Wb sib ntsib nyob rau lub tsiab peb caug xyoo 1988 nyob rau Yeej Tawg Rog Zos Vib Nais. Tom qab wb pov pob ib hnub yuav tsaus ntuj kuv thiaj li mam nug nws seb nws nyob qhov twg. Nws qhia kuv tias nws nyob Khej 2 sab npuab Khej 4. Kuv hais nws tias yog nws tsis tau muaj tus hlub tiag hmo no tsaus ntuj kuv tuaj saib nws tuaj nrog nws tham puas tau.
Nws kuj teb tias yog muaj siab tiag tuaj kom tau hmo no nws mam li nrog kuv tham yuav tham ib hmos los tau. Hmo ntawv kuv thiaj li tau mus nrog nws tham nyob rau tim nws tsev. Kuv tseem nco tau tias hmo ntawv yog ib hmo qaim hli kawg nkaus li kuv mus txog tim nws tsev zoo li twb muaj 2-3 tug hluas nraug tuaj nrog nws tham ua ntej lawm tiam sis thaum kuv mus txog nws kuj hais cov hluas nraug ntawv mus tsev tag tshuav wb ob leeg lawm xwb.Thaum ntawv kuv mam li hais hlub thiab nyiam nws rau nws ib leeg. Nws tus kheej nws kuv hais tias yuav thov hlub kuv ib leeg kom mus tag tiam no.
Ntuj teb ntsiag to neeg pw tsaug zog tag tshuav wb ob leeg nyob txias to nraum zoov. Wb zaum ntawm lawv lub txaj sab nraum zoov. Cua tuaj txias zias pom me hnub qub ntsais pluj pliaj kuv hnov nws lub suab ntxhi yau yau ntawm kuv pob ntseg"...kuv hlub koj". Wb sib hlub heev txawm nruab hnub los kuv yeej mus nrog nws nyob zaum xaws paj ntaub ua ke. Nws lo lus qab zib tseem nyob rau kuv siab tsis ploj kom tag tiam no. Wb sib hlub los tau muaj 7-8 lub hlis kuv hais rau kuv niam kuv txiv tias kuv yuav yuav poj niam kuv txiv tsis kam kuv yuav nws vim tias thaum ntawv lawv yuav kaw Xum Vib Nais tsis paub tias peb yuav mus qhov twg tseeb tiag yog peb tuaj rau Meskas tsam yuav tau nws ces tsis tau muaj hnub nyoog ho poob npe. Nws tus kheej nws taij kuv txhua hnub txhua hmo kom kuv yuav nws tiam sis kuv tsis paub yuav teb li cas rau nws> Thaum kawg thiaj li tau tso nws cia.
Txog hnub peb yuav tuaj mus rau Xum Phanatnikhom thaum cov buses tuaj txhij tag lawm kuv yuav mus lawm tiag tiag zoo li dua rhe nws ib nplooj siab lawm tiag nws quaj thiab kom kuv cog lus rau nws kuv thiaj li tau cog lus rau nws. Txog caij yuav sib ncaim lawm tiag tiag zaum no yuav tau tso ib me nplooj siab tseg rau Vib Nais lawm tiag. Lub bus khiav yeev mus lawm tiag nws quaj thiab tuav rawv kuv txhais tes thaum lub bus khiav ceev lawm nws raws tsis tau lawm nws thiaj li tso kuv txhais tes. Bus khiav yeev txog rau nraum kev ntsuab kuv tig saib lub Yeej Vib Nais ib zaug zaum kawg xav tsis txog tias yuav tau tso tus hlub tseg rau Vib Nais kua muag poob twj ywm tsis muaj leej twg pom tsis muaj leej twg paub. Hmoob Khej Lub Neej HLub Tu siab.