Ntaus Dab Tuag Tim Roob Nqeeb
Tus sau: Nplooj Pov Email: tsabntawvhlub@hotmail.com
Nplooj 12 Tug hluas ntaus xyw dab tuag tim roob nqeeb nyob zos Dej Ntsuab..tom qab no lawv kwv tus neeg tuag mus txog ntawm qhov chaw no ces tus tuag cia li poob nthav saum tus nees los rau qhov chaw nkawv ntaus tus xyw dab tuag no...txaus ntshai kawg nkaus.. li..
Nyob rau ntawm lub zos Dej Ntsuab uas tsis deb ntawm lub roob Phu Npiab sab hnub tuaj thaum xyoo 1972 muaj ob tug hluas nyob lub zos no tau tuaj mus tham hluas nkauj rau ntawm lub zos Naj Kheem uas tsis deb ntawm lawv zos kwv yees li yog mus kaw taw ces 1 teev los yog ib xuab moo xwb txog lawm. Hmo ntawv yog xiab 15 uas lub hli pom kev tseeb heev rau yav ib tag hmo. Thaum nkawv mus tham hluas nkauj los txog rau tim roob nqeeb uas yuav los rau ntawm lawv lub zos dej ntsuab ua cas nkawv hnov tib neeg mas qw ntsho tsuam nram tw roob tuaj xwb nkawv thiaj li nres saib no ua cas pom ib cov tib neeg kwv ib tug neeg tuag dawb paug saum tus nees nce toj nrav taug kev los rau pem roob no uas yog ntawm qhov nkawv nyob. Thaum zoo li no lawm nkawv thiaj li khiav nkaum kiag ntawm qaum kev uas cov hav nqeeb fab fab..ua cas los ze zuj zus no nkawv mloog cov lus uas hnov qw zom zaws no mas mloog tsis tau li kuj tsis yog hais lus li tib neeg hais thiab..nkawv ntshai heev yog li thiaj tau sib ntxhi tias los txog seb yog dab tsi no ces nkawv ob leeg tib tsaug muab pas nplawm kiag. Pom cov nqeeb mas faib hlo...faib hlo los ze nkawv heev ib pliag li ntawm ob feeb xwb ti nkaus nkawv lawm yog li nkawv thiaj tawm plaws muab nkawv ob tug pas tib tsaug ntaus uas nws cov neeg qw zom zaws thiab tus niag tuag saum tus nees cia li poob nthav rau hauv av hos ploj ntais tsis hnov dab tsi nrov li lawm. Ntuj teb ntsiag to ua rau nkawv ntshai heev thiaj tau sib tw khiav los txog ntua tsev, nyob rau tim zos kuj tsis muaj dab tsi li thiab. Tau tsis ntev kwv yees li 10 tawm hnub tom qab xwb txawm muaj ib tug yawm txiv laus hu ua npliaj riam no tuag kiag hauv lawv zos. Qhov txawv tshaj ntawm tus neeg tuag no mas yog tus tib neeg tuag no tsis lwj li tab sis thaum hnub muab tswm tshav tag thiab tua nyuj tuag tag ces tus tib neeg no cia li lwj kiag tam sim ntawv ob lub qhov muag tawm tag hos tus nplaig mas tawm ntev li ib dos rau sab nrauv cov kas mas nkag dawb vog rau tej ris tsho uas lawv kho rau nws hnav li. |
Nplooj 2 Txiv qeej txiv nruas muab ua kev cai tag nrho hnub qaij kiag xwb ces lawv kwv mus faus thaum mus txog ntawm qhov uas ob tug tub hluas ntaus cov dab ntawm roob nqeeb no ces tus tuag no cia li poob nthav saum tus nees los rau hauv av ..cov sawv hlua uas lawv muab khi zoj tus tuag no cia li tu tag nrho ces nws cov tub thiab kwv tij neej tsa mas qw zom zaws xwb tib neeg mas ntshai tiag tiag li ib co ces cia li khiav rov qab li lawm, thaum zoo li no lawm ces tus kav xwm thiaj hais tias kom suav daws cia li los sib pab kom txhob khiav no ces cov neeg mus faus tuag thiaj li rov qab los sib pab, lub sij hawm no tus maum phauj uas ntaus nyuj no thiaj hais rau cov tub tias tsis pub lawv kwv mus lawm nws poob qhov no ces kom cia li muab khawb qhov faus rau ntawm no xwb.
Yog li lawv thiaj tau khawb qhov muab nws faus rau ntawm qhov nws poob no uas yog qhov chaw ob tug tub hluas ntaus tus xyw dab tuag no. Tus tuag no mas zoo hnub zoo hmo tib neeg taug txoj kev no yeej hnov nws ntsaj quaj ntawm qab roob tuaj li leej twg ntaus nws mob mob..ua rau tib neeg tsis tau luag taug txoj kev no hmo ntuj li lawm hos cov neeg mus ua teb mas yeej sib yaum ua ke mus xwb thiaj tau luag. Nov yog ib zaug txawv kawg nkaus ntawm cov dab tuag thiab tus neeg tuag uas twb tshwm ua ntej lawm es tus neeg mam tuag. Kawg no thov ua tsaug rau www.3haivhmoob.com uas muab qhov chaw no rau kuv tau tuaj sau piav txog zaj keeb kwm ntaus dab xyw tuag no rau suav daws ua kev kawm. Mam ntsib nej dua lwm zaus, Ua tsaug ntau. Sau npe: Npliaj Pov. Nias Nov Mus Sau Koj Zaj Dab Neeg Dab Poj Ntxoog |
Ceeb Toom: Txwv tsis pub leej twg tuaj muab cov dab neeg kev hlub thiab dab neeg poj ntxoog hauv no mus tso rau koj lub vas sab - website- los yog lwm qhov uas ntej koj qhia peb paub yog tsis li ntawv peb pom lawm peb yuav tau hais koj. Ua tsuag uas suav daws koom tes es tuaj nyeem hauv no laug caij nyoog xwb.
Warning: No one may copy or save this love and ghost stories to post on other websites without our permission. Thank you for your cooperation.
www.3haivhmoob.com
Warning: No one may copy or save this love and ghost stories to post on other websites without our permission. Thank you for your cooperation.
www.3haivhmoob.com