Khoom Pov Haum
By: Hmoob Khej3
birdybrid@yahoo.com Nplooj-1 Thov txim ntau yom ib tsoom phooj ywg sawv daws tseeb tiag qhov ntawm no yog admin kam rau peb tuaj mus sau txog kev hlub xwb tab sis kuv ho muab tham tej yam uas tsis yog kev hlub zoo li nws tsis tshua raug pes tsawg yom tiam sis licas los nej ho zam txim rau kuv thiab tsis tag li ntawv thov txim ntawm admin thiab. Zaj kuv yuav tham ntawm no tsis yog kev hlub nws tsis muaj feem cuam rau kev hlub me me kuv thov muab tis npe tias "Pov Haum Pov Khoos" Peb ib txhia cov uas tseem nyob rau ntuj qub qab peb yeej paub txog "Phab Lev Laim" hais tias nws yog dab tsi nws yog ib yam khoom zoo ua pov khoos muaj cuab kav tiv thaiv tau mostxwv phom tua tsis raug thiab tua tsis nrov. Kuv muaj ib tug tij laug kwv tij tus tij laug ntawm no nws yog kuv txiv lawv phaum neeg tiam sis nws ho lawm tub ntawm kuv txiv lawm. Lub sij hawm thaum kuv tseem menyuam yaus hnub nyoog thaj tsam 11 xyoos (1984) nws tau tham rau peb sawv daws mloog tias yav thaum ub Lub Teb Chaws Nplog tseem tab tom ua tsov ua rog nws kuj yog ib tug tub rog Vaj Pov nws kuj tau sib ntaus sib tua nrog Nyab Laj ntau zaug. Muaj tej zaug Nyab Laj kuj tau tuaj ntaus lawv khaib tiam sis qee zaug nws kuj tau mus ntaus Nyab Laj khaib. Nws yog ib qho danger thiab txaus ntshai heev li. Phom nrov roog diaj luj tem pawg pig poog Npe 40 tawg npi npoog txhia chaw tub rog cov tuag los muaj cov raug mob los muaj coob. Nws tus kheej kuj ho tsis ua li cas tsis raug mob tsis raug qhov twg tsuas muaj raug luag lwm leej lwm tus xwb hos nws li sib ntaus sib tua txhua zaug nws puav leej tsis raug qhov twg li. Tos nws ho tsis raug mob li los yog vim nws muaj "Khoom Hav Xam" zoo tiv thaiv nws tus kheej tsis pub kom os txwv thiab luj tem raug nws. Qhov khoom ntawv nws yog ib lub Lev Laim luaj nkaus taub ntiv tes. Muaj qee zaug nws mus dawm Mine thaum lub mine tawg kuj ho tsis raug nws tiam sis raug cov uas nrog nws ua ke. Muaj ib zaug lawv mus lav tas vis (Patrol) Nyab Laj caws ib lub mine tu taw nws mus tsuj tau lub mine tawg tuaj ua rau nws txhais khau boot ntsoog tag nws lub ceg ris ntsoog txij puag pem hauv caug tu tag tiam sis nws txhais ko taw tsis tu tsis ua li cas tsuas yog thaum lub mine ntsawj tuaj nws txhais ko taw doog thiab mob tau yuav luag 2 weeks xwb. Thaum lawv los hla rau sab "Npuas Nploom" Nyab Laj zov kev tua lawv muaj ib yawg ua ntej nws yog tus thib 2 dua li cov ces lawv qab tag Nyab Laj nkaum pem qaum kev cov niag hav tauj khaub rhuab lawv mus kev sib nrug 3 dag 1 tug txog ntua ntawm qhov Nyab Laj nkaum lawv tsis paub tias Nyab Laj zov kev qhov ntawv. Thaum ntawv Nyab Laj tib txhij tib tsaug phom tam sim tuaj rau lawv raug kiag tus ua ntej thiab 2 tug lawv nws qab ntog kiag rau ntawv tuag kiag lawm tiam sis mas kuj ho tsis raug nws. Thaum ntawv nws thiaj li pw nthi hauv av tsa hlo nws rab phom M16 qhau flawj kiag (Full Auto Mode) tua tag nrho 1 npas 30 lub mos txwv rau cov Nyab Laj ntawv. Thaum ntawv sawv daws cov lawv qab mam li sib pab tua lawv cov M16 nrov ib zag ib zag rau cov Nyab Laj pem qaum kev thiab txawb 2 lub luj tem mus rau Nyab Laj cov suab phom thiaj li mam ntsiag. Zaum ntawv lawv tuag 4 leeg hos Nyab Laj tuag 6 