa yuav tu. Yim taug wb tej qub ke yim ua rau kuv rov nco nco Pajvuam lub npe. Tawm rooj plaws thiab rov txog vaj los pom Pajvuam tus duab roos kuv tag, kuv ntsia lub ntiaj teb ua plag nplas. Txawm li ntawv los kuv ua tiag nyiajntxeem phoj phoj txoj sia los tau ib ntus, txoj kev chim kev tu siab mam xam ploj zuj zus. Hmoov tsis muaj lub tebchaws Nplog tau poob rau tog sablaug koojsam hauv xyoo 1975 thaum lub 5 hlis ntuj. Thaum ntawv Pajvuam lawv thiab kuv tsevneeg nyias xia nyias huas kev khiav peem siav tuag plos zoov plos tsuag hauv tebchaws Lostsuas ua neeg thojnam los mus rau Thaibteb. Hmoov muaj kuv thiab tsevneeg tau tho toj lug dawm los tawm rau Thaibchaw thiab ho tshaulim tuaj mus rau Meskas hauv xyoo 1978. Thaum tuaj txog rau Memkuj, kuv tau mus kawm tiav kuv txoj lajtxheej kho tshuab cuatxias (air conditioning career) thiab tau los ua lajkam thiab yuav poj niam ua neej xws teb xws chaw. Lub caij nyoog tau ncaim yam tus dej tsis tig rov, nag hmo tau ncaim tsis muaj hnub los. Xav tsis txog tias, 10 lub xyoo tom qab Pajvuam wb yuav tau sib ntsib nyob rau Memkuj yam tsis nco fajseeb. Muaj ib hnub Pajvuam lub cuatxias tuag tsis ua hauj lwm, nws txawm tau tshawb hauv vasab pom kuv txoj lagluam kho tshuab cuatxias. Nws tsis paub tias yog kuv thiab wb ib leeg yeej tsis paub ib tug tias, ciaj los tuag lawm vim sib ncaim tau ntau dua 10 lub xyoo yam ntuj teb ntsiag moo. Kuv tau mus txog rau tim Pajvuam tsev thiab mus kho Pajvuam lub tshuab tag raws li qhov nws tau hu kuv. Thaum kuv yuav luag cev tes qhib Pajvaum lub qhov rooj kuv saib tim nws daim phab ntsa ua ciav pom nws daim duab luag nyav 10 lub xyoo dhau los dai rau tid. Daim duab ua rau kuv ceeb ib plhaw thiab xav tias yog tiag los npau suav? Kuv rov saib dua ib muag thiab kuv thiaj tsa ncauj nug nws tias, tus muam! Daim duab no yog leeg twg thiab muab qhov twg los? Nws teb kuv tias, twb yog kuv. Thaum ntawv kuv mam ua zoo saib nws zoo zoo, nws los kuj mam tsa muag saib kuv, wb ib leeg thiaj rov cim tau ib tug tabsis Pajvuam lub ntsej muag daj tag thiab txaj muag rau kuv heev {vim nws tus txiv nkawv nyob rau cov tsev ntiav sib puab (tsev xauj apartment) me me ti ti yam txom nyem ntsuav, nraum qab tsib taug twb cog tsis tau tsob tauj dub noj, nws tus txiv los tseem quav luam yeeb, quav dej quav cawv pw lig tsis xav sawv}. Nws cia li muab kuv tib thawb rau nraum zoov thiab kaw qhov rooj nrov npoog cia. Nws ua li rau kuv los vim yog nws lub vaj lub tsev sw zaws, tsw quav luam yeeb thiab cawv ntxiag. Thaum kuv mus kho cuatxias hauv nws lub txaj yeej tsis paub tias tog twg yog hauvncoo thiab kotaw. Thaum tsav tsheb rov los tsev kuv nim xav twj ywm tias, ntuj os Pajvuam! Cas koj nim tuaj ua neej txom nyem ntsuav os tus neeg kuv lub siab tseem daifo, yog muaj hmoo tau koj los ua kuv poj los kho kuv tsho, sim neej yuav cia koj nyob ntxuav taw sov so es kuv mam mus khwv los rau koj noj. Sim neej yog lam tau koj los rau kuv puag los rau kuv yuav, ntshe yuav hlub koj tsis dhuav, lub zoo vaj tse los yuav yuav rau koj nyob thiab lub zoo tsheb caij los yuav peem rau koj kom txhua. Tiam no ntshe yog npau suav lawm xwb os tus muam! Tusau: Yeej huam Vaj Australia
Tuag Ua DaB Rov Los
Lwm Yam Uas Koj Xav Mus SaiB
Dab Neeg Kev HluB
D
ab Neeg Tswv YIm
Dab Poj Ntxoog
HmooB Nyab Laj
Cov Zaj Lus
VDO Neej Neeg
Ci Vaj Lub Neej Tu Siab
Nyob Ntiaj Teb Part I
Ci Vaj Lub Neej Tu Saib
Nyob Ntiaj Teb Part II
Suab Nag Lauj Tham
Tau Ib Tug Nraug DaB
1 tug ntxhais raug DaB
Koj xav li cas rau txoj kev hlub tu siab saum no sau nram qab no
.
Nias nov rov mus Nplooj Kev SiB HLUB
Widget
is loading comments...