leej. Los txog rau thaum teb chaws tawg sawv daws khiav tawm tuaj mus rau Thaib Teb lawv khiav tuaj mus rau luv Xum Noom Qhais lawv tuaj nyob rau Noom Qhais tau ib ntus ces lawv mam li los nyob rau Xum Vib Nais. Thaum los nyob rau Vib Nais lawm nws kuj tseem khaws nws qhov khoom ntawm no cia zoo heev (kuv tus kheej kuv pom kiag ntawm qhov muag yog ib lub me nyuam pob zeb dub dub ci nplas luaj tau ntiv tes xoo). Nws tham rau peb mloog tias yog tias koj muaj ib qho Lev Laim zoo li qhov kuv hais ntawm no koj yuav tau cai kom zoo yog tias koj coj qhov khoom ntawm no nrog koj lub cev lawm ces koj yuav tau cai tsis pub nrog poj niam pw los yog chwv poj niam yog tias koj tsis caiv ces nws yuav tsis khoos lawm. Lub Lev Laim ntawm no nws haus zib ntab los yog zib muv muab nws tso tau ib lub phaj laub ib khob zib ntab tso rau ib sab ib chim koj los saj cov zib ntab ntawv nws tsuag cuag dej lawm xwb tsis qab zib li tej zib ntab lawm. Yog tias koj tsis teev nws tsis muaj zib ntab rau nws ces nws txawj khiav ntawm koj mus txawm koj yuav muab nws xauv cia hauv rhawv los txog thaum koj mus qhib saib ces pawv lawm xwb vim tias Lev Laim nws ciaj sia. Yog tias koj muaj lub Lev Laim ntawm no txog caij ntuj no hauv koj tsev mas sov so cuag li teb chaws no koj tso heater hos txog lub caij ntuj sov hauv koj tsev txias ziag cuag koj tso A/C. Lev Laim nws zoo ua pov khoos tiv tau mos txwv phom tua tsis nrov li kuv hais ntawv tshaj qhov ntawv lawm Lev Laim nws tseem tiv thaiv tau dab qus tiv thaiv tau nyuj ciab qe zeb yuav tsis raug tus tswv. Lev Laim muaj ntau yam Lev Laim xws li muaj ib yam mas nws kheej kheej dub dub ci nplas dub nciab xwb. Ib hom mas nws ho tsis kheej kheej nws zoo li lub txiv grape luaj ntiv tes dub thiab ntsuab nws cov colors zoo nkaus li cov plaub os nqhuab dub thiab ntsuab ci nplas li ntawv. Muaj ib hom nws tsis kheej li 2 yam kuv tham tag ntawm no nws zoo nkaus li tej pob zeb dog dig xwb tsuas yog dub dub thiab ci ci xwb yam ntawm no mas nws noo cuag ntub dej tag li hos txias txias txawm koj yuav nyob rau qhov tshav kub heev los nws yeej txias zias li ntawv tag li xwb nws tsis kub. Muaj ib yam nws yog xim silver kheej kheej zoo li lub lwg dej tuaj taub ntiv tes. Ib hom nws daj liab tseb zoo nkaus li cov hlau xeb xeb tab sis nws kheej kheej du lug. Muaj ib hom nws daj lem lis li cov ntaub maj kheej kheej du du. Dhau li cov Lev Laim ntawm no lawm nws tseem tshuav tej nyuag pov khoos xws li pov nab, pov kab liaj tshooj, pov roob ris thiab cov pov uas nyob rau tej xyoob tej ntoo nws zoo nkaus li lub pob zeb thiab xwb tab sis kheej kheej tawv tawv tsoo tsis tawg. Tej pov haum ntawm no nws puav leej zoo li Lev Laim thiab xwb xws li yog thiv thaiv mus rau sab ntawv hos tej lub nws ho zoo ua rau tus tswv muaj nyiaj muaj txiaj khwv yam dab tsi los tau yam ntawv. Ib hom mas yog taub hau nab yog koj mus pom nab sib nqos yog tias tus me nws nqos tus loj es yog nqos tog ko tw tuaj thaum nws nqos los txog ntua ntawm lub taub hau ob lub taub hau sib txig zos thaum ntawv koj xuas riam txiav kiag ob tug nab ntawv ob lub taub hau kom tu koj coj los qha kom qhuav coj mus twv txiaj twv phaib twv dab tsi los xij peem tsis muaj leej twg twv yeej koj li tsawg teg los koj noj tsawg tseg los koj noj tag li xwb yog tias koj muab lub taub hau tig tuaj ntawm koj. |
Nplooj-2
Tshaj li ntawv lawm nws tshuav kaus npua teb foob qab cov kaus npua teb foob qab ntawm no nws zoo ib yam li Lev Laim phom tua tsis nrov los sis nrov tab sis tsis raug. Kaus Npua teb foob qab ntawm no mas nws muaj ib qhov caiv hmub twg yog hnub tus npua ntawv tuag ces hnub ntawv yog hnub caiv koj coj nrog koj ces nws tsis khoos lawm. Kaus npua teb foob qab cov zoo tshaj txhob yog cov uas koj tua tau tus npua es muab ntawm tus npua los tiam sis nws yuav tsum yog cov uas thaum tus npua mus yog noj es nws ncaws kaus rau tej cav llos sis tej pob ntoos nws tus kaus hle ntsia rau ntawv koj mus pom koj khaws los hom ntawm no zoo dua tsis tag caiv los tau.Tshaj li npua teb tus kaus foob qab lawm cov twm npua thaum nws mus lob nyom noj nyom thaum nws lob tau ib co nyom rau hauv nws lub qhov ncauj nws muab cov nyom ntawv hiab los yog muab ntxias ua ib lub kheej kheej zoo li kauj tog npab los is zoo li lub ball tab sis to qhov hauv nruab nrab yog tias thaum nws muab lub ntawv npuav kiag los yog kwv kiag ntawm nws qhov ncauj lawm tseev koj xuas phom tuaj li nawb yeej tua tsis raug nws li thaum lub ntawv plam ntawm tus npua qhov ncauj poob koj mus khaws tau los nws khoos heev koj coj los ua pov khoos phom tua tsis raug li ntag. Tshaj li cov kaus npua foob ntawm no lawm nws tshuav Xob Taus los sis Taus Xob. Cov xob taus ntawm no yog thaum xob tua ntoo los sis tua tej yam dab tsi yog koj hmoov txog koj mus pom tej qho kub nyhiab zoo nkaus rab taus(Ax) ntag me me luaj nkaus ntiv tes ntev li 2 ya los sis 3 yag ntiv tes ntawv xwb qhov ntawv nws yog xob taus ntag khaws los cia nws zoo tiv thaiv. Xob taus no mas nws muaj 2 yam xws li xob taus pob zeb thiab xob taus tooj rab xob taus tooj nws zoo tshaj li rab xob taus pob zeb. Xob taus kuv tsis tau hnov tej laus tham tias ua li xyov nws puas yuav zoo khoos li cov pov haum kuv tham los saum toj no tab sis xob taus no nws zoo 2 yam xws li yog tsev kub nyhiab thiab dej nyab. Yog thaum twg muaj kub nyhiab ib tog tuaj kub tuaj ze koj tsev thaum ntawv koj muab rab xob taus tso rau hauv 1 ntim dej muab txawb cia xwb tom tej nram tej luag tsev kub nyhiab tag tshuav kiag koj lub tsev hluav taws tsis kub. Dej nyab los zoo tib yam koj muab tso rau 1 lub ntim muab txawb cia xwb txhia chaw dej nyab tag tshuav kiag koj lub tsev dej muaj peev xwm tsis nyab li ntag. Ho tham txog kuv tus tij laug ntawv nws lub Lev Laim thaum tuaj txog rau Vib Nais ntawv ces muaj ib yawg Thaib yog Xaum Caus tus Xaum Caus ntawm no mas nws yog ib tug nom tswv tiam sis tsis yog nom tswv qib siab dab tsi nws tsuas yog ib tug nom tswv nyob rau hauv lub Xeev Loei (Loei Province Thailand) nws tuaj mus nrhiav yuav cov Lev Laim ntawm no nws tuaj mus nrog ib yawg Hmoob tham nug tias yawg Hmoob ntawv puas paub leej twg muaj cov Lev Laim ntawm no xav muag no ces Xaum Caus yuav ntag. Thaum no ces yawg Hmoob ntawv los paub kuv tus tij laug ntawm no zoo nws paub tias kuv tus tij laug muaj ib qhov Lev Laim tiag thiab. Xaum Caus thiaj li hu kuv tij laug tuaj txog nqa nws qhov khoom tuaj rau Xaum Caus saib tag Xaum Caus nyiam heev thiaj li kheev nqi ua 50,000 nyiaj Thaib. Tiam sis ua ntej li thaum Xaum Caus yuav them 50,000 Npaj ntawv rau kuv tus tij laug no mas Xaum Caus xav coj mus sim ua ntej tso seb puas khoos li hais ntawv tiag es phom tua tsis raug. Xaum Caus muab teem ua 1 week tom ntej nws rov mus tsev nws mus nqa nyiaj thiab tuaj muab sim tag txaus siab lawm tiag mam li yuav. Txog rau hnub Xaum Caus rov qab tuaj ces Xaum Caus txawm mus hais Huam Nab Npaus Kaus (Thai Refugee Camp Commander) vim tias Huam Nab Npaus Kaus thiab Xaum Caus nkawv no mas yog yawm yij thiab dab laug xwb Xaum Caus yuav kiag Huam Nab Npaus Kaus tus muam. Thaum no ces Huam Nab Npaus Kaus thiaj li tso tau 2 tug Aus Xaum (Thai Army Volunteer Personnel) nqa tau 1 rab phom M16 nrog Xaum Caus tuaj thiab ntag. Thaum no ces Xaum Caus thiab 2 tug Aus Xaum ntawv thiab kuv tij laug thiab peb sawv daws nqa qhov khoom ntawv coj mus sim tua pem kwj ha. Thaum mus txog rau pem kwj ha lawm thiaj li muab qhov khoom ntawv cuab rau saum ib lub pob ntoos siab zog hauv caug me ntsis thaum ntawv ces Xaum Caus kom tus Aus Xaum xuas rab M16 tua lub pob ntoos ntawv ntag. Tus Aus Xaum ntawv nws thiaj li tua tag 10 phom txhua teg nws tua puav leej nrov huv si tsis muaj ib teg uas phom yuav tsis nrov li. Nws sawv deb li 7-8 daj ntawv tua lub hauv paus ntoo xwb thaum nws tua tag 10 lub mos txwv sawv daws thiaj li mam li mus saib lub hauv paus ntoo. Cuag li yuav hais dag tab sis qhov no yeej muaj tseeb tiag tiag li ntag lub hauv paus ntoo ntawv muaj peev xwm zoo li qub li ntag tsis pom mos txwv raug qhov twg 1 phom los sis pom ib lub qhov mos txwv raug lub hauv paus ntawv ntawv li ntag. Tiam sis Xaum Caus kuj xav kom tus Aus Xaum ntawv rov tua ntxiv txav mus kom ze zog lub hauv paus ntoo rov tua dua teg puav ntxiv tus Aus Xaum teb tias nws rab M16 tsuas muaj 10 lub mos txwv xwb twb muab tua tag lawm nws tsis tshuav mos txwv qhov twg tua ntxiv lawm. Thaum no sawv daws thiaj li mam los yos cov plav tooj uas nws tua thiaj li los yog tau 4 lub plav tooj xwb vim ib txhia dhia mus deb lawm yos tsis tau. Thaum sawv daws pom cov plav tooj ntawv nws yog ib qho uas txawv kawg nkaus lub keb uas nyob ntawm lub plav tooj ntawv nws tawg lawm tiam sis lub hau mos txwv nws tseem ntsia nws zoo zoo li qub rau ntawm lub plav tooj......kuv tham li no tej zaum muaj ib txhia yuav tsis ntseeg thiab tsis txaus ntseeg li tab sis yeej muaj tseeb li ntawv tiag tiag. Los txog nram tsev Xaum Caus tsis hais dab tsi ntau li cia li cob hlo 50,000 nyiaj tam sim ntawv rau kuv tij laug tes nws nqa qhov khoom lawm. Vim tias thaum tseem nyob Vib Nais ntawv txom nyem nyiaj thiab...50,000 yeej ntau kawg nkaus li lawm. Raws li kuv xav xwb mas qhov ntawm no tej zaum yuav yog lub Phab Lev laim ntawv muab cov tshuaj phom noj tag lawm los sis nws ua kom cov tshuaj phom tsuag tag lawm thaum tua nrov lub keb tawg tuaj nws tsis txais hluav taws hlawv tsis tau cov tshuaj phom ntawv kom kub ces ntsawj tsis tau lub mos txwv kom ya mus lub mos txwv thiaj li tseem nyob zoo zoo ntawm lub plav tooj. Los yog nej xav ne ho yog li cas. |
Koj xav li cas rau Hmoob Tej khoom Pov Haum Sau rau nram qab no . Ua tsaug. Nias nov mus nplooj Dab neeg
Widget is loading comments...